Колхозонь эряф/1934/11-12/Отвечатама

From Wikisource
Jump to navigation Jump to search
Колхозонь эряф (1934), 11-12 (30-31) № сентябрь edited by Бебан М. А., Белов А. А.
Отвечатама
Колхозонь эряф. Мокшень литературно-художественнай и общественно-политическай журнал. Нолдаец советскай союзонь писателень Мокшэрзянь областень правлениясь. Лиси 7-це кизось, ковти кафксть. — 11-12 (30-31) № сентябрь 1934 к. — с. 71—72
 
[71]
Отвечатама

Мельдень пингть „Колхозонь эряф“ журналть редакцияс кучфт лама стихотвореният, расскаст, очеркт и пьесат. Эрь од авторсь веши, штоба сяда куроконе печатлалезь сонь произведениянц.

Но редакциясь синь эздост печатлакшни кржа и аньцек сяс мес сьормады ялгатне кальдявста содасазь, али йофси аф содасазь тя тевть.

Штоба сьормадомс сяда цебярь стих, рассказ али пьеса, эряви улемс анокс грамотнайкс, содамс стихосложениянь хуть элементарнай правилатнень, содамс рассказть али пьесать сьормадомаснон ладонц. Тяда башка эрявихть морафнемс классикнень: Пушкинтть, Лермонтовть, Тургеневть, Лев Толстойть и лиятнень произведенияснон, станя-жа эрявихть морафнемс тянитень пингонь писательхнень: Горькайть, Шолоховть, Панферовть, Демьян Беднайть, Маяковскийть, Безыменскийть, Асеевть, Жаровть и лиянень произведенияснон Тяда башка эрявихть морафнемс мокшень поэттнень и писательхнень сборникснон, журналса и газетаса печатлакшневи стихотворенияснон и рассказснон. Од ушеды сьормадыхненди эряви морафтомс „Корхтатама велеса лит. кружокнень мархта“ критическай статьять, кона печатлаф 1933 кизоня „Колхозонь эряф“ журналть 23-24 номеронзонды.

А тяни аф ламос лоткатама од авторхнень редакцияв кучф стихснон лангс.

Пинясов ялгась кучсь стихотворение: „Аэроплан“, конань эса сьормады тяфта:

„Лийи лийи кшнень
Нармонць кшнетне
Цингордыхть
Кшнес!..
Ласькихть каршезонза
Вирьхне Атямсь
Алганза сонь
Торай!..“
И стак тов.

Пинясов ялгась нят валхнень сьормадозень мокшекс рузонь „Железная пцтица“ стихотворениять эзда, кона печатлаф 1 ступенень школав нолдаф учебникса. Значит, сон йорась саламс лия поэтонь стихотворения тя фкя, а омбоцесь: йофси аф грамотнайста рузонь строчкатнень иотафтозень мокшекс и сядонга аф грамонайста арафнезень: Вдь цебярь стихотворениять эса строчкатне аф шоряфт, и пара улель, кда Ф. Пинясов ялгське ня строчкатнень арафнельхцень тяфта:

„Лии, лии кшнень нармонць,
Кшинетне цингордыхть кшнес“...
Или тяфта:
„Лии, лии
Кшнень нармонць,
Цингордыхть кшнес
Кшнетне“...

А сон аф аньцек аф содасы тя элементарнай правилать — (стихть сьормадозе прозаическай вещакс), а нльня иофси аф машты мокшень валхнень правильнайста сьормадомост и препинаниянь знакнень арафнемост. Тя няеви сонь стихотворениястоза няфтьф кепотьксть эзда. И тяфта сьормадф сембе стихотворенияц, мезень инкса аш кода лувомс стихотворениякска и журналу печатламацка аш кода.

Тяфа жа аф шарьхкодьсы стихотворениянь сьормадомать ладонц П. Фадеев ялгась. Сон „Варсыть мороц“ стихотворенияц эса сьормады;

„Варсысь аварьди оцю
вайгяльса акша келути
Сияк пеняцяй...“

А сяда пара улель и шаволь стихотворениянь шири, кда стрчкатнень арафтольхцень:

Варсысь аварьди оцю вайгясьса,
акша келути сияк пеняцяй“...

Тяфта лисенди и сяда цебярь и сяда шарьхкодеви. А сядонга цебярь и кармай улема сяда полнай шарьхкодемась, кда няка строчкатнень сьормадсайнек афламода лиякс:

„Оцю вайгяльса варсысь аварьди,
акша келути сияк пеняцяй...“

[72]Сяс мес пеняцяй аф оцю вайгяленц мархта, а аварьдезь, а кда кивок аварьди, то тя значит, што ушева али потмова, но пеняцяй...

Вов Вася Р,сейкин строчкатнень арафнезень пяк цебярьста:

„Туманц кепоць,
Руцякс яфоць
Кати коста
Лямбе кожф“...

Тяса и картинность (хуть и аф прокс точнай и виде): „туманц кепоць“ и ванфт стихонь строчкатнень размерсна Но сембе стихоц аф печатлави сяс, мес васттне пяк аф шарьхкодевихть: „Шовдава шись

Якстерь флагокс
Од синдровть
Фталца лиссь.
Эста валдонць
Сембе менельть
Пожар лаца
Лиезь лийсь
Васень цяткоц
Эста киге
Лепе налти
Первай повсь
Илять коса
Ванять машнесь
Илядень познай
Якстерь ковсь.....“

Тяса цебярьсь аньцек ся, што пара рифмац: („повсь“ — „ковсь“) А „матнесь“ — „цяткоц“ хуть и аф рифма, но пяк парста кулеви. Тяньди мярьгондихть созвучие и тя созвучиясь кемаста удалаф.

А кальдявсь ся, што аф шарьхкодевиста корхтай: „Шись пожаркс лиезь лийсь“, а пожарсь аф лиенди ковга, сон аф нармонь. Вдь йофси лия тевсь, кода мокшень кой-кона поэттне шить сравнивают пожарть лаца. Тяфта ламоксть мярьгонди Е Пьянзин; „шись пожаркс кепоць“; толмаркс кепоць панда фталда“. но вдь именно аф „лийсь“, „а кепоць“

Тага аф шарьхкодеви: коза Ванять матнесь илядень познай, якстерь ковсь? — Аф содави. Карду, паксяв, куду али лия васц? Да и ковсь ломатть аф матни, матнесынь весь. Тяда меле Русейкин ялга сьормады сядонга аф шарьхкодевиста:

Ванясь эстакига шарьхкоць
Курок Мишать звенац сай“...

Ков Мишать звенац сай? Мес Ванясь шарьхкодсь? — Апак аст.

Русейкан ялга сьормадома машты, но тя стихоц пяк лафча, штоба печатламс журналса.

Пара размероц М.Кшнякин ялгать. Пара сявсь темавок. „Башка эряйти“ стихотворениянц эса сьормады:

„Башка эряйхть:
Алят—ават
Ломатневок пархтада
Марстонь эряфс
Тянимска тинь
Кати мес аф молхтяда“

Но сембе стихть эса удалаф куплет аньцек тяка, лядыкс васттне пяк лафчт. Омбоце стихонц эса козя колхоникнень серьгяди культурнайста арамати:

Сталин ялгать валонц коряс
Колхозник зажиточнайкс арать.
А дайте комсомолть коряс
Тисаськ културнайкстомомать...“

„Культурнайкстомомать“ валсь пяк аф поэтическай: пяк кувака, аф азомшка пцтай. А стихотворениять оцю ценностец эста, кда сон тьожде морафтомс — аф повонды кяльце. И сядонга пара, кда сон тьождяста шарьхкодеви, а тяса положениясь шоряф, аф содави мезе иорай азомс авторсь:

„Комсомолть коряс дайте тисаськ

Культурнайкстомомать“. Толи комсомолть руководстванц вельде — толи комсомолть эзда Кшнякин ялга сявфти кепотькс?

Кафтське стихонза лафчт: аш рифма, аш ритм - аф ванфт стихосложениянь элементарнай правилатне, конатнень колга сатомшка азонды „Корхтатама велень лит. кружокнень мархта“ статьясь.

Оц ушеды сьормадыхнень инголи задачась путневи тяфта: Эряви ламоня морафнемс рузонь и мокшонь поэттнень и писательхнень произведенияснон эзда. Тонафнемс синь колгаст. Морафнемс „Колхозонь эряф“ журналса и „Мокшень правда“ газетаса лисенди критическай статьятнень.

 
„Колхозонь   эряф“
журналть   редакцияц.