Поладкстомо (2016)/Ули мастор, конась монь седейсэ.../2
| ←1. Мезе те истямось — мастор? | Ули мастор, конась монь седейсэ... (2016) by 2. Кие мон, кинь? |
3. Сюпавчивтеме масторт арасть...→ |
| Нуянь Видяз. Поладкстомо. Без продолжения. — Саранск, 2016. — с. 467—470 |
[467]
2. Кие мон, кинь?
Каладсь орькс империясь, конанень мерильть СССР. Мон эрян яла эйсэнзэ. Мон, кода сёрмадозь паспортсом, СССР-нь гражданин. Тамаша? Содазь, тамаша. Кода а улемс истямокс — эрятано истямо «масторсо»? Зярыя иеде икеле ульнинь колмо ёнксонь ломань — СССР-нь, РСФСР-нь ды МАССР-нь. Ней кадовсть кавто. Бути меремс видестэ, теить эйсэнь «россиянинэкс». Ды седеяк видестэ — урекс. «Верховенство Законов России» теицятненень истя седе шожда чамдомс зепенек, габзордамо ды кучомс ков превезэст сы.
Ули, таго ледстяса, эсенек масторкоцтонок, гербенек, Ине кужонок (Верховной Советэнек), аволь аламо министранок... Лангс ваномс мень а государства? Ансяк вана... граждантомо. Ёвтнема теде киненьгак Франциясо эли Бельгиясо — а кемтядызь. Те, сон теть мери, — анекдот. Истя улияк. Мастор... ломантеме. Те мезе истямось?
Кить минь, алкукскак? Кодамо ёнксонь эйкакшт? Паряк, Ков лангонь? Паряк, видеяк, «россиянт»? Татарстанонь превей, арсиця цёра зярдояк истя эсь прядонзо а мери. Чеченэськак истямокс а лови эсь прянзо. Грузиянь эли Эстониянь эрицянть ланга кортамскак а мезть. А лован «россиянокс» эсь прям монгак. Мон — эрзян. Эрзянь Масторонь ломань. Ды бути ютавтомс тевтнень законтнэнь эрьва букваст коряс, — а видестэ кедьстэнек саить каявкст, сайнить цёранок ушманокс...
Мезе теема?
Васняяк, эрявить паро Законт. Ютксост весемеде питнеесь — Гражданствадо. Эрзятненень, конат эрить Россиянь областнева, — Закон омбокс гражданствадо. Зярс [468] сынь истямокс а теевить, келенек прянь кепедезь эрямо а карми. Газетатне (аволь «Эрзянь правдась», чарькодеви) ансяк маризь Инекужосо кортамотнень, сеске стясть каршо: сынь, келя, — раськетнень ютксо толбандянь теицят. Мекевланг. Мастортнэсэ, косо алкукскак раськетне эсь модаст лангсо азорт, истят Законтнэ ванстыть эрьванть покордамодо, лездыть тензэ ванстомс келензэ, масторонзо, эрямо тарканзо... Бути кортамс «правовой Государствадо», весемеде икеле эряви невтемс, кинь косо эрямо пизэзэ. Ансяк сестэ ломанесь ушоды мельганзо якамо прок ансяк озавтозь чувтыне мельга.
Минь, эрзятне — Мастортомо раське
Россиянь Инепромксось кемекстызе Гражданствадо закононть. Эйсэнзэ невтезь, кода максови те лемесь, кода лоткавтови-пекстави. Ёжом колавтызе те закононть колмоце пельксэзэ — «Прекращение гражданства РСФСР». 22-це статьясонть тешкстазь: РСФСР-нь гражданствань лоткавтомсто лоткавтови гражданствась республикасонть, кона «в составе России». Лиякс мерезь, а Улиндерят Россиянь ломанекс, тиринь масторонь ломанекс зярдояк а улят. Лисни: тейть истя, мезе мерить империянь прявттнэ.
Мордовиясь, кода свал, учи. Ули Гражданствадо законост калмыктнэнь, татартнэнь, ули лия «субъектнэньгак». Ансяк минек... Течис арась туемадо-самодо (миграциядо) закононокак. Секс самай ардыть «сэтьме Мордовияв» Армениясто, Туркменистансто, Таджикистансто... Весе сынь, косто-бути сыцятне, кармить тенек кочкамо депутатт, мелест ёвтамо эрьва кодамо кевкстематнесэ. Туемадо-самодо Законось, арсемскак а мезть, куродовлинзе масторганок вармакрандазокс ардтницятнень.
Саха республикань Инекужосо аволь умок кемекстазь Гражданствадо закон. Те пек паро. Сонзэ коряс эсь ломанекс кармить лововомо ансяк сетне, кить эрясть те республикасонть кеменде ламо иеть. Туиндеряйть мелезэть те ёнксонть мазычинзэ ды чевте седей эрицянзо, тонавтник сынст келест, учосыть неть кемень нетненьгак.
[469] Тейсть Гражданствадо закон Коми ды лия республикатнеяк.
Мордовиясь кадовсь тень эйсэяк. Мекс? Тувталтнэде ламо.
Васенце чумокс мон лован «мордва» валонть. Те сон рашты зыянтнэнь ды пелькстамотнень. Кой-кинь тунь арась мелезэ эрзянтень меремс эрзя, мокшонтень — мокшо. «Единый народ» — ды весе. Кияк а содасы, кодамо те истямо «единой келесь». Ёвкст...
...Эрясть-аштесть лелят-ялакст. Лелянть ульнесть ниле цёранзо, покшт ды тевень вечкицят. Ялаксонть — вейке цёразо. Сеяк тевтнесэ эзь пало. Сась тундо, видема шка. «Мон арсян, леляй, сюронок ве паксяс видьсынек...», — пшкадсь веженцесь. Лелязо мезеяк эзь мере, ды видизь сюрост ве паксяс... «Кода-бути а ён явномс, — арсезевсь покшось, — ве авань цёранень...». Сась сёксь. Умаст нуизь, сюрост пивсызь. «Кода явомонзо пивсэзенть карматано?..» — кевкстни лелясь. «Те кода истя «кода»? — абунгадсь ялаксозо. — Кавтов!» Покшонть мелезэ арасель истя теемс, ансяк наян ялаксозо пря эзь максо. Сюронть явизь кавтов. Мейле ялаксонть цёлак цёразо мерсь: «Ох и ён вейсэ важодемс!..»
Секс самай минекак вейке театранок теевсь Русскоекс, омбоцесь, «мордовскоесь» — пильге лангс а стявтови. Теке тувталонть коряс течис арась алкуксонь эрзянь мазый кельсэ газетанок, арасть талант марто кортыцянок ды морыцянок-киштицянок... Меревлинь, «Умарина» — минек каштанчинек, а мереван. Те ансамблясь седе ламо моры рузонь ды лия раськень морот. Умаринась умок теевсь укшторинакс. Иеде иес аламолгадыть сермадеенек.
Те сон, «мордва» валось-нарьгамось, весемеде чумо, мекс арасть меельце шкас эрявикс закононок. Зярс эзь кемекставо кельтнеде Законось, арась эрзянь ды мокшонь велетнеде Закононокак, Саран ошось рузыявты эйсэнек сельмень неезь. Вана кодамо те та-косто кандозь лементь «танстезэ»...
Омбоце тувталось, кона пачтимизь отьманть чирес, — а содасынек кезэрень шканок. Косто минь сынек, кить [470] ине ломаненек, зяронь таркава сравтневсь Эрзянь раськесь. Школасо-косо теде а ёвтнить. Сень кис потямо шкастонок саезь нерьгить превезэнек «Отечествань историянть». Содавикс сёрмадеесь Федор Абрамов мерекшнэсь: «Раськесь кулы «населениякс» теевемстэнзэ. Истямокс сон тееви эсь эрямонь пингедензэ стувтомсто». А стяко те ломанесь вечкелинзе Мезень, Пинега, Сура, Кулей, Вага... лейтнень. Содась сон эсь ундокстонзо!