Тесэ ды тосо (2013)/Ламбамо нартемкс/4
| ←3-це глава | Ламбамо нартемкс (2013) by , edited by Ломшина Л. А. 4-це глава |
5-це глава→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 216—233 |
[216]
— 4 —
Мелесь — ютамс базарга — совсесь Элювань превс аволь весть. Сы — туи, сы — туи. Истят уш сынь, мельтне. А кирдевикст. Эрявсь тов пачкодемс аволь эсь прянь невтнеме, аволь сельмень микшнеме, тевень тееме — содамс, кодат ды кона ёнов айгить сюронь, васняяк, ды лиянь-мезень питнетне; содамс, зярдо ливтема розенть ды товсюронть, зярдо — суронть; ён миемс сюронть почтсо эли апак яжавто. Истяяк эрси: кадсак тундос — арсят, седе ламо саят кисэнзэ, лиси мекевланг, ансяк ёмси утомсо кирдезь. Покш тевесь — кастомс-урядамс, аволь вишкине — нолдамс кастозенть тевс. Нолдамс варма мельга иень перть таштазенть, сень, мезе макссь Норовавась, — превть а эрявить.
Меремс видьстэ, ульнесь мелезэ — кадык эрясь сон потсонзо кекшезь — лисемс ломань юткскак. Иезэнзэ куш весть стувтомс эрьва чинь эвтематнень, кудоютконь ботамотнень, марямс лия ломанень вайгельть, ковгак а капшамс, ёролдомс ды ютнемс тия-тува.
Сундерьгадозь, стадань новолемадо ды чокшнень тевтнень теемадо мейле, Элюва ютась Олдайнень. Самозонзо азоравась кенерекшнесь пирестэ совамо. Анокстыль ськамонзо эрицянь стувор — розень кши, салтозь куярнэть, апак ватксе пидезь модамарть.
— Шумбрачи, Олдакай! — мизолдозь, теке вечкевикс ялганстэнь, гайгиця вайгельсэ пшкадсь стуворонть перька котьмицянтень Элюва.
— Шумбрат, шумбрат, Элюва патяй, — текень арсесь совицянтень Олдай. — Озак, каванятан.
— Арась, Олдакай, а карман ойсеме, шказо, несак, — ве. Ярсак, иля вано лангозон. Мон сынь мельгат.
— Нейке? Те ков вензэ лангс? — аламнеде талакадозь кевкстизе авась. Кепедизе вановтонзо куяртнэстэ, варштась чокшнеланга якицянть лангс.
— Иля тално. Аволь нейке. Вандынь чиденть кортан. Вандынень эряват. Атянть марто прынек мельс молемс [217] Кочкурбуев, базаров. Умок араселинь. Превсэнь талай кирдян, лисемс кодаяк а лисеван... Валскень тевтнень минсь тейнесынек, чинь — кортасынекак кода-мезе.
— Монь ванды тейтерень чиявтомо тердимизь... — валтнэнь нильнезь ёвтызе тувталонть Олдай.
— Те кие чаулась, сёксесь тензэ эзь учово? Кинь истя стардызе? — сась мелезэ содамс Элювань.
— Покшкарень Ашаень цёразо, — марясь каршо.
— Покшкартне, теня... кона ёндо теть малавикст? — эзь ойма, яла кевкстнесь, теке эзь сода, лездыцянь вешницясь.
— Кода меремскак а содан, — кавтолдозевсь Олдай. — Нилеце юронь.
— Сестэ а мезть якамс. А мезе теть тосо теемс. Бути сельметь тетьксемс? Ваномс, кода симить-каванить? Монь койсэ, мезеяк паро Покшкартнень кедьсэ а неят. Сак, иля арсеяк, монень. Янксеме а кармат, вансак ва. Кортазь шкаванть ульть монь кедьсэ, — кармавтыця вайгельсэ лодорсо певердсь валонзо чокшнеланга якицясь, — свадьбадо берянь, содат, а ули. Кода?
— Чинзэ лисезь, мерят? — арсезевсь, одс кевкстизе Олдай, кепедизе кедензэ ды нежедизе сурсо алце турванзо.
— Чинзэ лисезь.
— Паро. Кортынек, — шождасто таргизе оймензэ азоравась.
Стуворонть вакссо карадо-каршо аштезь, аватне кортазевсть пирень-паксянь тевтнеде, лиядо-мезде.
— Куярот ламольть тедеде? — кевкстизе Олдаень Элюва.
— А пеняцян. Ульнесть. Кавто «породань» виднинь. Вейкесь уш пек пароль. Видьмекс кадынь. Прок ожо тулевкскеть аштить пандянть лангсо. Шкаст куяртнэнь, мерема, ютась, лопаст тюжасо вельтявомо кармасть... Кода эсеть?
— Ды текекс. Монь помидорон тедеде ламо. Кенерить-арась — а содан. Паро, эзть наксадо. Лиясто ацазь пандятне эрсить. Ну, арсят, а ков теемс улить. Я! Мезеяк а кадови.
[218] Весе наксадыть. Васня таркаваст путнесыть, парьга-кува, мейле мекев ливтнек. Мон яла пижестэ салтнян. Учок, зярдо кенерить.
— Моньгак, Элюва патяй, вадрят. Монгак текень тейнян. А кенерить — салтсынь. Телесь кувака. Весе пурнасынзе. А кочкси.
— Виде, виде, Олдакай-парочи. Ламо тензэ эряви.
Истя каляказь, лиссть ушов, кузтемпес. Явовомадо мейле Олдай серьгедсь туицянть мельга:
— Виряз лелянень пельдень сюкпря!
— Паро, паро, дугай! Ёвтан.
...Стясть нить-полат, кода свал, чоподава. Ашолгадозь оймсемань а содыця Вишкайня потявтынзе скалтнэнь, педизе ды кайсизе кедьгева зярс лембе ловсонть. Кундась кувака килангов пурнамо-сэрнямо. Эзь лужале, тейсь валске мартонь тевензэ атяськак: симдинзе, каясь ярсамка лишметненень, урядынзе кардост, каясь товт саразтнэнень, меельцекс тенсизе кардазонть. Мезть кортамс, каня лововить тевтне? Теде башка — кизэ. Паксят, лугат, вирь... Ансяк веляк. Ниськак ай-ай-ай! Вейкень соды, сеяк рузкс: «Давай, давай!».
Путызе ужос тенстенть, таргизе кузтемалдо дёготь марто парненть. Кундась крандазонь чаротнень ваднеме.
— Тикше каить крандазонтень? — дильнезевсь кузтемпестэ Элювань скрипкакс гайгиця вайгелезэ. — Истя арсиньгак: монтемень... толга а кепедят. Куш кортак ломанентень, куш иля!
— Каинь, каинь, — сэтьместэ, ёнкстамонь апак сода кемевтизе музгордицянть чаронь вадницясь.
«Мезть мартост педсемс, — эськанзо поладынзе валонзо, — вейкеть сынь, тапарязь прятне. Тонась ки эзь максо «тонавтомасонзо», теяк теке. Мик валтнэньгак вейкетьстэ чевелить: таргазь, прок вешкезь, пачкодест седейс. Истяяк мереват: сынст чикордомавтомо — ламот мерить, онгомавтомо — цёраломанесь, секень вант, ёмаволь, рудаз потс ваяволь. Сынь, аватне, кармавтыть чеерень кундсеме, сынтемест атяка псакакс теевлинек. Покш тевтнень, [219] а мезть сёпомс, цёрась сяворды, а вана вишкинетнень — козонь пракстат понгавтомс, козонь пенченть, ваканонть, койменть, цёканьзюронть, муворонть путомс — тевекс а лови, ваны лангозост мельде-валдо. Аволь вейкеть, содави, цёратнеяк, ялатеке аватнень марто иля пелькстне, носкт ды тейть эсь теветь. Каят вал, каршот — кемень...»
Кардазъютконь азорось тонгизе меельце ваднезь чаронть ваднезь петькелентень, нерьгстызе чекушканть, нардтнинзе коське тикшесэ кедензэ. Сайсь сянго. Топавтызе нинзэ меленть — каясь крандазонтень экшесэ качадыця пиже тикше. Таргась эй кельме ведь, пештизе пелевидьга лагунонть ды вельтизе, илязо эже, тикшесэнть. Чись кувака, валскесь алтни пси, улезэ мейсэ явавтомс симеманть.
— Тон курок? — таго каятотсь кузтемпестэ Элювань вайгелезэ. — Ярсатано адя, шказо уш оно зяро!
Лиссть стувор экшстэ.
Элюва таргась горобиясто од покай, цёко марто якстерестэ ды сэньстэ викшнезь каркс ды лия оршамопельть.
— Мазыят, — эзь кирдеве, мельспародонть муст-муст пейдезь, мерсь Виряз атя, эрзякс, умонь койтнень коряс оршнезь Элюва лангс ванозь, — пангось ды пулаесь теть вельть молить. Теке сэрьс касыть. Одирьва...
— Саты, саты... Прок васенцеде несамак, — аламнеде визделгадсь Элюва стенас понгавтозь чавачамонть икеле чарамсто. — Тонгак оршак ванькс панар, оно анокстыя. А пежеть, чуродо весть листяно ломань юткс. Истя, атя?
— Истя, истя, мазыйнем.
Калдорк — марявсь кудыкельде. Панжовсь кенкшесь, ды тарчксонть трокс эрязасто эскельдясь Шорянь Олдай.
— Вай, авакай, ды тынь а содавтадояк! Аволь венчамо сыргиде? Допрок од ломанть! Виряз лелянь пракстанзо, панарозо ловдояк ашот, — пеедькшнезь ветердсь, прок кансёрот чулгсесь, совицясь.
— Неть «одтнэнь», Олдакай, шказо латкос сявордомс, — полавтызе кецнемань кортавксонть Вишкайня.
— Истя иля корта, Элюва патяй, пежетьс иля совсе. А мезть «латкодонть» шкадо икеле ледстнемс. Сонсь сы-[220]панжови, апак терде... Кодат кармавтомат тень кармить?
Аватне каштомикеле кортнесть чинзэ перть теема тевтнеде. Виряз учомо эзь карма. Шкась таркасонзо эзь аште, эрявсь капшамс.
Кардазонь келей ортатне панжозельть келес. Тештине таркасонзо эзь аштеве, чавсь пильгесэнзэ, учось келей ки лангс нолдамонзо.
Аламос аштезь лиссь Элюва. Кедьсэнзэ юдмине ды та-кодамо тапаркс. Мельганзо — Олдай.
Вансь Виряз, ды кодаяк эзь саеве вановтозо. Прок васенцеде несь эриялганзо. Ашосо прясто пильгс. Лавтов ланга, мештева ды руцянь алга чирева якстерть-раужо викшневкстнэ седеяк ашолгавтсть оршамопельтнень. Аволь покшке — а сэрьс, а келес. Кирьксаня чаманзо мазылгавтсь валдо, мельстуиця мизолкс. Кода эрьва аванть мазылгавтыть мизолкссо налксиця турванзо! Зяро кенярксчи улевель модамасторонть лангсо, седе сеедьстэ сакшновольгак тенст паро ёжось. Сестэ Моданть лангс седе чуросто пракшновольть потмура чить ды сынст марто сюлмавозь сёвномат-ацирьгалемат! Ве ёндо ванозь, Элюванень кодгемень кодаяк аволить максо. А стяко Олдай, кадык пеедькшнезьгак, тешкстызе: «Аволь венчамо сыргиде?».
Элюва путызе кансткензэ лагунонть ваксс, вельтизе тикшесэ; озамо таркаванть, тикшенть ланга, ацась чапан; чалгась удалце чаронь чекушканть лангс ды ливчанясто кузсь-озась крандазонтень. «Сы иестэ, тельня, а стувтса, раман тарантас. Те ков истя маштови — ридвансо базаров?! — ций-буй ютась пряванзо мелесь крандаз ирдезтнэнь юткова пильгензэ нолдамсто. — Пильгень допрок раужкадыть. Питнезэ, каня, зяро? Сти, пелян, ламо... Теяк виде: ков тарантассонть кармат ардтнеме, кува? Мон чей аволь Паксютычан. Ялатеке рамамс эряви. Питнезэ чей аволь лишмень питне. Ней прок сюпав боярт ардовлинек...».
Чипаесь, зярс пурнасть-сэрнясть, а неявикс кузтемаванзо кенерсь куземе Пиргужонь каршо эрицятнень латопряст видьс. Менелесь — сэнь баяга. Кадовсть ды арсесть, кона [221] ёнов сыргамс, мезе теемс седе тов, сэнь алкс ашо пельнетне. Варминень сульть эзь маряво.
Эрьмезьвелесь ютавсь. Тештинень панемс эзь эряво.
— Маней, паряк, а туи пиземе, — колызе чатьмонеманть Элюва.
— А туи, — оймавтызе кавтолдыцянть атязо. — Лопатне ведьповсо вельтязь. Те, кортыть, манейс.
— Улезэ Тонькс. Лисиндеряй лиякс, копачамс ули мейсэ — алганок чапансонть. Чись кувака, эрьва мезть эрсить.
Чатьмонезевсть.
Кадовсь удалов пекстазь, крёсттомо церьковась, ахолдась сёлмосонзо ведькевесь, ёмась чувтотнень потсто эль неявиця калмазыресь. Кись тусь аловпандт, куроксто поладовсь вандора пандочамава. Валскесь манеель. Манеель, пертьпельксэнть лангс ванозь, седейсэнтькак.
— Сыргамстонок, зярдо Олдай марто, прок ашо локсейть, лисиде кузтемпес, ванозевинь лангозот, — видькстась нинстэнь Виряз атя. Лишменть эзь эрязкавто. Крандазось эзь калдордо, эзь сорновтневе.
— Мейле мезе? — киткавсто пейдезь, згилязь ёвтынзе валтнэнь вакссонзо аштицясь.
— Мезеяк арась. Истямокс васенцеде неитинь...
— Оршнезь? — раказевсь Элюва. — Тонадыть, сыре атякш, ванномон апак оршне! У-у-у, визькстэме!
— Прок пейделька ашолдыть кузтемпесэнть. Алкукс. Ёвтык, мезе истямось вечкемась? А? — абунгавтызе аванть апак учонь кевкстемасонзо Виряз.
— Вай, авакай! Тон, сыре панго, маряви, сырнеме кармить. Кандолаздо эряволь арсемс, сон оно мезде ушодсь. Од шкат сась мелезэть? Течинь чис а содасак, мезе те истямось? — меельце валтнэнь ёвтамсто пеедькшнезь дондядизе кевкстницянть кенерепакарьсэнзэ.
— Ужо, ужо, иля пейде. Ёвтык, эрь, ёвтык, — назойгадсь, кармавтсь Виряз. — Тон арсят, шожда ёвтнемс? Шожда чарькодемс те валонть смустензэ? Э-э-э... Иля арсе, эрьванень а чулгови.
— Ужо, ужо! Тонь коряс, лисни, вейсэ важодиця кавто цёратнеяк вейкест-вейкест вечкезь эрицят, истя? — кода кортыть, стенас лепштизе нинзэ Виряз.
— А тов, атя, пурдыть. Важодемадо башка, цёрань-авань тевтькак ютксост улест. Кода эно...
— Эрь вана! Тонсь понгить туворонтень.
— Те кода истя? — эзизе чарькоде Элюва.
— Истя вана! Тон ансяк мерить: вечкемась — вейсэ ускома-важодема. Ней, ялгинем, лиякс морат: цёрань-авань тевтькак улест...
— Паро, паро, кундымик! Кода тонсь чарькодьсак вечкеманть? — поладызе кортамонть Элюва.
— Истя: вечкемась — тундонь чадыведь, шалны-теи таргошка ды скими, карми чудеме кизэнь сэтьме чудемасо. Эрсить, мерема, те шкастонтькак талномат. Виев пиземеде...
— «Сэтьме чудемась» — те важодема, вейсэ улема. Истя? — лавтовсо тутмадизе мирдензэ Элюва. — Ве лувс прынек, текес.
— Тонь теке морот — важодема. Виде. Ансяк сэтьме чудемантень эряви нардев неже — эйкакшт. Сынтемест... — Виряз эзинзе прядо валонзо, чатьмонезевсь, ледсть мелезэнзэ Валдоня ды Лияна тейтерензэ, конатнень некшнилинзе пек чуросто ды конатне свал седейсэнзэльть, сакшныльть истят ёжоткак — прок кулость.
— Тонь вана те нежесь сяворсь... Мекс эзь лезда? — сезизь арсеманзо Элювань салава, теке эсь пачканзо, ёвтазь валонзо.
— Мекс, мерят? Тона нинть марто эрямодон содат, ёвтнинь а весть. Нежем нардев ульнесь, эйкакшон лангс пежеть пеняцямс. Нежесь а чумо. Монсь лавшолинь, монсь. Нейгак, содазь... Мезеяк а теят, авам истямокс чачтымим: потамосо эсь прянь идицякс. Арсинь, туян лиянень, [223] лиянть кедьсэ эрьва чинь сёвномат а улить. Понган валдонь масторс. Э-э-э... бажамотнень келейть сёлмост! А стакаль неемс, мезес ветясамам кудонь кадомась, дух а стакаль. Ды вана... Зяроксть марсия: «Тосо вадря, косо минь арастяно». Арась, сестэ, тонь марто васень вастовомастонок, теде эзинь арсе.
— Янксят? — гувкадсь, казямосто пшкадсь авась. — Кенкштне панжадот, а кирдян.
— А кирдят? Кирдят. Варштынь течи валске лангозот ды мерезевинь эсь пачкан: «Няка!». Кирдят, дугай, кирдят. Ков туян сисем иень перть вейсэнь эрямодо, важодемадо мейле?! Сисем иеть чинек-венек... Вейсэ стувор экшсэ, вейсэ ве велькс ало. Ней жо — ды те аволь васенцеде — «кенкштне панжадот».
— Сестэ чатьмонть!
— Таго сёвномас прынек...
Удалов кадовсь покш, лей чирева сравтневезь Веждей-велеськак.
Кинть кавто ёнга ожолдсть — таркань-таркань апак нуе, седе ламо копонясо — товсюронь, суронь, вишень, кснавонь умат. Умарьков. Виде-паро нуемань-пивсэмань шка. Анокстамонь, таштамонь ков. Видемс стака, кеменксть стака урядамс кастозенть, кайсемс-путнемс мацтка-кува. Тевтне ламоксть ламолгадыть.
Апак учо Виряз атянь мельс ледсь тундонь видема шкань чи. Уманзо видемстэ каятотсь велькссэнзэ менелень сэнь отьмастонть баягинень вайгель. Ль-ль-ль... — нурьгезь нурьгсть ванькс, сиянь жойть гайттне. Кепедизе — стувтынзе тевензэяк — прянзо, бажась неемс кеняркстонть элякалиця нармунненть. Талай вансь. Окойники муизе. Оно ков кузи редямганзо, менель тёкшкес! «Ванодо, ванодо, косан», — яволявтнесь норовжорчось морынесэнзэ. Састыне, истя жо моразь, валгсь седе алов ды, зярдо моданть мештес кадовкшнось аламо, празь прась тикшесэ вельтязь маласо лей чирентень. Истят ломантнень ютксо тевтнеяк. Кузеват верев — кармить ломанькс ловомот, мелеть ваномо, кунсоломот. Кие ломанькс а путсы, саемс, Паксютычень?
[224] Элюваяк мик... Эно кода, сюпав. Эрьвась бажи савтомс тензэ. Кадоват алов — кияк а редятанзат. Кияк! Теяк виде: валгомскак эряви моразь.
Лишмесь сыргозтизе ветицянзо арсематнеде. Маризе, олякстомсть ведьметне, ды лиссь крандаз чаронь кикстнэстэ.
— Ков, ков?! — рангстась, мик лишмесь тандадсь, Элюва. — Каня а неят? Мезень кис кедьсэть ведьметне?
Виряз ноцковтызе вить ёнксонь ведьменть. Якстерть-тюжа Тештине паркстась ды луньк-луньк тусь ардозь. «Сестэль, атя, тундо, ней сёксень нувсемат, секень вант, ушодовить, варакань «ка-а-ардо» башка мезеяк а марят. Ютась тундось...» — поладовсть ледстнеманзо.
Пачкодсть Сэняж лейс. Ансяк, мерема, лемезэ лей. Чудикерькс. Сэдь вельксканзо арась. Чирензэ венежат. Кись юты троксканзо сэдтемеяк. Ютамо таркадонть башка, Сэняж а неявияк — чиреванзо каль куракшт.
Виряз лоткавтызе лишменть. Атякс, апак капша, састыне валгсь таркастонзо, олякстомтызе трокс пикскенть ды нолдызе Тештинень симеме. Лишмесь симсь цёрсо, мерят чи ды ве эзизь симде.
— Симемат сась? — пшкадсь Элюва поланстэнь.
— Нуртяк аламошка.
Авась штавтызе лагунонть. Таргизе потомксонть. Каясь кечинес ведне, копордась сонсь ды венстизе Вирязнэнь. Тона кечиненть чамдызе потмаксос.
— Та-а-антей ведеть, свал улевельгак истямо, — апак арсе, лиссь уш истя, скирдызе каваницянзо Виряз. — ... Мерть, кинек пелезэ удало.
— Тон седе эрязынестэ маштат?! Капшамс эряви. Мезень лезэсь чикуншкава самодонть? Чарак седе!
Виряз марикскак эзь тее. Тонадсь певтеме превс путомазонзо. Учизе, зярдо Тештине прядсы симеманзо, кепединзе ажиятнень, сюлмизе трокс пикскенть, озась тарказонзо, ды сыргасть седе тов.
Кинть кувалма раужолдсть теле лангс видематненень анокстазь модатне, кува-кува сыреждсть апак нуе сюронь [225] умат. Седе тов, вить ды керш ёнга, ванстсть неть тюстнэнь вирень пирявкст. Курок сы сёксесь ды лексти лангозост ожо коштсо; лексти ды кайсевтьсынзе кизэнь руцяст-пацяст.
— Таркатне кодат мазыйть! — сельмень сявадозь, жой вайгельсэ мерсь Виряз, перьканзо ваннозь.
— Улевлинекак минь истят мазыйть, — пеняцязь, мезде-бути мелявтозь путсь валт Элюва. Теке басом чевтень кис шикадсь кутьмерензэ алов тикше пакшке, кепедизе чапан пенть ды нежедсь теезь «тодовонтень». Нолдызе прянзо мештезэнзэ ды снартнесь сутямомо.
Истя пачкодсть Пелевелес. Лемдезь истя а стяко. Вишкине вельть. Комсешка кудот. Эйстэнзэ саезь кадовить Кочкурвелес кавто-колмо вайгельпеть. Видеяк, куроксто вастовсть те покш веленть пекстневиця вальма — прок удыця — кудонзо марто.
Пиргужтне састь шкастонзо. Келей совамо таркантень апак пачкоде — нурсемат, карусельть, налксемат. Седе ве ёно — кортамот ды кортамонь увт.
Эрьмезьвелень «сельмень микшницятне» ютасть карусельтнень-мезтнень вакска керш ёнов, тов, козонь лотксесть лишмесэ сыцятне, косоль човолось.
Базарось ансяк кармакшнось совамо вийс. Морасть атякшт, парасть реветь, скалт, цяхасть лишметь. Косо-бути киштеме тердсь гармония. Микшницятнень вайгельдест сорнось базаронть велькссэ коштось. Эрьвась шнась эсь товаронзо. Кодамо кельсэ кортась кашкиця, ламо вайгельсэ рангиця ломанень те пизэсь, кевкстнемс а мезть. Покш Кочкурвелесь — эрзянь. Перьканзо велетнеяк лия кель парсте а содыть. Кедень кемть, понань кемть, панарт, понкст, книгат, ленгеть, карть, почт, пангот, эскеть... Мезе тесэ ансяк арасель! Ванат — сельметь кадовить.
— Тон аштек, мон ютан-варштан, — мерсь авась крандазсто валгомадо мейле; варштась, пуворявсь-эзь руцязо, витизе прясонзо пангонть ды чопавтсь гайтте-вайгельде шалныця эрькентень.
Виряз перьгавтызе лишменть. Панст ведьмеде сюлмизе крандазонтень. Тезэнь путынзе каршавтненьгак. [226] Кавшакавтызе тикшенть. «Порть, Тештине, порть! Пинеме эряволь саемс, — янксезевсь каваницясь. — Кадык эно, тикшеськак а берянь. Сизить, неяви? А? Оймсек, оймсек... Ха, ды те минек велень Алькань Троша! — эль эзь мере марямга, зярдо неизе аволь васолдо эсь велень туторо кутьмере вензав цёранть. — Вант вана».
Пельсь Виряз, туиндерят, илизь кильде ят ломанть лишменть.
Текеде мелявтсь Трошаяк. Вастовсть, шумбракстнесть-тейсть ды прасть мельс ванстомс вейкень-вейкень полавтнезь. Троша те лувонть лиякстомтызе.
— Монень а мезть тува якамс, цёран якить. Секскак тезэнь кадован. Ютак азё.
Сась Элюва.
— Варштынь ланга-вакска. Шумбрат, Троша! Вантака, кода ладс лиси. Лишметь марто тон?
— Кода неят, — путсь вал Троша.
— Минь уш кортынек, — ёвтызе Виряз. — Адя ютатано.
Васня полатнить ютасть кудоютконь кедьёнксонь ды кедьгень куронтень. Эрявсть рамамс пицькат, сапонь, аламошка эскеть.
— Зяро питнест вана нет пицькатнень? — невтсь сурсонзо Элюва.
Ёвтызь.
— Вана нетнень? — невтсь лиятнень лангс.
Ёвтызь.
— Зяро пицькат те кувтынесэнть? — сайсь ве керьмине ды эль эзизе нерьгста микшницянть судо алов.
Ёвтызь.
— Тень эйсэ?
Ёвтызь. Казямо вайгельсэ.
— Зяро лиси ве сардыненть питнезэ?
— Ловинк.
— А вана те кувтань ве сардыненть зяро питнезэ?
— Саик ды ловик! — эзь кирдеве, лаказевсть микшницянть кежензэ.
— Конатнеде?
— Вана нетнеде, — венстизе кедензэ. — А питнест кодамо?
Микшницясь ёвтызе.
— Ужо, ужо, аволь нетнеде, — полавтызе мелензэ. — Вана нетнеде, нармунесь эйсэст мазыйстэ артозь.
Ёвтызь, зяро пандома.
— Вай, вана нетне седе мазыйть! Эрде нетнень...
Окойники те товарось рамавсь. Истя жо кевкстнезь, ваннозь, безардемас пачколезь, рамасть сапонь, пелькстамос пачкодезь — эскеть.
Мольсть сюронь микшнема куронтень. Эйстэнзэ ламо.
— Зяро вешат? — пшкадсь Виряз товсюронь микшницянтень — ашназа тюс, кувака судо, ваньксстэ наразь чама бурина цёрантень.
— Кода теть меремс... — мокнозевсь, аволь микшницянь кельсэ ёвтызе питненть.
— Аламо, аламо, — мелявтозь тешкстызе Элюва. — Мекс истя, кода арсят?
— А мезть арсемс. Со...содасак тонсь, ко...кодат тедеде товсюротне у...ульнесть — гуй а ютави, — ёвтызе мелензэ микшницясь.
— Эзик варчне Сурошов ливтемс? Тосо, келя, седе питней сюрось, — пшкадсь Виряз.
— Арась, тов эзинь пачколе, — прядовсь тень эйсэ кортамось.
Апак капша, ваннозь, ютасть розень микшнема таркантень. Тесэяк ули мезе саемс. Ансяк рамак.
Элюва шикадизе ве кескавонтень, кона видьс шикадевсь, кедьлапанзо. Пштистэ ды талай вансь коморосонзо эрьгана товтнень лангс. Каясь колмо-ниле пей лангс, каволясь-тейсь, арсезевсь. Аравтызе коморонзо судонзо алов: никсти — прянзо кепедьсы, никсти — таго кепедьсы. «Паро, мезеяк а мерят!» — тешкстызе эськанзо ды каинзе товтнень мекев [228] кескавс. Нерьгстызе кедензэ лияс. Таго ваннось-никсесь. Меельцекс шождынестэ таргизе оймензэ ды мерсь:
— Ва-а-адря сюро ливтить! Зяро вешат?
Аволь сэрей, кокша пря, якстере чама алясь седеяк якстерьгадсь мельспародонть, шнамо валтнэде. Ёвтызе питненть.
— Аламо, цёра, аламо. Истямо товаронть кис... — эзинзе прядо валонзо Элюва, арсезевсь: «Моньгак а берянь розем, истямо питнеде, арсемскак а мезть, а максса».
Тоско жо, теке куросонть, розень микшницянть вакссо, торговасть почтсо. Тесэ, сеске редявсь, седе ламольть рамсицятнеде.
Элюва кевкстнесь-исковась, ваннось, пижнесь, чевелясь, пелькстнесь микшниця цёратнень марто. Виряз седе ламо чатьмонсь. Содась, рамамо низэ мезеяк а карми; сонензэ эрявсть кевкстнемс питнетне. А вана салтозь куяронь партнень икеле пельчасонь перть аштемазо превс кодаяк эзь саеве. Эзть юта карень куронть вакскаяк. Тень зяро питнезэ, тонань? Те мекс истямо, тона? Вирязнэнь марявсь, пе а ули стяконь, кода сонензэ марявсь, неть кевкстнематненень. Ютызь базаронть весе. Лотксесть, козонь варштамскак аволь эряво.
Окойники пачкодсть лоткамо тарказост. Троша шабраст чинезэяк арасель.
— Вай, те кода истя? — вайкстнезевсь Элюва ды, теке нарвицька, кармась чарамо крандазонть перька. — Вадря куш мезеяк эзть сала. Кемть вана ломантнень лангс. Вантака, мезе теить!
— «Мезе теить»... Тонсь чумось — лытыть келеть лисемс, — «озавтызе» вайкстницянть Виряз. — Мезе ней, чоп тонь учомс?
— «Чумось», «чумось», — ацирьгадсь авась, пупсемань валтнэнь марязь. — Учомаль уш зярояк. Теня, адяка арбуз раматано, оно, овсе маласот.
Раужо, прок дёготь, менчевезь черь васолдонь цёратне тевень аразде автнесть арбузост вакссо кургот. Рамицятнеде аламольть.
[229] Элюва рузкс кортамо эзь машто. Савсь атянстэнь кундамс тевентень:
— Арбузик нам.
— Катор?
— Ды вот этот, — венстизе кедензэ чопода-пиже, суликакс цитниця арбузонть пелев.
— Те вельть покш, — кардызе Элюва.
— Сэвеви, иля пеле, — оймавтыксэлизе нинзэ Виряз.
— Покш, покш, — эсензэ содась авась. — Содат, зяро сти?
— Иезэнзэ весть. Иля уле зобнякс.
— Арась, арась, те а эряви, — эзь арсеяк потамо Элюва.
— Вон тот подай, — Виряз невтсь сурсо лия лангс. — Нет, нет, вон тот. Ага, этот.
Микшницясь путызе невтезенть онкстамс.
— Чатырь кило, дарагой, двести грамм!
Элюва салавине тохмадизе атянзо бокас:
— Каня а неят, кодамо покш? Седе вишкине саема. Седе аламо пандома. Адяка оно сень, шабранзо арбузтнэнь варштасынек. Паряк, сонзэ седе вадрят?
— Адя. Кочкак тонсь, — эзь кирдеве Виряз, кепететсть тортанзо.
— Монтемень теяк теть а тееви. Яла мон ды мон, — эзь кадово, пизякадсь Элюваяк.
— Взвесь вон тот, — пшкадсь Виряз атя муюков, чентязь чама тунь од цёрантень.
— Три с половиной кило.
— Те ков истямонть, мокшнашканть? Те мезень арбуз?
— Проверька во-о-он тот, рядышком. Виде, виде, этот.
— Ровно четыре кило двести грамм, — ёвтызе чентязь чамась.
— Мерть, кадык пельсы. Паряк, ярсамскак а маштови... — ледстизе безарькс кочксицясь.
Муюков микшницясь ливчанясто саизе арбузонть элезэнзэ ды пеельсэ пельсь варине, невтизе таргазь палнэнть.
Эзь кемевеяк: мезесь эрявсь, сюк Инешкипазонтень, кочкавсь. Виряз кавто кедьсэ лепштизе ине рамавксонть мештезэнзэ. Элюва сорныця кедьсэ — ланга илязо максово — ловнынзе ярмактнень ды венстинзе муюконь азоронтень. «Вай, илязан маняво!» — яла эвтсь прясонзо.
Сыргасть лоткамо тарказост.
Виряз атя кильдизе Тештинень. Сэвтнизе, кавшакавтызе крандазсо тикшенть. Витнизе озамо таркаст.
— Ве тевем эзь тееве, эзинь вастово Паксютыч марто, — кортазевсь Элюва, седе пек эсензэ кис, крандазс озамсто. — Эзинь — эзинь, мезе теят...
— Шумбратадо, эрзят! — теке маней чистэ пурьгине, ве ёндо каятотсь содавикс эчке вайгель.
Авась кепедизе вановтонзо ды абунгадсь — эйстэст аволь васоло кияванть ардсь Паксютыч. Косоль, мекс эзь неяво базарсо, — эзь чарькодеве. Сон ахолдась кедьсэ ды лоткавтызе тарантасонзо, мурдась Пиргужтнень ёнов.
— Кода шумбрачись? Кодат тевтне? Базарось тусь мельс? — мизолксонь пачк, паро ёжосо пшкадсь Паксютыч ведьметнень кирдезь, тарантасстонзо валгомадо апак арсе. — Капшан, Элюва сазорнэм.
— Шумбрачи, Паксютыч! Сюконян валозот, — кенярдозь, цельця тейтерекс серьгедсь каршонзо Элюва, вановтозо педязь педясь ваксозост лоткицянть чачос. — Базарось базар, улест ансяк ярмакот, рамак мезе мелезэть туи. Минь сакшнынек сюронь питнетнень содамга...
— Кодат? — каясь трокс вал тона.
— Товсюрось аволь питней. Ламо. Эйстэнзэ почтось-как... Монгак те таргостонть — Пазось максындеряй — пивсэман прядсынь, базардояк карман арсеме. Кадномс а мезть, питней-аволь — миема, — тевень содазь, сэтьместэ кортась Элюва умонь паро ялганзо марто.
— Зяро тонь пурнави? Зяро лангсо кучомс? — валонь апак ёмавтне, нурькинестэ ёвтызе рамамонь мелензэ Паксютыч.
— Сестэ истя кортасынек: кучсак тень атять. Истя, Виряз? Ёвтасынк зяро, ды мон...
— Истя улезэяк. Кучса.
Виряз эзь правто валгак. Кирдсь ведьметнень, аноколь сыргамо. «Зярс кармить лакштордомо?!» — велясь превсэнзэ.
— Илямизь чумондо, капшан. Но-о, Чентяй! — атясь нолдынзе ведьметнень, ды лишмесь ноцковтозь ноцковтызе тарантасонть — экипажонть, кода пеедькшнезь мери Паксютыч. Мельганзо кепететсь челькень сув.
— Эрсить, вантака, истят тюнихат. Прок мода потсто лиссь. Вантака... — абунгалесь Элюва.
— Иля котно, — алгаст тикшень ацамсто, чапанонть келейстэ сравтомсто кардызе эриця ялганзо атясь, — озак седе парсте. Истят тамашат лиснесть мартон а весть.
— Кодат?
— Истят. Арсезеват ломанденть, варштат удалов — сон палманькс ашти. Эрсесь тонь истя?
— Сеске а ледстяви, — арсезевсь авась.
Базаронь эрямось — нурькине эрямо. Пурнави, лаки-теи, ды велькссэнзэ шалтось, вант, ушоды энгамомо, куроксто срады допрок. Самай оймамонь те шкастонзо Пиргужт сыргасть кудонь килангов.
— А маняват? — талай чатьмонезь ардомадо мейле атясь велявтызе прянзо ды пшкадсь нинстэнь. — Питнетне тундо ёнов куземе а кармить?
Чатьмонема.
— Те виде. Иляк стувтне лиянть: сюронь ванстомга кой-мезе эряви. Васняяк, паро утомт. Сынь монь... Вансынек. Паряк, видеяк, витневтьсынек? — колызе каштмолеманть Элюва.
— А берянь ули истяяк: пелешканзо сюронть миемс ней базарсо эли Паксютычнень, омбоце пельксэнть кирдемс тундос, — мельс сась, превть макссь Виряз атя.
— Тонськак а содат мезть кортат! Весе максса, видьмеде башка, Паксютычнень. Весе. Товнень пес. Кортазь.
— Тундос, атя, эрямс эряви. Истя?
— Лиякс тонь а эрси...
Виряз содась: пелькстнемс, видеяк, те эрьва тевсэ дошуз аванть марто а мезть. Кодат ильведькст иляст лисе, теи мерезенть ладсо. «Кшни», — яла мери сон эйстэдензэ. Кшни а кшни, сеедьстэ лисни мекевлангкак — валонзо полавтсы кеменксть: весть мери истя, мельганзо — лиякс.
— Каня а виде? — пштистэ, прок уро, пшкадсь атянстэнь. — Аламошка Эстенекак кадтано. Утомтнень эрявить анокстамс. А содат, зяро кескавонок?
— Арась.
— Истя арсиньгак. Тон мезеяк а содат, мезеяк теть а эряви, — певердинзе буквань пес атянстэнь содавикс инзамонь валонзо.
Виряз чатьмонсь. «Ветердть, ветердть, сядоксть маринь неть валтнэнь», — мерсь эськанзо, эйстэдест эзь стя ве ёжопоназояк.
Прядовсть валонзо «ветердицянтькак».
Каштмолезь, чаротнень кортнемаст кунсолозь, пачкодсть Сэняж лейс. Виряз икелекс симдизе Тештинень, ды поладызь кист седе тов, кудо малав. Перькастольть пиже-ожо ды раужо некеть тюстнэ, сёксень ормасо токазь, пельтеме оланя-сэнь менелесь. Ней лия ёндо, кутьмерьс, вансь якстере, прок мезде-бути ацирьгадозь, мадемадо арсиця чись.
— Хи-хи-хи, — апак учо сиянь горниповнекс чольдерьгадсь Элювань пейдемазо, — ледсть мелезэнь базаров ардомсто ёвтазь валот. Тон мерить: вечкеманть чадыведекс жойнемадонзо мейле вечкезь эрямонтень, ну, кода меремс, улезэ неже — эйкакшт. Кортыть?
— Кортынь. Мейле мезе?..
— Мезеяк арась. Мон истяко, — ды таго муст-муст пейдезевсь. — Арсят, лия «неже» кодамояк а эряви?
— Кодамо?
— Я! Ды тонь дух чартьчить арась! Эрьга-эрьга, превтнень кильдить, — лепштясь Элюва.
— Седе мон. Арсят, велькс потсо элякалематневтеме паро эрямо лиси? Явовомат а улить? — поладынзе валонзо атянть низэ.
— А-а-а, тон оно мезде, — мизолдозь, прясонзо нулновтнезь, кувакасто таргинзе валтнэнь ветицясь; аламнеде, ансяк коензэ кис ильмештизе Тештинень ведьметнесэ. — Но-о-о, аволь ковгак — кудов ардтано!
«Кудов» валонть ёвтамсто Виряз маризе умонь пуворьксэвть. Кавксоце ие эри-ютавты Элювань кедьсэ. Маряви, умок уш тонадомаль — ловомальть сонзэ кудотнень-читнень эсензэкс. Эрямаль, прок эсеть кудосо. Зяро кедь вий путсь те юртонтень, зяро эрьва кодат майсемат ульнесть, паксянь-лугань зяро тевть теезь неть иетнень перть! Мезеяк эзь лезда. «Те аволь монь» валтнэ потстонзо кодаяк эзть нардаво. Свал марясь эсь прянзо инжекс, кемсь: зярдо а зярдо кадсы те пизэнть, каясы ойместэнзэ «аволь монь» кевенть. Кодамо илязо уле од шказо, икелень нинзэ марто эрямозо, кудонть, косо чачсть-кассть эйкакшонзо, косо ютавтынзе эрямонь ламо иензэ, ловсь эсензэкс.
Кудов капшицятнень перька салава морась моронзо сёксенть пельде пешксесэ якиця кизэнь чись. Педе-пес апак уряда паксятнень велькска, сёлмосонзо чуросто ахолязь, шкань-шкань цопазь, велясь — чеерть мучкась — вадов. Эрьвань эсензэ мелявксонзо, эсензэ кизэ, весень вейке ансяк песь.