Священная история Ветхого завета (мокшень)/О/41
41. Давидонь оцязоркс кочкамац.
Самуилсь ламос аварькшнесь Саулть кувалмова. Шкайсь тихтедсь теенза дъ мярьгсь: тят аварькшне Саулть кувалмова. Мон мунь оцязоркс сондедонза цебярь ломань. Пяшкотьк сюроцень шуфта вайда дъ арт Вифлеем ошу Иессейнди, дъ ся цёранц, конань Мон няфтса, ватьк оцязоркс.
Самуилсь тусь. Иессейсь тердезень теенза сисем цёранзон. Самуилсь кизефтезе сонь, сембе-ли цёранзон сон тердезень. Иессейсь мярьгсь: ули нинге фкя цёразе, лемоц Давид, сон ваны учат. Самуилсь мярьгсь Давидть тердемда, Давидсь сась. Шкайсь мярьгсь Самуилти: стяк дъ ватьк, тя сон, конань Мон кочкань. Самуилсь вадезе Давидть брадонзон ингольде. Эстокиге Шкаень Духсь валгсь Давидть лангс, а Саулть эзда тусь. Саулть аф-цебярь духсь пингонь-пинге ушедсь мутендамонза. Саулти мархтонза эряйхне мярьгсть: вешть гусляса морама машты ломань, сонь морамстонза аф-цебярь духсь мутендамдот афо-ли лоткай. Сянкнень эзда фкясь мярьгсь: мон содаса, Вифлеемста Иессейть фкя цёрац машты морама. Саулсь мярьгсь Давидть вятемда. Давидсь тусь Саулть мяльс, сон кадозе сонь эсь мархтонза эряма. Мъзярда аф-цебярь духсь ушедкшнель Саулть мутендама, Давидсь морсель теенза гусляса.