Священная история Ветхого завета (мокшень)/О/22
22. Иосифть брадонзон Египту васенце молемасна.
Ётасть сисем сёронь шачи кизотне, састь вача кизотне. Сёрось ашезь шаче аф аньцек Египетса, а Ханаанскяй масторсонга, коса эрясь Иосифть аляц — Иаковсь. Мъзярда Иаковсь кулезе Египетса сёронь мишендемать, кучезень цёранзон Египту сёронь рамама; куду илядсь аньцек ёмла цёрац — Вениаминсь. Египетса мишендсть сёра аньцек ся ломатненди, конатненди мярьгондель сонць Иосиф, сяс Иосифть брадонза састь теенза сёронь кизефтеме. Иосифсь эстокиге содазень брадонзон, а синь ашезь сода сонь. Иосифсь корхтась мархтост аф Еврейскяй кяльса, а Египетскяй кяльса. Иосифть брадонза кодак сувасть теенза, сюконясть пильгозонза; Иосифсь кяжиста кизефтезень синь: тинь коста саде? Синь мярьгсть каршезонза: минь саме Ханаанскяй масторста сёронь рамама. Иосифсь мярьгсь теест: мон няйса, тинь аф сёронь рамама саде, а Египетскяй масторть варжама дъ сальде тинь сатада лангознок вайнаса. Иосифть брадонза мяргсть: аф, минь аф стама ломаттяма, минь сембе фкя алянь цёратама; минь эздонок аф кемонь, а кемгафтува; аньцек фкясь кунаркиге аш шиса, а эмбода ёмлась илядсь куду аляньконь мархта. Иосифсь мярьгсь сянь кувалмова: къда тинь видеста корхтатада, тусть теень сембода ёмла брадонтень, а соньфтемонза оду тяда сашенда. Тяни фкясь эздодонт иляды теень закладс. Дъ кадозе Симеонть закладс. Брадонза сонь кувалмованза ушедсть лажнама дъ кармасть эсь ётковаст корхтама: тяфта минь Шкайсь наказасамазь Иосифонь миманц инкса, мяляфтсаськ, кода сон мимстонза эняльдсь теенек, а минь ашеськ ужяльде сонь. Иосифсь кулезе синь стане корхтамаснон, тусь синь ваксстост дъ аварьгадсь. Сальде мярьгсь брадонзонди сёронь каямда дъ нолдамда куду, а ярмакснон, конатнень брадонза максозь сёронкса, мярьгсь кяскавозост путомда.