Тесэ ды тосо (2013)/Ламбамо нартемкс/5

From Wikisource
Jump to navigation Jump to search
Ламбамо нартемкс  (2013)  by Нуянь Видяз, edited by Ломшина Л. А.
5-це глава
Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 233—252

[233]

— 5 —

— Паряк, саты теть ваномс газетантень? Мезе эйсэнзэ, мезень тансть? Ваны, ваны... — музгордезь совась Элюва икеле кудос, косо атязо, стуворонть песэ вальмалангонтень нежедезь, ловнось вечкевикс «Якстере тештензэ».

Ловныцясь марикскак эзь тее. Сёрмас а чарькодицянть удемезэнзэ стака совавтомс газетас «ваноманть» зэмензэ. Кодаяк сонзэ превс а путсак: ловномась — те кулянь кунсолома, натой васолга эрицятнень марто кортамо; те — [234] содамочинь утом. Элюва конёв лопанть эзизе сайне кедезэнзэяк. Теке пельсь пицевемс. Кода тензэ ёвтнесак те самай «ваноманть»?

— Мадть, саты теть каштордомс, — поладызе «моронзо» совицясь палянзо каямсто ды таркас мадемстэ, — валске таго чоподава стяма.

«Зярдо неть стякшноматне тонь лиятальть, аволь чоподань ульнесть?» — тешкстызе эсь пачканзо Виряз ды путызе кулянь пачтницянзо эземпес. Эзь кенере таркастонзо стямо, «кецневтизе» кардыцязо:

— Мадемадот икеле азё ютака кардазга, кенкштне весе пекстнезь? Ливтик теке басом торта ведь ведрантькак. Мейле... — мезе «мейле» ёвтыксэль, мезе кармавтыксэль, сонськак эзь сода.

— Кенкштнень тулолинь, веденть чияк уш ливтия, — ледстизе атясь эземстэнть стямсто.

— Ялатеке азё, мекс-бути седеем а таркасонзо, — мерсь, ней уш энялдозь, Элюва.

«Молема», — ансяк эстензэ марямга, пеень пачк мерсь Виряз, мезть понгсь тонгсь пильгезэнзэ ды мельтеме лиссь ушов — мерезенть топавтомо.

Кенерсть кирваземе менелень штатолтнэ, кивчкаесть — тердсть вейкест-вейкест налксеме. Тердсть эстест лангозост ваныцятненьгак. Абунгадозь — те мезе истя моли? — ваны лангозост келей чама, лембень а содыця ковось. Сиянь валдосонзо куш викшнек. Коштсонть кенериця умарень тантей чине. Кона ёндояк эзь маряво пинень онгома, мерят кекшнесть ковонть кельме вановттонзо.

Совась кудос, зэртьсэ путызе тарказонзо чаво ведранть, конань стувтокшнызе совавтомс, ды оймень витезь — окойники прядовсь чоподасто чоподас шешкемась — ютась икелев. Арсесь, «прявтось» умок уш корны.

— Вай, авакай! Дух стувтыя. Содат мезе? — вастызе «корныцясь». — Стувтынь течи алтнэнь пурнамс. Азёка...

— Веть, чоподава? Саразтнэнь тандавтнесынь. А молян, — невтизе обуцянзо атясь, эскельдясь эсь коникензэ ёнов ды аволь мадсь — сэрьсэ прась тарказонзо. Мадсь [235] вельксэнь апак штавто. Кунст. Тувталтомо эли, паряк, вензэ лангс Элювань певтеме кармавтоматнеде вельместь мельсэнзэ кавтошка иеде икеле марязь валтнэ.

...Ульнесь тикшень ледема шка. Валскестэнть учовсь Кизэнь вешнема чи — Эрьмезьвелень эрицятнень вечкевикс покшчист. Элюва мелень путозь, ваньксстэ шлинзе киякстнэнь, нардынзе вальмаланготнень, эземтнень. Каштомикеле валскенень анокстась чапакс. Атязо мезе-бути котьмась икеле кудосо.

Сундерьгадозь апак учо, прок менельстэ прасть, састь инжеть.

— Кияк ули кудосонть, а? Эли кияк арась? — каятотсь цёрань «сэрей» вайгель.

— Ули-ули, совадо! — зяро виезэ рангстась каштомикельде Элюва.

Совасть Элювань-Вишкайнянь Ляксандра лелязо, аволь сэрей крежа цёра, ды Проска низэ. Варштат лангозост — мерят, лелят-сазорт: сэрест вейкеть, черень тюсост вейкеть, содтояк раужот, мик кортавксосткак мейсэ-бути ёнов молить.

— Вай, пелян чалгамонгак! Истят ванькс киякст эзинь некшне. Те, маряви, «урьванок», Виряз, псилгалесь, — пештизе кудонть казямо вайгельсэнзэ Проска.

А куш а каш.

Колызе «кушонть», лиссь моргасто, азоравась.

— Те тынь косто, кона ёндо?! Ютадо тей. Озадо. Мон нейке. Ичевсь ичемамгак. Кадовсь кедень ёрвалдомс-нардамс.

Икеле кудонь кенкшесь аволь пек сёлгозель. Кортамотне марявсть валонь пес. Вирязонь стазь стызь тарказонзо. Аноколь туемс модань пачк. Аламос аштезь юрк стясь ды яксезевсь кудованть, панжизе тона кудос кенкшенть, мотордозь арсесь сыцятненень шумбрачи ды лиссь ушов. Аноколь лангсонзо оршамопельтнесэ туемс, оргодемс те эрямостонть. Ков — эзь сода. Сень кис содась лиядо: эсеть эйстэ ковгак а туят.

Ютасть иеть. Оймень костиця «урьва» валось ванстовсь, [236] кадовсь превс-седейс а шлявиця раужо аржокс. Инжетне сестэ эзть арсеяк покордамс Вирязонь. Содасть, кода ней содась сонсь Вирязгак, мезень танстезэ, мезе те истямось — улемс семиясонть урьвакс.

«Истя, лисни, зярс тонсь а варчасак, а эртеват терниця чеядавксос, а кармат содамо, мезе те. «Урьва» валонть марсия сядоксть. Паряк, тёжаксть... Содылия смустензэяк: теевсь «уре» валстонть. Ялатеке превскак эзь сакшно: кие сон, урьвась, эйкакшпингестэнь — «ряжом», кодат кенярксонзо-ризксэнзэ, кодат ёжот эвтить седейсэнзэ? Ве урнемасонть урневиль:

Састо ютан — нузяксан,

Эрязкалезь — чаулан...

Мейле мезе? Сельведень пачк ёвтазь неть валтнэнь салост седейзэнь эзь пачколе. Домкасто, пек видестэ ёвтазь мель, ды весе. Пачкодсь ансяк тесэ, эсень латалдо ломанень латалов туемадо мейле. Неть иетнестэ... Саты теде, саты невелявтнемс седеенть, а мезть сокарямс теезьсэнть.

Ванды розень видемантень пе путома. Шкась а ашти. Умарьковонь меельце таргонь сисем читне ютыть — сельгеме а кенерят. Сёксесь, атякай ялгинем, эци чатьмонезь, апак кевкстне. Лиясто, меремс, неть читнень ютазьгак паро лисевкст ды паро сюрот эрсить. Лембе улиндеряй. А бути тарькс? Сестэ уш, зяро иля кувсе «ох» ды «ах», паро а савкшны учомс...»

Неть арсематнень марто черькставсь Вирязонь эрямосто таго чи. Ансяк венемсь, матедевсь домка, прок аволь сыре ломанень, удомасо. Эзизе маря атякштнень пелевень жойсэ пелькстамост, Элювань ве ёндо омбоцев велявтнеманзо.

Эзь удово авантень. Удомась кекшнесь эйстэнзэ. Мекс — эзь сода. Ледсь мелезэнзэ Истляй. Васень мирдезэ. Сонзэ «оёвамо» туемазо.

...Сёксень пиземе. Рудаз. Верепестэ велекуншка ёнов валгить зярыя улавт. Мельгаст молиця симезь — кой-конат иредьстэ — цёратне кирьгапарень апак вансто, пиже-ожо [237] вайгельсэ пижнить «Последний ноняшний денёчек...» моронть. Мартонзо човор марсевить авань лайшемат. Ильтить цёратнень «за Веру, Царя и Отечество» верень валомо. Ютксост Элюва нинзэ марто Истляйгак.

Цёрась тюрсь васня немецтнень каршо, мейле недявсть та-кодат якстереть-ашот. Товгак саизь. Сёрманзо васня сакшность. Мейле ёмасть сёрматнеяк, сонськак. Арась ие, омбоце, колмоце... Элювань вейкине цёразо кенерсь келямо эстензэ ки. Ней эрясь ды важодсь покш ошсо. Сонгак иешка ульнесь леднема таркатнесэ. Велявтсь, лездась Инешкипазось, шумбрасто. Мирдесь жо прок ведьс ваямодонзо мейле учовкшнось, сакшнось, ансяк...

Кадовсь Элюва сокор ававтонзо марто «олгонь» довакс. Куроксто сыре ававтозояк кулось. Элювань иетнеде таштавкшность аволь верьга-ланга. Од, ловт, вийсэ пиксиця рунго! Кодат тевть эзь савкшно теемс идемевсень войнатнень перть, кода карязтнэнь эзь савкшно яжамс, эрямонть эсензэ коензэ-ладонзо. Мезесь тензэ эряви — эряви.

Пазонтень эли киненьгак лиянень эрявсь, ансяк лиссь истя, кода лиссь, ды ковгак тень а пштидьсак. Эрямось соды ансяк ве яннэ.

Эрьмезьвелев сась буень велестэ модань онкстниця. Эрявсь кой-кинень явомс мода, онкстнемс, теемс плант-картат. Элюва аволь ансяк эзизе некшне те ломаненть, эзь сода самодонзояк. Пси-пси чистэ, зярдо, секень вант, невели, штавтовиндеряй, киськесь, ломанесь анок кирнявтомс куш кодамо сёлтс, а ванны, кодамо ведесь: кельме-аволь, ванькс-рудазов... Ансяк экшендемс!

Истя лиссь Элюваньгак.

Кизэ. Чизэ якстере сувтемекс поводевсь модачиренть вельксэс ды арсесь сыця чокшнеденть: валгомс эли учомс зярскак?

Элюва чинь-чоп нуемадо мейле апак капша, комадо кувать аштемадонть оймсезь, эскелясь эйкакшпингестэ содавикс кияванть кудов. Велентень апак пачкоде редясь каршонзо сыця. Цёраломанесь оршнезель ошокс, ашо панарсоль.

[238] — Сизить? — мизолксонь апак кекшне пшкадсь сон вастовомстост, невтинзе пинемень тюс муюконзо алдо вейкеть ашо пеензэ.

— Арась, — мельспаросо, набойстэ мерсь каршонзо авась ды ютыксэль вакска.

— Ужока аламнес, — чевте вайгельсэ, апак пеедькшне мерсь а содавикс ломанесь, прясто пильгс Элювань ваннозь.

— Монень кудов эряви...

— Ялатеке, ава-парочи... — эзь ойма цёрась.

— Кунсолан... Мезе?

— Мелезэнь туить, вана мезе! — згилязь мерсь вастовозесь ды венстизе кедензэ, мекс-бути саиксэлизе Элювань лавтов ланга каязь тарвазонть.

— Вай, визьксчама! Эли превстэ лисить?! — эзизе максо тарвазонзо, кежейстэ серьгедсь авась чопоньпелев чаво паксява лытыцянтень ды талнозь поладызе кудов кинзэ.

«Седейкельмевкс... Прок чинеяк кургостонзо эзь маряво. Ялатеке «токазель». Те кинь, костонь истямо алюханось? Аволь минек велень. Минек истят арасть. Мазый, мезеяк а мерят. Сельмензэ сэнть, сельмечирькензэ та-кода ожолт мерить, удалов судрязь черензэ кондят. А уш турванзо, мизолксозо! Теке тейтерень. Мондень од. Ниленьгеменьшка тензэ. Самай вийсэ. Оно кода кулдордсь перькан. Костонь, содамс, кие истямось? — неть арсематнеде Элювань пачк лымбазь ютась лембе. — Я, те истя мезе мартон? Кие соды мезть пивтян превсэнь... Мекс, мазя прев, капшинь мартонзо явовомс?..»

Теде мейле, тагояк апак учо, вастневсь васолдонь ломаненть марто велеютксо. Ансяк аволь карадо-каршо молезь. Валнэяк эзть полавто. А серьгедят жо куринкань келес. Седеяк — а содавикс цёранень.

Аволь ламо шкань ютазь эшкевсть веленть куншкасо сэденть лангсо. Маласо кияк арасель. Ансяк чинь-чоп пувиця вармадонть оймсиця кальтне. Сынь маризь цёранть валонзо.

— Течи чокшне, сяткинем, кемгавтово час малава, учомак инжекс! Косо эрят — содан, — псистэ тошказевсь [239] модань онкстницясь, варштась сэнь сельмесэнзэ Элювань сельмес ды эрязкалезь тусь эсь кияванзо.

— Теке кадовськак! — талакадозь, апак арсе серьгедсь мельганзо, мезе сась превзэнзэ, авась. Арсезевсь — ды седеяк талакадсь мерезденть. — Вай, те, лисни, тердия сонзэ... Те валонть а стака чарькодемс: вастневинек, ней... «теке кадовсь». Баяга пря, овсе а содат, мезть лакштордат!

Инжекс самс алтницясь Элювань превстэ эзь тукшно чокшнень перть. Лиснесть икелензэ ашо пейде пешксе кургозо, тейтерень турванзо, сэнь сельмензэ. Кода улемс, алкукскак, сындеряй? Кавто вийть потсонзо вейкест-вейкест мерькасть. Васенцесь учось салавань вастовоманть, учось танстень кандый те минутанть. Кармавтсь теяк: ниле ие малава эзь варчне цёрань вий, палсемстэ пси лексема. Омбоцесь кортась лиядо: «Вант, Элюва, иля маняво, иляк нолда малазот те алюханонть. Кие сон? Костонь? Тонсь вант: весть-кавксть чульть-чальть вастневиде ды уш эци ваксозот! Ды аволь ансяк «ваксозот»... Паро ломанть истя а тейнить. Эрят, Вишкайняй, велесэ. Иляк стувтне. Валске жо весе велесь карми содамо вейсэ ютавтозь венть эйстэ. Велесэ прыця салмуксонь гайтеськак маряви ве пестэ омбоцес. Весемень сельме икелят. Сындеряй мирдеть? Пачтясызь сеске. Варчик мейле прят ёрвалдомс. А шлясак, какинем, кулов ведьсэяк... Мирдеденть эно а мезть мелявтомс. Аволь коське лейс ваясь».

Тень чарькодизе Элюва.

Эзь чарькодеве лиясь: кода панемс превстэнзэ, ёртомс седейстэнзэ муниця-эждиця се мизолксонть.

«Паряк, а сы?» — сяткинекс кивчкаесь седеень токновтыця кевкстемась.

Сы — а сы...

Сы — а сы...

Сы...

«Сы!» — прась, теке сёксень шкава лопа лангс прыця сэря, кемемань мелесь.

Шказо — кавксо.

Шказо — кемень.

[240] Шказо — ...кемгавтово.

— Сюк, Инешкипаз, эзик кучо, идимик пежеттенть! — мерсь Элюва штатолнэ марто эземстэ валгомсто: кузнесь шканзо варштамо. «Паряк, аламос учозь сы? Зярс допрок эзь ойма велесь, илизь нее», — кашкасть удемсэнть салавань мельтне.

Мадстизе штатолонть. Чиремсь тарказонзо. Вельксэнть ланганзо эзизе кая — пси. Конинзе сельмензэ. Бажась матедевемс. Эзть максо оймамс карвокс эвтиця мельтне. «Сполать тензэ, пек вадря — эзь са. Паро. Кода кортыть, салмуксонть кескавс а кекшсак. Невтьсы нерензэ. Эзь са — эзь са. Истя, бульчом, Пазонтень эрявсь...»

Удомась сайсь эсензэ. Элюва сутямсь.

Калдорк! — каятотсь косто-бути кузтемпе ёндо. Теке псака косто-бути кирнявтсь.

Элюва прок эзь сутямокшнояк. Панжинзе сельмензэ. Лексемазояк кундатотсь. «Псакатне, бешоконь», — оймавтызе эсь прянзо. Велявтсь, седе парсте марямс, кунст. Удомазо штатотсь. Вельтинзе велькссэнть пильгензэ. Ушось чатьмонсь. Калдордыцясь ёмась.

Шкась кудонь чатьмониця чоподадонть эзь пеле; частнэ ловсть чудиця эрямонть кода свал: чи — ве, чи — ве... сы — а сы, сы — а сы... Сыненст, частнэнень, ялатеке, сынь седейтеметь, а марицят ды а неицят.

«Зяро, содамс, шказо?» — арсезевсь Элюва. Стясь, эскельдясь стуворонть ваксс, муинзе штатолнэнть вакссто пицькатнень, ютась частнэнь алов ды вельмевтсь толнэ. Кемгавтово част ды ниленьгемень минутат — невтсть налтнэ.

«Вай, Верепаз! Тон истя мезе теят, айма?! Удомскак шкадонть кадовсь озязонь нернешка, тон яла шка онкстнят. Нейке велькс потс, — неть мельтнень марто ютась ды лодорк венемсь тарказонзо. — Саты, оймак, цельця ава, тевтне сявдиксэс эцить, умок удомаль, тон яла од шкат ледстнят...»

Сельмень конязь аштесь талай.

Тук-тук-тук — каятотсь вальмас, састыне ды ёжомарязь.

Элюва аймельгадсь, рунгонзо пештизе пси, та-кодамо [241] вий лепштизе моцюдалксонь кендентень, зярс-бути кирдсь эйсэнзэ. «Мезе теемс? Стямс? Панжомс? Паряк, аволь сонгак, мезть лапномс шкадо икеле?» — толкелекс кивчкаесть прясонзо кевкстематне. Кавтолдоматнень изнязь, сон нолдынзе коникстэнть пильгензэ ды кепе, псакакс чевтестэ эскельдясь вальманть ёнов.

Суликатнень тона пеле чоподасонть неявсь аволь сэрей ломанень сулей. «Мон, мон», — невтнесь кедьсэнзэ мештезэнзэ.

«Сон!» — эзь кавтолдо Элюва. Жу-уйть тусь алов седеезэ. Ланганзо таго валовсь пси, марявсь, понгсь толпандяс. Ахолдась каршонзо ды ашо алга панарсонзо эрязкалезь лиссь кенкшень панжомо.

Ушосонть чопода. Кувака кудыкелькссэнть — седеяк. Ютызе — а эшкевемс — кавто ёнов кедень венстезь. «Лазтнэ, лазтнэ мекс истя чикордыть? Зярдояк истя эзть маряво...»

— Кие? — састыне, чеерькс лавшине, сорныця вайгель нолдась кенкшенть тона ёно учицянтень.

— Те мон, Элюва, мон, панжт, — каятотсь истя жо тошказь каршо.

— Ды кие тон? — прок эзизе сода вайгеленть, пшкадсь омбоцеде.

— Ну мон... Сэдь лангсо вастовинек... Течи. Стувтык?

Каштмолема.

«Инешки, Инешки, мезе ней теемс?!»

Элюва кодаяк эзь эскельдяво кавтолдоманть ды визьксэнть трокс. «Паряк, а панжомс?» — яла типельдсь лавшинестэ удемсэнзэ. Типельдсь циндерентень кедензэ венстемстэяк. Вить кедень невтий сурсонзо токизе циндерь пенть ды эрязасто, теке псиде пелезь, теке марто сорнозь, шаштызе верев.

— Элюва... — лиссь юрк совицянть кургосто аванть лавтов ланга кедензэ каямсто, — а кемевияк... Зяро мон майсевинь, зяро стомавинь.

— Ужо, ужо.

Састыне, кияк илязо маря-нее, пекстызе кенкшенть, [242] тулодызе. Сеске велявтсь цёранть ёнов, каинзе кирьгазонзо кедензэ ды лекшкадсь келей мештезэнзэ. Эзь ёвта валгак, ансяк косто-бути васолдо потсто лиссь кенярксонь а кирдевикс гайть: «Ва-а-ай...». Аванть вить кедезэ новольсь цёранть кедензэ ёжова, кундызе, теке эйкакшонь, ды саизе кувака, чопода кудыкельганть мельганзо. Ансяк козоньгак а эшкевемс, мезеяк а правтомс. Эрявсь капшамс — весь нурькине. Ансяк «капшамс» валось эзь эрявояк. Сонзэ тевенть тейсь чадыведекс шалныця-лакиця вересь.

Элювань кияк эзь ноцковтне, кияк превс эзь путне. Мезес ветясы те эскельксэсь, кияк эзь кевкстне. Сонзэ прясто пильгс копачизе оймеёжонь даволось. Весе-весе илыкензэ, нардевчинзэ саизе-тапардызе чуросто кинень изнявикс те виесь, чаравтсь эйсэнзэ кода мелезэ.

 

*  *  *

А стяко кортыть: тевесь сюлми, теваразесь — яви. Вальматнева стамбарнэ, виздезь совиця валдось стувтовтсь мадемадо икелень «чеменев» ледстнематнень. А кармат потсот гуйкс кельме ёжо марто чинь-чоп яксеме, эрьвань икеле пеняцямо эсь эрямот лангс. Кода иляст бизмолдо сынь потсот, кода илязо увно прят, — тевтне теемат. А мерят, кода ёвкссонть: сюро видеме а карман, сырян, ялатеке кулан. Эрьвань сынь, пайстомочитне-ризкстнэ, сатыть, эрьвань эсензэ. А мезть сынст теке муськемат пирявкс прява понгавтнемс весеменень неемга.

Васенцекс илештизе, ве ёнов айгизе вельксэнть ды стясь чевте-лембе «норастонзо» Элюва. Мельганзо уцор-ацор валгсь «чувто лангсто» Вирязгак. Мельцек-мельцек кепе-штапо ютасть удало кудов. Потолокс понгавтозь ведь ведрастонть кечинесэ ведень сайнезь, ёрвалдызе чаманзо васня Элюва, мельганзо полазо.

Васенцесь эйстэст совась мекев икелев. Стясь кавто вальма юткс, киртыжс, понгавтозь сэрей-покш чавачамонть икелев (модань онкстницясь казекшнизе) ды кундась прянзо пурнамо. Судрясь ашназа, касмова допрок шержей черензэ ды вансь, теке несь эсь прянзо васенцеде, [243] сиякс цивтёрдыця суликантень. «Я, ды каня те мон? Каня истямолинь? Арась. Сисемшка иеде икеле, атянть марто вастовома шкатнестэ, содазь, лияталинь. Ютаськак аволь ламо, тешкстнэде кадовсть оно зяро. Косто саевсть сельметнестэ пилетнень ёнов туиця неть сормсевкстнэ? Сынь арасельть... Вант ней лангозост, кецнек пуворязь, теке пидезь умарь, чамазот! Ледстнек, кодамолить «якстере» войнадонть мейле, зярдо Толай (эзинь маняво, Толай?) казекшнизе цивтёркай те суликанть. А мезть янксемс, сестэ аволь кода ней, эзинь орголе...»

— Мезть болдордат? — удалов апак варшта пшкадсь совиця Вирязнэнь.

— Аволь болдордан — калдордан. Сакалон тия-тува керсинь. Васоньпеельтне ношкат, яла парт вешнинь.

— Кодамо азорось, истят сыньгак. Я, тон мезть шканть тетьксят? Пенгеть апак совавто, ведранть ливтема, ведь кандтнема, андомкат максома... Эли теветь стувтыть?

— Тонь марто?! — згилязь скирдызе Виряз кудоютконь ушмодеенть.

— Вантака, мик скири, а кемияк. Каня а истя? Ды монтемень умок мендявовлить. Мезес а кундат... Чатьмонть уш. Кода кирдсь эйсэть сыре нись, превс а саеви.

Неть валтнэ карыть Виряз атянь пилензэ аволь васенцеде. Зяроцеде — а соды. Паряк, сядоцедеяк. Содась: чуросто кодамо авань мельс тукшны мирдезэ. Малав весе сынь пазить мирдест нузяксчисэ ды мелень аваномасо, сындест мейле молить лия раужо ёнкстнэ. Редизь тень видестэ, а чарькодеви лиясь: мекс нузякст ды мезе теемс. Аватне... Ну-у, те лия «сюпавчись»! А пештясыть сынст мейсэяк! Зяро иля тее, зяро иля кандо-ташта — аламо; кода иля тее — берянь, а сынст коряс. Чарькодеви, кадык аволь весеменень, ськамост кадовомадо мейле: цёраломантеме эрямосонть вадрядонть аволь пек ламо. Ансяк сестэ полавтсызь певтеме, поназь понавиця морост. Эрьва кодат, содазь, ютксост понгонить. Ялатеке авань обуцянть, коронть, мазычист марто вейсэ, эйстэст а лутасыть.

Атясь нардынзе нардамосо васоньпеельсэ [244] «мазылгавтозь» сакалонзо, чаманзо, оршась-карсесь ды кундась эрьва чинь тевезэнзэ. Явсь сынст колмов: кудоютконь, кардазъютконь ды — паксянь, лугань, вирень. Эзь стувтне тедеяк: эрсить сынь сёксень, телень, тундонь... Седе эрявиксэкс, покшокс ды аволь налкставицякс, стакачист лангс апак вано, ловсь паксянсетнень. Тосо кияк велькссэть а лырны, а моторды, кияк ведьметнесэ тей-тов а ноцковтни, кежть кияк а савтни... Теят тевенть истя, кода арсят, кода теть седе парсте ды куроксто тееви. Секскак Пиргужонь «урьваст» правтсь седе курок чемерямс кудоютконсетнень ды аравтомс ажиятнень, эсензэ меревксэнзэ коряс, «омбо масторов» — тов, косо важодят-эрят эсь эрямосот, косо лексят олячисэ ды марясак сонзэ коштонть танстензэ.

«Пельдесятина. Те, лиси, колмо умат ды а покшке пулыне, — ловсь эсь пачканзо умок ловозенть — зяро кескавт видьме эряви саемс паксяв. — А мезть превть яжамс, сайть вете пондот — а маняват. Те, ловт, кавто кескавт ды пель», — мерсь Виряз эстензэ ды панжизе утомонть.

Эсь вийсэ, лишмень апак кильде, аравтызе крандазонть утом кенкшенть каршо. Нучк саезь, кандсь эйзэнзэ розде пешксе кавто кескавт ды пель, путсь лангозост митялкат велявтозь кшнинь пей изамо.

«Весе саемкась саезь», — тешкстызе Виряз. Ветизе лишменть, совавтызе ажиятнень юткс ды кильдизе.

«Окойники кардазъютконь тевеньгак изнявсть, ней — килангов, «омбо масторов», — истямо ёжосо пекстызе мельганзо лазонь келей, ютамсто крандаз кельгезэ, кенкшенть, саинзе ведьметнень ды кузсь-озась тарказонзо.

Лишменть эзь пане. Эрязкалек-иля — тевтне аволь сюват, понжавтомсто варма а саласынзе. Мельтнеяк текекс апак эрязкале бизмолдсть удемень сормсевкстнэва.

«Капшак-иля — питнесь теке. Мезень кис яжан карязт, кинень — монськак а содан. Тейтерень туртов? Чаво валт. Трёшниккеяк тов а моли. Ледстнемскак теде а мезть. Сынь эсь семиясост эрить. Вишкинеть улевельтькак... Сестэяк... Мезе тенст максовлинь? Мезе тень панды «олгонь ним»? Ленге кирькс куншка? Паро, калминдерясамам. А кемеви.

[245] Вант, кода мартон «оякскали»: рангомат ды пиже валсо пижнемат. Сыречиденть пелема! Паро, сеске, апак учо врадындерят. Лоткавиндерят якамодо? Учок текень: косто сыть, тов пурнакак. Саты, мери, пидить верем седе а ков. «Ознотанзат» нучк-пачк ды кулдорк кузтемпес — азё ков мелеть. Зярс вийсан, беряньстэ-вадрясто, эрязасто-аволь, ускан. Паксянь тевтне, ловт, весе монь сявдикссэть: сокамот, изамот, видемат, нуемат, пивсэмат... Каня лововить теевезтне? Ускт, атя, ускт! Эсь мельгангак якан. Чиреминдерян. .. Секень вант, кши печтьке а карми максомо, учок: «Текень содат — трескат, мейсэяк а пештяват! Зяро иля максо — аламо. Ансяк путнинь икелеть шаваня-вакан. Косо? Прок потмакстомо парьс каик...

Виде, неть валтнэ-мельтне содавтнимизь аволь весть. Аволь кавкстькак. Ансяк вана... Мезе вана? Эль мезеяк а истя, сёвномине эли гай сёвнома, мелезэнь сы теке: туян, туян! Ды... ковгак а туян. Зяроце ие уш те чевеляви».

Велестэ лисемстэ стясь Вирязонь каршо Чичавонь Петряй. Кудозо сонзэ Верепесэнть меельце.

— Шумбрат, Пиргужонь содамо! — серьгедсь Петряй куринканть келес. — Сайсамак?

— Тпр-р! — ускинзе ведьме петнень эстензэ, лоткавтызе лишменть Виряз. — Озак.

— Мель саинь вирьга ютамс. Кой-кодат пенгинеть анокстынек, варштамат, — ушодсь ветердеме лаужа кель Петряй, кода мерсть тензэ велесэ. Лаужа — те аламо, аволь педе-пес виде. Лемдемаль пшти келекс. Аволь кель — уро. Истя пупасы ломаненть — тона чаракады, а муи мезе меремс.

— Меремс видьстэ, миньгак пенгень коряс аволь сюпавтано. Яла тевть: нуемат, видемат, — тонсь содат. Вана изнясынек пивсэматнень, мельгаст уштомапельде карматано арсеме.

— Истя, истя... Мик а кемевияк: Модаень Элюва пенгевтеме, — поладынзе Вирязонь валонзо лаужа келесь.

— Те кие?

— Кода кие? — ноцковтызе керш лавтовонзо Петряй. — Тонь азоравась. Элювась велесэнть вейке.

[246] — Мекс Модаень?

— Кода теть меремс, — валтнэнь таргсезь, кавтолдозь мерсь Петряй, — тон аволь минек велень, ламо мезе а содат. Паряк, ёвтнемскак аволь эряво, пелян, илязат покордаво. Ды кадык уш, серьгедезь моронть прядома.

Умок те, кирдаж, ульнесь. Ютасть, маряви, кеветеешка иеть. Текекс вана кизна, самай нуема шкава, сась Эрьмезьвелес модань онкстниця. Мезень кувалма тердтнизь велень атятне, кодамо пелькстамо лисекшнесь — мельсэнь эзь кирдеве. Келя, уматне та-кода а истя явовкшность. Истя-аволь — а содан. Эрясь сон, модань онкстницясь, велесэнть талай.

Те ансяк ушодкс.

Цёрась мазыель, шумбраль. Иензэ... Ну зяро... Ниленьгеменьшка эли тень малава. Истя кода-бути. Шкадонть оно зяро ютась, каня весемесь мельсэ кирдеви. Тонсь од ульнить, содат, мезе те истямось — од шкась. Вересь налксезь налкси! Оймамо а соды. Мезе, оймавтомс эряви, кода эно. Кувать а кувать, муевсь оймавтыцяськак. Кие, арсят? А? Пиргужонь Элюва. Иля покордаво, вадря? Бути а истя, монь чумом арась. Велеванть во кода, келес лытасть кулятне. Тонсь содат, велесь — веле, тесэ истят тевтнень, у-ух, стака кекшемс. Ве песэнть та-кие кешни, омбоцесэнть «ульть шумбра» рангить. Содат мезе, кулятненень-келятненень, видькстан, пек а кеман, ёвтнян седе, мезе маринь. Паряк, мезеяк арасельгак. Кувака кельтнеде сатыть. Сюлмить, ансяк кунсолок!

Элювань мирдезэ зярыя иеть хронтсоль. Ёвтнесь теть эриця ялгат? То-та. Тонсь содат, кодат ансяк арасельть меельце шкатнестэ ойнат: япошкатнень, немецтнень марто, сындест мейле ашот-якстереть тюрьгадсть. Кие кинь лавсаесь, сынсь эзть сода. Ойна, тонсь чарькодят. Содак вейкень: верь валт. Мезень кис, кинь — иля кевкстне. Тонь сайнидизь?

— Германскойс понгонинь.

— Мон кавто иеть ды пель ульнинь. Газтнэнь нильнемадо нолдымизь. Арсинь, а вельман. Лыкан вана.

Эно поладса ёвтнемам.

[247] Кавто гулькатнень вечкемань тевтнеде паро ладсо кияк эзь сода. Неть тевтне сельме икеле а тейневить. Ну, бути кармасть мереме тензэ Модаень Элюва, тонсь арсек, яжавтсть тевест а беряньстэ. Почт ульнесть. О-о, кирдаж, велесэ а кекшсак. Эно истя, беряньстэ-вадрясто — те аволь монь тевесь. Мон вакссост араселинь. Мон, кода Элювань мирдезэяк, хронтсолинь. Пачкодинь шкань ютазь кудов. Иешкадо мейле, паряк, сась Элювань однасумозояк, Истляй. Мирдезэ, лиякс ёвтазь. Паро лемесь, а? Седе тов, тонсь содат, Истляйнень пачтясть: истя-истя, келя, полат тапсевсь оно сень-сень марто. «Мазый» тевть тейнесь. Ну, тонсь содат. Визькстэнть цёрась кадызе велензэяк. Талай эрясь шабра велесэ, Чукалсо. Содамокс совсесь. Мейле туекшнесь од нинзэ марто ошов. Косо ней, эрий-аволь — ве паз соды. Лездакшнось Элюванень, ульнесть кортамот, «модамерэсь» модань явомстояк. То-та. Тонсь содат, а стяко лемдекшнизь Модаень Элювакс. Ага! Вана истя, содамо! Сюпавчитне таштавить аволь ансяк сявдикссэ... Тонсь содат...

Кунсолось Виряз атя колазь ёжосо. Вал эзь правто. Сакшнось мель лоткавтомс лишменть ды меремс: «Валгт, чинетькак илязан маря! Мезекс теде ёвтнят? Кодамат тон, Петряй, тюнголькс ойме!». Теке марто кунсолось — сорк эзь тее. Ёвтнесь тензэ, Вирязнэнь, Элюва кой-мезть мирдензэ марто явомань тувталдонть. Ансяк аволь марязденть.

Зярс кунсолось вакссонзо аштицянть, янксемань ёжотне каразь карасть седеензэ. Косто-бути васолдо тошкась тензэ чова вайгельне: «Сельгть, чаула, весе те лангс ды чиезь чийть икелень эрямозот...». Те вайгельнесь лиясто полавтневсь: «Паро тонавтомс. Варчик азё, велявтт ютазь шкантень!».

— Мон витев, Петряй. Пачкодинь, видема умам тестэ а васоло, — сэтьме, потмура вайгельсэ пшкадсь Виряз атя лишмензэ лоткавтомсто.

— Сюконян, пеледензэ ламо ким ютавсь, — мельспаронь апак кекше мерсь вирев молицясь ды, рашкондазь, верьга трокскенть велькска валгсь крандазстонть. — Оно, несак, кода учи эйсэнь виресь-укшторось!

[248] Петряй — сэрей ды теде аламнеде мендявозь рунго ломань. Луньк-луньк эскелязь тусь видьстэ Покш вирь киванть. Виряз сайсь витев, паксянь киванть эсь моданзо ёнов, уманзо видеме.

Атясь шканть таргсеме эзь карма. Саизе крандазсто изамонть, валгстынзе видьме марто кескавтнень. Перьгавтызе лишменть ды сюлмизе новта ведьмеде крандаз ирдезэнтень. Макссь ярсамс. Пурнынзе сивекстнэнь-ашкотнень. «Каршавтомо лишме а кильдят», — ледсь мелезэнзэ валмеревксэсь. Петряень, чальть-чульть содавикс ломаненть, кургосто марязденть пек эзь майсеве. А стяко кортыть: тевень теемадо вадря ормаменькс иля вешне. Лиясто, ванат, допрок ёжот калады. Прясь увны, кайксэсь — куш отьмас кирнявтт... Кундат тевс, ливчакадат — тонськак а марясак, кода срадыть весе пштикстнэ-сэредькстнэ. Менсти-вити сон аволь ансяк рунгонь — оймень ормат-тарвоткак.

Пештсь, певердсь-видсь ве парго, мельганзо омбоце, колмоце... Эзизе редяяк, кода чамсть ускозь кескавтне, кайсевсть видьметне. Путынзе чаво кескавтнень ды паргонть крандазс.

Менстиксэлизе Вармань. Сюлмизе мекев.

«Сырнеме кармить, атя! Апак ярса арсят весе тевтнень лепштямс. Тон, Варма, вачодо эзить аште, порнить? Оймсить? Ну-ну, паро. Эряви моненьгак сускомс. Оймамскак аламошкас эряволь. Иетне тонь, Варма, зяро? А содат. Ёвтаса — вете. Азороть — сизьгемень малава чарыть. Юткось байтяк. Чапик? Истя вана, ялгинем...» — лишмензэ марто тошказь-кортнезь, Виряз таргизе пешторонзо, мекев саинзе чаво кескавтнень крандазсто, ацынзе луганаронть ланга ды озась ярсамо.

Оймсицянть перька котьмась сёксьсэ сэредиця кизэнь чись. Верьга-верьга апак эрязкале, састо уйсть васоло масторов ашо, алга сэншть мериця, кавшаня пельнеть. «Ков сынь, лытагайтне, кирдить ки, косо тенст седе вечкеви эрямс?» — пургондась видицянть превсэ мельне ды сеске мадсь. Коштсонть марявсь модань, олгонь, кенерезь сюронь чине, марявсь сёксенть зярс лавшо-лавшо лексемазо.

[249] «Истя вана, шержей сакало, овсе аволь умок мельспаронь кирдезь кунсолыть човине, теке суликань лазовомсто гайть, кочкодыкень вайгельнеть, — ледсть Вирязонь мельс нуеме лисемань читне. — Ней уш, сиянь кирьгапарнеть, а марявить кармавтома морыненк, лембе ёнов ки саиде. Тундос, лисни, вастомазонок...

Эрьванть эсензэ шказо. А кекшат эйстэнзэ. Кизэяк эрьванть эсензэ. Кинь чилисема ёнов, кинь...»

Ярсамозо прядовсь. Кедькоморосонзо нардынзе турванзо. Тевтнеде какаря сурсонзо каинзе пешторонтень пенчензэ-ваканонзо. Стясь. Кши кочомненть, лукш марто зярыя ал паморькскетнень, пель чурька приненть пурнынзе коморозонзо. Ютась маласо апак нуе суро панкскенть ваксс, ландясь ды каинзе нетькстнэнь потс.

Видемтизе рунгонзо, ёвтась энялдомань валт:

Норовава-Паксява,
Пачкодест Теть кортамон.
Топавтык энялдомам —
Лездак сюронь кастомо.

«Марямак эно, Норовава», — эсензэ валсо прядызе энялдоманть ды поладызе тевензэ. Вармань кильдизе изамотнес. Ушодсь видезенть изамо. Ютась уманть кувалт тов ды мекев. Лоткась. Варштась, вадрясто-беряньстэ вельтявить видьметне, кавшакавтови модась. Мелезэнзэ тусь. Апак пеле кундась ушодозенть тееме. Тов — тей, тов — тей. «Эрявлиньгак эсень кудосо, саевлия мартон Кизай нуцькань. Тензэ ней кемгавтово. Изамось — самай цёрабаень тев. Лездавлинь тензэ куземс лишменть лангс, ды ласте ютневлизе весе уманть. Кавонеть тевесь седе эрязасто молевель. Вейсэ улевлинекак, тонадоволь мартон паксянь тевтнень тееме...

Умок уш азоравантень рамамаль видемкай, — полавтовсь арсемань лувозо. — Питней, видеяк. Кода тандавтнить, понксоткак, келя, каявтсынзе. Ялатеке рамамаль, кавто-колмо иес идевлизе прянзо. Видьме седе аламо [250] ютаволь — те вейке. Теке жо умастонть седе ламо сюро саевлить — омбоце. Кортамс эряви, паряк, мендяви. Стака-а-а... Эрьва трёшникенть велькссэ сорны. Аволь максомс киненьгак, секе мелявксозо — косто ды кода саемс, лутамс. Теке арсемазо. Варчама, паряк...» — карьксэкс понавсть арсематне уманть кувалт мекев-васов якамсто; зярыяксть содавтнизе течи валске Петряень пельде марязь куляськак, сонгак совсесь, карась удемсэнть. Седейсэнтькак.

Весе. Ютневсть кавто ёндо ума петнеяк.

Теле лангс видемась прядовсь.

«Улезэ розенек олгозо ажияшка, — кучизе Инешкипазонтень энялдоманзо, — товозо — сараз алшка...

Мезе, сыре атякш, кудов? Кудов, кудов шказо...»

Прядовсть тевензэ чипаентькак. Чоп псилгалесь. Ней арсесь оймсемадо, ваннось мадема тарка.

Видицясь кепедизе ды путызе крандазонь удалкс пес изамонть. Каинзе тозонь озамо таркакс чаво кескавтнень, икелев путызе пешторонзо ды видема паргонзо.

Эзь эрязкале. Ков? Косто кияк эзь велявтне? Тов апак капшаяк кенерят. Нежедсь крандазонтень, варштась изазь уманть лангс ды апак учо ледсь мелезэнзэ дюм од шказо, тетязо. Сон канстень видеманть прядомадо мейле кайсиль прясто пильгс. Кайсиль ды штапо апак эрязкале ютнилизе уманть кувалт, трокс, ушкс. Яла мериль: «Тыньгак, эйкакшт, тееде монь ладсо. Илинк стувто. Кадык Инешкипазось несамизь: эйдензэ штапот, эрявить оршамс; лездазо Инешкись кастомс паро, сэрей, чова сэльге кансть, чалгамс нардев мушко, кодамс чевте, кувать сатыця коцт. Содадо, эйкакшт, те коесь пачкодсь тенек умонь-умонь шкатнестэ, покштянь покштянок пельде. Стувтсынек — пачкодтяно покш кажос».

Виряз атянень янксемс а сави, сон топавтсь тетянзо превс путоманзо. Канстень видеманзо свал прялесь кайсемасо. Ансяк зярыяксть эзинзе юксе карензэ ды эзинзе нолдтне коцтонь понксонзо. Аваломанть маласольть. Сестэ кайсекшнесь карксамга ды истя, пельсштапо, ютнекшнизе видезь моданзо.

[251] Кие соды, паряк, те коесь лездыль эрзянь аватненень стамс ды викшнемс истят мазый оршамопельть? Паряк, текеде педякшноськак Вирязонь вановтозо руцясо-палясо одирьвакс оршнезь Элювас?

Канстень видеманть прялить штапо яксемасо. А зярдо видят розь?

Виряз атя видемтизе рунгонзо, кепедизе вановтонзо ды венстинзе панжадо коморо кедензэ чокшне ёнов ваныця менелентень. Сельведень эль кирдезь, марямга пшкадсь паксянь кирдиентень энялдома валсо:

Норовава-Паксява,
Пачкодест теть кортамон.
Топавтык энялдомам —
Лездак сюронь кастомо.
Улезэ розенек олгозо ажияшка,
Товозо — сараз алшка.
Паз, чангодть!
Паз, чангодть!
Паз, чангодть!

Ёвтынзе пазонь неть валтнэнь, кильдизе лишмензэ, саинзе ведьметнень ды кузсь крандазонтень, пильгензэ нолдынзе ирдезтнэнь юткова. «Но» мереманть апак учне, лишмесь тарск сыргась таркастонзо.

«Модась коське, пелян, а лисить, — кавтолдозевсь видицясь раужо леханть чирева ютамсто. — Кемемась менеленть лангс. Кадови, ялатеке кодамояк пельне кадови, начтсынзе. Сындеряй тиряка моданть симемазо, муеви симдицяяк...»

Совась, эзизе редяяк, Эрьмезьвелес. Пачкодсь кудов.

— Тон неик, мезе теить чеертне одониянть марто? Неик, кода калгить пулттнэнь? Тонеть ялатеке! Ансяк монень весе эряви, ансяк мон эрьва ков кенерезан! Прок а эряткак кедьсэнь! Монтемень ковгак а молят, ковгак а маштоват! Мезеяк теть а эряви! — ансяк кенерсь панжомо ортатнень ды калдор-кулдор совамо кардазс, вастызе Элюва паксясто сыцянть аволь весть морсезь «вечкемадо моросонзо».

[252] Зяроксть Виряз макснесь вал а педсемс, теевемс неть «моротнень» а марицякс! Сеедьстэ топавтнесь валонзо: ушов лисиль эли кундыль, оймамонь вешнемга, лия тевс. Ней эзь кирдеве. Эрявить, видеяк, уськень нерват, нолдамс марязенть пиле вакска.

— Сень кис тонеть ламо эряви, — мерсь каршонзо, сонсь апак капша лавшомтызе супоненть, ливчанясто олякстомтызе ажиянть ды нолдызе алов. — Те тон топодема а содат, тон мейсэяк а пештяват. — Таргизе чирькенть ды ёртызе ве ёнов. — Те тон анокат целковоень кис прят миемс, ды микшникак... А стяко велесэнть теть Модаень мерить!

«Моравтыцясь» энгамсь. Учось, мезе атязо ёвты седе тов.

Лишменть Виряз кадызе ажиятнень юткс. Каршавтне ёртнезельть кардазонь келес. Саинзе ансяк чаво кескавтнень ды апак ярса, вачо, вырк-вырк ютась венть ютавтомо утомонтень. «Туян, туян, валске жо туян...» — чавсть прясонзо, теке мушкорнэть, валтнэ.