„Мзярце шись ни
Увнай вармась?
Мзярце шись ни
Пиземсь суводы? —
Корхтай
Эстиенза Лаврась,
Суронь мянцезь
Шитнень лувонды.
„Аш ков молемс, —
Арьси Лаврась, —
Суви пиземсь
Вирьгя, паксява...
Сякокс течи
Сюци Каврась,
Мрденц эса
Юрхца—латала.
— Тята водя,
Лавруш, ялгат,
Няйса повоть
Аф эсь янозот.
Монга сотца,
Кода панда
Люпштай колхозсь
Лафту лангозот.
Аш месть тимос,
Етасть пинкне....
Аф минь прясонк
Тефне арьсемат.
Кельмя калмос
Ни вдь кинкя,
Лядикс шитня
„Шкайти“ максомат.
Фана попськя
Енда машць ни,
Сонга грехти
Пильгонц тонгозя.
Ох, и ломатть...„
„ — Лоткак, соньгя
Калхозсь пондазя!“
Лаврань потмонц
Пяшкся толда,
Аф кирьфтави
Кавра бабати,
Конань векоц
Уленць ордатф...
Кржа кельги
Осалть шабакски.
Лама корхни
Лаврась попти:
„Калхозникне
Тядде шавомат!
Мани шитнень
Якстерь толти,
Перестост
Сьоротне максомат!..
Вов мес Лаврась.
Учси манить,
Вов мес авац
Сюци эсонза.
. . . . . . . . .
Ляды шись ни
Пиземсь шави.
Курок коськихть
Вальмять ливсенза...
Кундась вармась
Туча крайти,
Лофца лангокс
Менельть штафтозя.
. . . . . . . . .
Моли тракторсь
„Колхос майти“
„Шинясь копонц
Валца архтозя.
Сргозсь Лаврась,
Нылхтай эвоць —
Тракторть сталмоц
Кудонц шарфтозя,
Мяштенц ланкс
Путозя кяденц,
Кяжда ваймонц
Потму таргазя.
