Колхозонь эряф/1936/06/Н. А. Островский
| ←Советскяй Социалистическяй Республикань Союзть Конституцияц (основной законоц) | Колхозонь эряф (1936), № 6 (35) Ноябрь-Декабрь ков edited by Купряшкин Т., Бебан М. А. Н. А. Островский |
Гудок→ |
| Колхозонь эряф (Колхозная жизнь). Мокшень литературно-художественнай и общественно-политическяй журнал. Мокшэрзянь АССР-нь писателень союзть правлениянц органоц. Лисенди вейксоце кизось, кафта ковти весть. — № 6 (35) Ноябрь-Декабрь ков, 1936 киза. — с. 47—48 |
.jpg)
|
[ 47 ]
| Н. А. Островский |
Николай Алексеевич Островскяйсь шачсь 1904-це кизоня Щепетовка вастоняса, Изяславскяй уездса, Волынскяй губерняса, железнодорожнай рабочаень семьяса. Иолманяста сон илядсь аляфтома. Эстоньберя семьяц кой-как эрясь тярянц и железнодорожнай депоса слесарькс работай оцю братонц заработкаснон лангса.
1915 кизоня, мзярда 11 кизоняса цьоранять Николай Островскяйть панезь церковно-приходскяй школаста, сянь инкса, мес сон прокс аф ладс эрясь попть марта, сон оцю сталма марта сиводьсь работама станционнай буфету. Эстоньберя ушедсь сонь трудовой эряфоц. Сон работай кубовщикекс, рабочайкс складса, подручнай кочегаркс электростанцияса.
1919 кизоня Николай Островскяйсь сувси комсомолу и арси Украинать немецкяй и польскяй оккупантнень эзда освобождениянц инкса отважнай боецень рядтненди. Сон примси участие гражданскяй войнаса Котовскяйть и Буденнайть коннай армиясост. Львовть ала Н. А. Островскяйть стакаста ранендакшнесазь. Но тя аньцек аф ламос лифнесы стройста мужественнай борецть. Сон демобилизовандакшневи аньцек гражданскяй войнать аделавомдонза меле.
1921 кизоня Н. А. Островскяйсь работай Киевса главнай железнодорожнай мастерскойхнень эса, а 1922 кизоня — машина кинь веткань ударнай строительстваса. Тяса сон сярядьксни тифса. Стака урмась сложнайгадкшни. Пчкамда меле Н. А. Островскяйсь тушенды внутренняй охранань войскань комиссаркс пограничнай Берездовскяй району.
Походтне, напряженнай организаторескяй и пропагандистскяй работась, сирь ранать и тифть последствиясна тернихт — стака сярядема, конань сюнеда Н. А. Островскяйсь сокоргодчни.
Но духонь бодростсь и лакай энергиясь минутонь пингска аф кадондсазь социализмать инкса славнай борецть. 1928 кизоня ушедкшни Н. А. Островскяйть литературнай деятельностец.
„Физически юмафтыне пцтай сембень, илядсь аньцек од пингень аф мадонды энергиязе и страстнай желаниязе улемс мезькс мезькс полезнайкс эсь партиязти и эсь классозти“, — сьормады Н. А. Островскяйсь эсь автобиографиясонза. Эсь виензон сон макссесыне „Кода календавсь стальсь“ романтть сьормадоманцты, конац лисенди 1932 кизоня. Сонь васенце романоц, пяк высокайста оцененнай Советскяй Союзонь сембе трудяй од ломаньтнень, партиять и правительствать марта, курокста арась фкя инь кельгеви книгакс минь странасонок. Сон йотафтф СССР-нь лама [ 48 ]народонь кяльса, а станя и иностраннай кяльс.
1935 кизонь октябрть 1-це шистонза ССР нь Союзонь Центральнай Исполнительнай Комитетсь казезе Н. А. Островскяйть Ленинонь орденса.
Партиять высокай наградац макссь писательти од вийхть ингельпяльдень работати. Гражданскяй войнань геройсь, канац юмафтозе шумбра шинц советскяй властть инкса тюремаса, Н. А. Островскяйсь, сярядемань шовор минутань пингска ашезь лостксе социализмать инкса художественнай валонь оружияса тюремда. Мекельдень пингть самс сон ульсь заняф „Рожденные бурей“ од романтть лангса творческяй работаса. Николай Островскяйсь максозень эсь эрямань сембе цебярь кизонзон социализмать инкса беззаветнай тюремати. Эсь великай социалистическяй родинанц достойнай цьорац, сон ульсь безгранично предан Ленинонь-Сталинонь партиять тевенцты.