Поладкстомо (2016)/Ули мастор, конась монь седейсэ.../1

by Нуянь Видяз

←Ули мастор, конась монь седейсэ... (оглавления)

Ули мастор, конась монь седейсэ...  (2016)  by Нуянь Видяз 1. Мезе те истямось — мастор?

2. Кие мон, кинь?→

Нуянь Видяз. Поладкстомо. Без продолжения. — Саранск, 2016. — с. 458—467

[458]

3. ПУБЛИЦИСТИКА, СТАТЬИ, ВЫСТУПЛЕНИЯ

УЛИ МАСТОР, КОНАСЬ МОНЬ СЕДЕЙСЭ...

1. Мезе те истямось — мастор?

Чачома мастор, тиринь ёнкс... Зяро кортазь, моразь, седязь, сёрмадозь эйстэдензэ! Кинь пилесэ а гайгить неть содавикс валтнэ, кинь а эждить седей. Истят сынь малавикст ды теке марто а чарькодевикст!

Рузонь кежейдеяк кежей Иван Грозный инязорось кавксть якась Казаненть саеме. Велявтсь чавонь кедть. Изнизе ансяк колмоцеде каявомсто. Те ульнесь 1552-це иень ожоковсто.

«Мордовской» народось, — тешкстазель «Мордовской АССР-дэ очерктнесэ», — Рав чирень лия раськетнень марто весе вийсэ лездась Иван Грознойнень. Те изнявксонть марто прядовсть Чилисема ёнга эрицятнень лангсо нарьгамотне...»

Вана истямо питне максови сеть умонь шкатненень-тевтненень.

Шкась полавтовсь. Ютазенть лангс ней вантано лия сельмсэ. Пингем перть нерьгсть удемезэнек: моданть лангсо улить раужо тюсонь ломанть (татарт ды лият), улить — ашо тюсонь. Кить ашотне — чарькодемс а стака. Лия тюстнэде, конат ульнесть ютксост, арсемедеяк а мерильть. Изницясь свал кадови изницякс, изнязесь — урекс. Секскак Кежей Иваннэнь лездамонть лангскак ванан ней тунь лиякс.

1941-1945-це иетнестэ, эрьвась соды, Адольф Гитлернэнь лездасть аволь ансяк французтнэ ды итальянецтнэ, натой славянонь раськетнеяк — Чехтне, словактнэ, поляктнэ... Эзь кадовкшно Германиядонть СССР-как. Сон стявтынзе эрьва кода ды эрьва мейсэ тертязь чуваштнэнь, марийтнень, татартнэнь, удмуртнэнь, узбектнень, латыштнэнь... Тамашань тевть, ансяк ковгак эйстэст а [459] туят: омбоцеде чачсть ды ютасть 13-14 пингень тевтне. Кода Чингиз ды Батый хантнэнь шкастояк, Чилисема ёндо сыргасть сядо ведьгеменде ламо раськеть Чивалгома ёнов. Нейгак. Весе сынь стясть ятонть каршо сынсь, «добровольной Иосиф Сталинэнь мереманзо апак учо. Эно кода, «отечествась» эрявсь идемс.

Мурдатано, теке басом, Казанень саема шкатнес.

Кецнемс-кеняркшнемс ошонь саицятненень кувать эзь саво. Мадстевсь ве толбандясь, кирвазсь омбоце. 1558-це иестэнть рузтнэ недявсть Ливононь ордентнэнь марто. «Волжской финнтгнэнь», кода мерильть тенек ве шкасто, зыкадизь те пси-палыця таркантень. Казанденть тунь лия ёнов, Чачома ёнкстост Басовдояк васов. Балтия ёнов молемстэ, ней уш алкукскак эсь мельсэст, пелешкаст оргодекшнесть.

1558-це иенть полавтызе 1559-цесь. Мельганзо вармань коволокс ютасть лиятне. Ды истя Ливонской войнанть прядомас, кона мольсь комсьветее иеть. Окойники Запольской Ямасо сёрмадозель тюремадо лоткамонь конев — кортавкс. Тень лангс апак вано, сэтьмечи моданть лангс эзь са. Ливонскоенть полавтызь «смутной шкатне». Верьсэ пургсиця тюремань тапарксось, кеверь-кеверь, ношкстась эсензэ киява.

Лжедмитрийтнеде ды Мининдэ-Пожарскойде мейле яжась аволь аламо ловажат Сисем иень войнась. Ульнесть Румянцевень, Суворовонь, Ушаковонь, Кутузовонь, Скобелевень ды лиятнень лия масторга якамост-тюремаст. Малав пельпинге, 1817-це иестэ саезь 1864-цес, тюрсь Россиясь Кавказонь раськетнень каршо. Аволь аламо ойметь саезельть Севастопольсэ, мейле Шипкасо, Порт-Артурсо, Цусимасо. Васня зэрнесь мирэнть-масторонть келес Васенце «мировоесь», мельганзо — Гражданскоесь, Омбоце масторлангонсесь...

Умонь шкатнень содыцятне иень пес ловнызь, кие марто, зярс ды кува тюрсь Русесь пингензэ перть. 1240-це иестэ саезь 1462-це иес (222 иеть) сон ютавтсь войнасо 200 иеть. 14-це пингестэнть саезь неень шкас верев телетнеде-кизэтнеде ульнесть 525. Лиякс меремс, Русесь войнавтомо эзь эря.

[460] Ютазь шкатнес те аволь домка варштавксось эрявсь вана мезекс: весе войнатнесэ, конатне эрявсть Россиянтень, «добровольно», содазь, тюрсть-леднесть эрзятне. Косо лаки верь, косо майсемат-кувсемат, тосот сынь. Кува ансяк а наксадыть эрзятнень ловажаст: Франциясо, Германиясо, Польшасо, Югославиясо, Болгариясо, Китайсэ, Вьетнамсо, Анголасо, Афганистансо, Таджикистансо, Туркменистансо, Азербайджансо... Ды, каня, лововить весе таркатне! Варштан лиясто картанть лангс ды жу-уйть мери седеем. Мезень кис? Мезень чумо тейсть покштянок ды тетянок, минь, течинь эриця эрзятне? Васня эйсэст пансть пулятнень алов «за царя, за отечество», седе мейле — «за родину, за Сталина». Маштови пайстомось косояк Испаниясо — «за родину», Кампучиясо эли косояк Кубасо — таго сонзэ кис.

Те мезе, весе Мода планетась — Чачома мастор? Авась шки-три эйдензэ тиринь ёнксонь ванстомо, сонзэ кучсызь ковгак Бирмав эли, секень вант, Эфиопияв.

Эрьванть удемсэ сардокс тарны ёвтавксось: «защита Отечества — священный долг гражданина». Ней теизь сонзэ аламнеде лиякс: «защита Отечества является долгом граждан Российской Федерации».

Видечинь пелькскеяк арась те валкерькскесэнть. Мейсэ эйсэнзэ кенгелемась — неяви конязь сельмесэ. Ванстомадонть икеле, васняяк, содама, косо сон — тонь Чачома Масторот. Мейле уш эряви улемс те масторонть кис аштицякс. Ней арась минек а теяк, а тонаяк. Васня морынек «мой адрес — Советский Союз», ней — «мой адрес — Российский Союз». Теке. Мезеяк эзь полавтово.

Мезе эно, видеяк, те истямось — Чачома Масторось?

Пшкадинь эрзянь валкстнэнень. «Эрзянско-русский словарь» (1949) — эйсэнзэ тень кувалма мерезь: чачома — рождение. Варштынь «Русско-эрзянскоентень» (1949). Сонгак эзь туе васов: чачома мастор — родина. Панжия В. Далень эрявикс томонзо: родина — рожать, рождать. Пачкодинь С. Ожеговс. Сон тень вана кода тешкстызе: Чачома мастор — те Тетяёнкс, киньгак чачома тарка. [461] Чарькодемань кис: Советской Союзось — социалистической революциянть чачома тарказо. Кашторгавтынь «Философской» ды «Юридической» валкстнэнь лопаст. Стяко. Валгак тень эзть ёвта те самай «священной долгтонть». Кемемам ульнесь Брокгауз ды Ефрон лангс. Кить-кить, арсинь, сынь уш панжсызь сельмем. Манимизь сыньгак. Истят превей ломанть ды вант вана! Мекс истя, чарькодеви. Сынь содасть: империясо, кодамокс ульнесь ды кадовсь Россиясь, кортамс Чачома мастордо кода-бути а ён ды а мазыйгак. Секс сынь чатьмонсть.

Мелем аламнеде витизь «Советской энциклопедиясь» ды «Советской энциклопедической словаресь».

Пачтясть сынь тень вана мезе.

«Чачома масторось — те ёнкс (отечество), мастор, косо чачсь ломанесь, те эли тона раськенть эрямо тарказо, косо пингеде-пингес ульнесть эсензэ ламо шкань эрямо лувозо, келезэ, культуразо, кудоютксо эрямонь коезэ-обуцязо»,

Вана мезе истямо Родинась.

Монськак, видькстан, кой-мезень кувалма ве мельс а пракшнан, лиясто кавтолдан.

Чачсь, мертяно, Тейтерьнесь Татарстансо. Сыречизэнзэ эрясь, кадык ули, Эрзянь Масторсо. Тетянзо-аванзо татарт. Сынст келенть а содасы. А содасы эрзянсентькак. Корты рузокс. Косо сонзэ... Тетяёнксозо, Родиназо?.. Се, козонь чачсь? Чачома тарказо? Истямо уцясказо аванть. Кодамо Масторонь ломанекс ули цёразо? Кинень сон карми уредеме-служамо?

Омбоце потмура тарка.

Весть валске чоподава ардынь важодеме. Вакссом таркась чаволь, ды озась од, сэньшть мерий сельме тейтерь. Кие сон илязо уле, кортазевинь, кода свал, эрзякс. «Тонавтнеме, тейтерь, капшат?» — ульнесть васень валон. Шабрам муст-муст пейдезевсь ды чаракавтызе прянзо. Кортазевинек. Мон эрзякс, сон — рузокс. Теевинек содавиксэкс ды маринь пельдензэ вана мезе: сон Отяжвелестэ, тетянзо-аванзо эрзят, сонсь ды патянзо-сазорканзо эрзякс ансяк чарькодить. «Кие Илларион [462] Максимович Яушев?» — кевкстия Валянь. «А содан...» «А Пургаздо марсить? Кие те истямось?» «Аздан...» Ды истя седе товгак: эзинь, аздан, арась...

«Косо, кодамо те тейтеренть Чачома масторозо? — арсезевинь, зярдо Валя марто лисинек автобусстонть. — Тарадкесь сон, содазь, эрзянь чувтосто. Кассь-мазылгадськак Эрзянь Масторсо... Ансяк вана эрзянь мезеяк уш эйсэнзэ арась: а ойме, а превть. Ды зяро истят тарадкетнеде меельце шкатнестэ пургондасть ёнксонок келес!..»

Ней зярыя валт рузокс кортыцятнеде.

Кодамо масторсо сынь эрить? Кить сынь — россиянт эли мордвинянт?

Кевкстематне аволь шождынеть. Бути ловомс масторокс чачома тарканть, сестэ тенст Мордовиясь, ансяк аволь Эрзянь Масторось, — Чачома тарка, родина. Бути ванномс те тевенть лангс келень ды коень-кирдань содамо ёндо, артовксось дюм полавтови. Сестэ лиси: рузтнэнень Мордовиясь кона ёндояк а «родина». Сынь а содасызь келенек, коенек, умонь эрямонок...

Кода улемс?

Теемс эряви истя, кода умоктояк умок теизь «ломанекс» эриця мастортнэ: весеменень тонавтнемс тиринь келенть, койтнень-кирдатнень ды васенцекс — эрзятнень историяст. Ансяк сестэ максовозо ломанентень Гражданинэнь статус. Чарькодеви: тенень эрявить аволь аламо иеть.

Токасак ве суриненть, сорнозеви омбоцесь...

Мордовиядо ды Эрзянь Мастордо кортамсто кода а кода сави евтамс вал вельть келей-кувака Россиядонтькак. Эряви видькстамс: сень, конадо сеедьстэ пижнить «единая и неделимая Россия», истямокс кона ёндояк а ловсак. Те — эрьва кодамо тюссо артозь, панкссто пурназь-стазь тавадкс. Эли лиякс меремс — икелень СССР-нть вишкалгавтозь моделезэ. Ашти сон Сибирьстэ (валось татаронь), Сахасто, Марий-Элстэ, Татарстансто, Удмуртонь Масторот, Бурятиясто, Дагестансто, Кабардино-Балкариясто... Те, — кадык истяяк улезэ ёвтазь, — мазый покш книга, конань пек стака ловномс ды кирдемс.

[463] Бути ловномс течинь Федерациянть Чачома масторокс, сави ловомс теть пстямокс Татарстанонтькак ды лиятненьгак. Арась, арась, монень, эрзянтень, те Республикась кодаяк ды зярдояк истямокс а ули. Мон а содаса татаронь келенть, а содаса сынст аволь нурькине эрямо пингест, вестькак араселинь мечетьсэст.

А содан, мекс ансяк ламотнень превс кодаяк а совавтови лияськак: шабранть модазо — те аволь монь модам. Сень кис шождынестэ совась ды эйстэнь кодаяк а явови вейсэ ды ансяк вейсэ чарькодемась... Мик колхозсо эрямоськак ведьгеменде ламо иень перть эзимизь тонавто, мезе питнезэ те «вейсэнть». Арась ламотнень мелест варштамс Суоминь ломантнень тевест лангскак. Теке сонсь Инешкипазось невтизе тенек, мезе те коморошка Суомись, ды мейсэ парозо иневедьстэ иневедьс сравтовозь Всея Русенть, конанень а андови эсь прязо, венстязь кедть яки эсензэ томбальга. Вейсэ... Вейсэ ён ульнесь, ды савсь, якамс мамонт лангс. Ней кустемпесэнек — XXI пингесь. Ломаненть кедьало компьютер, минсь яла...

Кода ансяк эзть нерьге прязонок ды оймезэнек «за веру, за царя и отечество» тердема валтнэнь! Тонавтсть минек вечкемензэ те самай «отечестванть» Рюриковичтнэнь эйстэ саезь. Романовтнэде мейле те «ярсамопельсэнть» каванясть эйсэнек советской инязортнэ. Ней кундасть те тевентень «едростнэ». Каня, колмо тюссто масторкоцттнэ, конатне лыйнить Мордовиянть келес, а ледстнить теде? Каня, «Отечествань ванстома чись» аволь теке паргостонть?

Меельце пелев «отечествась» ды «по просьбе правительства» кармакшность сиземе. Кой-кона «начко тевтнесэ», кода кортыть «кодексэнь содыцятне», сынь эзть маштово. Савсь сынст полавтомс седе ён, седе менчевиця ёвтавкссо: «интернациональной долг». Казизь сонзэ аволь стякодо. Савсь максомс кисэнзэ верь. Ды аволь аламо. Васняяк од ломанень.

1957-це иестэ «интернационалисттнэ» лепиявтызь верьсэст мадьяртнэнь. Ульнесть ютксост, визькс тенек, [464] эрзяткак. 1968-це иестэ «долгонь тонавтыцятне» одс совасть танксо-мейсэ «Сырнень Прагас». Кемень иень ютазь, 1978-це иестэнть совавтозель «ограниченной контингент» Афганистан. Истя совимпериянь прявттнэ яла кемекстасть раськетнень ютксо «ояксчинть». Кемекстасть, чарькодеви, танксо ды автоматсо. Истя тонавтсть лиятнень социализмань тееме. Паряк, кияк ёвтасы, зяро маштовсть эрзят Венгриясо, Чехословакиясо ды Афганистансо? Зяро 1939-1945-це иетнестэ?

Улить истят цифрат. Саран ошсто «Афганов» саезельть 800 ламо од ломанть. Сынст эйстэ мекс-бути 53 процентт тонгсть тов «мордват». Те сестэ, зярдо ошсонть неть самай «мордватнеде» ансяк 20 проценттнэнь малава. Невтизе наксадыця чинензэ «мордва» валось тесэяк. Улевель а берянь содамс: зяро тов якасть «ялгаксчинь кемекстамо» эрзят, зяро — мокшот. Истямо статистика а муят. Мезеяк а мерят, «мордва» валось пек ён. Сонзэ эйсэ шождыне вельтямс куш кодамо пежетенть. Секскак «вере эрицятне» ванстыть эйсэнзэ сельмедест пек.

Эзть яка «Интернационалистэкс» Саран ошонь ды республикань кирдийтнень цёрасткак. Сынь теске эрявсть Россиянтень. «Афганов» кучозельть васняяк сокицянь-видицянь цёрат. Велева эрить седе ламо эрзят. Секскак, чарькодеви...

Сравтнить эрзятнень эрьва кува. Мекс? Минь лепштязь раське, арасть виренек-моданок, заводонок, арась Масторонок. Лисни истя: ванстомс тенек а мезе ды а кинь. Ванстак лиятнень улипарост, коест-кирдаст! Ды ванстыть эли Польшасо, эли косояк Грузиясо. Ней вана Россиясь ды Украйнась кечкерязевсть.

Ули гербенек, ули раськекоцтонок. Ульнесь натой, кадык руз, президентэнек! Конституциядо ледстнемскак а мезть. Кодамо республика — Конституциявтомо? Арась вейкенек — Эсь Кудонок. Те кодамо Кудо, бути цёранзо ванстыть ды пряст путнесызь лия азоронь кудонзо-чинзэ кис?

Паряк, седе икеле, умонь эрямосонок ловсть эйсэнек ломанекс. Вана кода сёрмады теде Н.В. Заварюхин («Сятко», 1992, 10, 11 №).

[465] «Ратор ёнксонь эрзятне кандсть службанть Украинань стептнестэ саезь Сахалинэнть видьс. 1624-це иестэнть Алатырьской уездстэ армияв саезельть 290 шумбра цёрат, эйстэст ламотне ульнесть Повадьвелестэ (ней Мордовиянь Дубинькань буе). Тосонь эрьва колмо кудотнестэ ильтильть вейке солдат 25 иес. Ды, кода ёвтневи эрзянь вейке моросонть, «кинь рекрутс сайсызь, се а велявты, СОН ПУТСЫ ПРЯНЗО ЛОМАНЬ МОДАНТЬ КИС...». Тень кувалма ламотне оргодильть Рав чирев, Дон ёнов ды лия таркав. Кода свал, цератнень тостояк муилизь ды сюлмсезь ускилизь служамо...

Седе, кодамоль ружиянь кандтницянть ды кудос кадовозтнень уцяскаст, ёвтнить кезэрень моротне:

Вай, сон прась, цёрась — мекев эзь стяво, Мекев эзь стяво, кудов сон а сы.

Лайши авазо, лайшить сазортнэ — А кинень сынст трямс, а кинень андомс...

17-це пингень омбоце пельксстэнть комсьветее иень перть службанть киртизь. Кармасть сайнеме вете-кото иес. Бути икеле Повадьвелестэ сайнильть ансяк сетнень, кинень а рамавиль армиядонть прязо, военной реформатнеде мейле «отечестванть» ванстомо судрявильть весе шумбра цёратне...

«Инородецтнэнь» лангсо нарьгамотне сыремтизь мелест ёртомс сявдиксэст лангсто эрьва кодамо понань лепштийтнень. Муевсь толгельгак. Те Разин Степан, Боляень Акай. Зяро ды мейсэ савсь пандомс эрзятненень те стякшноманть кисэ, карминек содамо ансяк меельце шкатнестэ. Вана зярыя цифрат: 1671-це иестэ Повадьвелесэ 24 кудотнестэ чавот ульнесть.., 9 (37 процентт); Саран ошонть перька эрзянь велетне весе ульнесть пултазь; повсезь-маштнезь эрзятнеде... 10 процентт.»

1992-це иень эйзюрковонь 31-це чистэ Московсо сёрмадстозель «Договор о разграничении предметов введения и полномочий между федеральными органами [466] государственной власти Российской Федерации и органами власти суверенных республик в составе Российской Федерации», Сонзэ алов эзизь путо кедест ансяк кавто республикат — Татарстанось ды Чечнясь.

Варштат те «Договоронть» лангс, ютат киксканзо ды нуваргады седееть: те конёвонть вийсэ максови тенек права явномс чаво кескавт ды ...кастомс сюро. Армиянь, судонь, прокуратурань, Инекужонь ды лия-лия тевтнень лангсо покшокс яволявтозь Россиянь прявткурось.

Те меленть кемекстамга кортыть вана неть невтевкстнэ.

Меельце «отечественной» войнадонть мейле куроксто Россиянтень эрявсь тарка, косо теевель Моданть лангсо весемеде «тандавтниця» бомбась. Таркась муезель. Мордовиянь Саровось. Киньгак апак кевкстне амольдизь ды педявтызь сонзэ лия областьс. Нарьгамонь кис, теке басом, лемдизь сонзэ «Кемготовоце Арзамасокс». Ней, яла мерить, шкатне полавтовсть. Ансяк вана саезь ошонть ды лейтнень-модатнень, ледстязь «договоронть» коряс, велявтомост Ине Россиясь а арси.

Колоньгеменце иетнестэ чачсь Мордовиясь. Чачсь — ды сеске кармасть педявтнеме сонзэ эйс од лагерть, конат ушодозельть меельце инязоронть пингстэ. Од власть сась... Потьмасто саезь Барашовас Тюрьмат. Седеень човорявтыця сынст чинесь... «токинзе» Зубово-Полянань, Темниковань ды Теньгушевань районтнэнь. Неть буетнесэ седе сеедьстэ, лия таркатнень коряс, ормалгалить эрицятне педиця ормасо, седе сеедьстэ вастневить наркомант, симицят, тевелявсо сэредицят. Кода а визькс, ламот течи содасызь Мордовиянть Потьманть ды перьканзо таркатнень коряс. Ламонень сон теевсь уцяскань синдтриця таркакс.

Ней МССР-нь кирдийтне арсить «чапомс» од истямо «оймсема тарка». Мелезэст тусь Торбеевань буесь. Прок аламо чуди бутрав ведесь колмо пелькстнэнь пельде. Эрь, тейтяно нилеце...

«Монень эсь ёнксось, теке ёвкс», — мельспаросо ды авакс талнозь, — сёрмадсь эсь шкастонзо минек велень, ламонь таркава содавикс поэтессась Сульдина Анна. Лован [467] эсь ёнксонть истямокс монгак. Секскак лиясто эстень тарка а муян, зярдо марян ды неян, кода пеедькшнить-згилить ёнксонок лангсо. Ды седеяк скирдави седеем, зярдо пеедькшницятнень ютксто вастан эрзянь, васняяк, титул марто ломань.