Трїѡ́дїонъ/Недѣ́лѧ блꙋ́днагѡ сы́на
| ←Недѣ́лѧ мытарѧ̀ и҆ фарїсе́а | Трїѡ́дїонъ, сі́есть трипѣ́снецъ съ бг҃омъ ст҃ы́мъ, ѡ҆бдержа́й подоба́ющее є҆мꙋ̀ послѣ́дованїе Недѣ́лѧ, въ ню́же чте́тсѧ сщ҃е́нное и҆ ст҃о́е є҆ѵⷢ҇лїе, при́тчи блꙋ́днагѡ сы́на |
Сꙋббѡ́та мѧсопꙋ́стнаѧ→ |
сщ҃е́нное и҆ ст҃о́е є҆ѵⷢ҇лїе, при́тчи блꙋ́днагѡ сы́на. Въ сꙋббѡ́тꙋ ве́чера на бдѣ́нїи, по ѻ҆бы́чномъ стїхосло́вїи, на Гдⷭ҇и воззва́хъ, поста́вимъ стїхѡ́въ і҃, и҆ пое́мъ стїхи̑ры ѻ҆смогла́сника воскрⷭ҇ны г҃, и҆ а҆натѡ́лїевы г҃, и҆ трїѡ́ди д҃, повторѧ́юще сїѧ̑. Гла́съ а҃:
Въ безгрѣ́шнꙋю странꙋ̀ и҆ живо́тнꙋю ввѣ́рихсѧ, посѣ́ѧвъ грѣ́хъ, серпо́мъ пожа́въ кла́сы лѣ́ности, и҆ рꙋкоѧ́тїемъ свѧза́въ дѣѧ́нїй мои́хъ снопы̀, ꙗ҆̀же и҆ постла́хъ не на гꙋмнѣ̀ покаѧ́нїѧ: но молю́ тѧ превѣ́чнаго дѣ́лателѧ на́шего бг҃а, вѣ́тромъ твоегѡ̀ любобл҃гоꙋтро́бїѧ развѣ́й пле́вꙋ дѣ́лъ мои́хъ, и҆ пшени́цꙋ да́ждь дꙋшѝ мое́й ѡ҆ставле́нїе, въ нбⷭ҇нꙋю твою̀ затворѧ́ѧ мѧ̀ жи́тницꙋ, и҆ сп҃си́ мѧ.
Позна́имъ бра́тїе, та́инства си́лꙋ, ѿ грѣха́ бо ко ѻ҆ч҃ескомꙋ до́мꙋ восте́кшаго блꙋ́днаго сы́на пребл҃гі́й ѻ҆ц҃ъ пред̾ꙋстрѣ́тъ лобза́етъ, и҆ па́ки своеѧ̀ сла́вы позна́нїе да́рꙋетъ: и҆ та́инственное вы́шнимъ соверша́етъ весе́лїе, закала́ѧ тельца̀ ᲂу҆пита́ннаго, да мы̀ досто́йнѡ сожи́тельствꙋемъ, закла́вшемꙋ же чл҃вѣколю́бномꙋ ѻ҆ц҃ꙋ̀ и҆ сла́вномꙋ заколе́нїю, сп҃сꙋ дꙋ́шъ на́шихъ.
Сла́ва, гла́съ в҃: ѽ коли́кихъ бла̑гъ ѻ҆каѧ́нный себѐ лиши́хъ! ѽ какова̀ ца́рствїѧ ѿпадо́хъ стра́стный а҆́зъ! бога́тство и҆знꙋри́въ, є҆́же прїѧ́хъ за́повѣдь престꙋпи́хъ. ᲂу҆вы̀ мнѣ̀, стра́стнаѧ дꙋшѐ! ѻ҆гню̀ вѣ́чномꙋ про́чее ѡ҆сꙋ́дишисѧ. тѣ́мже пре́жде конца̀ возопі́й хрⷭ҇тꙋ̀ бг҃ꙋ ꙗ҆́кѡ блꙋ́днаго прїими́ мѧ сы́на, бж҃е, и҆ поми́лꙋй мѧ̀.
И҆ ны́нѣ: бг҃оро́диченъ а҃-й, гла́са.
Вхо́дъ. Свѣ́те ти́хїй: Прокі́менъ: Гдⷭ҇ь воцр҃и́сѧ:
Сла́ва, гла́съ д҃: Ꙗ҆́кѡ блꙋ́дный сы́нъ прїидо́хъ и҆ а҆́зъ ще́дре, житїѐ всѐ и҆жди́вый во ѿше́ствїи. расточи́хъ бога́тство, є҆́же да́лъ є҆сѝ мнѣ̀ ѻ҆́ч҃е: прїими́ мѧ ка́ющасѧ бж҃е, и҆ поми́лꙋй мѧ̀.
И҆ ны́нѣ: бг҃оро́диченъ тогѡ́жде гла́са: При́зри на молє́нїѧ твои́хъ ра̑бъ, всенепоро́чнаѧ, ᲂу҆толѧ́ющи лю̑таѧ на ны̀ воста̑нїѧ, всѧ́кїѧ ско́рби на́съ и҆змѣнѧ́ющи: тѧ́ бо є҆ди́нꙋ, тве́рдое и҆ и҆звѣ́стное ᲂу҆твержде́нїе и҆́мамы, и҆ твоѐ предста́тельство стѧжа́хомъ, да не постыди́мсѧ, влⷣчце, тѧ̀ призыва́ющїи, потщи́сѧ на ᲂу҆моле́нїе тебѣ̀ вѣ́рнѡ вопїю́щихъ: ра́дꙋйсѧ, влⷣчце, всѣ́хъ по́моще, ра́досте и҆ покро́ве, и҆ спасе́нїе дꙋ́шъ на́шихъ.
Сла́ва, самогла́сенъ, гла́съ ѕ҃: Ѻ҆ч҃ескагѡ да́ра расточи́въ бога́тство, съ безслове́сными скоты̀ пасо́хсѧ ѻ҆каѧ́нный, и҆ тѣ́хъ жела́ѧ пи́щи, гла́домъ та́ѧхъ не насыща́ѧсѧ, но возврати́всѧ къ бл҃гоꙋтро́бномꙋ ѻ҆ц҃ꙋ̀, взыва́ю со слеза́ми: прїими́ мѧ ꙗ҆́кѡ нае́мника припа́дающа чл҃вѣколю́бїю твоемꙋ̀ и҆ сп҃си́ мѧ.
И҆ ны́нѣ, бг҃оро́диченъ: Творе́цъ и҆ и҆зба́витель мо́й пречⷭ҇таѧ, хрⷭ҇то́съ гдⷭ҇ь и҆з̾ твои́хъ ложе́снъ проше́дъ, въ мѧ̀ ѡ҆болкі́йсѧ, пе́рвыѧ клѧ́твы а҆да́ма свободѝ. тѣ́мже тѝ всечⷭ҇таѧ, ꙗ҆́кѡ бж҃їи мт҃ри же и҆ дв҃ѣ вои́стиннꙋ вопїе́мъ немо́лчнѡ: ра́дꙋйсѧ а҆́гг҃льски, ра́дꙋйсѧ влⷣчце, предста́тельство и҆ покро́ве, и҆ сп҃се́нїе дꙋ́шъ на́шихъ.
Ѿпꙋсти́тельный: Бцⷣе дв҃о: три́жды. И҆ про́чее послѣ́дованїе бдѣ́нїѧ, ꙗ҆́кѡ ѻ҆бы́чно.
На ᲂу҆́трени, на Бг҃ъ гдⷭ҇ь, тропа́рь ѻ҆смогла́сника воскрⷭ҇нъ, и҆ бг҃оро́диченъ, ѻ҆бы́чное стїхосло́вїе, и҆ полѷеле́й. Ѻ҆бы̑чныѧ два̀ ѱалма̑: припѣва́емъ же къ си̑мъ и҆ тре́тїй ѱало́мъ со а҆ллилꙋ́їею кра́сною, рл҃ѕ:
На рѣка́хъ вавѷлѡ́нскихъ, та́мѡ сѣдо́хомъ и҆ пла́кахомъ, внегда̀ помѧнꙋ́ти на́мъ сїѡ́на: А҆ллилꙋ́їа. На ве́рбїихъ посредѣ̀ є҆гѡ̀ ѡ҆бѣ́сихомъ ѻ҆рга́ны на́шѧ. А҆ллилꙋ́їа. Ꙗ҆́кѡ та́мѡ вопроси́ша ны̀ плѣ́ншїи на́съ ѡ҆ словесѣ́хъ пѣ́сней, и҆ ве́дшїи на́съ ѡ҆ пѣ́нїи: А҆ллилꙋ́їа. Воспо́йте на́мъ ѿ пѣ́сней сїѡ́нскихъ. А҆ллилꙋ́їа. Ка́кѡ воспое́мъ пѣ́снь гдⷭ҇ню на землѝ чꙋжде́й; А҆ллилꙋ́їа. А҆́ще забꙋ́дꙋ тебѐ, і҆ерⷭ҇ли́ме, забве́на бꙋ́ди десни́ца моѧ̀. А҆ллилꙋ́їа. Прильпнѝ ѧ҆зы́къ мо́й горта́ни моемꙋ̀, а҆́ще не помѧнꙋ̀ тебє̀, а҆́ще не предложꙋ̀ і҆ерⷭ҇ли́ма, ꙗ҆́кѡ въ нача́лѣ весе́лїѧ моегѡ̀. А҆ллилꙋ́їа. Помѧнѝ, гдⷭ҇и, сы́ны є҆дѡ̑мскїѧ въ де́нь і҆ерⷭ҇ли́мль глаго́лющыѧ: и҆стоща́йте, и҆стоща́йте до ѡ҆снова́нїй є҆гѡ̀. А҆ллилꙋ́їа. Дщѝ вавѷлѡ́нѧ ѡ҆каѧ́ннаѧ, бл҃же́нъ, и҆́же возда́стъ тебѣ̀ воздаѧ́нїе твоѐ, є҆́же воздала̀ є҆сѝ на́мъ: А҆ллилꙋ́їа. Бл҃же́нъ, и҆́же и҆́метъ и҆ разбїе́тъ младе́нцы твоѧ̑ ѡ҆ ка́мень. А҆ллилꙋ́їа.
Степє́нны, и҆ прокі́менъ гла́са. Всѧ́кое дыха́нїе: Є҆ѵⷢ҇лїе ᲂу҆́треннее. Воскрⷭ҇нїе хрⷭ҇то́во: ѱало́мъ н҃.
Та́же, сла́ва, гла́съ и҃: Покаѧ́нїѧ ѿве́рзи мѝ двє́ри жизнода́вче, ᲂу҆́тренюетъ бо дꙋ́хъ мо́й ко хра́мꙋ ст҃о́мꙋ твоемꙋ̀, хра́мъ носѧ́й тѣле́сный ве́сь ѡ҆скверне́нъ: но ꙗ҆́кѡ ще́дръ, ѡ҆чи́сти бл҃гоꙋтро́бною твое́ю млⷭ҇тїю.
И҆ ны́нѣ, бг҃оро́диченъ: На сп҃се́нїѧ стєзѝ наста́ви мѧ̀ бцⷣе, стꙋ́дными бо ѡ҆калѧ́хъ дꙋ́шꙋ грѣхмѝ, и҆ въ лѣ́ности всѐ житїѐ моѐ и҆жди́хъ: но твои́ми мл҃твами и҆зба́ви мѧ̀ ѿ всѧ́кїѧ нечистоты̀.
Та́же гла́съ ѕ҃: Поми́лꙋй мѧ̀ бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ, ѡ҆чи́сти беззако́нїе моѐ.
Мно́жєства содѣ́ѧнныхъ мно́ю лю́тыхъ, помышлѧ́ѧ ѻ҆каѧ́нный, трепе́щꙋ стра́шнагѡ днѐ сꙋ́днагѡ: но надѣ́ѧсѧ на млⷭ҇ть бл҃гоꙋтро́бїѧ твоегѡ̀, ꙗ҆́кѡ дв҃дъ вопїю́ ти: поми́лꙋй мѧ̀ бж҃е, по вели́цѣй твое́й млⷭ҇ти.
Канѡ́нъ воскре́сенъ, со і҆рмосо́мъ на д҃, и҆ крⷭ҇товоскре́сный на два̀, и҆ бцⷣы на два̀, и҆ трїѡ́ди на ѕ҃. Мине́и же послѣ́дованїе пое́мъ на повече́рїи, въ пѧто́къ ве́чера.
І҆рмо́съ: Мѡѷсе́йскꙋю пѣ́снь воспрїи́мши возопі́й дꙋшѐ: помо́щникъ и҆ покрови́тель бы́сть мнѣ̀ во сп҃се́нїе: се́й мо́й бг҃ъ, и҆ просла́влю є҆го̀.
І҆и҃се бж҃е, ка́ющасѧ прїимѝ ны́нѣ и҆ менѐ, ꙗ҆́кѡ блꙋ́днаго сы́на, всѐ житїѐ въ лѣ́ности жи́вша, и҆ тебѐ прогнѣ́вавша.
Є҆́же мѝ да́лъ є҆сѝ пре́жде, ѕлѣ̀ расточи́хъ бж҃е́ственное бога́тство, ᲂу҆дали́хсѧ ѿ тебѐ, блꙋ́днѡ жи́въ: бл҃гоꙋтро́бне ѻ҆́ч҃е, прїимѝ ᲂу҆́бѡ и҆ менѐ ѡ҆браща́ющасѧ.
Сла́ва: Ѡ҆б̾ѧ̑тїѧ ны́нѣ ѻ҆те́чєскаѧ просте́ръ, прїимѝ гдⷭ҇и и҆ менѐ, ꙗ҆́коже блꙋ́днаго, всеще́дре, ꙗ҆́кѡ да бл҃года́рнѡ просла́влю тѧ̀.
И҆ ны́нѣ, бг҃оро́диченъ: На мнѣ̀ бж҃е, всю̀ показа́въ бл҃госты́ню, пре́зри мои́хъ мно́жество согрѣше́нїй, ꙗ҆́кѡ бл҃годѣ́тель, бж҃е́ственными мт҃ре твоеѧ̀ мольба́ми.
Катава́сїи же пое́мъ і҆рмосы̀ канѡ́на. І҆рмо́съ: Мѡѷсе́йскꙋю пѣ́снь воспрїи́мши:
І҆рмо́съ: Непло́дствовашїй мо́й ᲂу҆́мъ, плодоно́сенъ бж҃е покажи́ ми, дѣ́лателю до́брыхъ, насади́телю бл҃ги́хъ, бл҃гоꙋтро́бїемъ твои́мъ.
Ве́сь внѣ̀ бы́въ себѐ, ᲂу҆мовре́днѡ прилѣпи́хсѧ страсте́й ѡ҆брѣта́телємъ: но прїими́ мѧ хрⷭ҇тѐ, ꙗ҆́коже блꙋ́днаго.
Блꙋ́днагѡ гла́сꙋ поревнова́въ, вопїю̀: согрѣши́хъ, ѻ҆́ч҃е, ꙗ҆́коже ѻ҆́наго ᲂу҆́бѡ, и҆ менѐ ѡ҆б̾имѝ ны́нѣ, и҆ не ѿри́ни менѐ.
Сла́ва: Ѡ҆б̾ѧ̑тїѧ твоѧ̑ просте́ръ хрⷭ҇тѐ, млⷭ҇тивнѡ прїими́ мѧ, ѿ страны̀ да́льныѧ грѣха̀ и҆ страсте́й ѡ҆браща́ющасѧ.
И҆ ны́нѣ, бг҃оро́диченъ: До́браѧ въ жена́хъ, ѡ҆богатѝ и҆ менѐ до́брыхъ ви́ды, грѣхѝ мно́гими ѡ҆бнища́вшаго чⷭ҇таѧ, ꙗ҆́кѡ да сла́влю тѧ̀.
І҆рмо́съ: Непло́дствовашїй мо́й ᲂу҆́мъ:
Подо́бенъ: Гро́бъ тво́й:
Ѡ҆б̾ѧ̑тїѧ ѻ҆́ч҃а ѿве́рсти мѝ потщи́сѧ, блꙋ́днѡ и҆жди́хъ моѐ житїѐ, на бога́тство неиждива́емое взира́ѧй щедро́тъ твои́хъ сп҃се, ны́нѣ ѡ҆бнища́вшее моѐ се́рдце не пре́зри. тебѣ́ бо гдⷭ҇и, во ᲂу҆миле́нїи зовꙋ̀: согрѣши́хъ, ѻ҆́ч҃е, на нб҃о и҆ пред̾ тобо́ю.
Безневѣ́стнаѧ чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й, и҆ лю́тыхъ ѡ҆бстоѧ́нїй, всѣ́хъ свободѝ, на тѧ̀ надє́жды ѻ҆трокови́це и҆мꙋ́щихъ, и҆ дꙋ́шы на́шѧ сп҃сѝ бж҃е́ственными мл҃твами твои́ми.
І҆рмо́съ: Є҆́же ѿ дв҃ы твоѐ ржⷭ҇тво̀ прⷪ҇ро́къ предзрѧ̀, возпроповѣ́даше вопїѧ̀: слꙋ́хъ тво́й ᲂу҆слы́шахъ и҆ ᲂу҆боѧ́хсѧ: ꙗ҆́кѡ ѿ ю҆́га, и҆ и҆з̾ горы̀ ст҃ы́ѧ, прїѡсѣне́нныѧ прише́лъ є҆сѝ хрⷭ҇тѐ.
Бога́тство благи́хъ, є҆́же да́лъ мѝ є҆сѝ нбⷭ҇ный ѻ҆́ч҃е, расточи́хъ ѕлѣ̀, стра̑ннымъ гра́жданѡмъ порабоще́нъ. тѣ́мже вопїю́ ти: согрѣши́хъ тѝ, прїими́ мѧ ꙗ҆́кѡ блꙋ́днаго дре́вле, просте́ръ ѡ҆б̾ѧ̑тїѧ мнѣ̀ твоѧ̑.
Всѧ́кой ѕло́бѣ порабо́тихсѧ, прини́кнꙋвъ ѻ҆каѧ́ннѡ страсте́й дѣ́лателємъ, и҆ себѐ внѣ̀ бы́хъ несмотре́нїемъ, ᲂу҆ще́дри мѧ̀ сп҃се, пренбⷭ҇ный ѻ҆́ч҃е, прибѣга́юща ко мнѡ́гимъ твои̑мъ щедро́тамъ.
Сла́ва: Всѧ́кагѡ стꙋда̀ и҆спо́лнихсѧ, не смѣ́ѧ воззрѣ́ти на высотꙋ̀ нбⷭ҇нꙋю: и҆́бо безслове́снѡ прини́кнꙋвъ грѣхꙋ̀, ны́нѣ же ѡ҆бра́щьсѧ вопїю̀ ᲂу҆миле́нїемъ: согрѣши́хъ тѝ, прїими́ мѧ всецр҃ю̀.
И҆ ны́нѣ, бг҃оро́диченъ: Человѣ́кѡмъ по́моще, ᲂу҆пова́нїе тве́рдое всѣ́мъ хрⷭ҇тїа́нѡмъ, прибѣ́жище чⷭ҇таѧ сп҃са́ємымъ: сп҃си́ мѧ дв҃о, мт҃рними твои́ми мольба́ми, и҆ бꙋ́дꙋщїѧ жи́зни сподо́би.
І҆рмо́съ: Є҆́же ѿ дв҃ы твоѐ ржⷭ҇тво̀:
І҆рмо́съ: Но́щи преше́дшей, прибли́жисѧ де́нь и҆ свѣ́тъ мі́рꙋ возсїѧ̀: сегѡ̀ ра́ди хва́лѧтъ тѧ̀ а҆́гг҃льстїи чи́ни, и҆ славосло́вѧтъ тѧ̀ всѧ̑ всѧ́чєскаѧ.
Порабо́тихсѧ гра́жданѡмъ стра̑ннымъ, и҆ въ странꙋ̀ тлетво́рнꙋю ѿидо́хъ, и҆ и҆спо́лнихсѧ стꙋда̀: ны́нѣ же ѡ҆браща́ѧсѧ зовꙋ́ ти ще́дре, согрѣши́хъ.
Ѻ҆ч҃єскаѧ твоѧ̑ бл҃гоꙋтрѡ́бїѧ ны́нѣ ѿве́рзи мѝ, ѿ ѕлы́хъ ѡ҆брати́вшꙋсѧ, нбⷭ҇ный ѻ҆́ч҃е, и҆ не ѿри́ни менѐ, и҆мѣ́ѧй премно́гꙋю млⷭ҇ть.
Сла́ва: Не смѣ́ю воззрѣ́ти горѣ̀ на высотꙋ̀, без̾ числа̀ хрⷭ҇тѐ прогнѣ́вавъ тѧ̀: но вѣ́дый твоѧ̑ щедрѡ́ты ми́лѡстивныѧ, взыва́ю: согрѣши́хъ тѝ, ѡ҆чи́сти, и҆ сп҃си́ мѧ.
И҆ ны́нѣ, бг҃оро́диченъ: Всест҃а́ѧ дв҃о бл҃года́тнаѧ, ѡ҆чище́нїе всѣ̑мъ ро́ждшаѧ, мои́хъ согрѣше́нїй тѧ́жкое бре́мѧ твои́ми мл҃твами ѡ҆блегчѝ.
І҆рмо́съ: Но́щи преше́дшей:
І҆рмо́съ: Во глꙋбинѣ̀ грѣхо́внѣй содержи́мь є҆́смь сп҃се, и҆ въ пꙋчи́нѣ жите́йстѣй ѡ҆бꙋрева́емь: но ꙗ҆́коже і҆ѡ́нꙋ ѿ ѕвѣ́рѧ, и҆ менѐ ѿ страсте́й возведѝ, и҆ сп҃си́ мѧ.
Глꙋбина̀ согрѣше́нїй содержи́тъ мѧ̀ при́снѡ, и҆ треволне́нїе грѣхѡ́въ погрꙋжа́етъ мѧ̀: ѡ҆корми́ мѧ ко приста́нищꙋ жи́зни, хрⷭ҇тѐ бж҃е, и҆ сп҃си́ мѧ цр҃ю̀ сла́вы.
Бога́тство ѻ҆ч҃еское расточи́хъ лю́тѣ, и҆ ѡ҆бнища́въ стꙋда̀ и҆спо́лнихсѧ, порабоще́нъ непло́дными помышле́ньми. тѣ́мже тѝ вопїю̀: чл҃вѣколю́бче ᲂу҆ще́дри, и҆ сп҃си́ мѧ.
Сла́ва: Гла́домъ и҆ста́ѧвша всѧ́кихъ бла̑гъ, и҆ ᲂу҆страни́вшасѧ ѿ тебѐ всебл҃гі́й, ᲂу҆ще́дри ѡ҆браща́ющасѧ мѧ̀ ны́нѣ: и҆ сп҃сѝ хрⷭ҇тѐ, пою́ща твоѐ чл҃вѣколю́бїе.
И҆ ны́нѣ, бг҃оро́диченъ: Сп҃са и҆ влⷣкꙋ ро́ждшаѧ хрⷭ҇та̀, сп҃се́нїѧ мѧ̀ ѻ҆трокови́це сподо́би, ѡ҆бнища́вша ѿ всѧ́кихъ бла̑гъ, дв҃о чⷭ҇таѧ, да пою̀ твоѧ̑ вели̑чїѧ.
І҆рмо́съ: Во глꙋбинѣ̀ грѣхо́внѣй:
Подо́бенъ: Дв҃а дне́сь:
Ѻ҆ч҃ескїѧ сла́вы твоеѧ̀ ᲂу҆дали́хсѧ безꙋ́мнѡ, въ ѕлы́хъ расточи́въ є҆́же мѝ пре́далъ є҆сѝ бога́тство. тѣ́мже тѝ блꙋ́днагѡ гла́съ приношꙋ̀: согрѣши́хъ пред̾ тобо́ю ѻ҆́ч҃е ще́дрый, прїими́ мѧ ка́ющасѧ, и҆ сотвори́ мѧ ꙗ҆́кѡ є҆ди́наго ѿ нає́мникъ твои́хъ.
І҆́косъ: Сп҃сꙋ на́шемꙋ на всѧ́къ де́нь ᲂу҆ча́щꙋ свои́мъ гла́сомъ, писа́нїѧ ᲂу҆слы́шимъ ѡ҆ блꙋ́дномъ, и҆ цѣломꙋ́дренномъ па́ки. и҆ сегѡ̀ вѣ́рою подража́емъ до́брое покаѧ́нїе, вѣ́дꙋщемꙋ та̑йнаѧ всѣ́хъ, смире́нїемъ се́рдца воззове́мъ согрѣши́хомъ тѝ ѻ҆́ч҃е ще́дрый, и҆ никогда́же досто́йни є҆смы̀ нарещи́сѧ ча̑да, ꙗ҆́коже пре́жде. но ꙗ҆́кѡ є҆стество́мъ сы́й чл҃вѣколюби́въ, ты̀ прїимѝ, и҆ сотвори́ мѧ ꙗ҆́кѡ є҆ди́наго ѿ нає́мникъ твои́хъ.
И҆ быва́етъ чте́нїе пре́жде сѷнаѯарѧ̀ въ мине́и: та́кже въ трїѡ́ди по чи́нꙋ.
Блꙋдни́къ а҆́ще кто̀ є҆́сть ꙗ҆́кѡ а҆́зъ, дерза́й, грѧдѝ: |
Въ сі́й де́нь блꙋ́днагѡ сы́на воззва́нїе пра́зднꙋемъ, є҆́же бж҃е́ственнїи ѻ҆тцы̀ на́ши второ́е въ трїѡ́ди ᲂу҆чини́ша, вины̀ ра́ди сицевы́ѧ. Поне́же бо сꙋ́ть нѣ́цыи мнѡ́гаѧ безмѣ̑стнаѧ въ себѣ̀ свѣ́дꙋще, блꙋ́днѣ же ѕѣлѡ̀ ѿ ю҆́нагѡ во́зраста живꙋ́ще, и҆ пїѧ́нствы, и҆ нечистота́ми ᲂу҆пражнѧ́ющесѧ, и҆ во глꙋбинꙋ̀ ѕлы́хъ си́це впа́дше, во ѿча́ѧнїе прихо́дѧтъ, є҆́же ᲂу҆́бѡ рожде́нїе є҆́сть го́рдости: и҆ ѿсю́дꙋ къ попече́нїю добродѣ́тели ника́коже приходи́ти хотѧ́тъ, и҆ ѕлы́хъ ᲂу҆́зы предлага́юще, тѣ́мже и҆ го́ршимъ ѕлы̑мъ при́снѡ впа́даютъ. Чл҃вѣколю́бнѡ и҆ ѻ҆те́чески ст҃і́и ѻ҆тцы̀, и҆ къ такѡвы́мъ человѣ́кѡмъ и҆мꙋ́ще, и҆ ѿвестѝ ѿ ѿча́ѧнїѧ хотѧ́ще таковꙋ́ю при́тчꙋ здѣ̀ по пе́рвѣй ᲂу҆чини́ша, ѿча́ѧнїѧ стра́сть и҆з̾ ко́рене востерза́юще, и҆ къ добродѣ́тели воспрїѧ́тїю возставлѧ́юще, и҆ чл҃вѣколю̑бнаѧ и҆ пребл҃га̑ѧ бж҃їѧ бл҃гоꙋтрѡ́бїѧ мно́жае согрѣши́вшымъ, блꙋ̑днымъ показꙋ́юще: ꙗ҆́кѡ ничто́же є҆́сть ѿ грѣхѡ́въ, є҆́же є҆гѡ̀ чл҃вѣколю́бный ра́зꙋмъ побѣди́тъ, ѿ сеѧ̀ при́тчи хрⷭ҇то́вы сїѐ представлѧ́юще. Два̀ ᲂу҆́бѡ сы́на сꙋ́ть человѣ́ка, си́рѣчь, бг҃очеловѣ́ка сло́ва, првⷣнїи и҆ грѣ́шнїи. Старѣ́йшїй ᲂу҆́бѡ є҆́сть, въ за́повѣдехъ бж҃їихъ, и҆ во бл҃го́мъ є҆го̀ при́снѡ пребыва́ѧй, и҆ никогда́же ѿ негѡ̀ ѿстꙋпа́ѧй. Ю҆́ный же, грѣ́хъ возлюби́вый, и҆ съ бг҃омъ сопребыва́нїѧ стꙋ́дными дѣ́лы ѿрекі́йсѧ, и҆ ѡ҆ не́мъ бж҃їе чл҃вѣколю́бїе и҆жди́въ, блꙋ́днѣ пожи́вый: ꙗ҆́кѡ є҆́же по ѡ҆́бразꙋ цѣ́лѡ не соблюда́ѧй, и҆ лꙋка́вомꙋ де́мѡнꙋ послѣ́дствовавый и҆ рабо́тавый сластьмѝ ѻ҆́нагѡ хотѣ́нїємъ, и҆ не возмо́гъ жела́нїе и҆спо́лнити. Несы́тнаѧ бо ве́щь грѣ́хъ, согрѣва́ющїй ѻ҆бы́чаемъ, ра́ди вре́меннагѡ наслажде́нїѧ: є҆го́же и҆ рожцє́мъ ᲂу҆подоблѧ́етъ, ꙗ҆́кѡ свинїѧ́мъ сꙋ́щаѧ пи́ща. Рожцы́ бо, пе́рвѣе ᲂу҆́бѡ сла́дко нѣ́что предлага́ютъ: послѣди́ же жестоко̀ нѣ́что, и҆ а҆́ки плє́вы быва́ютъ, ꙗ҆̀же весьма̀ стѧжа̀ и҆ грѣ́хъ. Є҆два̀ ᲂу҆́бѡ возбнꙋ́въ блꙋ́дный, ꙗ҆́кѡ гла́домъ добродѣ́тели погиба́ѧ прихо́дитъ ко ѻ҆ц҃ꙋ̀ глаго́лѧ: ѻ҆́ч҃е, согрѣши́хъ на нб҃о и҆ пред̾ тобо́ю, и҆ нѣ́смь досто́инъ нарещи́сѧ сы́нъ тво́й. То́й же прїе́млетъ сего̀ ка́ющасѧ, не поноша́ѧ, но раскрилѧ́ѧсѧ и҆ ѡ҆быма́ѧ, бж҃е́ствєнныѧ и҆ ѻ҆те́чєскїѧ ᲂу҆трѡ́бы показꙋ́етъ. И҆ дае́тъ є҆мꙋ̀ ѻ҆де́ждꙋ, си́рѣчь, ст҃о́е креще́нїе, и҆ печа́ть и҆ ѡ҆брꙋче́нїе, бл҃года́ть всест҃а́гѡ дх҃а. Къ си́мъ же и҆ сапогѝ, да не ктомꙋ̀ ѿ ѕмі́євъ и҆ скорпі́й ᲂу҆ѧзвѧ́тсѧ по бг҃ꙋ є҆гѡ̀ стѡпы̀: но наипа́че ѻ҆́нѣхъ главы̑ сокрꙋши́ти возмо́гꙋтъ. Пото́мъ же преѕѣ́льнѣйшею ра́достїю и҆ тельца̀ ᲂу҆пита́ннаго є҆гѡ̀ ра́ди закала́етъ, сн҃а своего̀ є҆диноро́днаго, ѻ҆ц҃ъ и҆ пло́ти є҆гѡ̀ дае́тъ причасти́тисѧ, и҆ кро́ви. И҆ а҆́ще чꙋдѧ́сѧ старѣ́йшїй сы́нъ пребезчи́сленномꙋ є҆гѡ̀ млⷭ҇рдїю, глаго́летъ, є҆ли́кѡ ᲂу҆́бѡ и҆ речѐ. Чл҃вѣколю́бецъ же, и҆ ѻ҆́наго молча́ти твори́тъ, вводѧ̀ ти́хими словесы̑, и҆ кро́ткими и҆ любе́зными: ты̀ всегда̀ со мно́ю є҆сѝ, глаго́лѧ, и҆ пора́доватисѧ подоба́ше, и҆ ѻ҆ц҃ꙋ̀ спи́рствовати, ꙗ҆́кѡ сы́нъ мо́й се́й ме́ртвъ бѧ́ше грѣхо́мъ пре́жде, и҆ ѡ҆живѐ, раска́ѧвсѧ ѡ҆ ни́хже дѣ́ѧше безслове́сныхъ: и҆ поги́бшїй, ꙗ҆́кѡ дале́че мѝ бы́въ ѻ҆бы́чаемъ сласте́й, и҆ ѡ҆брѣ́тесѧ мно́ю, милосе́рдїемъ свои́мъ пострада́вшимъ, и҆ ми́лостивнымъ нра́вомъ призва́вшимъ є҆го̀. Мо́жетъ же при́тча сїѧ̀ и҆ къ лю́демъ є҆врє́йскимъ, и҆ къ на́мъ взѧ́тисѧ. Сеѧ̀ ᲂу҆́бѡ ра́ди вины̀ и҆ при́тча сїѧ̀ здѣ̀ ѿ ст҃ы́хъ ѻ҆тє́цъ ᲂу҆чини́сѧ: востерза́ющи ᲂу҆́бѡ, ꙗ҆́коже рече́сѧ, ѿча́ѧнїе и҆ боѧ́знь, є҆́же дѡ́брымъ дѣлѡ́мъ каса́тисѧ: поꙋща́ющи же въ покаѧ́нїе и҆ раска́ѧнїе, и҆́же ꙗ҆́кѡ блꙋ́днаго согрѣши́вша: є҆́же ᲂу҆́бѡ и҆ ѻ҆рꙋ́жїе є҆́сть велича́йшее, во ѿгна́нїе сопроти́внагѡ стрѣ́лъ, и҆ поможе́нїе крѣ́пкое. Неизрече́ннымъ чл҃вѣколю́бїемъ твои́мъ хрⷭ҇тѐ бж҃е на́шъ поми́лꙋй на́съ, а҆ми́нь.
І҆рмо́съ: Херꙋві́мы подража́юще ѻ҆́троцы въ пещѝ ликовствова́хꙋ вопїю́ще: бл҃гослове́нъ є҆сѝ бж҃е, ꙗ҆́кѡ и҆́стиною и҆ сꙋдо́мъ наве́лъ є҆сѝ сїѧ̑ всѧ̑ грѣ̑хъ ра́ди на́шихъ, препѣ́тый, и҆ препросла́вленный во всѧ̑ вѣ́ки.
Сла́достемъ тѣлє́снымъ приклони́хсѧ всеѻкаѧ́ннѡ, и҆ порабо́тихсѧ весьма̀ стра̑стнымъ и҆з̾ѡбрѣ́тенїємъ, и҆ стра́ненъ бы́хъ ѿ тебѐ чл҃вѣколю́бче. ны́нѣ же зовꙋ̀ блꙋ́днагѡ гла́сомъ: согрѣши́хъ хрⷭ҇тѐ, не пре́зри менѐ, ꙗ҆́кѡ є҆ди́нъ млⷭ҇тивъ.
Взыва́ю, согрѣши́хъ, ника́коже воззрѣ́ти дерза́ѧ на высотꙋ̀ нбⷭ҇нꙋю всецр҃ю̀, ꙗ҆́кѡ въ безꙋ́мїи є҆ди́нъ тѧ̀ прогнѣ́вахъ, ѿве́ргсѧ твои́хъ повелѣ́нїй: тѣ́мже ꙗ҆́кѡ є҆ди́нъ бл҃гі́й, не ѿве́ржи менѐ ѿ твоегѡ̀ лица̀.
Сла́ва: А҆пⷭ҇лъ, гдⷭ҇и, и҆ прⷪ҇рѡ́къ, и҆ прпⷣбныхъ, и҆ чⷭ҇тны́хъ мꙋ́чєникъ, и҆ првⷣныхъ мольба́ми прости́ ми всѧ̑, ꙗ҆̀же согрѣши́хъ, прогнѣ́вавъ хрⷭ҇тѐ бла́гость твою̀: ꙗ҆́кѡ да пѣсносло́влю тѧ̀ во всѧ̑ вѣ́ки.
И҆ ны́нѣ, бг҃оро́диченъ: Херꙋві̑мъ ꙗ҆́вльшисѧ, и҆ серафі̑мъ бцⷣе, и҆ всѣ́хъ свѣтлѣ́йшаѧ нбⷭ҇ныхъ во́инствъ, съ си́ми ᲂу҆молѝ, є҆го́же воплоти́ла є҆сѝ бж҃е́ственное сло́во всенепоро́чнаѧ, безнача́льнагѡ ѻ҆ц҃а̀, ꙗ҆́кѡ да бла̑гъ вѣ́чнꙋющихъ всѝ сподо́бимсѧ.
І҆рмо́съ: Херꙋві́мы подража́юще:
І҆рмо́съ: Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀, проѡбрази́вшаго и҆ногда̀, по́йте, бл҃гослови́те и҆ превозноси́те во всѧ̑ вѣ́ки.
Сше́дый на зе́млю сп҃стѝ мі́ръ, во́льною нището́ю за млⷭ҇рдїе мно́гое, ѡ҆бнища́вшаго мѧ̀ ны́нѣ ѿ всѧ́кагѡ бл҃годѣѧ́нїѧ, ꙗ҆́кѡ млⷭ҇тивый, сп҃сѝ.
Ѿ твои́хъ за́повѣдей ᲂу҆дали́всѧ, порабо́тихсѧ всеѻкаѧ́ннѡ лестцꙋ̀: ѡ҆браща́ющагосѧ же ны́нѣ, ꙗ҆́кѡ блꙋ́днаго дре́вле припа́дающа тебѣ̀, прїимѝ пренбⷭ҇ный ѻ҆́ч҃е.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Тлетво́рными помышле́ньми ѡ҆б̾е́мсѧ ѡ҆мрачи́хсѧ, и҆ ѿ тебѐ ᲂу҆дали́хсѧ, ве́сь внѣ̀ себѐ бы́въ ще́дре. тѣ́мже въ покаѧ́нїи припа́дающа тебѣ̀ сп҃сѝ.
И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Бг҃оро́диченъ: Бг҃ороди́тельнице чⷭ҇таѧ, низве́рженныхъ и҆справле́нїе є҆ди́на, и҆спра́ви и҆ менѐ всѧ́кими грѣха́ми сокрꙋше́ннаго всего̀ и҆ смире́ннаго.
І҆рмо́съ: Въ кꙋпинѣ̀ мѡѷсе́ю:
І҆рмо́съ: Ѿ земноро́дныхъ кто̀ слы́ша таково́е; и҆лѝ кто̀ ви́дѣ когда̀, ꙗ҆́кѡ дв҃а ѡ҆брѣ́тесѧ во чре́вѣ и҆мꙋ́щаѧ, и҆ безболѣ́зненнѡ младе́нца поро́ждшаѧ; таково́е твоѐ чꙋ́до, и҆ тѧ̀ чⷭ҇таѧ бцⷣе велича́емъ.
Ви́ждь хрⷭ҇тѐ печа́ль се́рдца, ви́ждь моѐ ѡ҆браще́нїе, ви́ждь сле́зы сп҃се, и҆ не пре́зри менѐ: но ѡ҆б̾имѝ па́ки бл҃гоꙋтро́бїѧ ра́ди, мно́жествꙋ сп҃са́емыхъ пречⷭ҇таѧ, ꙗ҆́кѡ да пою̀ бл҃года́рнѡ млⷭ҇ти твоѧ̑.
Ꙗ҆́кѡ разбо́йникъ вопїю̀: помѧни́ мѧ, ꙗ҆́кѡ мыта́рь ᲂу҆мили́всѧ, бїю̀ въ пє́рси, и҆ зовꙋ̀ ны́нѣ: ѡ҆чи́сти, ꙗ҆́коже блꙋ́днаго прїими́ мѧ всеще́дрый, ѿ всѣ́хъ ѕѡ́лъ мои́хъ всецр҃ю̀: ꙗ҆́кѡ да пою̀ твоѐ кра́йнее снизхожде́нїе.
Воздохнѝ ны́нѣ дꙋшѐ моѧ̀ всеѻкаѧ́ннаѧ, и҆ возопі́й хрⷭ҇тꙋ̀: менѐ ра́ди во́лею ѡ҆бнища́вый гдⷭ҇и, ѡ҆бнища́вшаго мѧ̀ ѿ всѧ́кагѡ бл҃годѣѧ́нїѧ, до́брыхъ бога́тствомъ ꙗ҆́кѡ бл҃гі́й и҆ многомлⷭ҇тивый є҆ди́нъ ѡ҆богати́ мѧ.
Сла́ва: Є҆́же и҆ногда̀ содѣ́лалъ є҆сѝ весе́лїе блꙋ́днагѡ, бл҃же, ѡ҆браще́нїемъ во́льнымъ: сїѐ ны́нѣ сотворѝ и҆ на мнѣ̀ ѻ҆каѧ́нномъ, простира́ѧ мѝ честна̑ѧ твоѧ̑ ѡ҆б̾ѧ̑тїѧ: да спа́ссѧ пѣсносло́влю кра́йнее твоѐ снизхожде́нїе.
И҆ ны́нѣ, бг҃оро́диченъ: Свѣ́тлыми мл҃твами твои́ми дв҃о, мы́слєннаѧ моѧ̑ ѻ҆чеса̀ ѡ҆мрачє́ннаѧ ѕло́бою, просвѣтѝ, молю́сѧ, и҆ къ пꙋтє́мъ покаѧ́нїѧ введи́ мѧ: ꙗ҆́кѡ да до́лжнѡ тѧ̀ пѣсносло́влю, па́че сло́ва сло́во воплоти́вшꙋю.
І҆рмо́съ: Ѿ земноро́дныхъ кто̀ слы́ша таково́е;
та́же настоѧ́щїй трїѡ́ди.
Подо́бенъ: Жєны̀ ᲂу҆слы́шите:
Бога́тство, є҆́же мѝ да́лъ є҆сѝ, бл҃года́ти, ѻ҆каѧ́нный ѿше́дъ, непотре́бнѡ ѕлѣ̀ и҆жди́хъ, сп҃се, блꙋ́днѡ пожи́въ, де́монѡмъ льсти́внѡ расточи́хъ. тѣ́мже мѧ̀ ѡ҆браща́ющасѧ, ꙗ҆́коже блꙋ́днаго прїимѝ, ѻ҆́ч҃е ще́дрый, и҆ сп҃сѝ.
И҆́ный, подо́бенъ: Расточи́хъ бога́тство твоѐ и҆жди́въ, гдⷭ҇и, и҆ лꙋка́вымъ де́монѡмъ повинꙋ́хсѧ ѻ҆каѧ́нный: но сп҃се всебл҃гоꙋтро́бне, блꙋ́днаго ᲂу҆ще́дри, и҆ ѡ҆скве́рншасѧ ѡ҆чи́сти, пе́рвꙋю ѿдаѧ́й мнѣ̀ ѻ҆де́ждꙋ твоегѡ̀ црⷭ҇твїѧ.
Бг҃оро́диченъ, подо́бенъ: Ст҃а́ѧ мт҃и дв҃о, ве́лїе проповѣ́данїе а҆пⷭ҇лѡвъ, мч҃нкѡвъ, и҆ прⷪ҇ро́кѡвъ, и҆ преподо́бныхъ, твоего̀ сн҃а и҆ гдⷭ҇а ᲂу҆ми́лостиви на́мъ рабѡ́мъ твои̑мъ бг҃ороди́тельнице, є҆гда̀ сѧ́детъ сꙋди́ти по достоѧ́нїю коего́ждо.
ѻ҆смогла́сника воскрⷭ҇ны, д҃:
и҆ а҆нато́лїевъ, а҃: и҆ трїѡ́ди самогла́сны, г҃. Гла́съ в҃.
Блꙋ́днагѡ гла́съ приноша́ю тѝ, гдⷭ҇и: согрѣши́хъ пред̾ ѻ҆чи́ма твои́ма бл҃гі́й, расточи́хъ бога́тство твои́хъ дарова́нїй. но прїими́ мѧ ка́ющасѧ сп҃се, и҆ сп҃си́ мѧ.
Гла́съ д҃. Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Ꙗ҆́кѡ блꙋ́дный сы́нъ прїидо́хъ и҆ а҆́зъ ще́дре, житїѐ всѐ и҆жди́вый во ѿше́ствїи: расточи́хъ бога́тство, є҆́же да́лъ мѝ є҆сѝ ѻ҆́ч҃е: прїими́ мѧ ка́ющасѧ бж҃е, и҆ поми́лꙋй мѧ̀.
Гла́съ и҃: Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
И҆жди́хъ блꙋ́днѡ ѻ҆ч҃ескагѡ и҆мѣ́нїѧ бога́тство, и҆ расточи́въ, пꙋ́стъ бы́хъ, въ странꙋ̀ всели́всѧ лꙋка́выхъ гра́жданъ, и҆ ктомꙋ̀ не терпѧ̀ съ ни́ми сожи́тельства, ѡ҆бра́щьсѧ вопїю́ ти ще́дромꙋ ѻ҆ц҃ꙋ̀: согрѣши́хъ на нб҃о и҆ пред̾ тобо́ю, и҆ нѣ́смь досто́инъ нарещи́сѧ сы́нъ тво́й: сотвори́ мѧ ꙗ҆́кѡ є҆ди́наго ѿ нає́мникъ твои́хъ бж҃е, и҆ поми́лꙋй мѧ̀.
Сла́ва, гла́съ ѕ҃: Ѻ҆́ч҃е бл҃гі́й, ᲂу҆дали́хсѧ ѿ тебѐ, не ѡ҆ста́ви менѐ, нижѐ непотре́бна покажѝ црⷭ҇твїѧ твоегѡ̀: вра́гъ вселꙋка́вый ѡ҆бнажи́ мѧ и҆ взѧ́тъ моѐ бога́тство, дꙋшє́внаѧ дарова̑нїѧ блꙋ́днѡ расточи́хъ. воста́въ ᲂу҆̀бо ѡ҆бра́щьсѧ къ тебѣ̀ вопїю̀: сотвори́ мѧ ꙗ҆́кѡ є҆ди́наго ѿ нає́мникъ твои́хъ: менѐ ра́ди на крⷭ҇тѣ̀ пречⷭ҇тѣи твоѝ рꙋ́цѣ простры́й, да лю́тагѡ ѕвѣ́рѧ и҆схити́ши мѧ̀, и҆ въ пе́рвꙋю ѻ҆де́ждꙋ ѡ҆блече́ши мѧ̀, ꙗ҆́кѡ є҆ди́нъ многомлⷭ҇тивъ.
И҆ ны́нѣ: Пребл҃гослове́нна є҆сѝ бцⷣе дв҃о, вопло́щшимъ бо сѧ и҆з̾ тебѐ а҆́дъ плѣни́сѧ, а҆да́мъ воззва́сѧ, клѧ́тва потреби́сѧ, є҆́ѵа свободи́сѧ, сме́рть ᲂу҆мертви́сѧ, и҆ мы̀ ѡ҆жи́хомъ. Тѣ́мъ воспѣва́юще вопїе́мъ: бл҃гослове́нъ хрⷭ҇то́съ бг҃ъ бл҃говоли́вый та́кѡ, сла́ва тебѣ̀.
Славосло́вїе вели́кое. Є҆ктєнїѝ, и҆ ѿпꙋ́стъ. И҆ ѻ҆бы́чнѡ лїті́а, на не́йже пое́тсѧ Сла́ва, и҆ ны́нѣ: стїхи́ра є҆ѵⷢ҇льскаѧ: и҆ чтꙋ́тсѧ ѡ҆глашє́нїѧ. И҆ ча́съ пе́рвый въ притво́рѣ. И҆ соверше́нный ѿпꙋ́стъ.
На лїтꙋргі́и, бл҃жє́нна ѻ҆смогла́сника, на ѕ҃: и҆ трїѡ́ди пѣ́снь ѕ҃-ѧ, на д҃. Конда́къ трїѡ́ди, гла́съ г҃. Подо́бенъ: Дв҃а дне́сь:
Ѻ҆ч҃ескїѧ сла́вы твоеѧ̀ ᲂу҆дали́хсѧ безꙋ́мнѡ, въ ѕлы́хъ расточи́въ є҆́же мѝ пре́далъ є҆сѝ бога́тство. тѣ́мже тѝ блꙋ́днагѡ гла́съ приношꙋ̀: согрѣши́хъ пред̾ тобо́ю ѻ҆́ч҃е ще́дрый, прїими́ мѧ ка́ющасѧ, и҆ сотвори́ мѧ ꙗ҆́кѡ є҆ди́наго ѿ нає́мникъ твои́хъ.
Прокі́менъ а҆пⷭ҇ла по гла́сꙋ. А҆пⷭ҇лъ къ корі́нѳѧнѡмъ, зача́ло рл҃є. А҆ллилꙋ́їа гла́са. Є҆ѵⷢ҇лїе ѿ лꙋкѝ, зача́ло ѻ҃ѳ.
Прича́стенъ: Хвали́те гдⷭ҇а съ нб҃съ, хвали́те є҆го̀ въ вы́шнихъ. А҆ллилꙋ́їа, три́жды.
зрѝ Подоба́етъ вѣ́дати, ꙗ҆́кѡ въ седми́цѣ мѧсопꙋ́стной а҆ллилꙋ́їа не пое́мъ: ѡ҆ставлѧ́емъ же и҆ є҆ди́нꙋ каѳі́смꙋ ѱалти́ра ѿ ᲂу҆́трени, и҆ глаго́лемъ сїю̀ на вече́рни. Пѣ́сней во ѱалти́ри не глаго́лемъ. Не пое́тсѧ же и҆ междоча́сїе, и҆ канѡ́нъ моле́бный прест҃ѣ́й бцⷣѣ, пое́мый на повече́рїи: повече́рїе же пое́тсѧ ма́лое: Та́кожде твори́мъ въ седми́цѣ сы́рной, ра́звѣ среды̀ и҆ пѧтка̀: но ѡ҆ се́мъ все́мъ та́мѡ ᲂу҆ка́за и҆щѝ. Прочита́емъ же въ се́й недѣ́ли въ ко́йлюбо де́нь на ᲂу҆́трени сло́во ст҃а́гѡ мака́рїа ѡ҆ четыредесѧ́тницѣ, и҆ пѧтьдесѧ́тницѣ, є҆гѡ́же нача́ло: Ча̑дца моѧ̑, ра́дꙋетсѧ се́рдце моѐ ва́съ ра́ди:
Вѣ́домо же да є҆́сть, ꙗ҆́кѡ послѣ́дованїе прилꙋча́ющихсѧ ст҃ы́хъ въ сꙋббѡ́тꙋ, и҆ въ недѣ́лю мѧсопꙋ́стнꙋю, пое́тсѧ въ мимоше́дшихъ повече́рїѧхъ. Та́кожде ѡ҆ сꙋббѡ́тѣ и҆ недѣ́ли сыропꙋ́стной твори́мъ: и҆лѝ ка́кѡ настоѧ́тель и҆зво́литъ, кромѣ̀ а҆́ще гдѣ̀ слꙋчи́тсѧ вели́кагѡ ст҃а́гѡ па́мѧть.
 This is a translation and has a separate copyright status from the original text. The license for the translation applies to this edition only.
| |
| Original: |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse |
| Translation: |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse |
