Поладкстомо (2016)/Ули мастор, конась монь седейсэ.../3
| ←2. Кие мон, кинь? | Ули мастор, конась монь седейсэ... (2016) by 3. Сюпавчивтеме масторт арасть... |
4. Службадонть оргодсть...→ |
| Нуянь Видяз. Поладкстомо. Без продолжения. — Саранск, 2016. — с. 470—475 |
[470]
3. Сюпавчивтеме масторт арасть...
Кие-бути инетнеде мерсь: пурныцянть масторозо — кескав. Истя улияк. Бути раськенть эрицянзо удало нулны кескав, конась пешксе чаводо, чачома мастордо кортамс а мезть. Лия ине истя мерсь: бути кудосот азоркс тейни шабрат, мерть, кудовтомот. Те чарькодеви Эйкакшонтеньгак. Улевель седеяк паро, чарькодевлизьгак тень покштнэ ды, васняяк, «в составе России» пижницятне.
Федерациянь кедьчавома конёвсонть (Договорсонть), кона ловови Российской Федерациянь Конституциянь пельксэкс, сёрмадозь: модатне ды сонзэ весе улипаронзо — республиканть сюпавчинзэ (3-це статьясь, 3-це пельксэсь).
Сёрмадомс сёрмадозь, ансяк тевенть теемстэ лисни тунь лиякс. Конёвось обуцявтомо. Кирьдсы весементь, мезе сёрмадозь. 81-це статьясонть ёвтневи: Пертьпелькстнэ, сынст эйстэ улипаронь саемань тевесь — вейсэнь — РФ-нть ды республиканть. Вана те казне! Аймельгадомань тевть ды ансяк.
«Вейсэнь» валонть питнезэ пачк неяви вана истямо невтевкссэнть.
Хантытне ды манейтне ваучертнэнь саить беряньстэ. Сынст а козонь путомс. Неть раськетнень весемеде покш сюпавчист — нефтась — кадови государственнойкс. Лиякс меремс... бабань пеште теть, азор, а эряви?
Зярыя валт неть раськетнеде.
Сынь — финнэнь-угрань чувтонть эйстэ тарадт. Эрить Ханты-Мансийской национальной областьсэ. Ве ёндо [471] тенст пирявксокс сави Екатеринбургской областесь, омбоце ёндо — Омскоесь. Хантытнеде 1970-це иестэ лововсть 21138, манситнеде — 7710. Аламолгадыть, кода миньгак. Сюпавчист, нефтадонть башка, — тайгась ды оленень трямось. Неть кавто пайстомо раськетнень тонавтызь симеме, таргамо, усксевеме, нулгодькс валсо сёвномо. Сынст масторс пачкодсть аванькс ды педиця ормат... («Огонёк», 1991, 42№).
Уралонть тона ёндо Шашттано седе малав, Татарстанов.
Меельце шкас те республиканть заводонзо ды фабриканзо нолдасть 80 процентт эрьва кодат «ванстома пелькст». Весе предприятиятнень эйстэ Татарстан мельга ульнесть цётазь-кемекстазь ансяк... 22 процентт. Лиятнень лангсо азорокс ульнесь СССР-сь. Те ёнксонь эрицятне нолдасть ды нолдыть эрьва кодат товарт. Эйстэст ансяк сисемеце пельксэсь кадновсь теске. («Волжские новости», 1992, умарьков).
Ней Татарстанось «эци пекензэ» аволь ансяк суверенитеттэ, ули сонзэ лия мелезэяк.
Алкуксонь Эмиратокс эряволь улемс Сахантень. Мезе тесэнь модатнень потсо ансяк эзь таштавкшно! А стяко те «мастордонть» мерить «Россиянь Клондайк». Весе СССР-сэ таргавиця сырнесь ды алмазтнэ таргавильть-шлявильть Якутиясо. Виде, ожо кшниденть саильть аволь аламо, ансяк Сахастонть Эмират эзь тееве. Мекс? Бешом, тесэнь даволтнэ-якшамотне чумот.
Улипаротне салсевсть-ёмсевтневсть, валсть-тейсть сынст лангс жабардань-жабардань танкат ды кой-мезть лият. Валсть неть «налшкетнеде» зняро — ней а содыть мезе мартост теемс. Аволь аламо Сахань ломантненень савсь чукадемс раськень утомтнестэ од, мода потс кекшезь парочитнень Московонть теемскак.
Сеедьстэ савкшны марямс: «Мордовиясь — андомка республика». Сонзэ, келя, арась нефтазо, арась уголиязо, кшинзэ... Меремс лиякс — Московтомо сон а ули чинь ютазь. Врады вачодо. Стувтнить истя лавгицятне вейкеде: Европасо ве ломаньс сави 0,20, Япониясо — 0,05 [472] гектар, тесэ минек... — 1,3 гектар тевс нолдазь мода. Ялатеке, сынст коряс, минь ковгак а маштовтано, ялатеке минь кескав марто яксицят. Тевесь, мерема, аволь ансяк кинь зяро модазо ды мода потмова таштазь уличинзэ. Мейсэ-бути лиясо. «Дотационнойкс» эйсэнек ловить, монь койсэ, нузякс-чавола прятне ды кинень онстонзояк маряви Россиясь «единойкс ды неделимойкс». Мельсэст сынст вейке: прянк илинк кепсе, кулотадо! Тень пингстэ аламо кие соды: кезэрень рузонь конёвтнесэ эрзянь моданть лемдить «подрайская землица». Лисни а стяко истя бажасть нельгемензэ.
Иестэ иес аволь аламо ускови республикастонть сюро, сывель, ой, медь, пона... Усковить эрьва кодат промышленной товарт. Ускомс-миемс эряви. Кандырганть, газонть, машинатнень ды лиятнень-мезтнень кис эряви пандомс. А чарькодеви лиясь. Мекс иеде иес, пингеде пингес анды-орши эрзянь раськесь покштояк покш армия?
Московонь ды тескень чиновниктне, паряк, зярдояк ёвтасызь, зяро эрьва эрзясь-колхозникесь три чевте таркава аштицят ды ярмаконь вешицят?
Саранонь ды лия таркава нерьгстнезь заводтнэсэ ламо-мезе нолдавиль ды кой-мезе нолдави нейгак «ванстомань тевентень». Ансяк воёвак, эрзя! Кие марто — се а тонь тевесь. Кинь каршо кучтадызь, сень каршо тюрть. Икеле седе шождыне ульнесь — «империализмась тандавтни». Кие ней? Чувашиясь? Паряк, Пензань алятне пейть порить? Эли Эрзямасось тандавтни эйсэнек? Сюкпря, Инешкипаз, кияк мокшнат а невтни.
Сестэ эно мезекс андомс зняро шинельсэ якицят? Мезекс зняро каявкстнэ? Икеле ясак пурныльть татаронь хантнэ, ней...
Алкуксонь мастортнесэ, косо прявтокс аштить Законтнэ, эрьва эрицясь соды, зяро ды мезень кис максы каявкст, ков ютавты государствась ярмаконзо. Соды, зяро панды эйкакшонь тонавтомань кис, парсте соды, мезе сти тензэ солдатонь кирдемась.
Те — тосо. Сэрей пандтнэнь томбале.
[473] Кинь, кодамо рангонь начальник эзинь кевкстне, кияк тень эзизе ёвта: ков молить ярмаком, мезень тевс нолдтневить? Паро куш содамо карминь «милициянь налогтонть». Содан «пенсионной фондтонтькак». Зяро ильтявить танконь-мезень теемс — а куш а каш. Содан вейкеде: книгань нолдамс ярмакт а мукшновить, пушкань — зяро мелеть.
Эрзянь раськесь сравтневсь ламо ёнга олячинь вечкеманзо кувалма. Кезэрень эсь масторсост эрить ансяк 16-18 процентт. Мекс — содави: вельть кувать тюрсть Эрзянь Масторонть кисэ. Теде мейле савсь ламонень кадомс Чачома ёнксонть.
Мон аламнеде талакадынь, зярдо ловнынь Абхазиядонть. Минек ды сынст уцясканок вейкеть. Те раськесь Кавказонь лепштямо войнасонть (1817-1864) тюрсь рузтнэнь каршо весемеде кувать. Изнявсть меельцекс. Русско-турецкой войнасонть (1877) сынь ульнесть туркатнень ёно. Те наянксчись стяко тенст эзь юта. Абхазтнэ лепштязельть. 200 тёжанень савсь кадомс Чачома масторост ды туемс Турцияв.
Лепштямонь политика ютавтсь Россиянь империясь иеде иес, пингеде пингес. Пестелень «Русская правда» газетась Кавказсо войнанть пингстэ сёрмадсь:
1) Решительно покорить все народы, живущие к северу от границы между Россией и Персией, а равно и с Турцией;
2) разделить все кавказские народы на два разряда: мирные и буйные;
3) завести в кавказской земле русские селения и всем русским переселенцам раздать все земли, отнятые у прежних буйных жителей, дабы сим способом изгладить на Кавказе даже все признаки его обитателей и обратитъ сей край в спокойную и благоустроенную область русскую (АИФ, 1992).
Содавикс «кедьчелькесь».
Рузонь инязортнэ-чирязтнэ ды сынст урест васня «сэтьмечист» невтнизь тия, Рав чирева. Васня тия тоначи певердсть. Мейле... Истяяк арсезеват те умонь шкань «Правданть» ловномсто: Адольфт чачнесть аволь ансяк Германиясо...
[474] Ды таго каявкстнэде.
Самарань, Оренбургонь, Пензань ды лия ёнга эриця эрзятне аволь аламо ярмакт чукить Россиянь казнас. Панды эрьвась сонсь, пандыть учреждениятне, колхозтнэ, совхозтнэ, косо важоди ломанесь. Ансяк зарплатасто каявкст (подоходнойть) каильть тосонь эрзятне 70 миллиондо ламо целковойть (1991-це иень питнесэ), зяро неень ярмактнэсэ — сонсь пазоськак а соды. Пандыть ламо, ансяк вана эрзянь культурантень а сы целковойгак. Вана мекс эль-эль ципельди эрзянь келесь. Визькс: лия областнева тонавтневи сон кода предмет ансяк 40 (бути кемемс) школасо. Ламо велетнесэ ды школатнесэ а муят тиринь кельсэ сёрмадозь книга.
Томбалькс эрзятнень пельде лутазь ярмактнень эйстэ зяро-бути велявтыть тей, Мордовияв. Ансяк эрзятненень сынь таго а понгить. Сынст «сэвсызь» лия нациянь ломантне, конатнеде пурнавить 80-85 процентт. Весемеде ламо, а мезть кавтолдомскак, ютавтовить рузонь культуранть лангс. Теде весемеде неявиксстэ кортыть «Мордовской» книгань издательстванть тевензэ. Тесэ 90 процентгнэде ламо конёвось явнови рузонь книгань печатамс. Сынст тиражось — 15-100 тёжат. «Эчкесткак» аволь човинетнестэ. Эрзянсетнень нолдыть ансяк... вейке тёжань покшолмасо. Мусть тенень эсь прянь идема валгак: кияк, келя, а рами сынст. Те превс а саеви: ве тёжась а саты библиотекатнескак.
Вана истямо эрзятнень пельде пурназь «налогтнень» уцяскаст...
Те ней. Паряк, икеле аволь истя сорновтневсть эрзятнень зепест?
Таго вал Н.В. Заварюхиннэнь.
«...А эряви стувтнемс, Дворецэнь ведомствань эрзятнень лепштясть рузтнэде пек. Кедьстэст лутасть весементь, мезесь аштесь сельмест икеле. Ломантненень мезеяк лия эзь кадово, кода совамс шабра семиятнес. Истя седе шождаль пиштевтемс — каявкстнэ вишкалгадыльть. Лиясто, секень вант, комсень-комсень ломань пиксесть ве кукорьгадозь кудьнесэ. Арази те эрямо?..»
[475] Колониальной налогтнеде эсь прянь ванстомга Татарстанось эсь Конституциязонзо совавтсь истямо статья: Татарстанонь закононзо, Россиянсетнень коряс, Республикасонть улезт седе виевекс. Сахань од Конституциясонть, 41-це статьясонть, кортави текеде. Россиянь законтнэнь лангсо покшчидест ёвтави Калмыкиянь, Бурятиянь, Тувань ды лия республикатнень Конституциянь проектнэсэ.