Тесэ ды тосо (2013)/19
| ←Кемгавксовоце сёрмась | Тесэ ды тосо (2013) by , edited by Ломшина Л. А. Кевейксэеце сёрмась |
Комсеце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 134—141 |
[134]
| * * * |
| Кевейксэеце сёрмась |
Масторлангов, ашо ойме Учаень Валдайнень, эрямосонть видечинь кис аштицянтень
Шумбрачи, валдонь кандыйнем!
Сёрмат учовсь. Энялдат поладомс ёвтнемам. Весе, Валдай, чамсь ёвтнема парем. Потмаксос. Мезе-кода лиссь мартон седе тов, ловносак теке сёрмастонть. Дёпось ней тонь эйс прась — сёрмадт. Невтить ламо иень перть ютазь кить-яннэть. Эскелить, содави, аволь аламо, ули мезде ёвтнемс. Учан, учан.
Содат, Валдай, кадык аволь сеедьстэ, совсить эйзэнь, теке экше шкане лекстявксто сув, ёжинеть: мон эрий ломань, од, прок виде-рацяня килейне, тейтерь эли авине. Сакшныть, оинем, истят коволт! Сакшныть. Алкукс. Каня а эрьведема, а кеняркс — марямс эсь прят куш кивчк шкань перть эрий, менель алга якиця ломанекс?
[135] Пачкодевлиньгак Масторлангов, кумажа лангс аравлинь икелеть од авань содавтоманзо кис. Кодамокс тень эзь ульне, од авакс-аволь, ялатеке — авам. Истяяк, Валдай, меревлинь: аволь истя кецневтимик сонзэ содавтомасот, кода кудозонок совсемасот. Куш сельмепонань пачк, куш сельмень конязь варштамс лангозонзо! Варштавлинь васня ушосто, мейле уш — потсто. Ютавлинь икелев, озавлинь столь пес ды кувать-кувать ванновлинь перькан. Пачкодевлиньгак телень шкава, кузевлинь каштлангс, педявтовлия чевте рунгинем истямо лембе, валаня кирьпецень ацавксонтень ды матедевлинь эйкакшонь сэтьме удомасо.
Ёвтыка, Валдай, совамсто вить ёно стенасонть кундосо фотографиятне таркасост, ванстовсть? Эйстэст вейкесэнть ниленек: тетям, авам-шкинем ды минь патят-сазорт — эйдинеть. Монень, маряви, котошка иеть, Кастушнень, лисни, — нилешка. Ванстовсь-эзь те фотокувось? Авань чачозояк кадовкшнось мелезэнь сонзэ вельде. Трицям прясо кошокс сюлмазь ашо паця. Алдонзо неявиця чертне явозь кавтов. Прянь сюлмсема коесь сестэ истямоль. Вановтозо васов ваныця, седеень эждий. Турванзо мазый эчкеть, чевтеть. Моньгак сонзэ кондят ульнесть. Чама тюсомгак текель. А стяко «авань тейтерь» мерильть тень кудосо-косо.
Мерят, якить, совсить аванень умарьковсто? Содат, Валдай, те ковось — вечкема ковом. Кода тон арсят, мекс тукшныль мелезэнь? Ёвтаса. Чинензэ кис. Маней ветнестэ Пичепесь васня пешкедиль кенериця розень чинеде, шкань ютазь кенерильть товсюротне, седе мейле салава совиль ды срадыль велеванть умарень ламбамо-тантей чинесь. Качадыль эрьва кува. Лексят лексевлить! Маряви, текеде покштянок лемдизьгак истя те ковонть — умарьков...
Седеем витевиль эсенек пиресэ антоновканть чинедензэ. Лекстят домкасто — прок ансяк таргазь медьс турват токавтсыть. Эри-арась се чувтось? Редик? Паряк, чаво тарка кадовсь эйстэнзэ? Монень маряви, истя улияк: шкань варматне умок уш костизь. «Макст, макст тень, Чоподань Паз, якиця пильгинеть, ваныця сельминеть, мариця [136] пилинеть ды ве чис куш нолдамак...» — лиясто ниреждезь энялдан эсь пачкан. Содан, тенень зярдояк а улема, вешемс ялатеке вешан. Мезть теде кортамс! Арсематнень лангс панст а каят, а онкстясыть. Сынь олячинь вечкицят, верьга ливтниця нармунть, ливтить ков мелест. А стяко кезэрень гректне меленть-арсеманть лемдекшнизь Пазокс. Нейгак вана эцезь эцить эйзэнь.
Ютавлинь тунда якстерть-ашосо оршазь се умарь чувтонть алов, кутмордавлия ды панжовлия тензэ ризкстэ пешксе седеем: нолдавлинь сельведень ды ёвтневлинь пайстомо эрязь эрямодон. Паряк, вечкевикс чувтом чарькодевлимим? Ансяк сон, маряви, седей ёжос путовлинзе мелявтомань валон, марявлинзе сельведень салов танстест. Сеедьстэ васолдо-васолдо, тынк Масторсто, сакшны се умарьксэсь сельмень икелев. Илямак чумондо: таго ильведькс теинь. Кодат сельметь ды сельведть умок кулозь ломанень? Кода «кодат»? Неть жо ансяк арсемат. Мезеяк а теят: монсь кулозян, арсематне вана — эриень. Коензэ-ладонзо Тоначинть истят.
Мерят, чемердизе, токизе седееть эрямодон ёвтнемам? Энялдат поладомс седе тов? Вадря. Тень топавтомс а стака. Ансяк вана содат кодат ёжот верьгелить потсон ютазь-эрязь иетнеде ёвтнемстэ? Кавтов лазован: ве ёндо мель кирдян чатьмонемс, лия ёндо — анокан ёвтнемс весементь челькинень пес. Седеяк — а содавикснэнь, ят ломаннень. Тонгак, а мезть кортамс, ней сынст эйстэ пек а явоват. Секс мезеяк а сёпан. Содат невак мекс сыремкшни мель кортнемс? Чамдсак потмот — ойминеть ойми. Прок сталмонь сталмо чамдат сявдиксстэть! Шождалгадат. Секскак, Валдай оинем, мелеть витьса: мельспаронь кирдезь эскельдян ёвтнемасон эрямонь киван седе тов.
...Мейсэ уш прядокшныя ёвтнемам? Вай, допрок стувтыя! А-а... ёвтнинь Толя мирдень ормадонзо-куломадонзо, моданть-масторонть лангсо меельце минутадонзо. Истя? А ильвелян?
Кунсолок седе тов.
...Иетне, эрямось, — те теке менель прявтонть, чипаенть, эрьва чинь кизэ. А кенерят ойметь таргамо, ванат — [137] уш валгомав туить. Кодат иляст уле сынь, читне — манейть, потмурат, псить эли цят якшамот, — менелень азорось ялатеке ютасы ютамо кинзэ ды валги модачиренть томбалев. Текекс ломанентень казезь иетнеяк.
Таго, зяроцеде уш, кадовинь ськамон. А кинень вал ёвтамс, а кинь пельде, а кона ёндо лекстявкс марямс. Ськамон тарнан, прок апак нуе розьприне сёксень чаво, эрьва ёндо панжадо паксясо. Куш, яла мерилинь, кияк эсь буень, эсь велень содавикс ломань улевель маласон! Лия ёжоткак содавтнимизь: «Зяро ризкст, зяро мелявкст кирдить, зяро чопода чить ютавтыть — саты, эряк ськамот, оймсек эрямонь вешкиця-выжныця даволтнэде! Тонеть, бешоконь, верде мерсть эрямс цёраломантеме. Эряк. Модамасторонть лангсо весемесь моли човорявозь: валдось-чоподась, калгодось-чевтесь, нардевесь-лавшось, ризксэсь-кенярксось, чачомась-куломась... Весе-весе. Теяк: ськамот берянь, ськамот... вадряяк!».
Ламоксть сакшнось ды нейгак сакшны, кадык чуросто, мелезэнь Толя. Кода а сакшномс, оно зяро иеть ульнинек вейсэ, вейсэ эскелинек эрямонь аволь кувака, аволь свал валаня кияванть. Эскелинек вейкень-вейкень марязь. Куломадонзо мейлеяк зярыяксть совсинь сазоронстэнь.
А стяко кортыть: мирдевтеме авась — те апак пиря тикше капа; эрьва ревесь, эрьва лытагай скалось норовить эйстэнзэ ноцордамс пакшке. Толя марто эрямсто кияк эйзэнь эзь педсе. Прок конясон сёрмадозель; мирде экшсан. Кулось вастам-полам, ды эрьва нолгаресь, визьксэнь апак сода, бажась улемс тень «ялгакс». А! Сон, келя, мирдевтеме! Истятнэ, марявсь тень, ловсть монь омбоце сортонь ломанекс. Сонзэ кенкшензэ, келя, эрьва злыдарь кискантень панжадот. Иля кавтолдо, чокшне-омбоце, ды сон — тонь.
Кирдтядо, кирдтядо тынь, сакалонь нарсицятне, истямо мель ськамост эриця аватнеде! Истя-аволь? Видькстак, ёвтык валот, Валдай. Те монь свал покордыль. Ансяк ков туят эрямонть эйстэ, сельметь ланга паця а каят. Истяяк мереват: кодамо цёрат, а кепсиндерят вановт ава лангс? Аваськак аволь кев.
[138] Эрьванть эсензэ канстозо, эсензэ сэредьксэзэ, эсензэ кизэ. Содылинь зярыя ават: сынь эрьва кода бажасть вастовомс цёра марто, бажасть пурнамс-сэрнямс вейсэнь пизэ. Кода эзть «бизмолдо», тевест эзь моле. Мон тень кувалма мелявкст эзинь сода. Мезе паро мукшность эйстэнь цёратне, мезень кувалма мелезэст тукшнынь — а содан. Теке медь вакан велькска сёксень укскат — чаразь чарасть перькан. Паряк, алкинечисэнь тевесь? Кой-кинь мельс, содан, тукшныть вишкинетне. Келя, налкшкеть теке, татайть! Сы теть мель зепезэть путомс — путык, ули мелеть кедезэть саемс — саик. Кепедик, варчик азё, центнерэнь-омбоцень сталмосонть! А содан, а содан. Ансяк шнамокс илязо лисе, меремс мерян: чаматюсонь коряс а мазыекс эзинь ульне. Теде, Валдай, мондень парсте содат. Истя?
Сыретне ды стака ормасо кувать сэредицятне содасызь, кадык аволь чинь пес, Тоначив туемань шкаст; седеень ормадо майсицятне — арась. Эли иень-ветень ютазь, эли... Монь мельга Тов тердицясь сась вельть шкадо икеле. Апак ёвта. Тунь эзинь учо. Превскак эзь совсе, сы ды истя куроксто панжсы Пингеде пингень Масторов раужо кенкшенть.
...Чизэ манеель. Аволь псильгак, аволь экшельгак. Истят чить эрсить таштамковонь васенце пельксстэнть. Кизэсь прядовсь — сёксесь зярс вийс эзь сова. Тей-тов кайсевемань, оланя-сэнь менельганть шанжавкоцтонь ливтнема шка. Тукшныль мелезэнь, вечкилия сонзэ, умарьковонть «пулонзо». Неть читнестэ марилинь потсон кодамо-бути а ёвтавикс нусманячи. «Пароль, — зярыяксть совсесь превезэнь мелесь, — куломс те шкастонть, зярдо а пси, а лембе ды лов алов видевкстнэ истя кецневтить ванькс пижесэст сельметь, седеяк — зярдо пельтнень ютксто, прок келейстэ панжовозь вальмава, апак учо варшты лангозост кециця чипаесь.
Кода арсевсь, истя лисськак.
Важодема шканок прядовсь. Лисинь заводсто. Кенярксось пештизе мештем: менельсэнть эйкакшокс налксесь валдосонзо келей чама чипаесь. Алкуксонь кизэнь чи. Кода а кецнемс! Тевем прядовсь, ушосонть лембе. Цехень [139] зэрттенть, а ванькс кошттонть мейле лексеви шождасто. Ялган марто вейсэ, теде-тонадо лабордозь, ютынек аволь васоло ломанде пешксе лотксема таркантень. Учотано «бусонок». Аволь ламо шкань ютазь, пеедькшнезь-згилязь, эцинек тыц пешксе троллейбусонтень. Эйсэнзэ пси. Кадык, ардомскак зяро... Кеменьшка минутань ютазь валгинь эсь лотксема тарказон. Асфальтсо вельтязь яннэванть сыргинь вете этажсо кудонок ёнов. Эйзэнзэ кавто-колмо эскелькст.
Менельксэсь, тагояк мерян, вадряль, раштась кенярксов ёжот. Пельть эзть неяво. Чивалгома ёндо коволонь-ковол пувась лембе, важов, чевте вармине. Эль марявиксстэ гайгиця сэняжа менеленть азорозо, якстерть-ожо чама чипаесь, арсесь ошонь сэрей кудотнень, чувтотнень, коткудавокс кашкиця ломантнень марто валскес явовомадо. Тетькевсть-тустолгадсть чилисема ёнов ваныця сулейтне.
Эскелинь апак капша. Кияк монь а учи, арсинь, кенерян, кудонь каштмолемась эйстэнь а оргоди, а кекши. Эрязкалемс а ков. Чизэ сюконьчи, пеця, чачома чим. Арсинь, мезть пидемс-панемс. «Пидемс... Кинень? Кинь серьгедян? — ципадимим, мельсэнь, кевкстемась. — Ёвтамаль зярыя чиде икеле! Ней мезе...» Валтнэнь истя сувтнезь, эзия редяяк, пачкодинь этажкаенек вейсэнь кенкшенть икелев. Совамс мелем арасель. «Менельксэсь вадря, озан, — сынь мельс, — оймсян аламнешкас, лексян-теян, кенерян чопавтомс чаво кудонтень, учицям арась».
Озынь келей-рацяня укшторонть ало чаво эземнентень. Кода истя ве «ёзыцяяк» арась? Мезе лиссь сырькайтнень марто? Кулянь оровтост понжавтовсь? Эли удалксозост пуворькст теевсть? Ёжом вадряль. Кайксэм лангскак пеняцямс эзь савкшно. Путыя ваксозон кой-кодамо ярсамопель марто юдминем ды нежедия кутьмерем эзем удалксонтень. «Паро ушосонть! — тешкстыя эсь пачкан, перькан ваннозь. — Теке аволь сёксень ушодкскак». Ансяк ютась пряван кецнемань мелесь, скирьк-скирьк мерсь седеем. Эзинь кенере таргамо таблеткан, таго сювордызе истя содавикс тень виесь. Ливезькадынь, сеедьстэ-сеедьстэ чавозевсь седеем. Новольсть кедень-пильгень ды сеске, эзинь кенере «вай» меремеяк, [140] ваинь чоподас. Лип шкань перть аволь васоло кинть пельде, конань трокс ансяк ютынь, марявсть мельцек-мельцек ардыця машинатнень матразь урномаст. Сеске теяк ёмась. Весе...
Мезе мейле мартон тейсть, ускимизь-арась больницяв, кода калмимизь, козонь, кить, лайшимим-арась кияк, кить мольсть кандолазон мельга, сакшнось-эзь кияк велестэ — эзинь сода. Течис а содан, кинень максызь квартирам, кинень понгсть нулан-валан. Содат, Валдай, мезе мерян тень кувалма: иля правто таштамос, эрямосот васень тевекс те илязо уле. Седеяк пельть, илязо тееве ормакс. Мезень ульнесть, мезеяк мартон эзинь сае. Тесэ весе ули. Тесэ, ледстяса, мезеяк а эряви. А квартира, а оршамопельть, а телевизор, а ярмакт... Мик цёраломаньгак авантень а эряви. Ме-зе-як! Содак, чапик конязот.
Ансяк лиссь оймем, Модаалксонь прявтось Кулава саизе тей, эсензэ Масторов. Кулынь 1985-це иень таштамковонь 10-це чистэ. Содат, Валдай, самай се чистэнть, зярдо васенцеде варчакшныя коштонть танстензэ, чачома чистэнь. Мезть, алкукскак, ансяк а эрсить эрямосонть! Топодекшнесть тень ансяк ведьгемень иеть. Мезесь кецневти, чоподас ваинь тунь апак майсе. Весть эшкезь. А пштикст, а чулксетемат эзинь маря. Эрямосон эйстэдест кирьгаваль. Човсесть-мерькасть эйсэнь эрьва кода ды эрьва ёндо. Паряк, секс истя шождынестэ, сэредьксэнь апак маря, ченярдомань апак сода, саимим Тоначинь азоравась. Сюкпря теть, Кулозень Масторонь прявт! Маряви, косо-бути — Менельсэ эли Модаало — ули видечи! Ули, ули. Паряк, куломась улияк сон?
...Вана истя эскелия каворьксэв, лушмов-лашмов, аволь кувакатнеде эрямонь ким ды пачкодинь свал чатьмониця, кевень ашназа-раужо тюс менельсэ лепштиця те Масторонтень. Те таркасонть арасть ацирьгалемат, кецнемат, сельмень сявадомат, майсемат, вечкема, арасть Киринэнь кондят манчигай альгачткак. А стяко ёвтазь: пингеде пингень, певтеме сэтьмечи! Тесэнь эрямось — а эрямо. Секскак тей иля бажа, ванстт, кода маштат, шумбрачить ды пеень сускозь кирдевть Эриень Масторсо. Оно кодамо стакаль, [141] сельведтнеде нолажаль эрямонь ким, ялатеке тесэнь сэтьмечинть лангс аволия полавто. Зяр-до-як!
Ульть шумбра, вечкевиксэм. Тоначи, Лемаень Вияна.
Поладкс. Кулома чистэнь, тагояк мерян, топодекшнесть тень ведьгемень. Теят паро тев, карминдерят те чистэнть, таштамковонь 10-це чистэ, кирвазтнеме штатолнэ ды эрзянь кезэрень койтнень лувсо, чилисема ёнов кедень кепедезь, кундсеме лемем. Свал кирдть мельсэть: чачомсто чачи куломаськак.