Эрязденть арсезь (2010)/Улевельтькак Иерэнь кондят...
| ←Аволь свал парось — паро | Эрязденть арсезь (2010) by , edited by Разгуляева Т. В. Улевельтькак Иерэнь кондят... |
Гайгсть морот, кайсететсть вайгельть...→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 156—161 |
[156]
| Улевельтькак Иерэнь кондят... |
Сыргинек Петровка вирев. Пенгс. Букасо. Сон латошка, сюронзо, конянзо келезэ — метра малава. Тюжала пона. Эсь прянзо, варштат лангозонзо, лови весемеде превеекс, кидеяк а пелицякс, виевекс. Те кодамо бука, а карминдеряй истямокс?!
Чипаесь анеявиксстэ, састо кевери аловпандт. Чокшнес, а мезть варштнемскак сырнень чаманть лангс, велявттано. Аштемковонть чинзэ аволь рудазов, тошначинь явшиця сундерьковонть — весемеде кувакат, ламо-мезе валдосто валдос кенерят тееме. Ансяк иля нузялдо.
Челькев кияванть буканок эскели букакс — апак капша, чатьмонезь. Аэрязкавттанояк. Моли ды паро. Митя лелям, ззналянок, патянь мирдезэ, ды мон, крандазсонть ёнсто озадо аштезь, калякатано кудонь, велень ды колхозонь тевтнеде. Митя содамонок кувать урендясь-служась Васоло Чилисема ёно. Ламо несь, ламо марясь, кирдсь, кода кармавтсть, илязо каяво Япониясь СССР-ть, морясто-моряс масторонть лангс. Сась васоло ёнкстнэстэ, урьвакстсь ды уш иешка эри велесэ. «Ардомстонок» ледстни, ёвтни тень тосонь, гимнастёркасо якамонь эрямодонзо. Кунсолан. Нерьгстнян келем монгак — кевкстнян мезе тень а чарькодеви.
Кизэнть мазый, вийс совамо шказо. Кинть кувалт куронь-куро якстердить, мизолдозь ваныть лангозонок чавкань прят; ожолдыть, теке пизёлонь умарнеть, сезялтикшенть панжовксонзо; типель-типель ливтнить велькскаст, пря трить, ашо сёлмине нимилявт. Мекс а ливтнемс?! Менелесь сэтьме, а лексияк, ванькс, Чамастонзо а неят пель панкскеяк. Кекшнесть, бешоконь, та-кува важдамонь а содыйтне. Оймсить. Вийть пурныть.
Вадяшить-палснть пилень вакссо аштиця Митя лелянь соланя-валаня валонзо. Ломанесь сон кортакшов. Вайгелезэ ванькс, верьга «ливтниця». Вечкевить кортамонь лувозо, Чилисема ёнксонь таркатнеде, тосонь койтнеде-илатнеде ёвтнеманзо.
Ускицянок а капши. Ялатеке колмо-ниле вайгельпетне кадовсть удалов — эзть редявояк. Совинек вирьс. Тесэ, чувттнэнь пиже латост ало, седе чопода, летьке ды, мезесь весемеде вечкеви, экше. Коштось тикшень. Лексеви шождасто. Муинек «верде» саезь конёвтнесэ тешкстазь керямо тарканть ды шкань апак таргсе кундынек тевентень.
[157] Сявордынек зярыя пекшеть. Цёк-цёк петнинек, пильсинек крандазонь кувалмосо ды кандтнинек кичирес. Кепсинек чочкотнень крандазс. Пурнавсь эйпаро улав. Митя лелям онкстызе вановтсонзо покшолманзо ды пшкадсь монень:
— Ну кода? Саевить? — гайгезевсь аламнеде цийниця вайгелезэ.
— Кортамскак а мезть, — апак кавтолдо ёвтыя мелем. — Оно конянзо зярошка келезэ.
Букась, видеяк, шождынестэ, виень апак путо сыргавтызе улавонть. «Мезе те сонензэ...» — меринь эськан.
Вирьстэ лисезь кись тусь аламнеде аловпандт. Сюракшовонок апак лоткавтне, ливчанясто, теке псакат, кузинек вачказь чочктнень лангс. Буканок уски прок трактор. Ансяк а урны.
Одтано. Ёжонок налксезь налкси. А маряви «вирень» сиземаськак. Прок эзинек ливезькалеяк. Вал мельга вал, ды апак редя кортазевинек моротнеде: армиянь, олячинь, тундонь, сёксень, вечкемань... Эрьке эйстэст, каня весе лововить.
— Армиясо монь сехте вечкевикс мором ульнесь «Легендарнаясь». Эхи, морсинек сонзэ! Кода зэрневтьсынек, кода зэрневтьсынек — вайгеленек Китаень чиренть тона ёнояк марявить! — ледстнемадонть кенярдозь, капшазь ёвтни Митя лелям. Апак учо верьга вайгельть серьгедизе «вечкевиксэнзэ»:
Над тобою шумят, как знамёна, |
Вайгелезэ морыцянть човине — «васенце», сон ливтнезь ливтни мадеме пурныця паксятнень, кинть чирева тия-тува вастневиця калькуракштнень велькска. «Лаксицянтень» мезекскак а маряви саемс весемеде верце нотанть. Мороютконть серьгедемстэ монгак нолдтнян од атякшонь вайгелем. Улавонок тёкшкесэ озадо аштезь, жойсэ моратано. Кунсолодо, товзюронь-розень паксят, кунсолодо чиреванк нувсиця балягат, кунсолодо, Петровкань рузонь тейтерть. Меленек паро, тевенек а ашти, буканок уски — а паркстнияк.
| [158] | Наш паровоз вперёд летит, |
морась седеем.
Кода-бути пачкодинек, ледсь мелезэнек, умонь-умонь, илязо уле «Волочаевские дни» фильмастонть «По долинам и по взгорьям» морось. Стройсэ яксицятнень мельс, Митя лелянь валонзо коряс, пек эзь тукшно, оймеёжо эзь кепсе. Нусманячинь сув, келя, ланганзо каязь. Кадык! Минь жо аволь стройсэтяно. Мелень витезь «лаксинек» сонзэяк.
И на Тихом океане |
«Концертэнек» кунсолость аволь ансяк кавто ёнга сравтовозь келей паксятне ды балягатне-тикшетне, аволь ансяк вельксканок сравтовозь сэньксэсь, кунсолось покш васоньпеелькс стявтозь пилесэнзэ Иер буканокак.
«Иер... Мекс истя лемдизь? Мезде корты те валось?» — моронть прядозь апак учо содавтымим, валгсь превезэнь кевкстемась. Иер ды Иер... Минек велесэ те валось а марсеви. Пошань Аркайгак — уш оно кодамо «книгань пориця», оно кодамо содакай! — эзизе марсе. Мезде сон, алкукскак? Кие истя Иерэнь тешкстызе? Паряк, колхозонь прявтось? Сон тень кувалма кол, сон — лишмень ды букань попось. Лемдясы уш лемдясы! Пинге а стувтови.
Аловпандт кинь юткось прядовсь. Прядовсь «фестиваленекак». Уцор-уцор валгинек «сценастонок». Эно кода, Иернэнь яла седе шождыне ули.
Улавонть вакссо ялго молезь ютынек Ашо лейненть трокс каязь чувтонь сэдненть, удалов кадовсь Петровка веленть пезэяк. Ушодовсь вандора пандочамась. Видьстэ меремс, кодамо пандо — верев молиця кинь пелькс. Ансяк. Теке басом, таргави те «песь» вайгельпешка. Мольтяно улавонть вакссо вейкенек-вейкенек туртов чуросто валонь кайсезь. Пиксэнь ведьметне Митя лелянь кедьсэть: сон ветицясь, сон покшось.
Аламонь-аламонь ютавсь «кузиця кинть» пелезэ.
Апак учо Иер кувакасто лекстясь ды тоцк лоткась. Оймсеме? Венелев молемазо сась? Учотано — арась, учотано — арась. А те, а — тона. А арсияк. «Мезе-бути лия, аволь венелькс», — ютась пряван нусманя мель.
— Но-о-о, Иер, но-о-о, — чевтестэ, пеедькшнезь ладсо мерсь [159] ветицясь ды весть-кавксть ноцковтынзе ведьметнень.
Букась марикскак эзь тее. Прок лемензэяк стувтызе. Аламос аштезь таго — «но-о-о»! Каршонзо теке — а сырк, а сорк.
— Вантака, теке арастянокак, — лангозон варштазь, пеняцязь пшкадсь Митя лелям. — Но! Но! — эзь кирдеве, ацирьгадозь серьгедсь «прявтом» ведьметнесэ каряз ланга акунсолыцянть варсодемстэ.
Лезэвтеме. Чалгавксонзояк эзизе полавто. Аштесь таркасонзо, мерят пильгензэ каназкадсть, мерят кевензась. Аштесь, теке статуя.
— Варчик тень, — венстинь кинть чиресэ эрьбань куракшстонть синдезь суронь эчксэ илёв.
— Эрьга, — маринь эль марямга каршо; Митя саизе кедьстэнь «кармавтоманть» ды аволь пек виевстэ, ёжомарязь, зярыяксть аваждызе ракшанть пильге ланга ды лия таркава. Тато теке — эзь киртято ве санозояк. «Каня овсе а марят Сэредькс?» — токимим седейризкс пайстомо буканть лангс ванозь. Арась, эзь маря. Монь эзь маря, монь мелявксом.
Ютынь икелензэ. Юкстия ажия пес сюлмазь панст ведьменть ды таргия чирькентень пезнавтозь чобластонть. Вадяшия ускицянок пондакш келей конянзо ды, дёлязь, кольневтезь «нонть» ёвтнезь, карминь ведьмесэнть ноцкаеме, тердеме-ускомо икелев. Эзимим чарькоде. Эзь варштаяк лангозон. Прок кулось. Стядо.
Ней мезе теемс?
Ушодынек «вельмевтемензэ» кавто ёндо: мон ноцкаян панстведьмесэнть, Митя лелям «каванякшны» Иерэнь удалдо — ведьметнесэ ды илёвсонть. Истяяк — истяяк. Стяконь мелявкст! Чавт куш куломазонзо. Аволь путомс вий, нежедемс, ноцковтомс — сыркак а теи.
Чарынек «тракторонок» перька час малава. Аволь ансяк «кайсинек» тензэ — кортынек-энялдынек, тердинек мельганок, андыя кши кочомонокак. Ялатеке тевенек эзь лисе. Аштесь Иер ажиятнень ютксо — теке кежть пандсь.
Мезе теемс? Кода улемс?
— Сави шождалгавтомс, — арсезевезь ды стакасто лекстязь ёвтызе мелензэ Митя лелям, ёртынзе ведьметнень буканть каряз лангс, — лиякс, ванан, мезеяк а лиси.
Чочктнеде верде алов бухаинек зярыя. Чамдынек пельулав. Кеминек: тень уш Иер изнясы. Мезе те сонензэ?
[160] Саинь лангстонзо ведьметнень.
— Но-о-о, Иер, но-о-о, нузяй! — ведьметнесэ лакштяезь кармавтынь Иерэнь.
Бабань пеште! Майсевтицянок текень содась: а сырк, а сорк. Аштесь, мерят почо видьга ваясь модантень.
— Сави одс, таго зярыя валгстомс, — меринь кежтнень кирдезь, ёжонь каладозь ды таго ёртынь-каинь ведьметнень буканть каряз лангс.
— Сестэ уш чаво крандаз кадови. Сон мезе, ормазкадсь? — машнетезь серьгедсь Митя лелям ды вырк кузсь крандазс. Мон мельганзо.
Беньк-бенькс ёртынек зярыя чочкт. Кадынек нилешка, седе эчктнеде. «Ней уш...» — арсесь эрьвась эйстэнек.
Виде, сюракшовонок, прок лангсонок пейдезь — изнинь! — тарск тейсь, ды улавось чи-и-корк, чи-и-корк сыргась таркастонзо, буканок састо эскелязь поладызе веревпандт кинзэ.
Ну итевть...
Вана пандотёкшоськак.
«Мезе, нилешкатнень марто седе тов, кудов? Лиятнень кадсынек? Эли кандтнемат сявдикс лангсо? Васоло. Пельвайгельпешка. Вельть уш псить кармить пенгтне. Теяк: кандомо туемстэнек буканок а туи-сези кудов?» — кашкасть прясон кевкстнематне.
— Туи-арась, карматано кандтнеме, — теке маринзе арсеман, путсь пе кавтолдоматненень эзналям, ды сыргинек мерезенть топавтомо.
Састь сундерькст. Тия-тува цивторк-цивторк вельместь оланя тештинеть. Маряви, цитнить-кончтнить ды паронь арсезь тошкить тенек: «Капшадо, цёрат, капшадо! Кизэнь весь аволь раужо сёксень. Пачколеде кудов куш ашолгадомадо икеле». Псилгадынек. Чинь псинть матрамозо дух а маряви. Косто марявомс, оно зяро вийть путынек.
Кепединек, пес кундазь, кандонть, путынек лавтов лангс, ды сеедьстэ-стакасто лексезь, лунтик-пентик икелев — пандыненть тёкшкес, косо учи, кемтяно, буканок. Учимизь, превакш! Паро. Мезе, одс? Эно ков молят?
Зяро «рейст» теинек, эзинек лово. Корты эйстэст лангсон майкась — лоподсь сурень пес, хоть пурдык. Кецневтсь лиясь. Васня машнетинек, рангомас пачколинек, мекс ракшанок кевензась, таркастонзо а сыргави, ней мекевланг, кецнинек аштемазонзо.
[161] Окойники, носкозь-пувсезь, пачтинек меельце кандонть. Модас апак нолдтне кепединек ды кода эряви аравтынек улавонтень.
«Илязо таго ордадо...» — токимим ведьметнень саемстэ наволо кельме мель. Сюк Инешкинтень, истя эзь лисе, маримизь. Иер нежедсь пилысэнзэ модантень, венстизе, ускозь, сивексстэнть прянзо, ды крандазось чикор-чикор сыргась таркастонзо.
«Ва-ай!» — лекстинек шождасто. Прась, марявсь, лангстонок а онкставиця сталмо.
Шкась моли. Вана Иерэнь эскельксэнзэ седе келейгадсть, тусь седе эрязасто. Паряк, кудозо ледсь мелезэнзэ? Пекезэ вачсь? Минь мельга-мельцек дубор-габор кузинек чочктнень лангс.
«И на Тихомокеане Свой закончили поход...» — кенярксстонть, сиземанть лангс апак вано, верьга вайгельть серьгедсь Митя лелям — колызе моросонзо вень удыця каштмолеманть.
...Ёгань ды Минеень кудосо веньперть палсь тол. Эзть удо. Учость цёраст, вирев пенгс туицяст: сыненст мурдамаль-самаль чинзэ валгома шкасто. Эзть са. Мадсь чипаесь. Сундерьгадсь. Эзть са. Сась ве, кармась ашолгадомо. Цёратне яла арасельть, арасельть...
* * *
«Иердема» ды эйстэнзэ лисиця «иердамс» валтнэде карминь содамо допрок шержейгадома, чувто пряс сормсевезь умарекс теевема шкастон. Секс, чарькодеви, а содылинь Иер буканть лемдензэяк. Валкстнэва азгондемстэ-шатамсто эртевинь эйзэнзэ ды эль эзинь кирнявто, теке пакша, кецямодонть: «иердемс» — теемс мезеяк киньгак апак кунсоло, мезе лангскак апак вано, эсеть ладсо-мельсэ. Рузокс — «упрямство», «упрямиться». Теде соды эрьва-эрьва пакшась. Те рузокс. Эрзякс вана... Секскак ёнкставинь мельденть: кодамо сюпаволь эрзянь келесь валсо-гайтьсэ!
Виде. Валонть зэмензэ а содылия. Сень кис ламоксть савкшнось автобуссо-косо, мик кудосояк, марсемс, седе сеедьстэ рузтнэнь кургсто: «мордовское упрямство», «упрямый, как мордвин». Койсэнь, те малавгак а виде. Васняяк, кие те «мордвинэсь»? Эрзятне? А кемеви. Омбоце мель: улевельтькак икеле, умок-умок эриця эрзятне, покштянок покштяст Иер буканть кондямо исрат-иердицят, Модадост, Чачома Мастордост авольть пота, келест ды кортамост-морост лия раськенень аволизь максо, аволизь тонго пряст ят ёнксонь ашконтень.