Колхозонь эряф/1940/03/Кафта ширет/2-2

by Безбородов, Михаил Ильич

Омбоце картинась

(Сяка жа веть пяле вешкада Том Петровичень
кудса, Матя озада арьси)

1-це лисемась

МАТЯ

Тя веть танга поздазе Петровичсь,
Няймок няренц валондсы винаса.
Содаф, симдьсы ошо сакалть овоц,
Тоса марса ризфснон синь ризнасазь.
Тячимс арьсесть, сяськисна синь аяш,
Кода мяльсна шарфнесть тефнень эса.
Тяни курок, аля, курок ваят...

Ердсазь мельгат сорхнень вельсоветста.
Сязезь иряцень, — аф ужялят ёфси,
Кли велень тефненди тон шорят.
Ну и кинди тон ужяльдемс, кинди?..
Аф тонь инксот седиезе шокши.

(Уфкстай)

Фталу ётасть арьсеф ингольпяльхне,
Конань инкса палондсть эсон толхне,
Мзярда монга... стакат, стакат лятфнемс...
Сатомс ёрань эрек комсомолхнень.
Оцю мяльса кундсень книгас, сёрмас,
Стакальхть путнемс букванятне пецек.
Арсесь прязе стакати пси толмаркс,
Апак учсек ётнесть тялонь ветне.
Сяськом лангса ульсь ни стака книгась.
Мяльшань арамс сёрмас содай рядти;
Пинге сась и киста мон гурякстонь.
Сембонь нельгозь тундань сетьме ветне,
Мзярда ковсь эсь лофца валдонц пяярдсь.
Ульцять эзга гармонць оттнень вятнесь,
Стирень потмос кайсесь кельгинь сярятькст.
Кие кирди, мзярда пиже паксясь,
Мзярда лаймось штафтсы васень панчфонц?
Вов ся шитнень монга ульцяв яксень,
Палы мяльса фатнень тундать таньфонц.
Монга кштикшнень, пеетькшнесть трване.
Пингонь юкснень кельгома книгатьке.
А тоса... велети сась Ванясь...
Яксесь мельган... кельгозь эзон фатнесь,
Кельгозь, ладязь лямбе кизось ётась,
Кизоть мельге сёксесь кожфонц таргась.
Сёксеть мархта Ванять тумац токась...
Ах, ся шитне! кода эсон кардась:
«Матя, учт... тят кульхцонда киньге...»
Тусь. Кельмось эряфозе — шамсь.
Шитне мольсть. И сась няк стака пинге.
Седи алдон марянь... вайме... шавсь...
Мезе тиемс?.. Алязе изь кельге
Стама цёрат, конат комсомолецт.
А седись таргась Ванять мельге.
Корхнесь: «Сави, Матя, теет молемс...“
Сталгодсь прязе. Оттне эсон рахсесть...
Кудса машфнезь эряфозень... тюрендсть.
А тя шитнень Мотсь ширезнок яксесь...
Оцю ялгакс алязти сон улендсь.

Лама сёрмат учсень Ванять ширде,
Но синь ашельхть, няймок, юкснесь Матянь.
Тюрезь, вихца, азозь теень мирдекс
Аеркс Томть... кода? — афи фатянь.
Эх, Мотть мархта стакаль эряфсь, стакаль,
Люпштась эсон аф кирдемшка горясь.
Сяконь лангс шинкатнень ланга якаль,
Коза мялец, тоза нрянц и ёрясь.

(Эрекста)

Ну, а тяни, мзярда колхозсь пуромсь,
Марстонь тефне серептсть мадонтф толхнень,
Панжевсь кизе марстонь авань пуромксс,
Тяштекс няфтихть эрек комсомолхне.
Тяни тага мрдась меки Ванясь...
Ащи инксонк! Вов кие ужяльдемс!
Но, аф Мотть! Сон лебоньц ваясь,
Шямонь эрьхконь шямонькс тярьгомсь.
Танга ёрай шорямс марстонь тевти.

(Уфкстай)

Ваня, Ваня, макста теень павас...
Ванфтте сельмокс...

 

(Маряви Томть вайгялец)

ВАЙГЯЛЬ

Ареф! Пялен веляфтт!
Сиптяма! А тоса ни шудавась...

МАТЯ

Сайхть!..

(И эрязста лиси)

 

2-це лисемась

(Сувайхть Томсь и Пропкась,
кафцьке иредьстот).

ПРОПКАСЬ

 

Том! Том Петрович... учакс...
Ульхть сетьме. Теень ялгат?!
Ялгакс прязень путсан...
А Каворсь... Каворсь сволоч!
То-ом...

ТОМСЬ

Э-э, оцю сакалть овоц?
Сон аф канды ни лишнай.

Ваец ули, а шяняфкст рястась,
Пинесь, вайфтема...

ПРОПКАСЬ

Улхка шнайть!
Азолить, што цёрась ряса,
Мон ба таргалине ваенц!

 

(Озай моркш ваксс)

Ну, сиптяма тифтенянь?

 

ТОМСЬ

Сиптяма! Аньцек Келюнь паенц...
Кадома...

 

(Лифти вина)

Ареф, лифтень!

 

ПРОПКАСЬ

Ха, ха, ха! Содак, сипть!

 

(Бокти)

Кефне шарыхть, почфне пяярихть.

 

(Томти)

А тон, Петрович, парат типсь!

 

ТОМСЬ

Тяфта, Ареф и эряви.

 

(Нюрьхтяй вина, сими)

Э-э... кхе! кяжи, кода зелия...
Клдормати педи, кода перець.
Кда симоль эздонза лиясь —
Стопканяти иредель... кода иредсь
Каворсь...

 

(Нюрьхтяй Пропкати)

Ця, Арефи, цяпотьк!

ПРОПКАСЬ

(Сими и шукади прянц)

 

Бррр! Да-а! Аф эзьконть эзда...
Ну, а теень сон сембе сякокс...

 

(Аф ламос кашт аф молихть.
Томсь уфкстась)

ПРОПКАСЬ

Надияк, Петрович! Арефсь лезды...
Шири ризфнень!

ТОМСЬ

(Аф весяласта)

Эх, Ареф, кда улель авась лацон,
Кда ялгане коряван улельхть —
Лият панчфне улельхть садсон,
Эряфть таньфонзовок мувольхть.
А тяни? Сембе лийкснихть эздон,
Шиста шис монь кельми потмонь псизе.
Кода эрямс? Эряфть кона песта
Эряви кундамс? Аф содави, сизень,
Ащихть кисон кеме кевонь стенакс,
Тя аф саты, авазень синь нельгихть...
Эх, Ареф, седиезень шяняфтсть,
Сяс и тяф та пильгоне монь пяльнихть.

 

(Сими)

ПРОПКАСЬ

Да, стакат, Том, юмафксне,
Но аш месть синь инксост ольксемс.
Стакань кирдезь сатневихть вдь сатфксне.
Мезе тият, кда лама нинге сави няемс?

 

(Эрекста)

А сянь самс тон пяшкотьк тейне стопкать,
Конань симсы аф ужяльдезь Пропкась.

ТОМСЬ

(Нюрьхтяй)

 

Тон, Арефи, няймок, эряфть кельгат,
Шутонь валхне шарыхть кяльцень пряса.
То винать, то аватнень эк шнасайть,
А монь кизе сембе ширде перяф.

ПРОПКАСЬ

(Сими, сяда меле комоти
кияксть кучкас и морай)

 

Вина! Ават! седизе тинь инксонт,
Кафту-колму сязевомс сон ёрай.
Мзярс пяльди шяярезе инксокс,
Кельган эсонт, инксонт моран.
Мзярс пяльди шяярезе инксокс,
Кельган эсонт, инксонт моран.

(Томти)

Том! Арьсят, мон пяк пелян?
Арьсят, кистон курок велян?
Аф! А сянь самс!

(Кшти)

Труа, труа!
Мезе теень учема?
Тяса кальдяв, тов тума!
Эх, труа, труа, труа!
Тячи Арефсь идь нула,
Ванды ули дранцякс,
Шарсь эряфсь масланцякс!
Эх, эх, эх, эх! Ха, ха!
Од авань рубаха!
Ава рядонь кукшинь...
Кельгомазень учсинь!
А сон, сукась, кадомань!..

 

(Кшти сиземс, тоса, лоткай, тятерди)

Шары прязе.. мадома.

 

(Озай)

Фу-у! Том, То-ом...

 

(Нувазеви)

ТОМСЬ

(Аф весяласта)

Мадсь. Симсь, топодсь и пара;
А монь? Монь седиезе сязеви кафту.
Ух, мзяра ня винагне марасть
Лангозон...

(Бойкаста)

Кирдихть, сянкса синь и лафтуфт,
Няйса, вожиятнень норгихть.
Нельксазь, инекуйхне, содаса!

(Аф весяласта)

А седись сялги, бта моргу.
Коза, коза мон эсь кизень кодаса?

(Кяжда)

Аф! Томти шавонь кятть ли яцемс?
Тейнь кундайти велети ли шачемс?
Пуромсть Ванят, Мишат — комсомолецт,
Синь кргазьти ёрайхть путомс петля,
Йорайхть норгомс кядьстон тянинь волять!
Аф! теест тянь мзярдонга аф учемс!

(Сетьмоста, пялес нувазь)

А мезенкса, кизефтемс, пишкодан?
Васькафнемат сельмоненди кодан?

Вандыкиге лангти сембе лиси...
Газетась кядьсост... седиезе псити...

 

(Арьси, сяльде шарьхкоди)

Да, да, да! Гриняти ни самаль.
Ах, мзяра ёньда Келюнь! и лама...
Корхтай: кулесть ёткстонт сире атять...
Мзяра стакась мяштезт пинекс фатяй,
Сави тюремс... тюремс, штоба ёрдамс...
Гринясь сась? Тя паваз? Нолдамс?
Гриняти алаша максома.
Мзярня ули, сура марамс.
Но мяляфтость, ёнюста ащема —
Кда мяленте алякс арамс...
Ну, вов, мзярда макссазь питнеть,
Гринять справканкса Томть ширес...
Моли Томти — няренц петнемс...
А Арефись — фталда пилес.
Мон ся пингти Гринять ширде —
Ушу. «Караул!» Стяфтомс велеть...
Вагот ворхне! Лацкас кирдесть!
Тяфта... Келюсь... ёрай петнень
Кяшемс ведти, цёрась питни...
Гри-н ня... Гри... и...

(Пряц прай моркш ланкс, матодови)

3-це лисемась

(Сувай Гриня. Аф ламос ваны
Пропкать и Томть лангс)

 

ГРИНЯ

Вов кит норгозь кядьстон волять;
Вов кит панихть эсон велеть эзда!
Салсесть синць, а монь ланган нолязь
Сембонь. Вятнесть суттнень эзга.
Судендамазь. Тяни — пелезь кяшендть,
Кода пинеть эзда кяшенди эрь нумолсь.
Арьсесть Гринясь пенёк, ташта пяшень,
Конань питнец — воронь лемса куломс.
Аф! Мон срафтса сембе пизоть!
Келюнь ширесь — аф минь ялгань мяльхне!
Аф тейне, а тейст лебоньц пезомс!
Штоба колхозниксь пильге лангста праза,
Кона лама паксянь тевда, тись,
Келюсь ёрась алашать прважамс,
Танга саламс колхозть сембе суронц.

Тяни монь сон ёрай шалхкта вятемс,
Вешфтихть справка алашать прважамс,
Конань вельде китнень ёрайхть кяшемс,
Штоба сюлмось улель кеме, таза.
Норак, тячи пови Келюсь!
Мезе арьсень — аньцек тяни кялевсь...
Аф, аф улемс пизоти колхозса!

(Няфни зепонц)

Мархтон сайхнень ярмаксна вов тясот,
Тяни учсест эсон веле песа...
Тячи, вестьке, веснень мон утясайне,
Тапарьксть эзда лихтема ни кесак.

(Вальмава ваны Матя
и туй, Гриня няезе)

Матя, ваноть? Тя пяк пара, пара...
Содак, тоньге сединязот ласьфтезь.
Пинесь лангозт лама сталмот марась...
Ласьконтть, азонтт...

(Эряскоды)

Кона стяфтомс?
Томть!

(Моли Томти)

Норак, коса справкась?
Малатькя лангс юмафтсак.

 

(Таргай каготкя, путсы моркш ланкс. Лифтьсы
наганонц и вишкста вачкодьсы Томть щёка ланга).

ТОМСЬ

(Эводезь)

Ой, кие, кие монь токамань?

ГРИНЯ

(Кяжда)

 

Нинге байдекса ирдеснень лочамат!
Тя мон, Гриня! содамайть?

 

(Макссы каготкять)

Ця вов! Путк печадть!

 

(Томсь эводезь ваны Гринянь лангс)

Эх, сельмонза! Ну, кодаман?

ТОМСЬ

(Пелезь)

Гриня, мес тон тяфта?..

ГРИНЯ

Лоткак! Муят кафта.
Путк печадть! Лангсот тевсь...

(Тя пингкть стяй Пропкась. Шарьхкоди, ёрай тумс,
но Гриня сурса няфтезь озафтозе моркшть ваксс)

 

ТОМСЬ

Аре-е-фи, коса печадсь?

 

ПРОПКАСЬ

(Макссы печадть)

Карьксокс шуди эздон ливссь...

ГРИНЯ

Курок, курок пряцень петьсак.

 

(Томти)

Ну-у! курок?

 

ТОМСЬ

(Морафтсы каготкять)

 

Што Сеникинць эряйсь ашу...
Сёрось сонцень. Колхозса член.
Максф колхозста алаша... ошу
Мимс. Вов справкать тянь
Кемокстасы печадьса советсь.

 

ГРИНЯ

(Бокти)

 

Аф советсь, а подлецсь!

 

ТОМСЬ

(Гринянди)

 

И путсы кяденц председательсь...
Аф пован?...

 

(Путсы печаденц)

ГРИНЯ

 

А кинди-на острокса ащемс?

(Сявсы справкать, Пропкати)

Ну-ка, Пропка, шаштта Мотти!
Кядензон эсь шнасот сотыть

(Пропкась сотсыне Мотть кядензон)

Ну, а тяни сака малав,
Штоба оду тяда сала,
Фталу кяттнень!

 

(Сотсыне Пропкать кядензон, сонць кармай сёрмадома. Тя пингть марявихтъ вайягяльхть: „Пирьфи, пирьфи! Панжесть. Панжесть ортать!“ Гриня кадсы сёрматф кагодть и справкать, эрязда лиси. Томсь и Арефсь арайхть копта-копс, ёрайхть юкссемс фкя фкянь кятть.)

4-це лисемась

(Сувай Ванясь, мельганза кафцьке ворхне. Сятнень мельге Зафур и Мишась, кядьсост ружьят).

ВАНЯ

(Кафцьконди)

 

Корхтатада, Келюсь мизень теенть?
А кода содасасть сонь, коста?

(Няйсыне Томть и Пропкать)

Вай, вай мезе, ялгат, няян!
Кафта азорнеконь пиксса сотфста...
Кие сотодязь?

НУВАЙСЬ

Кие председательть?

МИША

Ха, ха! Тяфта велесонок ашель.

 

ТОМСЬ

(Пеняндазь)

 

Зафур, кулхцонт, тяза сувсесь Гринясь,
Кафцьке кядьга кирди кафта нагатт.
Йорась шавомс монь, Арефить, пинесь...
Пешкодсь: «Косат?» «Ваган!“ —
Кулевсь вайгяль...

5-це лисемась

(Сувай Матя)

МАТЯ

 

Мон тинь инксонт...
Но изь сатов кивок куду,

Гринясь аш ни? Кона пингста
Ворьгодсь?

ВАНЯ

(Няфни Томть)

 

Сон и сотнезе тя сюдуфть.

МАТЯ

Тяса кати-мезе ули.
Гринясь ладяй моннеть мархта....
Э-эх, тя аф стак!

ВАНЯ

Матя кулить?
Минь вдь веле песта
Кафта нармотть фатяме. Синь вагот!

НУВАЙСЬ

Чуть исть розаря колхозть,
Салсезь суроть и «Гроза»
Айгорть...

ВАНЯ

(Моркшть лангста ванондсь кагодть)

 

Норак, Гринянь ширде кагод!
Ага! справканяське ульсь анок.

 

МИША, МАТЯ

(Марса)

Лувить, лувить, мезе сёрмадсь!
Кати-мес Томть коняц сормась...

ВАНЯ

Кулхцонтт, Зафу. Тевсь аф пара.
Суроть Келюнь цёрац марась...
Куледа!

(Морафты)

«Кельгома ялгат!
«Улень мон Томть ширеса...
Сон колхозникть каршес сялгатф»,
Сон инь аеркссь минь велесонк.
Сон и суксунь Келюсь — кафонест,
Тячи подлость тиемс ёрасть синь...
Гринясь ёрдасы
Петлять сяда цебярьста. Куледа.
Матясь няемань. Анокт уледа.

Велесонок лама врагонь раштафкст,
Конат салайхть, мийхть и макссихть справкат.
Моньгя сюцесамасть ялгат, содаса.
Ну, курок шарькодьсасть, мес тяфта и кода сань...
Ули суд, тоса мон улян»...

 

ВАНЯ

(Нувайти)

Зафур, кулят?

(Морафты)

«Келюсь мизе суроть и алашать.
Ласькозь ушу! Лисесть велеть,
Ворхне нинге улихть маласот,
Сембонь колга сяда меле...
Кода ялгат и братт,
Уледа шумбрат!
Гриня»

 

ВАНЯ

(Сембонди)

Пара? А тяни ваность справкать

 

(Сембе ванонцазь: Мотсь, Пропкась
и кафттне ширесот)

НУВАЙСЬ

Том, тон тяфта?

МИШАСЬ

Салайхнень нюряфнят?!

6-це лисемась

(Эрязда сувай Келюсь)

КЕЛЮ

(Эвотьфста)

Велеса ворхт! Во-о-ор...

 

(Абондозь ваны кафттнень лангс)

ВАНЯ

(Кундай Келюнь мяштьс)

Да! велесонок улихть ворхт!
А вятись — тон...

(Нувай Зафурсь, Мишась, Матя кяжда ваныхть
Келюнь лангс. Салаване таргави занавессь).

Занавес.