Тесэ ды тосо (2013)/18
| ←Кемзисемгеце сёрмась | Тесэ ды тосо (2013) by , edited by Ломшина Л. А. Кемгавксовоце сёрмась |
Кевейксэеце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 126—134 |
[126]
| * * * |
| Кемгавксовоце сёрмась |
Тоначив, Лемаень Виянанень, тошначинь марязь
Валдо мельть теть, чивалдынем Вияна!
Сёрмат ловномадо мейле эсь эрямом тонсенть коряс марявсь якстере-сэнь вишпилявсо мазылгавтозь пекше вирень келей кужокс. Арась, тонсенть ваксс а путови, куш эсензэкс а шождынель.
Сёрмадот икелеяк ловинь сонзэ, тонь эрямонь кинть, суликань штелькссэ ацазь кикс. Ней — седеяк. Мекс, сядоцеде уш эсь прям кевкстнян, Пазось ды Модалангсо лездыцянзо истя беряньстэ аштить видечинть кис? Мекс сынь тонь пряс-сявдиксэс вачкасть зняро пайстомочи? Мекс, мезень кис кепе-штапо пансесть эйсэть кизна пиципалакс потмова, тельня — лов ланга?
[127] Кода а томбават, кода а мендяват истят стакачитнеде? Кодамо товнестэ лиси-кепети, мелем содамс, зыянонь кандый тикшесь? Кува сравтневить сонзэ ундоксонзо? Содавольтькак менельсэ эрицятне, зяро сельведть, ды мик верьгак, валовить Модамасторонть лангсо! Содавольтькак, кеман, зняро авольть валово. Чипаесь, Вияна, вановоль лангозот седе чевтестэ, седе паро мелень кирдезь. Ней вана...
Аволь умок, медьковонь меельце читнестэ, таго понгонинь велев. Эринь колмошка чить. Мезе неть читне! Тосто куш иля лиснеяк. Тевть, тевть... Каладсь се, наксадсь, чиремсь тона. Теема тень, витнема сень. Кадык истяяк, ютко шка мукшнынь, якинь чачома пизэть-ашкот марто вастовомо. Иля тално, свалшкань энялдомат, нейке мерян, топавтыя. Эрьва самстон Пичепева ютан. Кода эно! Тия умоктояк умок чийнесь кепе эйкакшпингенек. Мельганзо аволь яксесь — ливтнесь келей сёлмо од шканок. Кода а варштамс...
Икеле сакшномстон свал кирдинь мель: велентень совамсто ютамс Покш куринкава, ледстнемс, кудотнень лангс ванозь, кинь те эли тонась. Ды ламот содавильть. Ней икелекс прям тей-тов а пурдтнян. А мезть. Содан, вейкеяк юрт тень а ледстяви. Весе лият, весе полавтовсть. Кукорьгадозь, модас ваныця, олгосо вельтязетнень таркасо аштить сэрей-покш, келей вальма, ашо ды якстере кирьпецень кудот. Латост... Олгонсетнеде неень од эрицятнестэ ламот эзть марсеяк. Икелень «кулактнень» «хоромаст» малазосткак а путовить; неявольть латякарекс кедень кем вакссо. Косто содасак, конась кинь? Натой од куринкат чачсть. Секскак чачома велем умок уш чачома велекс а лован. Та-кинь лиянь сон, аволь монь. Тесэ умоктояк умок яки, шалны, эвти, лия коень кирдезь, лия эрямо, гайгить лия вайгельть, валт, вечкить, кежиявтнить, вастневить, явновить лият... Монсесь, сонзэ чиремезь кудонзо, сокорокс ваныця вальманзо, эри эсь эрямосонзо, эри превсэнь ды седейсэнь. Ансяк...
Якинь, омбоцеде мерян, Пичепев. Неия тынк кудонк, ды тапардымим — кемат?! — кецнемань ёжо. Каштансто ваныця неень шкань од кудотнень ютксо пингензэ печти тынкесь; озась, вальманзо нежедсть модас, шиферэнь латозо [128] раужкадсь ды цяк кирди пиземетнень; кукшкадсь ташто кудонк, теке якшамодо сараз. Неезденть, нуваргадомань таркас, вельместь эйсэнь паро мельть: вана, вана монь велем! Вана тия, истямо кудо юткова, якась морыця од шканок. Тонь ды монь. Кадык озась, кадык алкиньгадсь, кода ломанеськак сыречиденть, сон, самай те кудось, ульнесь минек вечкеманть неицякс! Секс истя эрязкалезь токнозевсь седеем.
...Ве. Олгонь латотнень ало кудотнесэ цивтёрдыть саразонь сельминекс якстере толнэть. Вастневеманок шкасто тынк кудось куринкасонть вадрятнестэ вейкель. Молилинь, мельсэнь, чокшнень чоподава вальманк алов, эль марямга колмоксть — динь-динь-динь — тянкадилинь вальма суликантень ды училинь лисемат. Седеем мештезэнь эль кельгиль. Кувакакс марявиль шкась! Окойники кальцьк мериль потмо ёндо циндересь ды чико-о-орк панжовиль кенкшесь. Кундылинек кедте кедьс... ды сыргилинек пиренк песэ ламаренть алов. Тонадовозь тарказонок.
Кортнезь, теде-тонадо ледстнезь, икеле шкадонок арсезь, куроксто — тунь апак учо, минек апак кевкстне — лазови__ валскень зорясь. Теке ансяк вастовинек, сон уш... Эзик стувто? Кода шкатне полавтовсть! А кемевияк, кодамо какаря кедь-пильге атякс велявтсь кудонк. Чавачамос варштавозь, неия, мезекс теевинь монсь. Сормсевкстнэ-изавкстнэ вельтизь чамам эрьва кода. Кассь омбоце уло. Сельметне теиньгадсть. Теевинь а содавиксэкс. Аволинь ванояк.
Совсинь кудозонкак. Тесэ, мекевланг, мезеяк, каштомдонть башка, эзь полавтово, прок мерсь «стоп» ды лоткась, ванстовсь се шкась. Икеле, вить ёно, якстере ужосонть, столесь секе, стенанть ёжосо ашти иетнеде тюжалгадозь секе келей эземесь. Кодак соват, вить ёно Тюштянь пингень — бодят зярдо-бути теекшнизе — чувтонь коникесь. Керш ёно, кода велень эрьва кудосо, — пор ведьсэ ашолгавтозь каштом, минек эйкакшпингень кельсэ — кизэнь мастор. Мекс истя мерилинек тензэ, кеман, мельсэть: тельня эйкакштненень, ды аволь ансяк сыненст, каштлангось — лембензэ кис — ульнесь кудосонть весемеде вечкевикс таркакс. Тосо, те «масторсонть», ютавтнинек теленть аволь аламо кежей, кувака чинзэ.
[129] Эскельдинь тарчксонть трокс ды чувтоминь: тесэ эрясть икелень коштось, чинетне, эрясь тонь эйкакшпингеть ды мазый од шкат. «Косат, Вияна? Листь, а мезть кекшнемс! Аволь каштлангс эцить?» — цяк эзть кирнявто кельпрястон валтнэ.
Марявсь, юты шка, ды каяты жойниця, мештестэ лисиця, истямо вечкевикс вайгелеть. Косто истямось саевкшнесь? Кона ёндо? Тонсь ульнить а сэрьс а келес, вайгелеть вана — баягань. Сестэ марсия, ней содан: тонь ульнесь альт — авань алкине, эчке вайгель. Паряк, текеде кортылитькак састо, матразь вайгельсэ? Тукшныль мелезэнь, ней меревлинь, артовксозо — тембразо. Тукшныль...
...Азрава од ават, чокшнень шканзо лангс апак вано, котьмась каштомикеле. Мезе тейсь — сонсь содась. Прок маризе калдор-калдор совамон. Лиссь каршон. Озавтымим столь-стувор экшс. Сонсь озась каршон.
Сыредсь. Сеске тень эзь содавояк. Покш, сэрей, пандошка аваль, теевсь мендявозь рунго дёкуш авинекс. Чамазо шумбрачиденть, мельсэнь, палозь палыль. Мазыельгак. Паряк, мазычисэнзэ тетять эждекшнизеяк. Маштыть истятнэ! Лия мельгак юв-яв ютась пряван: сон-аволь икелень аштицясь? Каня сон эль эзь теевкшне тень низанякс? Черензэ чоподальть, ней — ашот; чамакиськезэ сулика валаняль, ней — сормсевезь, теке чувто пряс кадовозь мелень коськезь умарь. Вайгелезэ вана лиядсь кодамокс ульнесь. Кшни калгодо нотатне эйстэнзэ эзть ёма, марявить. Эзь полавтово кортамонь ладозояк. Лисни, сыреди, допрок пужи ломаненть рунгозо, пужи, сормсеви киськезэ, обуцязо-оймезэ, вайгелезэ — ванстовить. А стяко кие-бути инетнеде мерекшнесь: ломаненть седейсэ куломазонзо ванстовить кавто ёжот — вечкемась ды пезэрдемась, кежтне.
Аволитинь каваня берянь кулясо, ансяк эрямодонть чувто пряс а кузят. Мутанзат, козонь иля эце. Сави ёвтамс. Весе те лиссь уш тонь куломадо мейле.
Од авать тейтерезэ, Вежана, тетять ёндо веженсь сазорот, минек велесэ кемень классонзо прядомадо мейле тусь васоло ошов. Тосо эрясь Азрава од авать патязо. Сонензэ [130] валгськак сазорот. Снартнизе сыцясь поладомс тонавтнеманзо кодамо-бути ПТУ-со. Эзь лисе. Каня панизь, каня сонсь кадызе. Ушодсь важодеме лавкасо микшницякс.
А паро кулят-кортамот яксесть тейтерденть велесэ эрямстонзояк. Теде тон содылить. Кодамо-бути покшчинень авазо панекшнесь кренчведь. Велесэ ков сонтемензэ? Тонсь содат. Седеяк ськамост эриця аваломантненень. Узере кечке теть озавтыть — кандт, эске та-кие чави — таго нуртяк... Панемстэ лездась тензэ тейтерезэ. Весть, аванзокс, варчизе палыцянть виензэ, омбоцеде... Кедензэ-пильгензэ лавшомсть. Пансть ашолгадомас. Валскестэнть Вежана мольсь школав ды совась урокс... Мезе седе тов ульнесь, кортамс а мезть.
Вейке эйкакш, кортыть, — а эйкакш. Од авать превсэнзэяк арасель нолдамс омбоце. Эзь марсеяк неть превей валтнэде. Очко нардавксось кассь, текенень, тетявтомо. Васькавтнематненень пе арасель. Авазо пельсь лексемскак лангозонзо. Кода ансяк эзь кольневте пупоркинензэ! Школав туемазонзо поте тензэ макснесь. Весе тевтнень тейсь кисэнзэ, кадык сонськак, авазо, аволь дошузтнэдель. Удсевтизе пешкедемазонзо. Истя эйкакшонть кардызе тевень теемадо, эсь мельганзо якамодо, валонь кирдемадо; кастызе кинь-бути лангс кемицякс, тевде пелицякс, удыцякс-аштицякс. Содазь, косо нузяксчись, тосот цильнематне-эльнематне, тосот тюнголькс тевтнеяк.
Видьстэ меремс, а мезекс теде сёрмадомс: Вежана, колмостонк меельцесь, кассь сельметь икеле, неить, ков тевтне увтить. Мезес пачколесь мейле — те уш тевесь лия, теде, маряви, эзить марсе. Эли марсить? Сестэ уш туекшнить Тов, косто а велявтнить.
Эно поладса Вежанадо ёвтнемам. Кунсолок.
Кувать микшницянь таркасонть эзь кирдеве. Ярмаконь асатыкс тейсь. Кшувавтызь. Паро, кадызь теке лавкантень урядыцякс. Киякстнэнь шлямс-ёзамс а шождынель. Эрявсь менчевемс, сюконякшномс сэдявкстнэнень аволь аламо. Ялатеке нузякстнэнень сеске эзь изняво. Топавтсь тевензэ. Ульнесь эйсэнзэ кой-мезе велень оргатнестэ. Шлицянь-[131]нардыцянь «чинсэнть» ульнесь талайс. Лиссь мирденень. Чачтась кавто тейтернеть. Весемесь, паряк, улевель вадря, аволь тонадояк сазорнэть суликань потмаксос ванномо. Тонадсь истя — эзь сода, косо, зярдо, кие марто ды зяро каямс кирьгаванть идемевсень начкодонть. Мезень парт-кеняркст учнемс истятнэнь пельде? Мирдесь кирдсь-кирдсь — кшувавтызе. Куроксто мусь-чиявтсь лия ни. Эйкакштнень ков? Те канстонтькак сазорот правтызе лавтовстонзо — эйкакштнень саизь кедьстэнзэ эйдень кудов. Теде мейле аваст седеяк ведьмензэ нолдынзе, сайсь эрямостонть «пародонть» зяро саевсь. Комавтнесь стопкатнень апак лово. Те ульнесь маныть эли седеяк умок. Та-кода кизна сакшнось велев аванзо содавтомо. Содавтызе... Азрава кавто таргонь перть якась сэньшкавтозь сельме марто. Сэньшкавтыцясь вана, куринкаванть а эсь превсэнзэ кепе-штапо якицясь, куроксто тусь ошов. Се шкастонть саезь пельдензэ а сёрмат, а кулят. Ёмась. Ёвтнесь тень ризксэв те тевденть кудосонк улемстэнь од ават.
Вана истя содавтыя кудонк, косо макокс панжовкшнось од шкат. Тон содат, Вияна: обуцянь коряс мон аволь кудонь-кардазонь ломань. Истят мелявкстнэнь тетям-авам эзизь совавтокшно обуцязон. Секс свал бажинь ковгак молемс, ливтямс, неемс-марямс мезе-бути од. Ялатеке, эрявлинекак мартот вейсэ, те ташто-ташто кудонть истямокс аволия кадо. Кемеви, тарказонзо путовлинек од, шабратнень кондямо покш, мазый чачо, кирьпецень кудо. Лиссь, неят, мекевланг. Эрямонть чудильманзо иерат, ковгак а молят, ков мелест — тов пурдыть, тов сайтядызь. А кармавтсыть.
Лисинь Азрава сырькаенть кедьстэ нусманя ёжонь марязь. Меельцеде варштынь истят содавикс, модас нежедезь вальматнень лангс ды арсезевинь, кодамо а чарькодевикс, нусманячисэ-ризкссэ кодамо сюпав ды ялатеке кенярксонь раштыця эрямось. Кие ней соды, кодат мельть, ёжот, седеень толт, учомат-кемемат зярдо-бути якасть икелень шкава сэрейкс марявиця неть вальматнень алга? Кулость сынь, сеть мельтне-ёжотне, ваясть отьмас. Кода-бути ледстнинь, Вияна, сёрмасон: эрямось куломавтомо а эряви, а кирдеви.
[132] Сон, куломась, кода иля ахоля кедьсэть, азор. Сон мик... эряви.
Ней Тесэ паксятнень-виртнень ланга яки-паки, пря шны эрьмесэнзэ умарьковось... Сон азорокс вети прянзо, покшкавтни, апак арсе явши сельмень кецневтиця товсюронь-розень ожо мазычинзэ.
Лисинь од авать ландязь аштиця кудосто ды саинь мель ютамс содавикс курованть.
Пичепе...
Содылия аволь ансяк кинь кудось, содылия, зяро эрьвасонть эрицят, кинь кода лемезэ, зяро иензэ. Сырень-эйкакшонь пес. Се оно, маряви, Черькаень, каршост — Пупоронь, седе верев — Шабаень... Ужо, ужо, а те, те эно кинь? А-а, Штурмань! Мельгаст — Индялонь, Кажань, Оржаень, Тумаень... Те юртсонть вана эрякшность Тузань, мейле — Дандаень. Кить ней? А содан. Келя, кить-бути лия ёнкссто сыцят. Каня чилисема, каня чикуншка ёндо. Кодат раужо кренчть ансяк эзть пурнаво велентень. Пенть прядыть Сеськень ды Чичавонь.
Седе тов — пакся. Келей-келей пакся. Сыретнень ёвтнемаст коряс, зярдо-бути неть ёнкстнэ вельтязельть чопода вирьсэ. Сэрей пичетне цёцяня прясост судрясть велькскаст седе сеедьстэ чилисема ёнов чатьмонезь уиця пельтнень. Варматнеде прясост тей-тов юхаема шкастост морсесть Тоначив умоктояк умок туицятнеде лужаня, седей лепштиця морот. Секс истя лемдезельтькак велепесь ды вана те паксясь. Пиче пакся...
Сэрей вирев молиця паксянь аволь келей, калгодо-кевенза кись яви-кери Нороваванть эрьмензэ кавтов. Кавто ёнга нувсить чинзэ перть лымбакстнематнеде товсюронь пешксе стака прятне. Оймсить. Ансяк кой-конатне эзть сутямо, кунсолыть, нучк мендявозь ды чатьмонезь, чачтыця-кастыця модаст. Эскелинь киванть, кува умок-умок кедте кедьс кундазь яксинек кизэнь лиясто ковов, лиясто дюм чопода ветнестэ тонь марто. Эськан пшкадинь удомо пурныця товсюронь прятненень: «Курок сы кувака нерь мувор ды цирь-цирь правттадызь [133] пильге лангсто. Правттадызь, ды телень ютазь тарказонк сыть-касыть лият. Сынь текекс кармить сюконякшномо андыцяст туртов, модантень. Истя эрсесь икеле, истя моли ней, истя карми свал».
Сыргинь мекев. Совинь велентень. Чопотекшнесь. Келей вальматне вансть валдо вановтсо. Лездась тенст кудотнень лангс нусманясто ваныця покш сувтемешка пешксе ковось. Мелезэ ульнесь мезе-бути кевкстемс. Мезе? Мезеяк эзь мере. «Сестэяк, ламо-ламо иеде икеле, истямолить?» — кевкстия, пшкадинь тензэ, эзинь кирдеве. «Ульнесть, сеть шкатнестэяк ульнесть нусманя чить, — сонзэ кис ёвтынь валонзо. — Ансяк минь вечкемадонть ламо мезе а содылинек. Сокорт ульнинек».
Меельце сёрмасот марявиксстэ сялгимик кевкстемасот, мекс чатьмонян, а кортан, кодамо киява тусь явовомадонок мейле Учаень Валдаень эрямозо. А пандыцякс, Вияна, а кадован. Сы шка, весе эрямом путса сельметь икелев. Тонськак, а кавтолдан, поладсак эрямопингедеть ёвтнемат. Истя? Поладык, поладык... Кеман, Вияна, прядови сон валдосто, моронь моразь. Кода эно лиякс? Кемемасо, кемезь эрияк ломанесь. Сонтемензэ... Каня алкукс менелень прявттнэнь зепесэ видечинь челькинеяк а усксеви? Мезень, зяроцеде уш кевкстян, чумот, кодамо апаро теить тенст? Кода меремс... Паряк, видеяк, мезе-бути аволь сынст меремаст коряс тейтяно? Паряк, минсь, аволь кить-бути, чумот, минсь а видестэ прянок ветятано? Мон яла истя мерян: бути мезе а истя — свал ушодт эсеть эйстэ. Кодамат тонсь — истят теветь, истят ялгат, перькат чарыцятне.
Учан. Учан.
Кода тынсь тосо, Кулозень Масторсо? Ламо тенк меельце шкатнестэ састь од эрицят? Кулава Пазонк ламо-аламо нолдтнесь тенк валдо? Менелев кепетема-ютамо шказот ламо кадовсь? Кортамот теде арасельть? Парсеень пиксстэ кодазь Тов куземань кузтемат анок? Эли тынь лиякс, аволь кузтема вельде Тов пачколетядо? Аволь а неявикс нармунекс?
[134] Мезть, мерть, кевкстнят «одтнэде», каня а содат, мезе тынк тосо моли-тееви? Эрдекстыть, тюрить, салыть-колыть... Чачозетнень коряс Кавксть-колмоксть седе ламо кандовить калмазырев. Солазь солыть келейдеяк келей Эрий Масторонть эрицянзо. Тень таркас сюпалгады Тоначись! Сельмень неезь... Тесэ минекрангить-пеняцить: аламо пандыть важодемань кис, а шкастонзо... пенсиятне вишкинеть... Салыть ламот, ды ламонь-ламонь. Тесэнь эрицятне, седеяк вере аштицятне, масторонь ды тескень прявттнэ, ярмактнень кис анокт вейкест-вейкест кирьгапакшто кундамс. Тынк Тосо вадря: а питнеть, а ярмакт... Арасть сынь — арасть кежть, сельмень сявадома, арасть сёвномат-тюремат.
Вечкемадонок ледстнезь, Учаень Валдай. Масторланго, 2001-це иень ацамковонь 1-це чи.