Од пингень вий/Тол Иван/2
| ←1-це пелькс | Тол Иван (1930) by , edited by Арапов И. 2-це пелькс |
Тол Иван (оглавление)→ |
| Т. А. Раптанов. Од пингень вий. Ёвтнемат ды очеркт. — Художественной литературань государственной издательствась, Москов, Ленинград, 1934. — с. 61—67 |
II
Эрямось тусь. Прок Толкан леесь салы читнень-ветнень. А марявитькак читне ютамодо. Ансяк шкань-шкань вармась ристядьсы леенть, теевить сормавкст, прок сыре ломанень чамас.
Турезь ютась кизэсь.
Састь сёксень якшамот, мельгаст састь бурятне, даултнэ. Весе кармасть анокстамо телень якшамотнень ютавтомо.
Тол ве обидня а менсти. Яла озны. Сы кудов, кузи каштом лангс, карми моравтомо. Промкс кудо малаваяк Тол эзь ютне.
Эрьва чокшнэ вельсоветсэ промкс. Арсить алкукс велесэнть ютавтомс колективизациянть. Чи а юты — пурныть группань промкст. Вармаяк мольсь эсинзэ группас. Кувать кулсонось, мезть кортась [ 62 ]докладонь теицясь. Уцордызе Варма човонензэ, мольсь столь экшс.
Тол лекшкадозь вансь лангозонзо. Сонгак течи сась промксов.
Варма кармась кортамо:
— Моньгак саемизь колхозс. Мон...
Тол натой кешнезевсь. Чамазояк кармась якстерьгадомо. Губор-габор стясь, седе курок мольсь столь малас.
— Моньгак примамизь! — сергедсь ки бути удалдо.
— А эряват тон миненек! — пижакадсь омбоце.
— Сон картасо колхозонть налксесы! — пижакадсть ламо вальгейть.
— Эли симсы! — пейдезевсть удалдо. Тол седеяк якстерьгадсь. Валтнэ прок кевсэ лоштясть эйсэнзэ. Кармась Тол талакадомо. А соды, ков ваямс сельмензэ.
Промксось седеяк карма ракамо. Тол овсе талакадсь. Кирьвазсь весе потмозо. Потамо эзь карма, мезе вийсэ рангстась:
— Бути монь колхозс а нолдасамизь, илинк нолда Варманьгак. Сон нейгак эщо яла кулаконь морот моры...
Тол натой псилгадомо кармась. Повнэнь-пов конястонзо кармась чудеме ливезесь, прок пси кече каясть потмозонзо.
Весе эньгамсть, кулсоныть Толонь.
— Мон ней лоткинь симемадо, лоткинь картасо налксемадо! — кортась Тол.
Варма кармась мик сорномо. Кирвазсть [ 63 ]кежензэ. Эль-эль кирьдевсь эсь прязо, недиксэлизе Толонь кирга пакшсто.
— Те а тонть тевесь, кинь кис мон молян! — рангстась сон братонзо лангс. Мейле кежень сазь ношкстась кенкшенть пелев.
— А примасамизь? Илямизь прима, авардеме а карман! Ванса, кода карматадо бедняктнэнень лездамо! — тусь кройсезь промксонть ютксто.
Эньгамсь весе промксось.
— Ну, кода эно, примасынек Вармань эли арась? — пшкадсь председателесь.
— Примасынек! Сон батрак, — пижакадсть котошка вальгейть. Вармань кис кепедицят ламо ульнесть. Ульнесть каршояк.
Иван таймаскадсь, прок тарказонзо чувтомсь.
— Монь эно кода? — пшкадсь сон пелезь.
— Примасынек! — рангстась промксось.
Оконики Тол оймась, пандо сяворьсь лангстонзо. Пельсь а нолдасызь сонзэ колхозс.
Промксось прядовсь. Весе кармасть тукшномо кудов. Тол вельмесь, прок банясо парясь ды шлясь.
Мольсь малазонзо Дойда.
— Ну, Иван, теветь ней туить. Колхозс совить, козяйкат ули, ансяк роботак.
Тол аволь умок урьвакссь. Ней ансяк ризнэсь седеезэ, кода мери колхозс совамодонть Олда козяйказо. Зяро эрясь Варма марто ве кудосо.
Ливчанясто сась Тол кудов.
— Олда, пувак тол — пшкадсь сон весёласто козяйканстэнь.
— Тон тонсь толат! — пеедсь Олда.
[ 64 ]— Ней мон аволь Тол — Иван Лексеич!
— Умок Иван Лексеичекс теевить? — пееди Олда.
— Течи. Мон колхозс сёрмадстынь. Примимизьгак уш, — капшазь ёвтнесь Тол.
Олда потазевсь натой. Кармась сёвномо.
— Трисподни тук колхозот марто! — пижнесь Олда Тол лангс. Тол васня кашт мольсь. Олдань валонзо прок а маштытькак. Сюдызе прядо пильгс весе колхозонть, Толонь.
— Мон ней яла теке колхозсто а лисян! — пшкадсь кеместэ Тол. — Тонть кис колхозонть а кадса. Бути арась мелеть эрямс монь марто колхозсо, азё ков мелеть...
Кувать кашт мольсть. Тол эзть пуваяк. Олда кузсь каштомс лангс, Тол мадсь коник лангс. Кувать мейле кашторсть ковонест.
Шкась соды эсинзэ. А учни киньгак. Пани икелев читнень-ветнень эйсэ. Тол чинь чоп колхозонь кардазсо котьми. Тев шачсь ламо.
Лондадсь ташто коесь велесэ, прок лов соламо кармась. Кадовсть панкст тезэнь-тозонь. Тол кенярдозь кундась од тевс. Ламо од мельть шачомо кармасть Толонь пря потс. Ней сон чаркодизе парсте, нужасто лисема кись вейке — колхозонь ки.
Вармаяк колхозсо. А мельсэ роботы сон. Колхозонь тевень кис прянзо а сэредьстясы, рунгонзо а сорновтсы.
Сась Варманень бригадирэсь. Макссь теензэ наряд.
[ 65 ]— Карми улеме шкам, молян роботамо, — мерсь Варма бригадирэнтень. — Монень ней а ютко...
— Нать теветь ули? — кевкстизе таго бригадирэсь.
— Вельсоветэв тердимизь, — манчесь Варма.
Бригадирэсь тусь. Варма мызолсо пеедсь.
«Молян Олдуньканень» — кортась эсь пачканзо Варма. — «Мерсь, максан тенть колмо-ниле пондт почт. Эряви седе курок саемс не почтнэ, ата секень вант велестэнтькак паньсызь».
— Бути кияк сы, мерть тусь вельсоветэв, — мерсь Варма козяйканстэнь.
— Тон вант таго иля симе, — рангстась мельганзо козяйказо.
Олда кармась колхозонть сюдомо.
— Тон иля сюдо, монгак сёрмадстынь, — састо ёвтынзе валонзо Гара.
— Минь секс сёрмадстынек, валонок промкссо седе кепедезэ. Мон уш а карман тенст седейшкава роботамо.
Совась Тол. Гара трокс варштась лангозонзо. А мельсэ кармась кевкстнеме.
Аволь ламо шкань ютазь ковонест тусть промксов.
Промкс кудось пешксель. Течи промкс. Качамо седе а ков. Ки озадо, ки нежедезь. Весе лажныть.
Панжизь промксонть. Качкасть председатель. Кармась кортамо ячейкань пельде ломань.
— Ялгат, минь прядынек видемань планонок. Аволь шождынель тевесь, яла теке минь сонзэ теинек, плановок топодстинек парсте...
[ 66 ]Промксов совась Вармаяк, нежедсь кравать ёжос, кармась кулсономо.
Прядынзе ялгась докладонзо.
Васняяк кортамо лиссь Варма.
— Паро тонеть ирнэмс столенть экшсэ. Тон туемстэ ярсыть, мон вана арась, — кармась сюдомо докладчикенть эйсэ. — Чинь чоп роботак, ярсамс а мезде, — пижнесь Варма. Мейле прок келезэ кундатотсь. Лиссь каршонзо Тол.
— Мон карман васняяк эсь братом кувалт кортамо, — кармась сон састо. — Сон покордась докладчикенть, тень эйсэ покордымим моньгак, покордымизь веленек. Сон эри омбоце ие колхозсо. Те шкас яла эзь лотксе лездамо кулактнэнень. Сон бажи кулактнэнь таргамс колхозс. Секс сон сонськак паро седейсэ а роботы. Нень эйстэ паро учнемс а мезе. Монь койсэ весе роботась эряви колхозсо нолдамс сдельщинасо. Минь сестэ нейсынек, ки роботы, ки арась. Вансынек — ки колхоз марто, ки кулак марто. Ней эряви анокстамс весе сбруенть.
Гарань прок кияк коняс лоштизе. Пелезь ладсо мольсь столь экш, конязо нолдазь, кармась састо кортамо:
— Ялгат, мон те шкас ульнинь кулаконь пуло пельксэс. Ансяк ней мон чаркодинь, кодамо зыян теинь колхозонтень. Ялгат, простямизь монь. Мон ней эсь прям яволявтса ударникекс. Виев роботасо шлясынь чумон...
Весе промксось лажакадсь.
Варма седе курок оргодсь.
[ 67 ]Толонь кочкизь ударникень бригадиркс. Гара совась те бригадантень.