Колхозонь эряф/1940/03/Кафта ширет/2-1

←1-це действиясь

Колхозонь эряф (1940), № 3 Март edited by Игнатьев Г. А., Чумаков И. Ф. Кафта ширет. 2-це действиясь. 1-це картинась by Безбородов, Михаил Ильич

2-це действиясь. 2-це картинась→

Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — с. 41—55

 

2-це   ДЕЙСТВИЯСЬ

1-це картинань налкихне:
ГРИНЯ — 29 кизоса, башка эряй,
НАСТА — сонь авац.
ФКЯСЬ	$\scriptstyle {\left\{{\begin{matrix}\ \\\ \end{matrix}}\right.}$	Афсодаф ломатть, ворхт,
ОМБОЦЕСЬ		Гринянь ялганза.
СУКСУНЬ КЕЛЮСЬ.

 

1-це картинась

(Гринянь ширеса.
Сяка жа илять 10 частста)

 

1-це Лисемась

(Наста кштирди)

НАСТА

Кафта недялят вов ётась,
Пря изь няфне куду ёфси...

Тусь ёткшиста... Тячиеньге ёткши.
Пелян пови! Седизе аф лоткси...
Кати мес пяк тячи шави?
Шетка козонга ни шавовсь?..

(Арьси)

Аля, аля! Кода ломатть,
Тееть улемс сетьме ломанькс...
Улихть козят, кода Сёмась.
Эряйхть, токсисна синь аяш,
Эряйхть сякокс, кода баярхт.
Эх, эх, эх, эх, э-эх!
Беглай пинекс, аля, арнят,
Няймок, тошна улемс марняс?Й
Йордайть кудцень, авацень и идцень-..
Мес прянь сязикс сембонь каршес молемс?
Парста эрязь, эряфце аф колель.
А тяни? Лебоньц таргат кицень.
Туть и воронь слава кандат,
Эвфнефтьсамак милициятнень кядьста.
Тяфта эрязь, аля, курок ландят,
Аф эсь пингста пяля киса лякстат.
«Колхозсь воронь» — шоват кяльцень эса,
Мес Артемти тосонга пяк пара?
Сире кити меки сонь аф вятьсак —
Сон тонь лацот вестеньге аф арай.
Налхксемат ли? Кафта кизос
Кевонь кудс судендафт судса.
Шетка тонць улелеть кудса,
Тяшкава аф сускольхть эзот?

(Стяй, ваны вальмяти)

Илядьсь нинге аф пяк позда,
Пцтай сембонь палыхть толсна,
Сельме сялк — аф няят, шобда...

(Калтыихть, маряви вайгяль)

ВАЙГЯЛЬСЬ

Наста! Наста! Марят?

НАСТА

Ой, сай!

(Ласьки кенкшти)

 

2-це лисемась

(Сувай Гриня и кафта ялганза)

ГРИНЯ

Шумбрат, Наста! Изеть учсе?

НАСТА

Учень-учень — учемадок ётань. Сюдуф...

 

(Кшмордай, палай и
сяконь шовор аварьгоды)

ГРИНЯ

Вай, вай! Сави потамс!
Тяфта палсихть аньцек одста,
Мзярда салмокссь паньци ямсять
Инь шуваня мокшень котфка.

НАСТА

(Аварьгоды)

 

Тейть рахсемат, а...

ГРИНЯ

Наста! Инжихть авардезь аф васьфнихть!
Маряйть? Вальмятне эрявихть пандомс,
Танга пирьфста кяскавнеконь кандомс.

 

(Ялганзонды)

Мес аф ётамс? Мезе тинь учтада.

 

(Наста пандсыне вальмятнень,
ялганза озайхть).

ФКЯСЬ

Няймок, авать обжай кажнайсь.
Сяс аварьгодсь сон лажназь.

(Наста лиси)

 

3-це лисемась

(Сякотне, Настафтома).

ГРИНЯ

Кие обжай вов тя алять аванц?

 

(Шави мяштенц)

Сон вдь канни гальцят сеель кедень.
Катокс обжайть кенчса сязян шаманц.
Али варчсы пеелезе сединц!

ОМБОЦЕСЬ

Ой, ой!

ФКЯСЬ

Собственниксь тон кодамат!

ГРИНЯ

(Таргай наган)

 

Ся аф саты, лазсы конянц пулясь.

ФКЯСЬ

Шетка шарфтомс омба шири темать,
Кода тяни корхтафть мархта улемс?

ОМБОЦЕСЬ

Тянь катк Гринясь азсы.
Ванцаськ, кода пуляц лазсы...
Ванцаськ, кода пови цельти?..

ФКЯСЬ

Гринясь эсонок аф кялькни.

ГРИНЯ

Гринясь кялькнесь, мзярда уленць ёмла,
Мзярда эряфть шарьхкотькшнесь фкя ширенц.
Тянинь эряфсь теень лия тол макссь,
Конань эзда сиресь куйгоркс кирендсь.
Кялькнян, шаван, конатнень аф кельган,
Конат кядьстон норгозь воля шитнень!
Аньцек сятнень! Панян сятнень мельге,
Штоба перямс теест сембе китнень.
Тяда арьсе, эряфть мон аф кельган,
Тяда арьсе, сембонь каршес молян.
Унжань котфнень врагонь кундамс кодан,
Вракнень ёткс мон порохонень ёрян.
Пинкне сайхть — порохне крьвязихть,
Бомбань гайфса лазыхть сетьме менельть,
Кинь каршес аноклафт — сянь сязихть,
Эста мярьган: «сялкф седизонт пеельсь!»
А тя пингти лядонды аф лама,
Эста монга властти улян ялгакс.
А сянь самс аноклама калма...
Якамс пелезь вень вельхтямать алга.

 

4-це лисемась

(Сякотне и Настась. Наста сувафты кяскав).

ГРИНЯ

Тоса котфкя, конань тееть туйне.

НАСТА

Муйне.
Самоварнять тяни путомс, што ли?

ГРИНЯ

Аф. Качамть аф эряви нолямс.
Сизефс горькайсь симомс сяда моли,
Конань инкса Келюнь ширес молят...

 

(Моли Настанди)

Горькайть макссы авац, Проса.
Кда ломатть улихть тоса,
Мяляфтк, аф эряви азомс,
Кинди тяфта позда рамат.
Ласькозь. Ця вов ярмак.

НАСТА

Кит мархтот? Мес аф корхтат?
Кали мархтост мезьге кальдяв арьсеть?
Няйса, няйса танга ёрат торхтат
Валомс прязот...

ГРИНЯ

Валхнень марьсеськ.
Архт, коза кучтядязь!

НАСТА

Аля, кулхцонтт!
Вестьке прязот путк авацень валонц.
Саты, сюдуф, кяжень толса паломс,
Кафта кизос ваяфтонзе улхконць...
Кали танга сяда алу ёрат?
Кудса идце, аваце нужасот.
Пиштихть, кшисна неделянь аф эряй...
Пинге арьсемс, коза пилькнень нолят?
Али аш ни ару уйхтьке прясот?

ГРИНЯ

(Кяжда)

Ласьконтть, мярьгонь! Саят — азсайть валхнень!

 

5-це лисемась

(Сякотне, Настафтома)

ФКЯСЬ

Тяни, азонтк, коза нолдамс налхнень?
Мяляфтк, птовдавати улемс вастса!

(Озсихть моркшть перьф)

ГРИНЯ

Мзярда тунь тинь эздонт, веле песта,
Налсь ульсь нолдаф Суксунь Келють ширес.
Токась ортать — ортась фталда пякстаф.
Эста сон вальманзон алу кирендсь.
Ваны, тоса сембе пизось пуроптф,
Шрась ётксост, кода шарам куротф.
Лувсть газета, коса колгаст сёрматф,
«Мезе тиемс» — валхнень пелезь лятфнихть.
Няймок, газетсь мяштьснон кенчса нефти,
Няймок, тялявсть пулфне тингстост.
Аф ужяльдихть большевикне ворхнень.
Мезень колга теенть корхнень,
Тячи тиевихть. Аньцек инксост
Маштозь келес килькшне ёрямс.

ФКЯСЬ

Ну, а кода? Кода ёрат?

ГРИНЯ

Теест аф улемс колхозса,
Кода эсь сурнень — тянь содан.
И мзярс синь ашезь пане,
Мон ёран
Суксунь Келють кядьста рамамс
Алашат и сёра.

ОМБОЦЕСЬ

Ай да Гриня!

ФКЯСЬ

Аф стак шалхкоц
Шаманц лангса нюрги цётмаркс.

ГРИНЯ

Тьфу! Сельме вийцень потмарс!

ФКЯСЬ

Корхтак тев, шинясь аф учи.

ГРИНЯ

Кинди авазень мон кучень,
Сон завхозкс работай тяса.
Лемоц Келю... Кулхцонтт лацкас.

Мзярда вадьманц пачк мон цильфса
Содамс максонь, Келюсь кеняндсь.
Ламос корхнеме минь пирьфса.
„Тев тихтяма“, — валоц мянендсь;
Ворьфтемс алашанц сон ёрай,
Танга марстонь пяньготьф сура.
Суроть марама эсь цёранц
Кучсы пери. Коста курок
Мрдай меки. Тяни питнеть
Молемс ладямс...

ФКЯСЬ

Молят тонць.

ОМБОЦЕСЬ

Мяляфтк, ярмаконеке аф лишнайхть.

ФКЯСЬ

Тянкса оцю сон тяз уле,
Сембе вийса тапаряк мийть мяленц.
Азк, питнеть тячивок фкя пяленц
Макссаськ. Мзярда ладят, кулемс
Тейнек макссак, штоба содамс,
Мзяра сави максомс ярмак.

ОМБОЦЕСЬ

Васькафтт маштозь, улхка кода,
Стане тячиеньге кармак.

ГРИНЯ

Ярмак тяниок эряви сявомс.
Келюсь эзьке лятфнесь ни задатка.
Сон вдь ёню, кода сире эвось,
Пуста картас мзярдонга аф налхфтсак.

 

6-це лисемась

 

(Сувай Наста, путы моркш лангс
кафта пяле литрат вина)

НАСТА

Саят, аньцек ласькфтят седис.
Кода идь якафтат мельгат.

ГРИНЯ

Сянкса тейть мон сединь петикс
Курок аран. Эсот кельган...
Мезе няеть Келюнь ширьде?
Улихть кудсонза ли инжихть?

НАСТА

Аяш.
Аньцек Просась сюци мирденц
Юргоманкса. Цёрац кильди
Пирьфса алаша...

 

(Макссыне посудатнень
и туй пенакуд инголи)

ФКЯСЬ

(Лифтьсы посудать пропканц)

 

Мезге сускомс путт, кудава!

ГРИНЯ

Танга стопка!

 

(Фкясь сими, тоса кандсы Гринянди)

ФКЯСЬ

 

Сипть, сяльде штоба лоткамс.

ГРИНЯ

(Сими)

 

Да, арьсеф тевть удаламс.

ОМБОЦЕСЬ

Штоба марса ялгакс эрямс.
Кирдемс фкя фкянь мархта соткс.

 

(Сими)

ГРИНЯ

 

Штоба кинеськ афоль перяв,
Шорсихне люпштамат лоткс.
Танга нельгомс эряфть кядьста
Тюрезь, салазь, сембе цебярть.
Вирьса, паксяса и ведьса
Аф пелезь эстейть ки кяльхть.

ФКЯСЬ

(Гринянди)

 

Кулхцонт, винать мельге валхне мазихть,
Конат прязот яцихть сембе ширде.
Но вдь часттне пяле вети лазыхть,
И тонь мархтот тейнек синь аф кирдемс.
Кли саме, пингть юмафнемс менди?
Менди учемс атякшть кукоряманц?
Али прокс тон арьсесамасть инжикс?
Пинге молемс, кда мяльце рамамс...

ГРИНЯ

Тяда лажна, весь нинге кувака.
Тефнень тиемасна ни аф стака.

(Стяй)

Ну, а тяни ярмакт дайте
Задатканди савихть максомс...

ФКЯСЬ

(Максы Гринянди ярмакт)

 

Мяры ан, сатыхть?..

ГРИНЯ

Сатыхть.

 

ОМБОЦЕСЬ

Эряздоне ласькондть!

 

7-це лисемась

(Някотне Гриняфтома)

 

ОМБОЦЕСЬ

Пяле литрать симоськ, мярьган саты?

ФКЯСЬ

Саты. Омбоцесь ки ланкса симови.

 

(Настанди)

А тяни, щакай, мезьге азонтт,
Кона срафтоль аф азомшка скукать,
Кона ламос лядоль минне прязонк.

НАСТА

Теенть ёфкскат, авантенди мукат.
Тяфта, штоли, ёратада эрямс?
Няймок, тяфта семиянтетрямос
Сяда тёждя?

ОМБОЦЕСЬ

Ха, ха, ха, ха! Сяда тёждя!
Коста кода! Ату афи стака,
Штоба сатомс, щакай, тёжятть,
Аф стак Гриня мархтонок вдь якай.

НАСТА

Ах, тя Гринясь! маштоль Гриня лемське.
Мес сон геворьсь, коса ашель васьце?

Али тяфта ёрай ваи пяйськя
Мумс эряфста? Содан, ластяйхть..

ФКЯСЬ

Саты, щакай, саты пелемс, охиемс,
Валхне шавос куд кучкати лопиихть.
Минь кинеське, кода вармась, вольнай,
Эряфть эса мяльнеське минь фкя:
Тюремс, кода даволть каршес волнась,
Ялгань соткссь. Поват — мон лихття.

ОМБОЦЕСЬ

Няймок, пелят, щакай, Гринянь инкса?

НАСТА

Щеняй, пелят, кда куцот кшице
Тонь аф эряй. Ранги вача идце.

ФКЯСЬ

Наста, вов и тянкса эряви вдь сяськомс.
Век народа тяза няе Келюсь,
Кона лебоньц таргась Дёмань алянц,
Тяни ольксек, кода сире келу...

НАСТА

Эсон пицихть ащеманте тяса...
Содан, содан сюдуфть пряса
Оцю, рдазу, кальдяв тев.
Содан прязонт прай пси кев.

ОМБОЦЕСЬ

Колганок дят пичедь, щакай,
Келихть китне тейнек якамс.

 

(Ушеста маряви нурдонь читорф,
алашань пркснема и тошксемат)

ФКЯСЬ

Састь...

 

8-це лисемась

 

(Сувасть Гриня и Келю.
Келюсь иредьстоня. нарни пильгонзон,
Наста туй пянакуд инголи).

ГРИНЯ

 

Вов и минь.

(Тоса салава ялганзонды)

Ярхмакне максфт сембе.
Ниле кяскафт сура, алашацка тяса.
Эряскодан справканкса... тясть юкста...

 

(Келюнди, кона моли шрать ваксс)

Йотак, ётак.

КЕЛЮ

(Гринянди)

 

Кода, литраня утятам?

ГРИНЯ

Тейнь аш ётка. Ялгане тейть кандыхть.
Синь и ярмакценьге пандыхть.

КЕЛЮ

Шумбра ве, аф содаф ломатть

ФКЯСЬ

А тяни вов ульхтяма содафт.

 

(Шумбрайхть, Келю озай)

КЕЛЮ

Виде, келаськясь ни тонадсь
Калу эрьхти, кона нолдаф...

ФКЯСЬ

Аф весть можи сави васьфтемс...

ГРИНЯ

Да. Фкя фкянь содаматне касфтомс
Тейнек эрявихть.

(Серьгядьсы кенкш лангс фкять)

Кяскафнень тинь явштость кафту.
Кафттнень минцень нурдти путость,
Омба кафттнень — рамафти.
А винанкса Настань кучесть.
Эзьконнеть монць эсь мархтон сявсан;
Председательть кургоц кельги сяпоть
Вов винаса и... ляпя кяльса
Архцан, кода улхка Кяпоть.
Мзярда симдеви моркш ваксстось,
Алашатнень веле пети панесть.
Мон улян ся ригать ваксса...

КЕЛЮ

(Гринянди)

 

Гриня, авазе тейть стопка каннесь?

ГРИНЯ

Каннесь.

(Фкяти)

Эряскоткшнеда, кулить?
Пяле вети лядонды фкя част ни,
Мянихть часттне — позда ули.

ФКЯСЬ

Тисаськ. Инксонок дят пичеде.
Варьхмодемать аф учсаськ,
Сон нинге вдь ичкозе.

ГРИНЯ

(Сявсы пяле литрать. Лисемста
Келюнди, кона салаване корхни
омбоцеть мархта)

 

Келю, учт, мон курок саян.
Симомс вов тя цёрась рамай.

(Лиси)

 

9-це лисемась

(Сякотне, Гриняфтома)

ФКЯСЬ

(Моли Настанди)

Ласькондть танга, сатт фкя литра.
Парцень аф юкстасан куломс...

КЕЛЮ

Мярьгат, аньцек сардонят, селитра...
И шудавас лядыхть кулуфт?

ОМБОЦЕСЬ

Недля ётай, вастонцка аф содат,
Сянкса тонь ни сединяце озай.
Киндиге аф шувомс алот лотка.
И ризнамдонга тон лоткат.

КЕЛЮ

Тяфтане и сави, сваткяй, тиемс
Кда эрави, пинетнень пидемс.

(Наста туй винанкса)

 

10-це лисемась

(Сякотне Настафтома)

КЕЛЮ

Тяфтак сатсазь инекуйхне пезень.

ФКЯСЬ

У-ух, тячи кода сизень
Ну, а тяни Келю атя,
Озан ваксозт, лацкас ватте,
Нармоннь тон кодама пизонь.

 

(Озай)

КЕЛЮ

Нармонтть нилегемонь кизоц,
Мезе ванат ни монь эсон...

ФКЯСЬ

Азк, тонь мзяра ярмакт зепсот?

КЕЛЮ

Ха, ха! Ярмак! Коста сяван?
Мзярда макссасть, эста мярган;
«Вов синь косот! Ця ватт!»
И четверть, конань кельган...

ОМБОЦЕСЬ

Тяни оцю кядьсот кассась.
Содаф, сявфтяма тонь ширдет.

КЕЛЮ

Ласькан, ласькан аньцек макссасть...

ФКЯСЬ

«Аньцек макссасть». Саты кирдень!
Азк, мзяра норготь Гринянь кядьста?

КЕЛЮ

(Абондозь ваны лангозост)

 

Шутятада? Али корхтатада видеть?

ФКЯСЬ

Тейть кортайхть, мзяра? Лятфтак!

КЕЛЮ

Фкявок трёшник сон изь макса,
А тинь кядьстонт сави вете сотнят.

(Фкясь и Омбоцесь ваныхть
абондозь фкя фкянь лангс)

Мадость эльбядень эряволь, кафкса.

ОМБОЦЕСЬ

Саты кштирдемс мелянь моцькат!
Азонт видеть, Келю атя!

КЕЛЮ

(Эводезь)

 

Вай, мон тяни аньцек фатянь!
Гринясь васькафтсь! Вазьть монь!

(Вешенди вазенц)

Кали алашанек тусь сон?!
Аф стак орталангсон кулцондсь.

 

(Йорай тумс. Фкясь таргай наган, Келюнди)

ФКЯСЬ

Кяттнень вяри! Ащек вастсот!

(Омбоцети)

Ушу! Алашатнень варжайть.
Кда тосот, пикскат варжак,
Штоба кемот улест.

(Омбоцесь лиси)

 

11-це лисемась

(Фкясь и Келю ащихть карань каршек,
фкять кядьса наган:
тяфта ащихть омбоцеть сувамс).

 

12-це Лисемась

ОМБОЦЕСЬ

Алашатне тязкот, ця пикскятнень.

ФКЯСЬ

(Келюнди)

 

Куркцень келептьк! Фталу кяттнень!

(Омбоцети)

Кяднек, пильгонек, инекуйть сотнек,
Катк, мяляфтсы вете сотнять.

(Келюнь сотнесазь,
пандсазь кургонц, и прафтсазь)

ФКЯСЬ

Сембе? Зепонзон щупайть.

(Омбоцесь щупасы Келюнь)

 

ОМБОЦЕСЬ

Аш мезьге!

ФКЯСЬ

А тяни — утикай!

(Лисихть, маряви нурдонь читорф)

 

13-це лисемась

 

(Сувай Наста)

НАСТА

Вай!

(Тятярди, прафтсы посудать,
ласьки Келюнди, юкссесы)

КЕЛЮ

(Стяй)

 

Кашт тят моле, сембе содаф!

(Занавес)