Тесэ ды тосо (2013)/17
| ←Кемготовоце сёрмась | Тесэ ды тосо (2013) by , edited by Ломшина Л. А. Кемзисемгеце сёрмась |
Кемгавксовоце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 112—126 |
[112]
| * * * |
| Кемзисемгеце сёрмась |
Масторлангов, Учаень Валдайнень, сёрмадомо-морамо вечкицянтень
Маней чить теть, Валдай!
Мельспаросо ловныя сёрмат. Сюконян. Прям нолдаса икелеть мелем топавтоманть кисэяк. Мерят, прядовсь ламаренек пингезэ? Коськсь, кода монсь? Поладызе, мерят, тейтерезэ? Вантая! Те вадря. Аволь ансяк вадря — пек вадря! Монень вана поладыця, мельган касыця тараднэ, эзь нолдаво. Мезеяк а теят, эрьвань эсензэ уцясказо...
Содат мезе, Валдай, стувтокшныя кевкстемс: эземень [113] таркас тенек покш кевесь тоско, чувтонть ало? Ванстовсь-эзь? Озамодо икеле, экше илязо уле, сравтылик ланганзо пиджакот. Бульчом, умок тевс нолдызь... Поркснизь-кайсизь кудонь-мезень путомсто юрокс. Пазось мартонзо, а карман талномо сонзэ кувалма. Витик седеем: содавтык вечкевикс тарканок, ташто кудонок. Мерят, цёковось эзь цёкордо, эзь элякале? Косто... Якить жо аволь панжиковсто.
Кевкстнят сёрмасот: мекс лиятнень ютксто тонь кочкакшнытинь? Мезень кис вечкилитинь? Содат, Валдай, лиясто лиснить эрямосонть а чарькодевикс тевть. Тесэяк истя. Тонсь ледстнить мельган пансицятнень лемест. Аволь ськамотолить. А вана сельме путокшнынь тонь лангс. Вечкилитинь, ды весе! Мекс — а содан. Кирдевсь мельсэнь вейкесь: чевте, седеймариця обуцят. Мольсь эйстэть оймень эждиця лембе. Теяк: содылить ламо. Мезе мон, тей-тов классон марто! Секскак вечкилинь кунсоломс эрьва мезде тонь ёвтнематнень, тень пингстэ оймсиль ды пештявиль од вийсэ сё^еем. Содак, Валдай: аволь весе аватне вечкить ансяк а кутмордавиця келей лавтовонь ды чирькекс мендявозь мештень кис. Аволь. Кой-кинь мельс тукшныть превень превсэ, ёжонь ёжосо сюпав цёратне. Ютксост, сёпомо а карман, монгак, тонь Виянат. Вана мезень кис вечкилинзить, оинем, кемгавксово иесэ Вияна «колхозницась». Ды те вечкемась эжди эйсэнь Тоначинь экше ёнкстнэсэ течис. Мон тонь таркасо «мезень кис» валтнэнь аволинь ёвта. «Мезень кис» вечкемадо кевкстемась корты — авечкемадо. Секскак ёртык весе тень превстэть!
Иля тално, оинем. Вечкилитинь. Мештьсэ толнэвтеме, налксемань кис, кавто иеть мартот аволинь вастневе. Истя? Мезть кортамс! Ломанесь лавшо. Седеезэ аволь кшнинь. Монгак сестэ, туемадот мейле, нолдакшнынь бриндан, валаня-нолажа валс кемезевкшнинь. Мезе лиссь — ёвтнинь, содат. Истямо мель кирдевсь потсон Модаланга якамстон: шожда кортавтомс, ды вельть стака чарькодемс. Арсян, чарькодимик, секс эйсэнь а чумондат.
Седе икеле ёвтнезь тесэнь койтнеде башка, кунсолок вана мезде.
[114] Минь тесэ, Тоначисэ, сёвномат-вечкемат, сялдомат-шнамот а содатано. Эрьвась, кие сы тей ды тееви сув пакшкекс, мик пакшаськак, — ламонь содыця, неиця, мариця ды свал чатьмониця. Пейдемат-кецнемат, авардемат-нусмакалемат... — весе те тынк, Модалангонь. Тесэнь эрицятне марить — марямс а мезе; парсте неить — ваномс а мезе лангс. Секскак содатано а весемеде, мезе моли-тееви эсенек ды тынк ютксо, Вере ды Ало. Тонь сёрмат, ёжонь арасьчинть лангс апак вано, кандыть мезе-бути вечкевикс ёжонь кондямо.
Ней топавтса энялдомат, поладса Эрий Масторсо эрямодон ёвтнемам, ледстясынь «чилисематнень», конатнень казекшнинзе тень уцяскам.
Покш, аволь пек содавикс ошонтень кадовинь, ловт, ськамон — теке келей пакся куншкасо варматнесэ эрьва ёндо пувсевиця од килейне.
Содат, Валдай, мезе мерян: аволь шождыне эрси явовомс азортомо пинень эрямонть мартояк. Тонадат. Эрьва мезес, лисни, тонадат. Тюнихань, мерят, тевть? Аволь. Тунь аволь. Паня марто эрямстонок эрьва чинь нарьгамодонзо а весть эсь пачкан мернинь: «Куш врадоволь, куш идемевсесь пурнавлизе». Оно кодамо валс пачколинь.
Ну, пурнызе-сэрнизе Пазось. Олякстомтымим.
Мейле мезе? Мезес пачкодинь?
Сован кудонтень — кияксос лепштиця каштмолема, кулозень сэтьмечи. Чеерень кашторкскеяк а марят. Куш костояк каятоволь, кадык сёвномань, вайгель! Арась... Сёвноматне эрямонть киртильть. Те виде. Каршо мезеяк а мерят. Панянь калмамодо мейле чатьмонемаськак кеняркс эзь кандо. Азё чарькодемизь минек! Те мезе, тонадокшнынь эрьва чинь булгатнененьгак? Улема, истя... Мик истямо мельскак, зярыя шкань ютазь, пракшнынь: куш кодамояк сёвныця-рангиця улевель стенатнень ютксо, эли Юртава, кудоюртонь азоравинесь, вайгельне максоволь, прянзо невтевлизе.
Содат, Валдай, орголеме кармакшнынь оймень костий те безарькс каштмолемадонть. Алкукс. Пелинь кудонтень [115] совамодояк. Панянь Тов ильтемадо мейле, зярс-бути удсинь ялгань кедьсэ. Содат, Валдай, ломанесь, тагояк ледстяса, эрьва мезентень тонады. Эрьва, эрьва мезентень! Карминь аламонь-аламонь тонадомо чаво кудонтеньгак. Стака ульнесь кадновомс ськамон эсень ризксэнь-мелявксон марто. Стака. Кода-бути весть аштян стувор экшсэ кудосо, ванан: панжови кенкшесь, ды сови... Паня! «У-у, стерьва!» — каятотсь вайгелезэ. Тейсь ёнон кавто-колмо эскелькст ды ювк ёмась. Сакшнось тень валске мартонь ниреждезь энялдомазояк: «Ну мук куш петнявкске, куш ве пенчке каяк. Кулан, каня а неят? Идемак, мук, мук!».
Свал карась седейсэнь, карась сиземань апак сода, теке унжа, эйкакшонь а чачтовомадо мелесь. Свал тень мезе-бути эзь сатно, вановтом а саевиль вальмало-косо налксиця-чийниця эйкакштнень эйстэ. Маринь эсь прям киненьгак а эрявиксэкс, пильгень нардтнема нулакс, мезекскак а маштовикс, стяконь ломанекс. Седеяк пек кармась марявомо те сэредьксэнь Панянь Тов туемадо мейле.
Шкась эсь перьканзо эзь веля, пансь икельксэнзэ удалов апак варштне. Эрявсь арсемс седе тов эрямодон. Кода а арсемс икелечидеть комськолмово иесэ? Ламот те шкава ансяк мирденень лиснить, ламот а лиснитькак, мон вана... ютынь, кода кортыть, адонь весе кемготово кирькстнэнь. «Кода улемс? Мезе теемс?» — сеедьстэ содавтнимизь кевкстематне.
Мезесь панизе мирдем калмос, сёрмалинь, содат. Апак симе — ломанель, карво а покордыль. Симезь — эвсель. Сэтьме, паро ломань — теевиль азарсь пинекс. Кайсевсь, мокшнат кепсесь, натой аванзо лангскак. Жаль марявсь яжазь уцяска авась. Марявсь тень, цёразо салава, эсензэкс пандсь тензэ кеж: мекс арась, кода весень, тетязо, мекс кассь ськамонзо. Сельведень туильть лангозост ванозь. Ансяк мезеяк а теят, мезе макссь трицязо-кастыцязо, се велявтсь тензэ мекев. Кенярксонь танстесь арасель цёранзо марто эрямсто, арасель сонтемензэяк.
Весть неть безарькс ледстнематнеде кадовинь удомо — налкставсь чаво пизэм! — Вера ялганень. Заводсо вейсэ [116] важодинек. Ве цехсэ. Эряськак аволь васоло минек эйстэ. Эрясь ськамонзо. Мирденень эзь лисне. Мелезэнь тукшнось авась, лавгамо эзь вечке, валонзо кирдеме маштсь. Скамонзо... Монгак ськамон. Мекс а кадовомс? Мекс а кортнемс авань певтеме мелявкстнэде, теде-тонадо? Яла седе куроксто шкась юты.
Чокшнеланга апак учо варштась тензэ лелязо. Аволь сэрей, аволь алкине, келей лавтов, лангс ваномс, виев ломань. Истятнэде мерить — креж цёра. Мондень ниле-вете иеде, марявсь тень, седе покшоль. Теевинек содавиксэкс. «Толя», — мельде-валдо, мокнозь ёвтызе лемензэ ды кадымизь Вера марто, совась панема нупальс, кухняс. Ярсамо, тень марявсь. Лангозон эзь варштаяк. Кувать сазоронзо кедьсэ чокшнень инжесь эзь кирдеве. Кортамо эзь ушолеяк. «Аволь лавшо кель», — меринь эськан. Кодамо илязо уле, та-кода лиссь истя — зярыя чинь ютазь таго вастовинь ъ мартонзо ялгань кедьсэ. Ней ойсинек стувор экшс. Вера каванимизь чайде. Уцяска, яла мерить, эйстэнзэ а оргодят.
Карминь содамо: важодсь Верань лелязо шофёрокс, яксесь васоло рейсэв. Рузкс ёвтазь — дальнобойщикель. Низэ кавтошка иеть кода кулось. Допрок одсто. Кадовсь эйкакшост, тейтерне.
Лангс ваномскак туекшнесь мелезэнь васолга ардтницясь. Аволь сэрей, коськана, сэря тюжа сельме, верьга човине, теке аволь цёраньгак, судо. Боксокс наразь чопода черензэ пиледе верьга токинзе эль редявикс шерже. Келей чаманзо мазылгавтсть тусто, пондакш муюктне. Вастовома, омбоце... «Ну, — арсезевинь, зярдо теевинек седе малавиксэкс, — сонсь Пазось тень кучизе, истямось эрявияк. Эсень эйкакшон арасть, сонзэ — тейтерне. Цёраськак сельмс каятыця». Капшамс эзинь капша, ваннынь, кевкстниньгак кой-кинь, васняяк, содазь, Вера сазоронзо. Пелинь, илязан пицеве колмоцеде. Шкась мольсь, таргавсь талайс, пельиешкас. Седе сеедьстэ Толя сакшнось монень. Окойники прынек мельс: пурнамс вейсэнь пизэ, сюлмамс уцясканок. Эрясь Толя вейсэнь кухня марто а покш нупальсэ. Монь — кавто комнатасо квартира. Таго [117] кавтолдомат-пелемат: илязан ёмавто истямо лембе-валдо кошом. Сынек мельс — муевсть превс путыцят, тонавтымизь: эрьвась кадови сёрмадстозь, косо эрясь. Истя теинекак. Од эрямонок ушодынек монь квартирасо. Мезекс пиксемс вейсэнь кухня мартосонть? Нупальтнеде-семиятнеде ниле, пидема-муськема таркась — вейке. Те кодамо, тонсь арсек, эрямо? Течи вейкесь муи тувтал — «нолдасынзе кисканзо», ванды — омбоцесь, вандыде мейле...
Эринек котошка иеть. А мерян — беряньстэ. Толя эрьва рейсстэ тукшнось монень ды тейтерненек туртов казнеть: ламбаськайть, жомкат, тантей ведь, мокшнашка ожо умарть... Мельсэнь: панжови кудо кенкшесь, ды прок сонсь чипаесь валдомтсы кудопотмонть. «Тетянок сась, тетянок сась!» — сееретяно, покш ды вишкине, кавонек. Кенярксонок певтемель.. .Толя саилизе тейтернензэ кавалалдо ды колмоксть-нилексть кепедилизе-люкштядилизе потолокс. Мейле килангонь юдмастонзо таргиль мезеяк тантейне.
Тонадокшность эйзэнь тетят-тейтерть. Монськак... «Авай» валось марявсь тень медте ламбамокс. Теке свал истя ульнеськак. Ярмаконь асатома? Эзинек сода. Эрсесть-эзть ютксонок аладямот? Видькстан, чуродо весть верьгелесть аволь покшке пелькстамот, ды сетькак малав свал прялевсть пеедькшнемасо. Эрямонь леесь, тонсь содат, менчеви эрьва кода. Тештяйне тейтерненек иензэ уш зярыяльть. Мельсэнь, оршневтьса мазый палясо — сехте пек мольсь тензэ ашо тюсось, — кодасынь лияназ ашо — аволь тетянзо — нернензэ, сюлман эйзэст сэнь эли якстере парсеень лентыне... Аволь тейтерне — няка. Ванат вановлить! Ветнинь эйсэнзэ эйдень кужов, налксинь мартонзо, седей витнинь. А уш кортакшоволь, кортакшоволь — а лоткавтовияк Кудонь келес баягинекс дильниль. «Те мезесэнзэ» чаракавтылимим. Весе, весе, мезе перьканзоль, эрявсь тензэ содамс! Кадык косо-бути потсон типельдсь: сон аволь монь килькшесь, аволь монь вересь чийни санганзо, — ялатеке эринь келей, панжий балягасо ацазь валдо кужосо. Те шкась эрямосон, маряви ней, ламо иень ютазь, весемеде кенярксоволь ды пиземечирькекс мазыель. «Эхе-хе-хе, — лиясто [118] мереван эськан, янксезь, — Паня мартояк ушодокшнынек кодамо а кодамо вечкемасто. Мезес пачкодинек?»
Свал кирдема мельсэть Тюштянь пингень эрьва кода витнезь-валакавтнезь валмеревксэнть: кажось ськамонзо а яки.
А неявикс, а марявикс иетне ве таркасо а аштить: одось кепети, сыресь — матры. Сась тейтерненек школав ильтема шказо. Тонсь, эсеть эйкакшот коряс, содат, зяро талномат, мелявкст эрсить васенцеде васенце классос эйдень ильтемстэ. Покшчи — ципакат сёлминеть нолдась. Кода а эрьведемс! Монь седейгаяк, кадык арасельть эсень пакшан, ютасть кенярксонь раштый, верьга ливтневтиця неть ёжотне.
Каршо чистэнть — уш чопоньпелев, илязо пужо — Толя базарсто рамась покш, сисем тюссо кувтолдыця балягань пусмо. Мизолксось, марявсь, эзь валгоне эрвастонзо. Аволь якась — ливтнезь ливтнесь кудованть. Эно кода, ванды школав! Раминек книгат, тетрадть, карандашт... Мезеяк эзинек стувто? Арась, арась! Тепггяйне чокшнень перть мекев-васов путнесь сынст портфельс. Налксесь.
Школань чистэнть стинь чоподава. Истямо чи, кодат удомат! Анокстынь ярсамс ды стявтынь Толя марто Тештяйнень. Оршнесть-тейсть. Кодынь тейтернень пулынензэ, пурныя-сэрния, оршнинь монсь, ды мейле колмонек сыргинек школав.
Васенцеде.
Ды... меельцеде.
Школасто тейтерненек... эзь велявто.
Понгсь машина алов.
Мезе мартон ульнесь, кода ютась седейган оймень чентиця вачкодьксэсь, валсо а ёвтневи. Цяк превстэ эзинь лисе. Течис янксян, мекс эзия учо. «А мезть учнемс, школась шабрасонок, ульнесь тосо а весть, кемень эскелькст юткось, пачкоди...» — истя арсезь сыргинь кудов. Ансяк пачкодинь, эль кенеринь кайсеме, мельган... истямо куля.
Келя, васоло-васоло менельёнкстнэсэ, сэнь паксятнень томбале, эри превейдеяк превей, васовдояк васов неиця [119] Инешкипазось, Мастораванть азорозо ды лездыцязо. Сестэ эно мекс Моданть-Масторонть лангсо зняро ризкс ды пайстомочи? Мекс кинень-бути максовить чанстьсэ экшелямот, лиятненень — ансяк певтеме сельведть? Мезень кис, ёвтавлизь менельсэ эрицятне, нельгизь кедьстэнь ансяк панжовиця пейдельканть? Мезень чумозо? Мейсэ минь чумотано? Мезе а истя теинек?
Кадовинек Толя марто кавонек.
Кавонек эли ськамон, эрямось мольсь, киньгак эзь кунсоло. Чикордозь, кувсезь — мольсь.
Келя, лезды оймень эли рунгонь сэредькстэ... кренчведесь. Аволь ансяк чаво — нулгодькс валт! Мекевланг. Сондензэ нардев шаштолма кельме латконтень арась. Витнить эйсэнзэ ёжост ансяк ковгак а маштовикс лавшо понкстнэ ды допрок мазя превтне. Шкадо вадря ормань пансий, кодамо се илязо уле — рунгонь эли оймень, — а муят. Сон ды эрямонь стакачитне, паксясо-косо чоподасто чоподас ливезькалематне, — кажос понгицятнень пильге лангс васень стявтыцяст. Виде-паро сон, шкась, одс аравтымизь эрямонь кинть лангс, лездась лепштямс седеень наксавтыця ризксэнть. «Вана, вана сон, эрямось! — серьгедсь тенек. — Сон эзь прядово, ванодо икелев ды эскелядо седе тов».
Мон важодинь заводсо, Толя эсензэ содась — икелекс тапарясь вайгельпеть, ардтнесь васоло киява, усксесь эрьва кодат сталмот лия ошка. Учинь эрьва мурдамонзо. Рейсстэ самозо марявиль кенярксто пешксе покшчикс. Седеяк — Тештяйнень калмамодо мейле. Арась-арась, пеняцямс лангозонзо ульнесь а мезень кис. Симемас эзь кайсеве, ярмаконзо макснинзе монень. «Кирдть, вирень баляга!» — яла мериль тень. Мекс лемдекшнимим истя — а содан. Эзь сёвно, зярдояк эзь пижне лангозон. Чатьмонемаскак, кода кой-кить, эзь пракшно. Цёратне яла кортыть: минь, аватне, ярмакт пек вечктяно, сындест башка, келя, мезеяк тенек а эряви. А содан, лиятнеде мезеяк а мерян, монь сынь, ярмактне, эзть кельмевте, эзть эжде. Толянень а беряньстэ пандсть, монень...
Эзь тукшно, ёвтаса, мелезэнь таргамозо — потязь потясь качамонть! Чизэнзэ кувта. Лиясто а сатыльгак. Мезень тансть [120] мукшнось теньстэ?! Паряк, чопода-нусманя мельтнень истя пансесь? Кавто кандолазт нурька шкас ливтсь. А содан. Вельть эзь вечкеве кургостонзо лисиця дёготень чинесь. Лепиявттанзат. Мернинь тензэ, эйстэдензэ мелявтозь. Зярыяксть мернинь. Арсинь кардамс. Мейле чапия: иля машнете, иля веше, весе тонь коряс зярдояк а ули. Асатыкстэме ломанть арасть. Вант, иляст велявто «моравтомат» эсеть каршо. Оймак ды цидярдт. Аволь уш покш зыянось — тарги...
Весть Толя рейсэв эзь молеве. Та-кода лавшомсть пильгензэ. Кумажадо алга ульнесть, валонзо коряс, теке аволь эсензэ. Кавтошка чить аштесь кудосо. Юты тей-тов кудованть — мади, юты-теи — таго мади. Эзть кирде сталмо яксемкайтне, эзть кирде! Кемсь: юты, прянзо а макссы. Монгак кеминь. Цёрась виев, ёжонзо лангс эзь пеняцякшно. «А мезть эрьва циреень кувалма чийнемс шумбрачиде — кудова», — яла кортыль сон. Арась, валонзо коряс эзь лисе. Савсь молемс клиникав. Врачось, аваломань, ваннызе-теизе ды мерсь: «Чизэнзэ колмоксть тейнеде тикше ведень пси ваннат (ёвтынзе тикшетнень лемест). Мезеяк берянь арась. Юты». Неть валтнэ совасть потмозонзо, кецневтизь. Моньгак кадымизь а паро арсематне.
Чи, омбоце котьматано, кирдтяно Толянь пильгензэ пси ведьсэ. Лезэнь таркас неть ваннатнеде допрок лоткась якамодо. «Э-э-э, — меринь эськан, — тесэ мезе-бути а истя». Тердинь «капшакай». Састь, мерема, куроксто. Кунсолызь-ваннызь, онкстызь лепштямвиензэ ды мерсть: сайсызь мартост. Толя а моликсэль. «Юты, юты, мезе тосо карман тееме, — мельсэнь валонзо. — Мезе, ней эрьва пштикстэ седе курок тов?» Врачтне кунсоломояк эзть карма. Мерсть кодаяк валгомс ветеце этажсто, чека марто машинась учось. Цяк валгстовсь кузтематнева. Паро, ашо халатсотне ульнесть цёрат. Вана мезес пачкодекшнинек.
Истя Тештяйне тейтернем калмамодо мейле ниле иень ютазь ушодовсть од тюсонь, допрок лия танстень майсеман. Теке мерят кинь-бути кинзэ трокс ютынь, вансь ды пансесь мельган тонавтозь кискакс, пандсь кежть.
Мирдем пичксема кудосоль малав колмо ковт.
[121] Колмо ковт... Тон содат мезе те истямось? Эрьвань Пазось ванстозо. Шожда ёвтамс — колмо ковт. Колмо иеде кувакакс тень марявсть.
Васня а марицякс, нулакс теевсть пильгензэ. Кармасть катардомо. Зярыя чинь-вень ютазь а лыкавтовицякс теевсть кедензэ. Доктортнэ менстясть эйсэнзэ ормадонть эрьва ёндо ды кода маштсть: макснесть чизэнзэ а весть эрьва кодат таблеткат, совавтнесть рунгозонзо ормаменькстнэнь петнякай ды салмукс вельде, пупсезь. Зяроксть чизэнзэ нерьгстнесть салмуксонть — а ловови. Ормась ялатеке эзь пота. Седеяк виевгадсь. Пильгензэ лоткасть марямодо кумажадо верьгаяк. Мадезь аштемстэ ёнксозо а велявтовиль. Аламонь-аламонь кармась понгонеме келезэ, стакасто панжтневсь кургозо. Меельцьпелев эль ёвтавильть тензэ зярыя валт.
Вакссонзо аштинь малав колмо ковт. Чинек-венек. Прянзо тодовстонть аламнеде кепедезь, чизэнзэ колмоксть пенчкесэ кайсинь кургозонзо вецана ярсамопель. Макснинь текекс симемс. Ливтнинь венельксэнзэ, полавтнинь аштема ёнксонзо. Вай, ледстнемскак стака. Сёрмадан, монсь эль а лайшан.
Арсинь, пе тенень а ули, а цидярдан. Весемеде стакаль боканзо полавтнемась. Ашти зярскак кунст — велявтома вить бока лангс, мейле — керш ёнов. Тень а топавтсак, киськесь таркань-таркань невели верьс. Икелень коряс полам дёкужакшнось, ялатеке сталмозо эйпароль. Аламонь-аламонь тененьгак тонадынь: алганзо сравтозь ацавксонть вельде карминь тееме те тевенть. Седе шождаль. Кузян коникс, рашкондан Толянь вельксэс ды зяро виень ускан коцт пенть ве ёнов. Кавто-колмо часонь ютазь — омбоце пелев. Ускан — монсень сельведть. Истямо виев, тулгов мирдем ульнесь, ней... лексиця уловоль. Ды истя чистэ чис, таргосто таргос. Сеедьстэ удсиньгак мартонзо палатасонть. Солазь солась цёрась. Аноколинь весемеде берянентень.
Истямо майсемас, Валдай, эзинь эртневе... Арсинь, а саты илыкем. Пран. Шумбрачи ды сюкпря Веранень, Толянь сазоронстэнь. Полавтнесь кой-зярдо эйсэнь. Лездась [122] аволь валсо — тевсэ. Сонтемензэ пе тень саволь. Удомояк кадновсь. Паро, палатасонть аштесть кавто коникть. Колмо ковтне — аволь колмо чить.
Чинек-венек пиштеманок стяко эзь ёма.
Лиссь Толям пичксема кудосто ансяк якшамковсто. Стявтовсь — комавтса прям, сюкпря врачтненень — пильге лангс. Колмо ков малава аштесь мадезь кониксэ, зняро, ловт, якась кельме латконть чирева. Эйзэнзэ педякшнось кодамо-бути кувака лем марто вирусонь орма. Те вирусось, ёвтнекшнесь тенек докторось, васняяк машты-куловты нерватнень. Ломанесь тееви эрий уловокс. Ушоды пильгестэ-кедьстэ, пачкоди пряудемс ды... Толянь весемеде стака чистэнзэ мерекшнесть: келя, уледе анокт весемеде берянентень, учодо. Ве шкастонть, видеяк, кодаткак кемемат эзть лияле. Эзь ярса, эзь корта, сельмензэ эзть панжтневе. Ютавтызь реанимациянь палатас. Тосоль таргодо ламо. Кодамо эриця... Аванзо, малавиксэнзэ, ялганзо туртовгак кенерекшнинек пачтямо а кемевикс ёжодонзо. Яла мерить, Тоначистэ сакшныцят а эрсить. А виде! Лисни, эрсить. Толям тосто — сюкпря Инешкипазонтень ды доктортнэнень — мурдакшноськак.
Сась шказо, ускинек полань кудов. Мандовтомо, клюка лангс апак нежеле, эзь якаво. Ускозь, эль-эль шаштневсть пильгензэ. Мадстьса кунст, рашкондан, кода палатасояк, коникенть трокс ды ушодан пильгензэ яксевтеме. Истя зярыя таргонь перть тейнинь упражненият ды массаж. Истя-истя! Тень теемеяк тонадокшнынь. Тонадат! Эрямось кармавтындерятанзат.
Аламонь-аламонь Толям путызе лездыцянзо — мандонзо-клюканзо — ужос. Ие малава аштесь азором кудосо. Пенсиясо. Тонавтнесь якамо, пурнась вийть. Сась сёксесь, ды мирдем лиссь мик важодеме. Машинасо ардтнемадо, кода икеле, арсемскак эзь савкшно. Кодат машинат! Макссть тензэ шожда тев — гаражсо та-кодамо табельщикекс. Те монень, видьстэ мерян, седеяк вадряль. Певтеме командировкатне, масторонь келес азгондематне прядовсть. Зяро мелявтынь тень кувалма! Учат — арась, учат — арась. «Вай, мезеяк эзь лисе?! Шумбра, ковгак эзь понго, эзь [123] томбаво?» — свал кирдевсь превсэнь. Кода а кирдевемс, радиось ветердезь ветердсь авариятнеде: тесэ эшкевсть, тосо пряст лангс велявтсть... Килангонь ортнэяк эзть удо. Берянесь вейкель — гаражось талаень таркасоль, ардтнемс васов савкшнось. Ялатеке чокшнеланга ней свал кудосоль. Эзть эряво ламо ярмактнеяк. Зяро кавонек туртов эрявсь... Марявсь, таго совинек эрямонь сэтьме лувонтень.
Истя ютасть кавто иеть. Берянде-мезде эзинек арсе. Эринек ды эринек. Марявсь, валаня те киванть карматано апак капша молеме Тов туема шказонок. Зяро, видеяк, маярдомат, сельведть нолдавить ломанентень, яла мерить, верде! Кодамояк пирявкс-буй ули-арась тенст? Ды мекс «верде»? Паряк...
Весть Толяс педясь козома. Те ульнесь, кирдевсь превсэнь, кода-бути кизна, умарьковсто. Ну козома... Мейле мезе? Кинь эйс сон а педси? Зяроксть пингеть перть? Юты — сынек мельс, кода свал. Толя, ды монгак, видькстан, эзинек вечке таблеткань нильнеманть. Секс панинь козонзо инзей ды медь марто лакавтозь пси чайсэ. Путнинь мештензэ лангс, зярс псист кирдеви, горчицань ды кшуманень компресст. Истя кода маштынек очобинек орманзо кавтошка таргонь перть. Стяко. «Кудонь нежетне» лезэ эзть максо. Козомась яла виевгадсь. Ормась тенек, кода икелеяк, пильгензэ сэредемстэ, эзь паневе.
Мезе, савсь пшкадемс ашо халатсо якицятненень. Ков лияв, кинень? Сынь сонзэ сеске кучизь, чарькодеви, рентгенс. Ды мезе? Тевелявсонзо... чопода таркине. Рентгенс кучицясь путсь диагноз: резэма орма, туберкулёз. Мейле мекс-бути кавтолдозевсь. Варштасть мештезэнзэ омбоцеде, тейсть верень-мезень анализт. Невтсть сынь, ёвтызь тень салава, допрок лия орма — тевелявонь карвоць орма, рак.
Мария пинекс ирныця нурька те валонть — чувтоминь, сорнозевсть канжамон. «Таго кандолазт!» — сась та-косто, кивчк ютась пачкан. Кадызь Толянь пичксема кудос. Савсь тензэ тосо кирдевемс талайс, кувать «андсть» эйсэнзэ эрьва кодамо ормаменькстэ. Операциянь тееме эзть карма. Эряволь, келя, пшкадемс седе икеле.
[124] Шкань ютазь Толянь нолдызь кудов. Монень эзть пачтяяк. Сась ялго. Вастовинек. Панжизе кенкшенть — мизолды. Эскельдясь каршон, кутмордымим. «Ну, — арсезевинь, — беряньс а пачкодтяно!» Кода эно лиякс, кинь потсо а кирдеви парос кемемась.
Якинь сэредицям мельга кода маштынь, бажинь савтомс эрьва мейсэ, мель путынь пидемс-панемс эрьваксть мезеяк лия, седе тантей, пекень пештиця. Кортамосо-мейсэ очобинь куломадо арсеманзо. Мель путынь максомс тензэ теевикс, седе шожда тевть.
Читне чиезь чийсть. Ков капшасть, сынськак эзть сода. Мирдем, кха-кха козкстнезь, чарась-велясь, котьмась кудоютксо. Ош — пирев-кардазов а лисят. Ютко шкасто, кода икелеяк, лиснинек ютамо-лытамо вирев — паро, сюк менелентень, сон эрямо таркадонок а васололь.
Ванстовсь мельсэнь вирьсэ меельцеде улеманок. Пачколинек тов ожоковонь васенце читнестэ. Кошткант# ливтнесть, кадык зярс чуросто, «ожо нармуннеть». Чувтотне кайсесть аволь умок пиже, кизэнь перть налкставозь оршамопелест. Ютксост кирдевсь нусманя каштмолема. Аволь тундо. Нармунень моронь гайтькеяк а марят. Кепедьсак вановтот — велькскат чилисема ёнов капшить, пелить а кенерить, уить качамо тюсонь пельть. Тей-тов менчевиця содавикс янганть эскелямсто Толя сеедьстэ лотксесь. Пацинесэ нардтнесь судонзо, турванзо. «Весе, Вияна, виренть марто те меельце вастовомам, — мерекшнесь стакасто лексезь оймень таргамо лоткамстонок. — Курок ожо лопатнекс — алов. Мезентень улема — сенень... — эзть прядово валонзо, таго куродызе козомась. — Арась мелем шкадо икеле туемс. Арась. Монень ансяк...»
Эзинь сода, мезе меремс. Келем кундатотсь. Чатьмонинь.
Лиссь валонзо коряс. Мон теде, чарькодеви, содылинь. Ансяк чись эзь содаво, истяко... Кода эзинь вансто шумбрачинзэ, кода эзинь мелявто, неинь, кода лавшомгады Толям, солы, теке палыця штатол. Васня кармась беряньстэ ярсамо, седе сеедьстэ козомо, верь марто аксорямо. Меельцьпелев допрок маштсь виезэ: эзь стякшново [125] натой венелевгак. Сэредькстэнть ушодсь верьга вайгельть пижнеме. Оймавтомганзо салмукссо секе тев нолдтнинь рунгозонзо сэредьксэнь матрыця ормаменькст. Сась шказо, ды... Ковгак теде а туят.
Мезе теинь, кодат мелявкст ютавтынь седе тов — содави.
Кияк а соды, кода муекшнизе Толянь, педякшнось эйзэнзэ оймень нельгиця те ормась. Мон яла мерян, таргамось чумо: нилезь нильнесь папиросатнень. Ансяк мади вейкесь, кирвазти омбоце, мельганзо колмоце... Мезе эйстэст мукшнось, мезень тансть — превс а саеви. Эсь прямгак чумондан: шкастонзо эзия карда, эзия лоткавто таргамодонть. Эряволь, эряволь кородомакс арамс, стямс те апаронть каршо! Эряволь... Мон... Яла пелинь, сёвномат иляст лисе-кирвазе. Лиссь оно мезе. Толянь куломадо мейле каразь карась седейсэнь тень кувалма янксемась.
Вана истямо, Валдай, уцяскам! Кавксть лиснинь мирденень, кавксть чопавтнинь вейсэнь эрямонь сёлтонтень, кавксть кенярксонь таркас — лажамот. Истямо нурькине шкань перть савсь тень ливтемс ниле кандолазт, лететсь нилексть ютавтомс калмамонь мелявкст, лайшемат, майсемат... Арась, чанстесь тень эзь муеве. Теде а мезть ёвтнемс — содат...
Вана теть, дугай, моро, кувака моро вечкемадо! Кодамо варма, кона ёндо тень кандокшнызе — а содан. Маряви, а соды сонсь Пазоськак.
Вечкема...
Те — лушмова, лей ды эрьке велькска сравтневезь валскень тусто сув: чачсь ды ёмась. Истяяк меревлинь: те чопода нупальсэ пицька сардыне — гувк кирвазсь ды мадсь. Седе тов эскеляк састо-састо, токшезь, козоньгак илязо эшкеве конят. Вечкемась — те верде алтазь аволь свал келей, аволь свал валаня ки. Вана сон мезе! Шныть эйсэнзэ, цяпить тензэ кода маштыть. Истят валткак улить: шалны, теке чадыведь. Мезе виде — виде! Седе а ков. Шалны, куш пилеть потомдыть. Ансяк а чарькодеви, мекс ламолгадыть урозонь кудотне. Те... шалттонть?
[126] Келя, сон, вечкемась, эрямосонть весемеде покшось — прявт! А истя, Валдай, а истя! Вечкемась, кодамо цитниця илязо уле, эрямонть штельксэзэ, аволь сонсь эрямось. Вечкитинь... Вечкимик... А мезе лиссь?
Содат мезе, Валдай, сизинь. Саты течис. Истят ледстнематнеде лавшомгады Тоначинь эрицяськак. Ловнок таланттон-уцяскадон ёвтнемам. Ловнок. Кармат содамо малав весе эрямопингем. Сы сёрмасон поладса. Моли?
Илямак сёвно, иля нария лангозон сёрмам кис. Кувака лиссь. Чумось аволь мон. Аволь мон сонзэ сёрмадыя — уцяскам. Сон тень истямо каворьксэв ки ацась, ков молят.
Энялдомат, ялгинем — ёвтнемс седе тов эседень, — топавтыя. Мекс тонсь, Валдай, течинь чис кикскеяк эзить тешкста явовомадонок мейле эрямодот? Мекс? Арсят, мелем арась содамс? Учан, учан...
Вияна, Течинь ды Тоначинь ялгат.