Колхозонь эряф/1938/09-10/Захаронь Трофимсь/4
* * *
Паксяста самдонза меле Трофимсь лацкас штась, кемоста ужнась и эрязста тусь правленияв, штоба кярьмодемс тевонцты, кона эряволь тиемс шить. Сонь пилесонза кайгсь стирьхнень-цьоратнень вайгяльсна, конат тердсть сонь эсонза ульцяв, штоба аф ламняс ваймамс. Вов кули сон гармошкать стройнай вайгялензон йоткса тейнза содаф стирень вайгяль.
Тя морась Катясь, Трофимть кельгома стирец. Кеподсь Трофимть одонь седийц. Сон йорась молемс морайхнень йоткс и васедемс Катять мархта, корхтамс хоть аф ламняс, кельксемс и кядень пецек молезь прважамс кенкшкя лангу. Но сонь прясонза ульсть иля мяльхть, конат сонь сявозь правленияв. Тейнза эрявсь работамс, ваймамс и шовдава тага кундамс тевти. «Лучи ванды васедян Катять мархта» — арьсесь Трофимсь.
Правленияса ульсь аньцек Федя атя сторожсь. Панжада вальмава сон нолясь кургстонза таргама качам пакшт и тожа кулхцонкшнесь стирьхнень-цьоратнень. Лядендсь атять мяльс, кода йотась сонь одкс пингоц. Ня лятфнематне ожнакс кеворьфтезь сонь сельме ведензон. А тяниень кштиматнень-мораматнень кулхцондомста сонь сире мяштец пяшкотькшневсь радостьта, марязе эсь прянц станя павазуста, кода оттне. Атять эсь пачканза арьсеманзон колазень Трофимсь правленияв сувамста.
— А-а, тя, Трофимсь! — весяласта пшкядсь атясь. — Лажадонь, Трафка, шиньберьф ашихтень няй. — Синь кемоста люпштасть фкя фкянь кятть. Трофимсь азондозе атяти, кода тячи колхозникне сокасть и мзяра сокасть, кода тейст якасть инжихть.
[ 34 ]Счетоводсь панжезе шкафть, сонь седийц сидеста тотназевсь. Шкапса каготтне ащихть аф станя, кода путнезень. Сон вишкста сюволдазень синь. Бта полянаса сонь эрьхтезь коняти, пряц ашкодовсь бта аф няеви кшнинь пингоксса. Аф лама секунда мезевок ашезь арьсе, ашезь азов валоц, ашесть чипоряв сельмонза, мази шамац акшелгодсь котфокс. Тяса аш кассовай книгась, паевой взносонь книгась, оправдательнай документтне и лия эрявикс каготт.
— Мес тон, Трофим? — эводезь корхтась атясь.
— Кие тячи панчсезе шкапть, атяй? — шрать шири валомня аськолдась Трофимсь.
— Мезевок аф содан, Трафка. Шиньберьф тясолень. Аньцек аф ламняс якань куду обедама. Тяса ульсь аньцек Яронь Филясь, конюхсь. Мон кадондыне сонь эзем лангс удозь, и стясь монь самдон меле. Аф ручандан, пади, кивок ся пингть сей сувсесь.
«Неужели тя тевть тиезе Филя? — арьсесь Трофимсь. — Вдь сон честнай колхозник, цебярь конюх... Сон аф азы фкявок зря валня, аньцек работай. Колхозса сон сембода рана стяйсь, поздна мадысь, сон максси цебярь советт Шаловти, Коршуновти. А пади сон? Эряви проверямс. Кда сон, ичкози ашезь кенерь прдамс, Федя атя тушендсь аф ламос»...
Трофимсь мярьгсь Федя атянди пякстамс кудынголь кенкшкять и арамс орта лангс. Сонць ласькозь тусь куду. Веле кувалма молемс ичкозе. Шарфтсь лотка кувалма алуда пети. Фталонза токсихть кочкярянза, аф тяльги потмозонза ваймоц, прай, стяй. Вдрук лоткась. Инголенза няи мезе-бди равжа. Зрназевсь телац. Вдь тя лотку кулакне шавозь Васять, сонь комсомолец ялганц. Шири аердомс аш кода, крутат лотка берякне. Арьсесь молемс инголи. Вов равжа марсь йофси маласонза, йотась ваксканза. Трофимсь секундань пинге варжакстсь фталу. Тя ульсь ломань. Сон сялдазонц лангса кандсь уча. Вдруг лоткть кержи берягстонза пяярсть мода покольхть. Кие-бди тоста пильгонь-прянь синдезь валгсь алу. Лотка потмаксова молить сялдазста тодукс лаподсь мастору учась. Трофимсь станя ласьксь, кода нинге вестенге ашезь ласьконде. Сон ашезе маря пильгалдонза модать, бта лиезь лийсь. Лоткть кержи берягсонза савсь пологай вастоня. Сон вишкста куцсь лотка пряв, и минутада меле ульсь велеса. Озась седиец. Тусь валомня вальмятнень алга. Ульцяса аш кашт моли. Аф ичкозель ни кудсна. Маряй мезень бди шум. Сон тага ласьки. Кулевихть башка валхт: «Вона тияня таргазь... Бабась ашемань нолда»...
Пачкодсь куду. Вальмалост ульсь народ. Синь састь Трофимть тядянц «кравул» ивадемазонза. Саласть пирьфстост учаснон. Аляц ласьколексоль ворхнень мельге ружьяса, но бабась ашезе нолда.
Тя кулясь Трофимть аф пяк тревожазе. Уча тага добувави. Сон ськамонза алянцты салаваня азондозе эсь беданц. Захар атя сявозе централка ружьянц, и пялес ласькозь синь тусть правленияв.
Федор атя аф кирьдемшка учсь Трофимть эса.
Аф лама пингта меле кажнайсь ащесь эсь постсонза. Трофимсь — латафтала централканц мархта, аляц — правулкаса, Федор атя — орта лангса. Учихть. Перьф пяльге аш кашт моли. Маряви мянь шужярень шерьфкясь. Трофимти пяк кувакаста марявсь пингсь. Сон арьсесь сянь колга, кода Шаловти, Коршуновти и сембе колхозникненди азсы тя бедать, кона лиссь сонь сюнедонза. Кода сон отвечай колхозникненди, кда кизефтсазь: кие, мзяра и мезе макссь колхозу паевой взносонди, ков йотафтфт марстонь ярмакне. А месть кармай сон тиендема, кда кивок мярьги, што Трофимсь тя тевть тиезе сонць, што сон нарошна и сокамонга якась, штоба кяшемс пильге кинзон.
Востоксь кармась якстерьгодома. Перьф пяльге моразевсть атьокшне, пачфнихть куля шовдавать саманц колга. Тяни сембодонга танцти удомась, а ня колмотнень нувамаське ашель пря ширесост. Учихть. Кивок аш. «Неужели прокс юмасть колхознай документтне, тефне?..», арьсесть синь.
Вдруг сидеста ушедсь тотнама Трофимть седийц; сон валомня тарксезе ваймонц, сельмонзон сялгозень шовдати. Каньф умать кувалма кие-бди видеста шашты сонь лангозонза. Вов сон йофси маласа. Пачкодсь. Срафтозе плетенцта шужярень щитть и сувась пирьфи. Трофимсь пильге сур пряня лангса шаштсь варяти и[ 35 ]ванць сувайть мельге. Маряви шужярень кашторф. Вов пирьфи сувайсь моли меки плетенть малас, штоба лисемс.
— «Лоткак! Кие тя!?» — пилень пандомшка ювадсь Трофимсь. Аф содафсь врьгятсь ортати. — «Стой! стой!», марявсть атятнень кяжи вайгяльсна.
Аф лама секундада меле Трофимсь алянц мархта кирдезь колайть тифтень кядьта. Тя ульсь Яров Филясь.
Федор ятя юксозень сонь сумань полонзон. Мастору лаподсь кагод мар. Колмицке аф азомшка кенярдсть, но кайндасть, мес тейст ашезь содав йоткстост врагти лездысь.