Од пингень вий/Тол Иван/1
| ←Тол Иван (оглавление) | Тол Иван (1930) by , edited by Арапов И. 1-це пелькс |
2-це пелькс→ |
| Т. А. Раптанов. Од пингень вий. Ёвтнемат ды очеркт. — Художественной литературань государственной издательствась, Москов, Ленинград, 1934. — с. 56—61 |
ТОЛ ИВАН
I
Дойда прок пирявсь ульцянтень, а ков тензэ молемс. Ванкшны кавто ёнов. Прок талакадсь.
— Егор Максимыч, мезть ваннат? — сергедсь ульцянть омбоце ёндо Данчань Дрига.
— Вана ков бу молемс. Сак тей, кортатано...
Ёгор а мельсэ ютась ульцянть трокс.
— Исяк совинь Алякань Федянень, Иван лелязо прок бука пары каштом лангсо, моравты. Моравты-моравты — рукш, сельги.
— А истяк меритькак тензэ Тол Федя. Сонсь кудосо? — кевкстизе Дрига Дойдань. Федянень лиякс велесэ мерить эщо Варма.
[ 57 ]— Кудосо, — пейди Дойда — сон исяк сась. Исяк срокозо лиссь Олдынькань кедьстэ.
— Алкукс сась?
— Алкукс.
— Молемс эряви тенст, тердемс колхозс совамо кавонест братиник.
— Нать виде колхоз арсеть пурнамо? — пеень пачк кевстизе Дрига Ёгоронь.
— Думатано...
— Мезеяк лиси те колхозонть эйстэ? — таго пельс пейдезь кевккстни Дрига.
— Мекс а лиси. Ансяк вана совицятнеде а ламо. Адя соватано Варманень, мезть сон карми пувамо.
Совасть Дрига ды Дойда Варма Федянень. Тол каштомс лангсо моравсть, сорновти кирганзо эйсэ, вальгеесь седе вадрясто лисезе.
Варма ульнесь мадезь коник лангсо. Стакасто кувсесь.
Тол прядызе моравтоманзо, кирнявтсь каштом лангсто, озась Дрига ваксс. Вешсь таргамс.
— Мекс бути весе ловажан чулксетить?
Дрига таргизе кисетэнзэ.
— Иляк таргавт! — пшкадсь Варма. — Чинь чоп вана мелем мольстизе. А валгонияк коник лангсто. Иля пель ловажаткак весе чувтомить, — кежейстэ кортась Варма.
— Тон тонсь мезть тейнят? — покордавсь Тол, трокс варштась братонзо лангс. — Ансяк яла сёвнат мартон. Мезе мон пек беряненть тенть теинь? Ярмак нажовакшнынь, максынь тонеть. Ансяк яла [ 58 ]машнетят. Ней вана колхозс тердить эйсэнек. Эряват ней колхозсо, коли братиник а ладятано.
— Тон нать а думсят совамо? — кевкстизе Толонь Дойда.
— Эщо эзинь веляскат, печкемак а сован. Мон ней прок бояр эрян, чи кавто роботан, кавто недлят истят элякалян. Мезекс монень пек колхозось?
Дрига каясь Толнэнь табак. Теизе Тол цигарканть сонсь таго нежедсь коник лангс, венстизе кургонзо, пухсо кармась таргамо.
— Таго лашкстась? — пейдезь пшкадсь Дрига. — Течи празник, тон лужадомо прыть!
— Виде, Григорий Василич. А берянь улевель ней зярояк копордамс. Бути миемс карсемашка карь. Ярмакон арасть.
Варма кежейстэ варштась. Тол лангс, натой соракадсь весе. Сёлгадсть. Састь кежензэ Толоньгак.
— Таго монь эйсэ покори. Сонсь Олдынькань кедьсэ а лоткси глохтямодо. Максыть тензэ меньгак каладышка одижа, сон прянзо повасы кисэст. Мон каршо а молян. Мезть мелеть, сень морак кулактнэ марто, кода мелеть, истят мольть кулактнэ марто велув — кежиявтсь Тол.
Парсте токась кежесь Толонь седейс. Ледсь мелезэнзэ весе эрямозо, весе нужа чись. Кулось Толонь козяйказо, цёразо. Сон седеяк новольсь. Братозо, Варма, эрьва чине мартонзо сёвны, покори. Ней покш мелезэ таго урьвакстомс, [ 59 ]пурнамс хозяйства, рамамс скал, путомс кудо. Колхозонть ледстемскак а вечксы.
А ламос весе кашт мольсть. Дрига эзь сода, кода ушодомс колхоздо кортамонть. Варма кувсесь.
Кувать чатьмонсть. Весе таргить. Кудось пешксе качамодо.
— Колхозс уш а сован! — пшкадсь каштом лангсто Тол.
— Яла теке соват. Лиякс миненек а лисемс нужастонть, — радовась кортамо Дойда. — Тон варштак, кода минь эрятано? Сюро одс зярдояк а сатни, паро сускомо колияк а варштнитяно. Кизэнь перть а чи, а ве содатано. Саемс вана, Тол, тонть. Весе пингеть ломань кедьсэ роботазь ютавтык омбо велева. Сат эсь велев, совамскак тенть а козо. Мень те эрямо!
— Колхозс яла теке а сован! — пижакадозь пижакадсь коник лангсто Тол.
— Тон думик, — пшкадсь таго Дойда. — Ки лангс тон кемнят? Ормалгадындерят, ки карми трямот?
— Учок, колхозось трятанзат. Автик кургот! — кежейстэ пшкадсь Варма. — Тонть, Дойда, тевесь арась, кода минь эрятано. Миненек а мейсь указовамс.
Вармань кежень пачк черензэяк дубушки стясть.
Тол тейсь таго цигарка. Прок эзь маряяк, кода Дойда карась кавонест эйсэ.
Варма седеяк бузакадсь Дойдань сёвномо. Секень вант тюрьгады. Дойданень савсь туемс.
А ламос аштезь Толгак лиссь Дрига марто. Тол [ 60 ]вешкезь тусь вере пе ёнов, Дрига ёматотсь эсинзэ кардазс.
Варма ськамонзо кадовсь. Седеяк кувсеме кармась кежтнень пачк. Совась Олда козяйказо.
— Пурнак ярсамс седе курок, лелям тусь. Ськамонок ярстано.
Олда машнетезь кармась ярсамс пурнамо.
Эзть кенерь озамо, вальмалов сась Гара, Вармань колмоце братозо. Эри сон эйстэст башка.
— Эзить кенерь. Самоль тенть седе курок. Дойда тесэ алатырничась. Колхозс яла совавты эйсэнек.
— Кучовлинк седе васов колхозонзо марто! — пшкадсь Гара. Таргась зепстэнзэ бутылка вина. — Кадык элякалить, мон колхозс а молян. Исяк промкс ульнесь, мон каинь тосо кавто-колмо валт эрикстнэнь кис. Веть кандсть тень заём сюро, вана чапамодояк каванимизь. Миненек ней самай эрямс. Минек пестэ ансяк кавто-колмо кудот сёрмадсть. Нетькак аволь овсе паро мельсэ. Мон весе промксонть эсь мельган уския. Сюпавтнэ ней пелить кортамост. Монь тердемизь кисэст пшкадеме. Монень эли валтнэ жальть? Кияк мезеяк тень а теи — беднякан.
— Ёжоват тон, Гара. Ней самай истя эрямс, — радовась Варма Гара марто кортамо. — Монгак Олдынькань кис яла пшкадян. Вана эщо исяк тень макссть почт, колмо овчинат.
Бутылкастонть умок ёртовсь пропкась. Якстерьгадсть Гарань ды Вармань чаматне. Позакадсть сельмест, вал-паргост келес панжовсть.
[ 61 ]— А мольдяно минь колхозс! — пижнесть сынь кавонест, прок кияк эйсэст пансь.
— Минь эщо эрятано! — рангсь овтокс Варма.
Гара тусь сяворькшнезь кудов.
Аволь ламо шкань ютазь сась иредьстэ Тол. Ансяк совиксэль кудов, сонзэ грохадизе Варма. Тол прок пулт ёртовсь.
— Кудось монь! Иля совсе тезэнь! — рангсь Варма.
Тол прась. Судостонзо чудсть верть. Стясь ниле пильге лангс, ноки Вармань кундамс сиведе. Сонсь эль аштеви пильге лангсо. Таго тюрьгадсть. Толонь цють лембестэ таргизь Вармань алдо.