Священная история Ветхого завета (мокшень)/О/50
Пророк Иона.
Пророк Иона эрясь Израильскяй масторса Елисейда меле. Весть Шкайсь кучезе Ионань Неневия ошса эряйхненди корхтама, што синь аф цебярь эряфснон инкса Шкайсь кяжиясь лангозост. Неневиянь эряйхне пяк лама афцебярь тиендсть Израильтяттненди. Сяс Ионань пяк ашезь ту мялезонза тоза молемась дъ корхтамась эсь масторонц неприятелензонди Шкайть кяжияфтоманц кувалмова. Сон содазе, што Неневиянь эряйхне кадондярясазь аф цебярь тевснон дъ кармандяряйхть Шкайти озондома, Шкайсь простиндасыне синь.
Сон озась корабльс дъ тусь иля масторс. Сонь корабольса уемстонза кепедсь морять лангса вишке буря.
Корабльть лангста сембе ломаттне эводсть дъ кармасть сембе шкайснонди озондома, а бурясь аф лоткси. Эста пърдазь сембе ломаттнень марс дъ каясть жерьба, кинь инкса сатозень синь тяшка несчастиясь. Жерьбась прась Ионать лангс. Эста Иона азондозе эсь грехонц, дъ эняльдсь, штоба ёрдалезь сонь моряв. Аньцек ёрдазь моряв, бурясь эстокиге лоткась. Моряса Ионань нилезе оцю кал. Калсь кирдезе сонь эсь потмосонза колма шит дъ колма вет дъ ёрдазе мъля меки берягть лангс. Тяда меле Иона мольсь Неневияв дъ шинь шоподемс якась ошка дъ корхтась: илядсь аньцек нилегемонь ши, сальде Неневиять Шкайсь юмафтсы аф цебярь тевонзон инкса. Неневиянь эряйхне верондасть Ионанди, кармасть ризнама аф цебярь тевснон кувалмова дъ аварьдема, Шкайти эняльдема дъ прощениянь анама. Шкайсь кулезе синь озондомаснон дъ простиндазень.
Неневиянь эряйхненди корхтамда меле, Иона лиссь ошта ушу, тись эстиенза псить эзда кяшемс кош, дъ кармась учема, кода Шкайсь юмафтсы Неневиять. Фкя веня Шкайсь касфтсь Ионань кошонц инголи оцю лопав шуфта. Иона кенярдсь ся чудати: ся шуфтть эзда праль сонь кошонц лангс цильф. Аньцек омбоце шиня сукссь порезе ся шуфтть юронц, и сон коськсь. Мъзярда лиссь шись дъ кармась Ионань прянц пидема, Иона кармась ужяльдема, што ся шуфтсь коськсь. Эста Шкайсь мярьгсь теенза: теть ужяль ся шуфтсь, конань лангса тон ашеть труденда, ашеть касфта эсонза. Кода мъля Теень аф ужяльдема Неневиясь, конань эса сяда комсь идь, конат аф содасазь, кона види кядьсна, кона — кяржись.