Колхозонь эряф/1936/01/Ашесть сяськя/4

From Wikisource
Jump to navigation Jump to search
Колхозонь эряф (1936), № 1 (31) Январь-Февраль ков edited by Купряшкин Т., Бебан М. А.
Ашесть сяськя. IV-це главась by Чекашкин, Андрей Яковлевич
Колхозонь эряф (Колхозная жизнь). Мокшень литературно-художественнай и общественно-политическай журнал. Мокшэрзянь АССР-нь писателень союзть правлениянц органоц. Лисеньди вейхксоце кизось, кафта ковти весть. — № 1 (31) Январь-Февраль ков, 1936 киза. — с. 88—90
 
[88]

IV

Иляденьди мольсь колхозонь марстонь пуромкс. Шинь повесткась ульсь: — 1. Отчет правлениять киза-кувалмонь работанц колга. 2. Разнайхть.

Зойновть докладонц аделамда меле пренияса сявсь вал Юргинць. Сон стясь васцтонза, пильгонза кальдявста кирьдсть ронгонц эса. Рябой шамац сонь ащесь кода веляньбяльде кели пачка. Вяри кепетьф оцю шалхконц лангс круглай путерькскянь-путерькскянь лиссь ливось. Тяйняня, кода тувонь, сельмензон тетькозень пуромкс кудонь уголу, коса ащесь правлениянь сери шкапсь. Прястонза тапу, апак сеенчнек шяярец навсеф бта юрнай толти — тюжя.

— Ялгат, — пшкядсь Юргинць — Зойновсь тячи тейнек азондозе правлениять сембе кизакувалмонь работанц. Кода сон корхтай тевсь бта моли пяк цебярьста. Сьорось урядаф апак имафтт-арафтт, сьоронь анокламань максф планць пяшкодьф фкя килограммонь пес эсь пинкстонза. Озепне видефт эсь пинкстост и касыхть тожа цебярьста. Видьме сай кизоньди ули. Модась, кона савсь сокамс лов алу-сокаф. Трудашити саф кафкса килограпт — тожа аф кяльдяв. Колхозсь и колхозникне анокласть якшама тялоти. Культурнай работавовок ули. Ну, коза тят варжакста, бта фалу ули и фалу цебярь, а мон мярьгелень, што афсатыкссь фкя и сон пяк оцю. Афсатыкссь ся, што Зойнов ялгась и сембе правлениясь лац аф содай, кода эряй, месть работакшни эрь колхозниксь. Сон аф содасы, што йотксонок улихть колхозникт-ударникт, конат йорасазь колхозть срафтома эсь саламаснон мархта. Синь марсихть эсь карманцнон минь работнайнеськонь эзда. Ялгат, афолень корхта мон, но омбоце шись седисон потяй бта куй, кати мезе бта лакай потмосон. Ито афолень азонда, пелян пяк, синь салавань суски пинекс ащихть, пелян шовамда, но тячи аф ламда копордань и, воляц, мезе ули ся улеза.

— Паньдя, Юргин, кувалгафнить корхтамацень, азыть кить ся ломатне, — корхтась президиумса Зойновсь. — Азонтк мезе содат синь лангаст. Пелемс аш кинь эзда.

— Ся ломаттне вага кит, — няфтьсь сурса Юргинць Иван-атянь Васять и Петя-атянь Александрть ланкс, конат ащесть серьцек озада вальмять каршеса скомня ланкса, — синь и Митяньгя шавозь. Синь колхозсонок лувондовсть сембедонь цебярь ударникокс и ниньге комсомолецт. Шнаентть вага тяни! — ювадьсь кайгиста Юргинць

Секретарьсь сидеста сьормадсь Юргинтть валонзон и шуроста варжакснесь озада ащи колхозникнень ланкс.

Ня валхнень эзда Васять и Александрть ронксна валовсть кода лакай ведьса. Синь ашезь маря алдост ащи скомнять. Шамасна лофташкадсть-акшелгодсть акша котфокс. Пуромксста ащи колхозникнень ендолкс пря потмоваст йотасть кальдяв мяльхть ня кафта цьоратнень колга. Кяжи сельмеса и нолдаф нярьса ванць ни синь лангозост пуромкссь, кода врагонь ланкс и апак каштордтт учсть Юргинтть азондоманц, коста и кода содазень, што салайхне и шавихне синь. Юргинтть корхтама еткованза Васясь стясь и пшкядсь президиумти: „Дайте тейне вал! Няйсасть вдь сон васькафни“. — „Юргинць катк корхтай!“ — ивадьсь вайгяль пуромксса [89]ащихнень еткса. И Васясь аф кирьдемшка досадада озась меки вастозонза. Равжа кудря шяяренза сонь нюрьксть сееньтьфста види прябокозонза и серай сельмензон пялезень Юргинтть ланкс. Сон пчкясь пилензонга пандольхцень, сяшкава аеркс ульсь теенза кульхцендомс лангозонза васькафнемась.

— Корхтак, Юргин! — мярьксь президиумонь председательсь.

— Мон вона кода содайня, — ушедсь корхтама Юргинць. — Исяк илять лисень морафтома кудста и тунь вальмятьнень алга куду. Пинксь ульсь ни поздна (ламос налхкондомя шашкаса). Толда велеса кржаль. Ванца Иван атянь толоц. Ожка, мярьгень, суван пялонза таргама. Нежедень вальмалонза, ванца зановескаса сильф: няевсть кафта кядьть каяйхть сулекаста стакану вина. Монь эсткиге сельгене шудема тусть, аф кенерькшнян меки потму ниленьдемс. Се вага суван афоли стакання пови, думандань эсь пачкан. Сямельде сильфсь имась, марявсь аньцек стакаттнень шра ланкс чакиемасна. Учень морамань вайгяль и кштимань дуборф, кда синь кудсост гитарань и балалайкань морама вайгяльсь афи машни. Маряса, морама вайгяльть вастс кулевихть валом корхтамань аф шарьхкодеви валхт. Мес тяфтаня? максонь эстейне кизефкс, симихть винада, а корхтамасна аф иредстонь. Ладяйня пилезень кольф вальмя уголняти, маряса корхтай вайгяльсь ульсь Иван атянь соньцень: „Недяляшка вага йотай танга кафтошка уйфтеда. Оду ваныхнень эзда тяда токсе, а илять повоньдяряй Зойновсь соньць косонга, обязательна покадесть“.

— Месть васькафнят! да рази мон мярьган Зойнов ялгать шавомда! — стясь вастстонза Иван атя валонь апак анак, но сонь президиумсь танга кардазе и корхтама ушедсь меки Юргинць.

— „Матк толть Вася ату кодама-кодама толти сай“. Эстакиге толсь матсь. Марявсь винать бульнямац и Васять вайгялец: „Тифтень пулдом ули, курок танга тифтень работатама, а синь кадыть копснон мяньцихть“. Колмоце ялгаснон ашине сода. Учень аф ламос кудста лиссть. Правулкаса танга кати месть тошказь корхнесть Малазост тейне ашель кода нежедемс и месть корхтасть ашесть кулев. Аф содафозе кархнемда меле тусь вальмятьнень ялга. Мон мельганза. Ожу, мярьгень, ванца, коза моли. Молень-молень ды эсь сельмоненьди аф верондан: аф содафозе сувась Петя-атянь пяли. Эстакиге шарьхкодень, што тя сонь Александрац. Вага вдь...

— Васькафнят, сволочь!.. — цяткафтозь ивадсь Александр Юргинтть ланкс:

— „Вага вдь, — тага корхтась Юргинць, — афи думандат, што ня ломаттне равжа тевти кярьмодихть, а лиссь няйсасть вага мезе. Кафта шить, тага весть азса, якань кода аф моньць. Кати, думандан, азомат, кати аф. Сянь пяльде-ни моньцьке виноватан. Пажалай ина паньде корхтань мон“ — аделазе Юргинць корхтаманц, нардазень рябой шамастонза ливозензон и озась вастозонза

— Дайте тейне вал! — стясь вастстонза Васясь.

— Норавак, цьорай, мон ингели корхтан, — пшкядсь аляц Васьняди, — Зойнов ялгась дай тейне вал.

Зойновсь макссь вал и Иван атя ушедсь корхтама:

— Минь, ялгат, плямасоноконга ашельхть ворхт ды ломанень шавихть. Колхозть инкс мон ваймозень путан. Зойновть келькса, кода эсь Васязень, нятом сонь мярьган шавомда. А Петя атянь семейканц колга мон ниньге тя пинкти ашень куль ширем валнявок. Вдь тиньцьке найсасть, што цьораттнень эзда сарас аф аварьди, а тинь, няйса, верондатада ня васькафнезь думандакшнеф валхненьди, ваттада лангознок сельме алга. Исяк минь баняса эшелямда меле, ранакиге мадомя и Александрсь пялон ся илядьня афи якась. Да и тиньцьке содасамасть, мзярда минь винада симоньттяма? — мзярдонга аф. Цьоратне кургозостка винать аф сявоньцазь...

— Правда, ня ломаттне тянь аф тийсазь, — утьксць фтала валонь апак анак Костянь Захарсь.

— Тяни васькафни штоли Юргинць?! — кулевсь танга вайгяль.

— Зойнов ялгась, тейне вал дай! — пшкядсь комсомолонь ячейкать секретарец Филясь. Зойновсь макссь вал и ушедсь сон корхтама шуроста и сембеньди шарьхкодевиста.

[90]— Монь, ялгат, аф сай верондамазе Юргинтти, думандан, што сон корхтась аф эсь валонзон Сидеста симоньчи винада, минь хуть аф весть сонь карнеськ, иредста ломаньць курок может повомс классовай вракть кядь-алонза. Мон йоткстононт сембодень абижафсян. Алашат минь танга раматама, ниньге сяда цебярьхть, а брадозе монь Митясь аф рамеви, ито нят цьоратнень виноватокс аф кадондасайня. Мон кирьдине синь ширеснон синь комсомолу прьмамстот, надиянь, што синь ниньге сяда лац кармайхть работама и виде сембе тефнень, конат путнефт синь лангозот, тиеньдезь цебярьста. Юргинть валонзонды аф верондама, а кизефкссь кадома панжада. Терьттяма шичас милиция, тихтяма пялост обыск. Ну, курок азомс, максомс эряви тевсь следствияс, а тяникиге цьоратнень ланкс тяда кяжиякшне.

Филясь яфодезень фталу шяярензон и озась вастозонза. Пуромкссь жалназевсь, кажнай колхозниксь азсь эсь мяленц ударникнень колга, но жалфса мезевок ашезь шарьхкодев, а кулевсть аньцек башка валхт и нюрьхкяня предложеният: „Цьоратьне тянь аф тисазь!“, „Юргинць аф васькафни!“ „Судс максомат!“ „Ускиентть кудынгели!“, „Ляпфцайнек бокснон“.

Микитась илештьф кядьса нежедсь матьса сотозь Васять и Александрть малас, фатязень мяштте и ушедсь ускома эсост наротть йоткс. Фтала марявсть вайгяльхть: „Ускить се! Сямольде катк милиционерхне сявсазь“.

Зойновсь лоткась цингорфтомда пайгонять, лиссь шрать ваксста и аерфтозе Микитать цьоратнень эзда.

— Судс максыментть, а шавомс аф макссайнек цьоратнень.

Пуромкссь лоткась шумнамда. Зойнов ялгать и комсомолонь ячейкать секретаренц Филять корхтамаснон коряс лихць путфкс: „Правлениять кизакувалмонь работац лувомс цебярьста. Эряви кярьмодемс эрь колхозникть бытовой эряфонц мельге ванома, эняльдес комсомолонь ячейкать секретаренцты сяда пяк вишкоптемс культурнай работать. Тевть алашань саламать колга максомс следствияс“.

Колхозникне ушедсть срадома кудга.

Шовдаль ни. Сидеста валдомкшнесть вальмасна. Пакшень-пакш ляцсь валдсь ульцять туркс вальмятнень эзда. Валда пакшнень эса няевсь туманць серай качамкс, сон ащесь аньцяй афлувомшка пульнятьнень эзда, конат пихцть кожфса. Кигя молихне йотнесть валтть эзга и имсесть шовдати

Сыргозсть велеса пинетне пуромксста сайхнень корхтама вайгяльснонды и пильгень тупфснонды, синь увасть молихнень ланкс, мархтост кавкснесть и йомла пинелефксятьневок.