Эрязденть арсезь (2010)/Аволь свал парось - паро

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Аволь свал парось — паро
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 154—155

[154]

Аволь свал парось — паро

ТОВ-МЕКЕВ, тов-мекев...

Колмоце ие — сёксня, тельня, тунда — якан вете вайгельпень ютко Дубинькань школав. Превть таштан. Зяро иеть весемезэ эрявить тень туртов? Пинге, кавто? Пештяви-арась зярдояк лавтовон лангсо кандтневиця утомнесь? Сёксень рудазт, тарькст, цятордыця якшамот, ловонь даволт, конатнень пачк мезеяк а неят... Молян, чиян, а ванан мезе лангскак. Превть пурнан. Оршамкатне некеть: «кухайка», мерьказь-човсезь шапка, пильгтнесэ — васень иестэнть карть, седе мейле — кевердезь кемть. Сюпалгадокшнынек. Книгатне лавтовонь трокс каязь кескавнесэть.

Вейксэце класс. Сисем иеть, кода општ мерсь ды мадсь чивалгомась — прядовсь «отечественноесь». Тевтне чиремсть паро ёнов. Ней мон покш, сюпав цёра. Якан армеецэнь паксянь юдма марто. Книгатне, тетрадтне, ручкатне-карандаштне эйзэнзэ путневить башка-башка.

Ушосонть лембе. Теке аволь якшамковгак. Перькан паксятнева [155] цитнить, а вановаткак, теленть мазычинзэ. Кись Дубинькав чаво, молицят а неявить. А капшан. Сокарян превсэнь. Эрзякс ёвтави: «Молян пангс». Аволь «пангонь кочкамо» — «пангс». Лисни, ней молян — превс! Эскелян, монсь мотордан Алексей Максимовичень «Буревестникензэ».

Ютыя Сёвонь латконть трокс сэденть. Кузинь Сарай пандопряс. «Буревесгникем» «чиевтеви» апак пупорькшне.

«Над седой равниной моря ветер тучи собирает.

Между тучами и морем гордо реет буревестник, чёрной молнии подобный...».

Кундынь Михалковс:

«Каких фамилий только нет —

Гаврилов, Сидоров, Петров...»

«Буревестникенть» Эмилия Владимировна тонавтыцянок, секень вант, карми кевкстнемензэ. Паро, мон уш содаса. «Фамилиятнеде» программасонок арась тешкстазь. Эсь олясон, монсь «моравтан» те баснянть. Содан, театрань институтс самсто литературадо-кельде башка учок кевкстема: «Ну-с, молодой человек, что нам прочитаете?». Сестэ зэрневтьсаяк «Фамилиятнеде».

Моткодезь-пижнезь, шкань-шкань кедьсэнь ахолезь, эзия редяяк, кода стясь икелень якстере кирьпецень, кавто этажсо, районсонть сехте сэрей кудось-школась.

 

*  *  *

Улиндеряй неень шкасто школась тонавтницянть эрямо тарканзо эйстэ кавто-колмо вайгельпень ютко, тетянзо-аванзо сеске шалнозевить: «Те кода истя?! Каня те тев?! Ялго... Ковгак а маштови! Улезэ машина, автобус, арась — вертолёт кадык анокстыть. Кода эно?! Эйкакштнень кельмевтьсынек... Ёмить, кельмить... Натой колмо вайгельпеть покольнентень онкстнема! Каня те а нарьгамо?! Сизи пакшась. Уроковгак а пачкоди».

Истя вана, аваст руця пес кундазь, трявить-кастовить неень ды сы шкань эрицятне. Каня сынст ули шкаст арсемс, эсест мельсэ тонавтнемс Михалковонь-кинь? Каня, теде башка, молемась-якамось аволь шумбрачи?

Вейкеде стувтнить тетятне-аватне: «Аволь свал парось — паро».