Священная история Ветхого завета (мокшень)/О/42
42. Галиафть сяськомац.
Филистимлятне ушедсть тюрема Израильтятнень мархта. Синь солдатсна ащесть панда пряса, а Израильтятне каршезост — омбоце пандть пряса. Филистимлятнень ёткса ульсь фкя пяк оцю дъ вии солдат, сонь лемоцоль Галиаф. Сон лиссь Еврейхнень инголи дъ корхтай: сембонди тюремда, кочкада ёткстононт фкя ломань дъ кучесть сонь монь мархтон тюрема. Сон сяськондярясамань монь, минь ульхтяма тинь, а къда мон сяськса сонь, тинь ульхтяда минь. Сянь кулезь сембе Еврейхне эводсть: синь ашель стама ломанцна, конань виец сатыль Галиаф мархта тюремс. Ся пингть тюрема вастти мольсь Давидсь брадонзон варжама. Сон кулезень Галиафонь валонзон дъ ёрась мархтонза тюремс. Сянь кулезе Саулсь. Сон тердезе Давидть дъ мярьгсь теенза: тон аф тюреват тя филистимлянть мархта, сонь сембе эряфоц ётась тюрема вастса, а тон нинге одат дъ ёмлат. Давидсь мярьгсь Саулти: алязень учанзон ваномста теень сашендовсь тюремс офта мархта дъ леф мархта, и мон шавондонень синь; мон надиян аф эсь виезень лангс, а Шкайть лангс. Саулсь щафтозень Давидть лангс эсь тюрема адёжанзон. Давидсь каязень тюрема адёжатнень, кочкась шудерьксста вете валазе кевнят, сявозе эсь кевнень ёряма локшонц дъ сняконь мархта тусь Галиафонь каршес. Галиафсь няезе сонь дъ кармась лангозонза пеедькшнема: мон аф пинян, тон лисеть мархтон тюрема кевса. Ся пингть Давидсь путсь локша пезонза кевня дъ ляцсь Галиафть лангс. Кевнясь видеста повсь Галиафонь конязонза; Галиафсь прась ёжофтома. Давидсь ласьксь теенза, фатязе Галиафонь сонцень палаженц дъ керозе сонь прянц. Еврейхне ласьксть филистимлятнень мельге, шавондозь синь, а мезьсна ульсь, сявозь эстиест.
Еврейхнень меки куду самстост, аватне лиссть каршезост дъ морасть: Саулсь сяськсь тёжянь, а Давиць сяськсь афи лувовихть мъзяра. Ся валхне ашесть ту Саулть мяльс, сон кяжиясь Давидть лангс дъ ётконь музь ёралексолезе сонь шавомс. Давид кулезе сянь дъ тусь эряма иля мастору. Сон эрясь тоса Саулть куломс.