Колхозонь эряф/1940/05/Ташта седла

From Wikisource
Jump to navigation Jump to search
Колхозонь эряф (1940), № 5 Май edited by Игнатьев Г. А., Чумаков И. Ф.
Ташта седла
Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 5 Май 1940. — с. 75—76
 
[75]
Ташта  седла

Эрясь-ащесь фкя конторщик цёра, лемоц сонь ульсь Алексей. Сон ашезень сода кит алянза тедянза и раднянза. Сон кантфоль воспитательнай куду. Тоса Алексейть касфтозь, тонафнезь и максозь солдатокс. Служась сон комсь ветие киза, аделазе службанц и эвондась оцязорть Петр перваень инголи. Оцязорсь службанкса азсь тейнза спасиба и макссь награда, вете цалковайхть ярмак. А сон оцязорти корхтай:

— Макст тейне ташта седла. Мон охотникан, а седлазе аш.

Оцязорсь мярьгсь тейнза максомда седла.

— Ваше величество, — корхтай танга Алексейсь, — сёрматт тейне каготкя, што ташта седлать тейне, солдатти Алексей Ивановиченди, максыть тонць эсь кядцень мархта.

Оцязорсь макссь тейнза тяфтама каготкя, и сон тусь. И вот сась Алексей эсь велезонза, а сонь кудоцка ашель. Сон эрясь ломань пяле колма шит. А веленц эзда аф ичкозе эрясь козя граф, оцязорть тайнай советникоц. Сонь ульсь именияц, лемоц „Ташта седла“. Алексейсь мольсь ся именияв и корхтай управляющайти:

— Ну, тяни тон ворть тяста, тя имениясь монне, оцязорсь максозе тейне, ванк вага документть, эсь кяденц мархта сёрмадозе Петр Великай.

Управляющайсь келепнезе, келепнезе кургонц, но мезевок ашезь азов, и тусь.

Алексей пуроптозе сембе народть, конац инголи ульсь графть кядь ала, тись пир, андозень-симдезень сембонь и мярьгсь:

— Ну, тяни арда, эряда вольнайста, работада эстейнть.

Сембе эсь пилеснонды аф верондайхть арьсихть: „неужта воляшись сатомазь?“.

Кулезе графсь тя тевть, аф содасы месендема: тусь оцязорти пеняндама. Петр Первай шарьхкодсь, што оцю эльбятькс тись.

— Эх, подлецсь, но и васькафтомань, но и штазень пиленень. Но аш месть тиендемс, уважительнай туфталфтома аф сявови меки, кда монць сёрманять сёрмадыне.

И вот, тердезень оцязорсь сембе министрхнень и тись собрания. Кармасть арьсема, мезе тиемс. Думандасть станя: куроконя солдатть тердемс дворецу, сембе баярхненди озсемс круглай шра ваксс, анокламс шрать лангс вина, закуска и путомс фкя стакан: кажнайсь эсь кяденц мархта нюрьхтяй стакан вина, симсы, шашфтсы стаканть ваксстонза ащи ялганцты, орхкадьсы [76]сонь бокти и мярьги: „прважак инголи“... А сонь, солдатть, озафтомс оцязорть мархта графть ёткс. Мзярда сай сонь рядоц, тейнза сави орхкадемс сонць Петр Великай, и тя ули туфталкс, штоба солдатть судендамс и шавомс.

И вот тердезь Алексейть дворецу. Сон сась наряжафста, кода пяк козя баяр. Сембе министрхне кундазь сонь кяденц, аф честенска, а штоба пяконя пеедемс сонь лангсонза. Синць эсь пачкаст корхтайхть: „Аф ламос пилькнень шерфтьсайть“. Озафтозь Алексейть оцязорть ваксс и ушедсть винада симоме. Кона сими, орхкадьсы ялганц и мярьги: „прважак инголи“. Алексейсь шарьхкодсь, што тевоц кальдяв. Сась рядсь графти. Сон симозе вина стаканть, шашфтозе Алексейть инголи, да кодак керсы сонь щёкань туркс: „прважак инголи“. Сембе баярхне: ха-ха ха-ха“... рахазевсть.

Кода пеель озафтсть Алексейть седиезонза, но сон ёфси ашезь эводь и ланга-лунга бта ёфси афи обижавсь. Сон нюрьхтясь вина стакан, путозе инголенза и корхтай оцязорти:

— Вот, ваше императорское величество, мон служань комсь ветие киза, лама няень и кулень, пади мярьгат тейне мезевок азондомда. Аньцек сембе сёрмадсаенть кядентень сянь квалма, виде или аф виде мон азондонь. Сембе согласиндасть, и Алексейсь ушедсь азондома:

— Вот, господат, инголькиге азан оцю спасиба оцязорти, сон пяк козякафтомань и озафтомань эсь ваксозонза. А сядынголе мон пяк беднаелень, ульсь кальдяв алашанязе, содалень ремесла, сяканят тиенделень и мишенделине ошу. Вот весть, сась базар шись. Мон марань усф сяканя и тунь базару. Лисень велеста, молень аф оцю васта, и кеподсь вию, вию буран, вармась колатанза. А ошу молемс мянь колмогемонь вайгяльбе. Мон думндан: молемс инголи, эрьгодян и эйндан. Мон сявонь мрдань куду и лядонь шиса. А сяда меле, няйсасть, эстейнтевок яраштонь, комсь ветие киза служань. Ну кода лац мон, што мрдань куду и лядонь шиса?

Сембе баярхне фкя вайгяльса зарякадсть: „лац тиеть“ и сёрмадозь кядьснон. Алексей прдазе карманозонза каготкять, комафтозе вина стаканть, нардазень усанзон, стясь стяда и корхтай:

— Мон мрдан господа, меки, молемс инголи значит куломс.

Сон шашфтозе стаканть графть инголи, да кодак сурдасы сонь коня пакарь ланга, тона прянц вельф и мастору грохадсь. А министрхне, конат шашкаснон фатнесть, конат револьверснон, ёразь шавомда Алексейть. А Петр Великай: „Стой, господат, мезенди кядентень сёрмадость? Тинь зздонт сизьгемонь ветие ломань и сембе дурактада, да монга тинь ётксонт дуракан. А тон, солдат, молодецат. Кда маштоть „Ташта седлать“ сявомонза, улеза вечна тонь“.