Священная история Ветхого завета (мокшень)/О/11

From Wikisource
Jump to navigation Jump to search
Священная история Ветхого завета на Мокшанском наречии Мордовского языка  (1900)  by Евсевьев, Макар Евсевьевич
11-це главась.
Священная история Ветхого завета на Мокшанском наречии Мордовского языка. Издание Православного Миссионерского Общества. — Казань, типо-литография Императорского университета, 1900. — с. 13—14

11. Авраамонди Шкайть кафта ангел мархта тихтедемац.

Весть Авраам ащесь озада кош кенкшенц лангса дъ няйсь колма ётай страннект; ласьксь синь каршезост, сюконясь теест мянь модати, дъ тердезень эсь пялонза ваймама. Ня страннекне аф стак ломательхть, а Сонць Шкайсь кафта ангел мархта. Авраам аноклась теест ярхцама пяль, дъ озафтозень страннекнень ярхцама. Ярхцамста сембода сире страннексь, Кона Сонць Шкайсель, мярьгсь Авраамонди: кизода меле тонь аваце шачфты теть цёра.

Ся пингть Саррась кенкш фталоль, сон кулезень ня валхнень, дъ пеедезевсь сяс, што синь кафцке пяк ни сиретольхть. Саррати вейхксагемонь кизоль, а Авраамти вейхксагемонь вейхкса кизоль. Шкайсь мярьгсь: Шкайти аш мезевок аф тиемшка. Мяс тон пеедезевоть, сянкса тинь цёрантень лемоц ули Исаак, мокшекс исааксь „пеедема“. Ярхцамда меле страннекне тусть Содому. Авраамсь тусь синь първажамост. Ки лангса Шкайсь мярьгсь теенза: Мон аф сёпса Авраамонь эзда, мезь ёран тиемс. Мон молян Содом мархта Гоморрать юмафтома, тоса ломатне эряйхть аф цебярьста. Ся пингть кафта ангелхне тусть Содому. Авраамсь кизефтезе Шкайть: Шкабаваз, улендяряйхть тоса ведьгемонь Шкайда пели ломатть, Тон синьге мархтост юмафтсайть?

Шкайсь мярьгсь: къда улель тоса сэпяра цебярь ломать, Мон синь инксост афолинень юмафта грехуфненьге. Авраамсь нинге кизефтезе Шкайть: а улендяряй ня ошнень эса аньцек кемонь Шкайда пели ломатть? Шкайсь мярьгсь: синь инксостка афолинень юмафта ня ошнень. Эста Авраамсь сюконясь Шкайти дъ мърдась куду.