Колхозонь эряф/1938/09-10/Захаронь Трофимсь/5

From Wikisource
Jump to navigation Jump to search
Колхозонь эряф (1938), № 9—10 Сентябрь-Октябрь edited by Руськин Ф. С., Пинясов Я. М.
Захаронь Трофимсь, 5-це главась by Чекашкин, Андрей Яковлевич
Колхозонь эряф (Колхозная жизнь). Литературно-художественнай и общественно-политическяй журнал. Мордовскяй АССР-нь советскяй писателень союзонь оргкомитетть органоц. Лисенди кефкиице кизось, ковти весть. — № 9—10 Сентябрь-Октябрь 1938 киза. — с. 35
 
[35]

* * *

Молодецат, Трофим, и тинге, атят! — корхтась шовдава Шаловсь. — Мах ашеде макса. Но мяляфтость, што инголе ащи нинге оцю работа, конань тиемстонза тейнек сави васьфтемс лама сталмот. Врагсь эсь равжа тевонзон сяда товонга кармай тиендемост. Значит, тейнек эряви аф удомс, нинге сядонга пяк улемс эрекокс, путомс сембе вийньконь, штоба тюремс сонь каршезонза, коряннек машфтомс сонь. Вийнь аф ужяльдезь, эряви работамс, штоба кемокстамс «Большевик» колхозоньконь.

Шаловть кельгозь и кулхцондозь сембе колхозникне и комсомолецне. Колхозть колга сонь заботанцты отвечакшнесть тевса. Комсомолецнень и сембе колхозникнень йоткса сембе вастова Трофимсь ащесь васенце ряттнень эса. Сон прянек-пильгонек тусь работати. Сяда смелста кармась аськоляма од эряфть эзга, ашезь пель сталмода. Сон и счетовод, и сокай, и ляди, и тяляй, и пропагандист, сьормас аф содайхнень йоткса сон учитель, кулакнень каршес сон беспощаднай тюри.

Сьоксенда Коршуновсь тусь армияв. Комсомолецне Трофимти няфтсть оцю почет и доверия, комсомолецне сонь кочказь комсомольскяй ячейкань секретарькс, а колхозникне — бригадиркс. Сон комсомолецокс тиендезе и тя тевонцка. И сиретненди и оттненди ащесь кепотьксокс. Сон васенцесь васьфнезе шовдавань зарять и матнезе иляденнеть. Тянкса колхозникнень ширде благодарностьта башка ашезь куленде ширем валнявок. Сонь кармась шнакшнемонза тядяцка, Захарорясь баба, конац лувондови тяни васенце колхозница бабакс.

Йотнесть шитне, неделятне, кофне. «Большевик» колхозсь кассь и кемокстась. Оцюста кассь и Трофимське. Сон заочна аделась Мордовскяй педтехникумть. 1935-це кизонь золотой сьоксенда кирдсь экзамен Мордовскяй Государственнай Педагогическяй институту. Сон тонафни.