Тесэ ды тосо (2013)/Ламбамо нартемкс/3
| ←2-це глава | Ламбамо нартемкс (2013) by , edited by Ломшина Л. А. 3-це глава |
4-це глава→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 204—215 |
[204]
— 3 —
Колмо часонь ютазь Элюва уш тевсэль. Велень тевтнень лангсо покшось — чипаесь, сонзэ валдозо. Лисемадонзо икеле, вечкеви а вечкеви, ульть пильге лангсо. Эряви кенеремс весементь мельга: кона чачи, кона касы, кона лопат нолды, кенери, коськи... Шкастонзо тевенть а тейсак — зярдояк а тейсак. Скалтнэ, ансяк ашолгады, потявтомат. А потявтсыть — учомот а кармить, савить кадомс кудос, стадас а понгить. Ды истя эрьва тевенть — шкастонзо.
Виряз атя чокшне сеске эзь матедеве. Кадык покш кежиявтнемас нинзэ пензамотнеде эзь пракшно, ялатеке седеесь, бульчом, скирятотсь. Эзь лезда удомань самонтень, аволь кода ламонень, чинь-чоп стомамоськак. Алксоськак мик марявсь калгодокс. Ансяк валске ёнов совась кеме удомас.
Стясь. Эзь кенере чаманзо ёрвалдомо, глянкадсь Элювань пшти вайгелезэ:
— Модамарть ватксек.
— Молян лишметнень лангс варштан, кардотне урядамат.
— Кенерят. Эрь, кочксек эйстэст берянтнень. Ну мезекс, мезекс тень саик?! Каня а неят, улить седеяк берякшкеть? — тонавтсь, пилязь пилясь важдамонь а содыцясь.
— Неян, неян. Кадомак. Тейть эсь теветь, — музгордезь мерсь Виряз.
«Кадык эно кардазонь, цёрань тевтнень вачкавлинзе лангозон, сон авансетненьгак нерьги...»
Таргочи. Азоравась чокшнестэнть уш арсесь панемс панжакайть. Валскестэнть сеске кундась чапаксонь тееме. Эриця пельксэнзэ кармавтызе модамарень анокстамо: шлямс, путомс чугунсо каштомс, ансяк пиить — ватксемс, томбамс...
Эрейстэ-аволь — тевесь теевсь.
— Саить чугунтнэнь, аксяло оно се кастрюлянть ды — ушов. Чуварсо ёзыть. Вант, седе вадрясто. Шлить ды путыть коськеме. Варштыть лишметнень, лиятнень, каяк Пинеме, симдить, — эзь саво учомс од кармавтома.
— Весе?! — пеедькшнезь мерсь атясь.
— Весе, — коськестэ ёвтызе валонзо тевпаргось,—седе эрейнестэ, иля уле тухмужакс.
Виряз атя содтонть раужо чугунонзо-кедьгензэ марто калдор-кулдор лиссь кардазов. Путынзе ливтезтнень ды васняяк совась лишмень кардос. Очкотне, видеяк, чавольть. Утомсто, капшазевсь, кандсь пряс пешксе кавто ведрат Пинеме. Таргась кудост икеле лисьмастонть ведь ды симдинзе лишметнень. Дёлязь вадяшизе васня Тештинень, мельганзо — Вармань.
— Ну-у, кода венть ютавтынк, кодат онт неиде? — кортазевсь, прок ялганзо марто. — Исень сиземадот мейле кода прят марят? — пшкадсь Тештиненень. — То-та-а. Течи тенк, кецнеде, оймсема чи максан. Вийть таштадо. Тынсь содатадо, тевтнеде — улав.
«Вечксак-арась тевенть—теема, ков эно молят»,—истя арсезь, сияждыця пря атясь педясь пенксев, содов чугунтнэс. Чуварсо нулыне марто савсь ёзамс сынст кувать. Прядызе те «весемеде пек вечкевикс» тевенть, каясь скалтнэнень тикше, урядынзе кардотнень ды уш совиксэль кудос. Эзь кенере. Чи-и-икорк мерсь кудыкелькс кенкшесь, ды кузтемпенть сюпалгавтызь кавто ведрат.
— Ведьс седе курокке!
— Ули теезь! — згилязь рангстась кардазонь прявтось, цопадинзе ведратнень ды лиссь ведь мельга вальмалов, зярыя кудос икелест лисьмантень.
Кандсь весть, омбоцеде. Совавтынзе ванськавтозь-нардтнезь ведрадо ламо кельгемань чугунтнэнь. Низэ саизе эйстэст вейкень, ютавтызе ланганзо вановтонзо ды, сурсонзо нерьгстазь, мерсь:
Виряз истя теекшнизеяк — мелень путозь. Ансяк... Неть валтнэде, марявсь, лоткась сатомадо коштось, секень вант, лепии, нурьгатотсь седеезэ. Типельк-типельк кивчкадсь превсэнзэ мелесь: гамадемс идемевсень неть чугунтнэнь кияксос ды ношкстамс, удалов апак варштне, ков сельметь неить. Зяроксть сакшнось тензэ те мелесь... Ялатеке ковгак эзь ношкста. Ютыть кежтне, ойми, таго кадови. Нейгак истя: саизе нинзэ кедьстэ «пидема паренть», прянзо апак кепеде, чатьмонезь лиссь, теке сулей, мерезенть топавтомо, «педе-пес» тееме.
— Саты теть чугунтнэнь нолсемс! Совак ярсамо, — зярыя шкань ютазь кецневтизе «нолсицянть» содавикс вайгелесь. Вирязонь мельс ледсь нинзэ васень кармавтомазо: «раужо баяганть», кудос совавтомадо, понгавтомс чинь каршо пирявкс пряс. Истя тейськак.
Совась кудос.
Пекезэ зярс пек эзь вачокшно. Зярдо жо вановтозо эртевсь каштомикеле лавсянть лангсо тантей чинесэ лексиця модамарень панжакайтнес, пекезэ потятотсь. Элюва кандсь стувор лангс кавто прякат, вейкенть керизе нилев. Пси коштось менчевезь венемсь эйстэст потолокс. Чакшкестэ ваканс каясь исень пидевть чапамо ловсо.
— Те тонеть, тантягай, — мерсь Элюва ожола-тюжа, сельгетькак туить, пенксенть каямсто, — вечкат тон.
Виряз атя мельспаросо «увтясь» прякастонть ниле пелькст. Тантейть! Теке пештень товт.
— Сюкпря, пиципалакскем! Седеем витевсь. Кавшанят, тантейть! Мон, теня, сырган ракшатненень тикшес, — паро ёжодонть пекензэ ёзазь, ёвтась Виряз.
— Вантака... Умок уш сыргамаль... Тусть, мерят, мелезэть? — полавтызе паницясь казямо кортамонзо, мизолдозь варштась мирдензэ лангс ды озась стувор экшс. — Эрьга, варчасынь...
— Мон эно сыргинь, — мерсь Виряз омбоцеде ды эскельдясь кенкш ёнов.
[207] ...Кияк а соды, мезе карми улеме ванды, ковонь эли иень ютазь. Эзь сода Виряз атяяк: тунь апак учо, прок менельстэ, сы тенст васолдонь инже. Панжинзе паксясто самсто кардазонь келей ортатнень, ды вановтозо эртевсь перьгавтозь а содавикс лишмес, кона порнесь тарантасонтень каязь тикшеде. «Та-кодамо келей сёлмо валгсь пизэзэнек, — арсезевсь неезденть. — Сюпав, неяви, нармунесь, тарантассо юхаи». Совавтызе «пижень» улавонзо кардазс, перьгавтызе лишмензэ ды содызе секе крандазонтень тикшеде порнеме, путызе пелюманзо латалов, совась кудос.
Удало кудосонть кашт. Карво ливти — маряви. Икельцесэнть кайсететсь цёрань аволь пек гайтев вайгель.
«Вай, те кие истямось?» — ютась санганзо а паро ёжо. Сонзэ апак невте, атясь совась икелев.
Стуворонть экшсэ озадоль чуморксов атя. Виряздо седе сыре. Чуро черензэ ашот, прок тустосто почодозь ловсо. Судалксозо ды улозо валанясто наразь. Теде ды Якстерть мериця чамаумардензэ неявсь эсь иензэ коряс седе одокс. Инженть лангсо эрзянь викшнезь панар. Ашо. Псиденть сивезэ келес панжадо.
Стуворонть омбоце песэ, Вирязнэнь копорь ёндо, озадо Элюва. Карадо-каршо аштицятнень икеле прякат, вишка цяпласо мазыйстэ тапарязь ламбаськат. Вакссост панжозь пия бутылка. Вальмалангсо нилешка-ветешка уш чамдозь. Совицянть судоварянзо тешкстызь папиросань тантей чинентькак.
«Э-э, ды тесэ, маряви, покшчинь симнемкат!» — лемдизе Виряз неезенть.
— Озак, атя, — чольдерьгадсь Элювань вайгелезэ, ды кедьсэнзэ цяпадсь эземганть. — Те Иван Паксютыч Письмеров. Мон теть та-кода ёвтнинь. Сон Килейвелень. Модань тевтнеде башка, торгови сюросо. Дошуз ломанесь. Валонь кирдий. Ёвтнинь теть... Стувтык? Вантака... Сон вана, те шержей прясь, — од мирдем. Эрятано вельсоветтэме. Сисем иеде ламо. Лемензэ сонсь ёвтасы.
Анелицясь аволь кортась — витердезь витердсь. Валсонзо марявсь эсь прянь идема ды кеняркс. Лездасть тенень, мерема, чамдозь суликатнеяк.
— Те берянь, — эчке, рокиця вайгель пештизе кудопотмонть. — Аволь умок ульнинь Алоошсо. Микшнемань тевть яксевтинь. Икеле, редия, седе марсевсь тосо келенек. Алкуксонь эрзянь ош ульнесь, ней... Те берянь...
Эчке вайгелень азорось саизе келей, прок рукшна лопа, кедьсэнзэ панжозь пия бутылканть, явизе эйсэнзэ уликсэнть колмов.
— Эрде эно, содавиксэкс теевеманок кис, — ды сонсь каваницясь васенцекс, киньгак апак учне каизе кургозонзо кечинесэнзэ ожола-тюжа веденть. — Та-кода умоктояк умок Элюва нить тердекшнимим пангс. Тевтне кирьгава, ялатеке сестэ алтакшныя прям варштамс. Ансяк вана кизэсь а пангонь. Коське. Тевесь аволь уш истя панготнесэяк. Вирьсэ умок араселинь. Тошнаинь. Эряволь ютамс. Юткоськак Эрьмезьвелестэ Килейвелес кемень вайгельпеть — арась вирьпулынеяк. Ансяк лемесь кадовсь — Килейвеле.
— Адядо варштатано, — талнозь, валтнэнь нильнезь ёвтызе мелензэ Элюва, стясь ды киньгак апак кевкстне кармась пурнамо-сэрнямо.
«Те мезень тамаша, мезень эвсь киштсь тарканть лангсо? — валовсь Виряз атянь ланга пси ведь Элювань коник лангонзо неемстэ. — Вельксэсь мерьказь. Ве пезэ новольсь, кияксос токась. Тодовтне кичкерь-мичкерь путнезь. Те аволь Элювань койсэ. Истямокс зярдояк тарканть а кадсы. Кие, кие?.. Кодат чопачат тёкиесть лангсонзо?»
Сянгоркс, оймень наксавтыця неть арсематнень марто чатьмонезь лиссь стуворонть экшстэ, пшти вановтсо варштась ацамотнень лангс ды ютась кудыкелев, тосто валгсь кардазов. «Вай, авакай-тирякай, вай, козонь понгинь! — эзть кадно Вирязонь, майсевтсть, раздесть седеензэ мельтне. — Урядонь истямо кирдий, ваньксчи мельга правтыця, ды вант вана — пряст лангс велявтнезь велькст-ацамот».
[209] Кулелямонь ёжотнень рикстедемга, совась кардс, ливтизе Вармань ды сюлмизе панст ведьмеде Тештине ваксс пиже тикшеде порнеме. Мезеяк эзь лезда: а лишметь, а мезть, — раужо мельтне лаказь лакасть.
Лиссь, прок мазый баляга панжовсь, Элюва. Прясонзо ашо, уло алга сюлмазь паця, эрзянь покаень таркас лангсонзо истя жо ашо, вишка чахрынесэ артозь ковта ды брижазь якстере юбка. Кедьсеерьксэнзэ трокс каязь кептерне.
Аволь покшке, стёжна, ёлганя рунго, сэнь сельме, турвасонзо налксезь налкси мельстуиця мизолкс. Сынст эйсэ ды ёрокчисэнзэ зярдо-бути эждекшнизеяк Вирязонь. Кузтемпесэ «мазый баляганть» удало аштесь ашо панарсонзо аволь сэрей, келей лавтов инжесь.
— Тонгак, атя, сайть кептерь.
— Мон ковгак а молян. Виренть содасак. Аволь кода мон. Азёдо кавоненк, — башка-башка, лангозост нежедезь, ёвтынзе Виряз меельце валтнэнь.
— Стяко иля ботно — молян, арась... Ютак, саик кудыкелькс стенас понгавтозь кептеренть ды — вирев, саты кашкамс кудосонть! Адя, адя, минь аволь куватьс, — кармавтозь-кортазь валгсть кузтемаванть Элюва ды инжесь, кардазонь вишка кенкшканть лиссть ушов.
Кудотнень, икельгаст кальтнень юткова элякалезь ванкшнось кизэнь маней, аволь пек пси чись.
Кудонь-кавтонь ютазь молицятнень сасынзе Виряз.
Лытасть талай. Састь чаво. Вете-кото суравкадо башка, кептерезэст мезеяк эзь валго. Виде, кизэсь а пангонь, омбоце ков менелесь эзь правто сельведнеяк. Паряк, седе тов, ожо шканть малава, почкоди сэнь латось? Сестэ уш туить мукорь опёнкат. Содык азё, кинь мезе учи ды кинень мезе канды вандынь чись. Зярс жо панготнеяк мазычист а невтнить.
Чикуншкадо мейле вирьга якицятне ульнесть тосо, косто сыргакшность — Пиргужтнень кудост-кардазост икеле.
— Совадо, ялгинеть-оинеть, — моразь ладсо пшкадсь Элюва кенкшенть панжомсто.
[210] Меельцекс совась, пекстызе мельганзо кенкшенть Паксютыч. «Сыргатано курок, иля мелявто», — пшкадсь лишменстэнь, теке басом нерьгстызе кедензэ тарантасонтень каязь тикшенть алов ды таргась тосто колмо бутылкат пия. Совась мартост кудос.
Элюва каясь чакшкестэ чапамо ловсо. Путсь верек алт. Виряз керсесь панжакай. Печттнень ладсинзе шаваняс. Мекев-васов яказь, анокстазь ярсамопельтнень кандтнинзе икеле кудонь стуворс.
— У-у, тынк кедьстэ, ванан, курок а менят, — кеняркс ёжонь марязь, пештизе кудонть вайгельсэнзэ Паксютыч. Мазый сон, ванькс, морамсто, маряви, лымбакстниця-сорныця.
— Мейсэ тевесь? Кадовт, валске ильтятадызь, — поладынзе инженть укстнеманзо азоравась икеле кудов ливтязь ливтямсто, — тарка мутано, кудотнеде кавто.
— Кудотнеде кавто... — валтнэнь ускозь мерсь Паксютыч, арсезевсь. — Кудотнеде — кавто, тевтнеде — сядо. Арась, арась, Элюва сазорнэм, лужалемс, шка ёмавтнемс — те а монь койсэ. Вирьга якинек-пакинек — теяк паро. Сусктано-корштатано аламнеде ды — кудов.
Стуворонть перька калякамось мольсь аволь зняро пангс якамодо, зяро паксянь тевтнеде: нуемат-пивсэмат, яжавтомат, пенгедемат... Велесэ эрязь эно мезде лиядо? Телесь кувака, кургозо покш, ансяк кенерть пештямонзо. Секскак весе мелявкстнэ чарыть сонзэ перька, эрьвась бажи савтомс тензэ.
— Кортыть, улемс инжекс вадря, ансяк эсь кудосот — седеяк вадря, — ледстизе атясь-мазычись ды састыне-састыне лиссь стуворонть экшстэ.
Удало кудова ютамсто Элюва автордызе эземстэ пряка ды кургансо верек ал марто анокстазь юдминенть ды венстизе Паксютычнень, умоконь содавиксэнзэ туртов.
— Те тонеть, Паксютыч! Вант, алтнэнь илить чемердя. Течинь алыявт. А содылинь, мезеяк лия пурнавлинь. Ней уш мезе Инешкипаз макссь!
— Сюконян, Элюва сазорнэм... Прям комавтан парсте [211] вастомат кис. Витинк мелем вирев лиснемасонть. Пазось максозо тенк шумбрачи ды ояксчисэ эрямо, — цярнось атянть эчке, аламнеде ирныця вайгелезэ ушов лисемстэ.
Сакшныцят, яксицят, покшчить... Кода ды мезе илязо уле, тевтне ялатеке теемат. Теемат, валгиндеряй Пазоськак. Вирязнэнь налкставсь а содавикс ломаненть марто апак учонь те вастовомась, китордсь седеезэ, кандтнесь потсонзо кодамо-бути а ёвтавикс сталмо. Лиссь кардазов. Симдинзе лишметнень. Варштась пирев. Ютась седе тов, тингелангов. Марявсь тензэ, мезе-бути ёмавтсь. Мезе—эзь сода. Эзь муе эстензэ тарка. Аламнеде витизе мелензэ, полавтынзе арсемань яннэнзэ одониясь. Аштесь икелензэ, прок пшти тёкш сырнень пандо. «Эряви капшамс, — сась мельс лангозонзо ваномсто, — а пивсэсынек минсь, калгасызь-пивсэсызь чеертне. Капшама, капшама, покштяй...»
Мурдась кардазов. Тошначинзэ панемга сайсь узере ды кундась пенгень лазномо. Якстере сакало Юртай зярыя чить бахаесь. «Кадовсть аламо, монськак кодаяк изнясынь», — тешкстызе эсь пачканзо узересэнть ахолямсто. Цюрка, мельганзо омбоце, колмоце... Панарозо, маризе, педясь киськезэнзэ.
Ломанесь Виряз тужо, аволь тол, а палы, тевенть теи апак капша. Видьстэ меремс, малав сизьгемень иесэ цёрынекс тёкаеме а кармат. Кодат тёкаемат, зярдо ловажатне чикордыть апак вадне чарокс. Озат — а стяват, пильгетне каназкадыть, стят — а озават, таго «ой-вай!». Сыречи. Тень эйсэ мазычизэяк. Ков молят? Стамбаро лыкамонть кис сеедьстэ понгонияк омбоце пельксэнзэ пельде. Сонензэ мезе иетне?.. Ульть свал од. Тевтнень чевеляк, якак ёндолкс. Кепедть седе ламо, кандт, ёртт седе васов. Ускт тевде пшксе улавонть чоподасто чоподас. Лия а соды. Сон, Виряз, ды неень полазо вейкест-вейкест ёнов тунь а молицят. Васенцесь эйстэст, атясь, котьма, омбоцесь — каямо, кодемкс: тей-тов, тей-тов, эрьва тевесь кедьсэнзэ лаказь лаки. Апак эрязкале, седе нурькинестэ, чуросто пильгень путнемань молевкс а соды. Свал чиезь. Сонсь вишкине — мельганзо а кенери вензав цёраяк. Цянавнекс ливтни. Теде лиясто лиснить ютксост кечкерематкак.
[212] Бах-бах, шпа-а-анк! — сравтневить вачкоемань гайттне кардазонь келес. Ансяк саразтнэ сынст кунсолыть. «Те мезе истя?» — кевкстнить, пряст кепедезь. Пукшт-пакшт лазновить пенгетне. Прясонть ялатеке поны карьксэнзэ Элювань удома тарказо, прянзо лангс, кода марявсь, велявтозь коникесь. «Каня те алкукс? Паряк, истя монень маряви? Мезть а эрсить... Мекс мезеяк а вешнемс кенденть алга? Сестэ кода чарькодемс пиянь чаво бутылкатнень? Те идемевсь атясь... Тикшес сыргамодон мейле шкадонть байтяколь. Оно зяро бутылкат мамштасть! Оно кода Элювань сельмензэ налксесть, келеськак лавшомокшнось. Мезть кортамс, умок редязь — симезь авась эсензэ лангсо а азор. Кадык кургоскак а сайни, пиинеденть корштнесь. Оно кода кулдордсь... Сюронь микшницядонть... Виде-виде, ёвтнекшнесь Элюва те боярдонть мезть-бути. Мезть? А... каня кирдевить! Стувтовсь».
Гонкаесь килеень цюркатнень сундерьгадомс. «Саты течис. Ванды чи карми, прядсынь», — сась мельс ды цяподизе узерензэ лазнома мукорентень. Совась, ливезев конянзо нардтнезь, кудос.
— Ёрвалдыка лаханонть велькссэ. Седе вадринестэ, вадринестэ, — венстизе Элюва потявтома ведранть ловсонть педямодо мейле.
Виряз ушодсь шлямо.
— Азё ливтика тусто ведь ведранть. Я, стувтокшныя, валскенень пенгеть анокт? — поладынзе кармавтоманзо азоравась.
— Кедень аволь кемень! Неят, мезе теян? — машнетезь мерсь атязо, путызе тарказонзо ланга тукшныця эриялганзо.
Теизе васень меревксэнть, ливтизе тусто ведь ведранть, кавксть кандсь пенгеть. Ней мезе?
Кувать учомс эзь саво.
— На, шлик пачалгонть. Мейле тенсесыть кудотнень. Монь кедень новольсть, — пеняцязь ладсо «кецневтизе» ялганзо Элюва ды невтинзе кедень луволемасо сэредиця суронзо.
[213] Неть тевтнень «сявордомадо» мейле Виряз атя юксинзе-каинзе карензэ, путынзе свал путнемань тарказост ды ёрвалдынзе — каясь тазас ведь — пильгензэ. Кепе совась икеле кудос. «Окойники, — тешкстызе эсь пачканзо, оймензэ шождынестэ таргазь, — течис весе». Озась столь экшс. Саизе ужос чавозь лавсинестэнть умок пачтязь газетанть. Ютась статьянь лемтнень ланга, кепедизе прянзо, ды вановтозо эшкевсь анамаз пона коникентень. «Пту! — сельгсь ацирьгадозь ды теке басом оймавтызе эсь прянзо: — Мезт ь ацирьгалят, сыре кренч, каня а содат, кить аватне ды кить цёратне? Васенцетне микшнить эсь сюпавчист, омбонстнэ— рамсить. Эрьвась менди эсензэ ёнов. Аволь уле те — аволь уле модамасторонть лангсо эрямось. Авась эсь эрявиксчисэнзэ кармавты тееме весементь, мезе тензэ эряви. Тень кувалма сон эсь прянь вечкиця. Весе улезэ ансяк сонзэ ладсо, бажи теемс цёрастонть кедьёнксонь кондямо. Кода илязо уле, сон — пизэнь пурныця, эждиця, ванстыця. Секс мезеяк лангс а ваны пурнамстонзо. Самай секс мерьказь коникесь, вейсэнь удсема таркась... Мезе лия учат?»
Кода эзь оймавтне оймензэ, апарось эйсэнзэ каразь карась. Нусманя арсеманзо сезинзе та-кодамо велесэ вейсэнь од эрямодо статьясь. «Те таго мезе?» — кивчкадсь превсэнзэ, кундась ловномонзо.
Совась Элюва.
— Саты теть ваномс конёвонтень! Нувсят, некак, мадть! Чоп нерьгинек, — валтнэнь ёвтазь, юксизе карксонзо, каизе панаронзо ды дюм штапо лоцьк мадсь Вирязонь седеензэ раздиця таркантень. — Лоткак каштордомадо, мадть.
Виряз прядызе ловноманть, козкстась ды путызе конёвонь лопанть тарказонзо. Аламос мольсь, частнэнь тикаемадост башка, кашт. Колызе сонзэ, талай онкстнемадо мейле, кониксэнзэ кунст мадезь аштиця Виряз:
— Элюва, дугай, те кие кедьсэнек ульнесь? Мезть-бути ёвтнекшнить... Мезть — дух мельсэнь эзь кирдеве.
— Сядоксть теть ёвтнинь. Прясь тонь, видеяк, сувтеме. Те атянть, Иван Паксютовичень, содаса умок. Килейвелень. Сю-у-упав алясь! Ули ведькевезэ, кирьпецень заводозо, [214] ямкст пенгеди. Сюросо торговамодонзо кортамскак а мезть. Рав чирева вети тевензэ. Кудозо Килейвелесэ кавто этажсо. Кирьпецень. Алоошсояк текень кондямо. Кудом путомсто лездакшнось тень.
— Мейсэ? — совавтсь вал кунсолыцясь.
— Кирьпецьсэ, содазь. Эрявсь эйстэст аволь аламо.
— Зяродо лиссь?
— Кода теть меремс... — Элюва аламос чатьмонезевсь, — аволь уш кода весенень. Зяро-бути сюросо пандынь. Сон эдь сюросо торговиця.
— Зярос нолдтнизе питненть?
— Ней уш стувтовсь. Маряви, пельпитнеде сайнинь. Шкась оно зяро ютась, кеменде ламо иеть. Вадрясто лездакшнось, а мезть кортамс.
— Мезень кис?
Валтнэ зярс-бути лоткасть коникстэ коникс ливтнемадо. Виряз атя, керш боканзо лангс мадезь, учось. Элюва, прок сускизе келензэ, чатьмонсь. Окойники тетькевикс, оймень киртыця каштмолемась сезевсь.
— Весе теть эряви содамс. Бути уш истя бажат, ёвтаса. Теня, од ульнинь. Эринь мирдевтеме. Эрявсь тень... Мезень берянесь?
Элювань видькстамодо атясь одс велявтсь кунст. Марявсь тензэ, лепштизь таркантень мештень трокс каязь чувардо пешксе кескавсо.
— Сестэ, лисни, течинь мерьказь таркась... од шкадот ледстнема? — стакасто лексезь, сорныця вайгельсэ поладызе кевкстеманзо.
— Мезе-мезе?! — ацирьгадозь серьгедсь таркастонзо тень каршо Элюва.
— Мезе марить. Ды неить. Неик, кода «ацазель» коникесь. Паряк, истя псакась киштсь лангсонзо?
— Содат мезе... Нейке стяк ды пурныть курмот-кармот. Азё тов, косто сыть. Сыре нить учи эйсэть! Свал истя пурнакшнан вельксэнь-алксон, свал!
— Свал, — эль марявиксстэ лиссь Вирязонь кургосто, — теке мон а содан урядонь кирдема койдеть, а [215] содаса, кода вадяшакшнат велькстнэнь-тодовтнень. Кувать монтемень аштесь?
— Тонеть кодамо тев?! — кежтнеде лаказь, серьгедсь каршо Элюва.
— Истямо... Каня стака ёвтамс? — эзь пота, исковась Виряз атя, бажась содамс седе ламо, содамс весементь педе-пес.
— Сась велявтомадот икеле, — арсезевсь, аволь сеске топавтызе поланзо меленть авась.
— Сеске, мерят? — кулелямодонть палсь Виряз. — Сеске, лисни, пия бутылкатненьгак костинк?! Ве валозот а кемеван! Кенгелят тень визьксэнь апак сода.
— Тонсь истямат! Вант эсеть мельга. Свал чумочинть киньгак лангс ды каясак. Весе чумот, ансяк аволь тон, — Элюва прядызе пелькстамонть.
Кудось пешкедсь, чоподадонть башка, каштмолемадо. Теке кецнесь: сёвномань недявксось прядовсь. Виряз атя содась: весь юты апак удо. Истя лисськак. Оймамонь апак сода чавсь прясонзо мелесь: «Кода улемс, мезе теемс? Ков молемс?». Зярскак ваить та-ков неть кевкстематне — таго лангс лисить, таго рангозь рангозевить. Терявтнизе, ды а весть, кекшемс эйстэст эсь пачканзо ловозьгак. Вейке, кавто, колмо, ниле... сядо... колмосядт... Мезеяк эзь лисе. Полавтнесь ёнксонзо, маднесь комадо, кунст, лиснесь ушов—теяк эзь лезда, удомазо малавгак эзь тердтневе.
Окойники ашолгадомась варштась позакадозь сельмесэнзэ вальматнева, кундась эземтнень-кониктнень алдо чоподанть пансеме. «Саты кеверькшнемс», — мерсь эстензэ атясь ды састыне, илязо маря низэ, нолажтсь «чувтонзо» лангсто. Совась паникудос. Чаманзо апак ёрвалдо оршнесь, карсесь. Лиссь кардазов. «Ансяк тевесь, эйзэнзэ рожодомась, менстятанзат куш кодамо ормадо», — ледсь мелезэнзэ вечкевикс валмеревксэзэ, ды сон кундась эрьва чинь тевезэнзэ.
Ушодовсь мелявксто, кенярксто, ризкстэ, эрьва кодамо тевде-котьмамодо пешксе од чись.