Колхозонь эряф/1940/05/Вейхксов

From Wikisource
Jump to navigation Jump to search
Колхозонь эряф (1940), № 5 Май edited by Игнатьев Г. А., Чумаков И. Ф.
Вейхксов
Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 5 Май 1940. — с. 77—78
 
[77]
ВЕЙХКСОВ
 

Фкя солдат ащесь постса. Сонь ваксканза ётась граф.

— Шумбрат, часовой, — мярьгсь графсь.

— Арьсян шумбраши, ваше превосходительство, — отвечась солдатсь.

— Кодама постть номероц?

— Вейхкса.

— Кодама ротаса служат?

— Вейхксоцеса.

— Мзяроце частсь ащат?

— Вейхксоцесь.

— Кода ся станя, вейхкса, да вейхкса, — ивадсь графсь... — Кода фамилияце?

— Вейхксов, — отвечась танга солдатсь.

— Дурак! — ивадсь графсь.

— Ворьть постть маласта, эчке пеке, ату пилькнень стяфтсайне вяри! — солдатсь ладязе штыконц графть мяштьс.

Тона сяда курок потай, потай, да ласькозь, стане керсы, кода од пингстонзовок ашезь ласьконде. Мольсь оцязорти, Петр Первайти. Ваймоц потмозонза аф тяльги, кжнай, сяшкава сизесь; валхт аф мушенды корхтамс, сяшкава састь кяженза.

— Мезе тонь мархтот лиссь? — кизефнесы сонь оцязорсь.

— Ваше величество, пяк оскорбиндамань часовойсь. Мон кизефтине, кодама постонц номероц, кодама ротаса служай, мзяроце частсь ащи, кода фамилияц. А сонь сяка ответоц — вейхкса, вейхксоцесь да Вейхксов. Да нинге шавокшнемань.

— Ах, сукин сын, казнендамс тянкса можна. А тейть малазонза нежетькшнемска афоль эряв, часовойть праванзон аф содат, а графат, шафтанза нинге. Оцязорсь варжакстсь часттнень лангс — времась вейхкса частт. Сон макссь графти вейхксогемон вейхкса цалковай ярмак и мярьгсь:

— Арт кравульнай помещенияв, сон тнярс тоса ни. Максыть тейнза ня ярмакнень и катк синь лувсыне. Кда аф лувовихть, то значит сонь аф сембот и эздонза вешендемска аш мезе. А кда лувсыне, то значит сон ёню, оскорбинданзе нарошна, эста сонь судендасаськ.

Мольсь графсь кравульнай помещенияв и ивадсь кяжиста:

— Вейхксов!

— Мон, ваше превосходительство, мезе тейть эряви?

[78]— На, вага оцязорсь тейть мярьгсь лувомда ня ярмакнень.

Солдатсь сявозень графть кядьста ярмакнень, путозень карманозонза. Тона келептезень сельмонзон и учи.

— Ну, месть нинге тетьксесайть сельмаванятнень? Арт, азк оцязорти, што мон сонь мельганза лувондома аф карман, стаконга верондан. Кда фкяшка цалковай макссь лишнай, то сон монне, а кда фкяшка аф саты, мзярдовок макссы.

Графсь кяжденза дубордозевсь фкя вастса, зярякадсь, кода бука, а валхт ашесть азов.

— Листь тяста, эчке пеке! Кравульнай начальникта башка киньге аш праванза сей сувсемс. Листь, ату ирдесненьге синнесайне ружия ложса!

Графсь нинге сядонга вишкста ласьксь оцязорти.

— Ну, кода, лувозень?

— Аш. Путозень карманозонза и корхтай: „Арт азк оцязорти, што мон сонь мельганза лувондома аф карман. Стадонга верондан“... Шавокшнемань...

— Ну, вот, дураксь тон, аф солдатсь. Оду тят тревожсе часовойхть, ату рядовойкс путте. Листь тяста!

 
Йофкснень сёрмадозень Ковылкинскяй районца
Парапа   велень   колхозниксь   Я.   К.   ЧЕКАШКИН.