Священная история Ветхого завета (мокшень)/О/12
12. Содом мархта Гоморрать юмафтомасна.
Шоподема-пяли кафта ангелхне састь Содому. Лот ся пингть ащесь озада Содомть ортанзон лангса. Кодак сон няезень ангелхнень, стясь эсь вастстонза, сюконясь теест мастору дъ мярьгсь: сувада монь кудозон удома. Ангелхне мярьгсть: минь удотама ушеса. Лотсь мярьгсь теест: мон афолень мярьге теенть ушеса удомда, тяса эряйхне аф цебярь ломатть. Эста ангелхне тусть пялонза. Веть састь Содом эряйхне дъ кармасть Лотть кядьста Ангелхнень анама. Ангелхне синь сембонь сокоргофтозь. Шобдава ангелхне мярьгсть Лотти: минь ангелхтама, Шкайсь кучемазь минь тя ошть юмафтома; тон сявк сембе семьяцень дъ листь тяста; ки лангса кивок эздодонт тяза варжаксне фталу.
Лотсь сявозе аванц дъ кафцке стирензон, дъ лиссь Содомста. Лотть авац ки лангса ашезь кирде дъ варжакстсь фталу, дъ эстокиге тиевсь салонь столбакс. Содомть дъ Гоморрать лангс менельста прась тол, дъ пълхтазень синь. Синь вастозост тиевсь моря, конанди мярьгихть Чермное море — мокшекс кулома моря.