Колхозонь эряф/1934/11-12/Васятянь эряфоц

←Кулось С. А. Врагов ялгась

Колхозонь эряф (1934), 11-12 (30-31) № сентябрь edited by Бебан М. А., Белов А. А. Васятянь эряфоц by Врагов, Сергей Афанасьевич

Отвечатама→

Колхозонь эряф. Мокшень литературно-художественнай и общественно-политическай журнал. Нолдаец советскай союзонь писателень Мокшэрзянь областень правлениясь. Лиси 7-це кизось, ковти кафксть. — 11-12 (30-31) № сентябрь 1934 к. — с. 29—35

 

   С.    Врагов.   

Васятянь  эряфоц

(Сявф  „Большевиконь  тундась“  повестьста).

Васятя ломаньсь шутник. Сон прокс сембе мархта шутендай и ламатневок коростайхть мархтонза шуткаса. Но, и эряфськя аф кржа Васятя лангса шутендась.

Васятя лац мяляфцы сембе эряфонц. Мяляфцы ниньгя шабакс пиньгонц и од церакс пиньгонцка. Тидянза—алянза беднайхтельхть. Фкя вальмяня мархта куднясна мянь модати лоньдятфоль, турбац ашель, — соду кудоль.

Мяляфцы Васятя, коста ниньгя шабаль, удсель пянакуд лангса, коса ацам вастс ульсть калгт, и эрь шовдава тидяц уштсы комафкс мархта соду пянакудснон и мярги Вася церанцты:

— Вася, паньчк вяльдярьмать.

Вася стяй валомня плманжа лангса и панчсы моцькяталхксса пантф стенаста варять и тя варять эзга кудста туста качамсь лиси ушу.

И тяни кодак лятфтасыня Васятя ня етаф кизотнень, таргасы кувакаста ваймонц и дивандай:

— Вант, цера, кода полафцсь эряфсь, да и ломаттневок илякстомсть, аф кода сяда инголя — церькавда да озондамада башка мезевок афольхть сода. Тяни всякай лемонь-сюнонь машинат тусть. Сокайхть тракторса, видихть машинаса, тяляйхть тожа машинаса... Мярьгихть улихть стама машинатка, конат синьць нусазь, тялясазь, понжафцазь и кяскавс рознетькя каясазь.

Верондай Васятя, што улихть тяфтама машинат.

— Да кода аф верондат, — тага корхтазеви эсь пачканза, — усксть колхоззонк трактор, конань лангс озай Микалаень Федя и аньцек кундай эзонза, — атямкс торазеви и туй паксять кувалмос и кивок аф уски эсонза - кода емла паровосня; шинек-венек соказа — аф сизи. И паровозонь сельмокс ащи кляньцеконь фкя сельмоцка ули конань Микалаень Федя крьвяснесы веть, да аф сярдоняса, а тяфтак, кати мезень пакарень пуняня люпштай и валдопцы сембе паксять.

Аньцек ся Васятянь пряс коданга аф сявови, — кит тиенцазь тяфтама машинатнень.

— Кали эсь Рассейсонок ня машинатнень тиеньцазь? — тага думандазеви Васятя. — Мярьгихть ярманецне и америкатне пяк дошлайхть тяфтама машинань тиемя Да миньцень Рассейсонконга, председательсь собранияса корхнесь, тиеньдихть тяфтама машинат. Корхтай: Нижняйса ули стама завод, кона тракторхт тиеньди, да Саратавсовок ули завод, кона тиеньди самай ня машинатнень, конат синьць нусазь и тялясазь...

А лемонц Васятя машинать юкстазе. аф мяляфтови, аф мокшекс мярьгихть теенза: Да и мялямоцка Васятянь кальдявгоц-ни — сиредсь.

— Председательсь собранияса корхнесь тага, што Днепрать лангс пяк оцю электричествань станция тисть. Корхтай: „сембе мастор лангсовок сяшка аш, ды целай край, корхтай, кармай валдоптома“. Кали, цьора ся, станьцясь мастор лангса инь оцюсь? Кали, америкатненьдигя эзь тиев тяфтама? Да кода аф верондамс, кда эсь ведь меленьцязонок мелянь тундать пуцть эликтричествань машина и тялонь перьф учильщасонга, колхозонь правленияса, клубса и колхозонь пирьфсовок палсть уфамнякс ащи лампанят. Председательсь корхтась: „сексенда тага нолдасаськ“

Дивандай Васятя:

— Мес, цьора, толоц тя эликтричествать аф уфави, аф варманьди, аф кургса и хоть сушила пряв тишетнень лангс путк — аф крьвязихть. Эк, цьора, мезе аньцек трудяй ломаньсь аф тии! — Таргасы кувакаста ваймонц Васятя, шары омбоце боконц лангс и тага ня думтне, мяльхне аф явихть прястонза.

— А минь кода эрямя? — лятфтасы тага эсь эряфонц Васятя — Сокселемя шуфтонь, моргокс ащи, сокаса, инзаманьконь пейсна ульсть тумонь. Шават, шават ськамот праксташка уманяцень лангса, алашаняценьгя пульзяфцак и тоньцкя пульзят, а пара эряф сякокс афолеть няя.

И рахазеви Васятя етаф эсь эряфонц лангс.

— Кхе, кхе, кхе!.. — котназеви, кода атекшкя валомня эсь пачканза, а тяда меле дажа сельги мастору.

Ня мяльхне и арьсематне аф максыхть Васятяньди паксяса удомс фкявок ве. Но сянкса шить, кодак пидесы Васятянь польцякс ащи плеженц обедонь шинясь и матодови тозк работанц ваксс, кода шаба налхксеманзон вельхксс. Сальдя, Васятя юкстасы работанцка и соньць аф сыргози кда аф стяфцазь.

Кельксы Васятя марстонь эряфть Тусь мялезонза.

— Да кода аф кельгомс, кда теждя марса эрямс. А минь алянькя, да и миньгя кода сядынголя эрямя?..

И тага кармай лятфнемост Васятя етаф шинзон-кизонзон, кода тапаряф сюра крня прястонза орады.

А пяк интереснай Васятянь эряфоц но интереснай аф цебярензон мархта, а нужань-ризфонь шинзон мархта. Всякайкс Васятя варьчсезе сявомс эсь пуворксу кядезонза эряфть но аш, коданга изь покоридондафтов Эряфсь, кода валазя кал, лисель Васятень крмоштаф кядьстонза.

Шачсь Васятя, кода лама беднаень шабат, паксяв, нуфтол лангс. Мазы морнят конатнень морсесазь тидясна шабаснон нюрямняснон вельксса, Васяньди тидяц, изь морся но сянкса аф кржаксть тидяц валондозе Васянь шаманянц эрьксиякс ащи салу сельмеведьса. Сай тидяц прдама вастста сизеф маендаф, прай Васянь нюрямнянц вельхксс и азсыня афшарькоди церанянцы сембе нужанзон, горянзон, ризфонзон—печалензон, явсемя вайгельса сельмяведь мархта.

Кафкса кизозонза Вася фкявок тяла пцтай изь лисеньдя ульцяв. Да и аш мезьса лисемска. А тялотне якшаптольхть, морозсь толкс пидесы шамацень. Озай Вася эзем лангс вальмяняснон каршес, уфсесы эендаф вальмя сельмонять и ванонды станя ульцяв, кода курькснемаса курькснихть ялганза кудняснон каршеса, пандонять лангса. Лисель Вася ульцяв. но аш мезь щамс, аш мезь карьсемс. Масластовок, тиихть шабатне ловонь пандт, сайхть ялганза Васяньди, — терьдьсазь курькснемя, а Вася отвечай:

— Аш мезь щамс.

— А минь ванта месть щамя. — И кармайхть няфнемост ялганза адежаснон, и правда, беднай шабатнень лангса сязеньтьф сумань лыпканят, калада карь лоскадт. Пара! Аньцек улель-ба мезьса вельхтямс телась, синь тряйсновок аф сяда лад щафт-каряфт, Кармай эняльдемя Вася тидянц инголя, штоба мезевок вешель щамс и тидянцтыге ужяль арай фкя кельгома цераняц и стай теенза моцкяталксонь, манахонь камилафкакс ащи, колпак. Вася кенярьди. Щасы прязонза, пильгозонза карьси пянакуд алу ердаф карьхть, конатнень тидяц ердазень тоза пеньгянь крьвястемс. Лангозонза щай сязентьф сумань лоскоткя карксасы, шужерень карксса и туй кенярьдезь ялганзон мархта Маслань пандть лангс куркснемя. Тяда радостна минутат Васянь эрьфса ашельхть.

Весть, васень тундать, Васянь аляц корхтай:

— Ну, баба, Васянь тяни вехкса кизонза и максома козовок работникокс, а моньць туян степи работама, шять мзярда-мзярда ярмаконя кандан и рамама кодамовок алаш лоскоткя, ату тяфтак вачеда кулат.

Недляшкада меле Васянь максозь помошникокс Прохор атяньди кона ванозень Улонь—велень козялять учанзон. А аляц тусь степи работама.

Васяньди изь сав учильщаса тонафнемс, да училищатка ся пиньгть ниньгя пцтай ашельхть мокша велева, но сянкса теенза савсь пяк рана содамс эряфонь сталмось и учильщакс теенза арась лама кизот батракокс работамась.

Первой шитнень Васянь мяльс тусь постухонь работась. Прохор атяц макссь теенза локша, шуфтонь вяшкома и ласьконьди весяласта Вася учатнень инголяма. А стойлас паньцазь учатнень, Вася озай ляй берякть лангс и сик морси вяшкоманц мархта, а Прохор атяц тя шовор ваймяй.

Аньцек ся изь ту Васянь мяльс, — пяк рана шовдава стякшнемс сашендови. Первай шитнень Вася дажа аварьдель, коста Прохор атя стяфты эсонза ляпе вайгяльняса:

— Стяк, стяк, церай. ату азорсь сюцесамазь.

Марясыня Вася Прохор атянь валонзон, стяй, — пели „рзорин“ валть эзда. Нарнесынь пангу сельмонзон, сявсы локшенц и лихцазь учатнень ульцяв.

Но сянкса, кода паньцазь учатнень поргонть эзга луганяти, али парьне паксяв, Прохор-атяц мярьги Васяньди:

— Ну тяни, цярай, мадт, — топафтк таньцти удоманяцень.

Вася мады и уды мянь завторкти. Завторкамста Прохор—атяц лихти, кяскавняста кши пакш, почецазь салса кшиснон и кармайхть ярхцама. Тяка пищась обедстовок эряй. Аньцек праздник шиня Улонь стирь шабац канды теест копша и шапама ловца. Тя лофцть Улорясь шять кизонь перьф кирьдезя похарямсонза парьса сяс пяк шапама и сяпи.

Шить валгомс Вася сизи учатнень мельгя ласьконьдезь, илядень пяли коданга аф учеви шить валгомац, Вася тага ункстасы цильфонц, — мзяра карьпрят эсонза Тяфта коста-коста тиеньди Прохор атяц, штоба „точнайста“ содамс мзяра времась, но Прохор-атя шить коряска времать содасы, а цильфонц карензон мархта ункстай аньцек сяс, штоба тонафтомс Васянь тя „хитрай и точнай наукати“.

Шить валгомс Васянь вофси сизихть пильгонза, но вели учатнень эса пани радостнайста.

Учатнень панемада меле сувайхт Улоть кудозонза (кухнязонза) и озайхть шрать ваксс уженама. Улорясь каяй теест пеконь керы шапама квас конань ланга уеньдихть гнойкс ащи оргат, квасти керьси ниньгя пялес наксада салу куярхт. Коста сяда добрайкстоми жаднай Улорясь, каяй лофцаведь, кона тожа-ни ланга пинень понясь и ниньгя сяда шапама оргаву квасонц ваксстовок Пара, постухне сивсазь, да Прохор-атя корхни: „козялять мезецка аф юмай — сон венели молемстонзонга арси, кода-ба снафнень меки кочкамс...“

Но Васяньди тя пищаськя пара. Синь шра лангсост тявок аф эрь шиня эряй и тяда таньцтиста сон ниньгя изь ярхцся.

Ужндама меле Вася лиси ульцяв и кармай локшонц мархта кайгфнемя. Пуромихть перьфканза ялганза и анасазь Васянь локшонц — кажнайти охота кайгфтемс локшоса, но аф кажнайсь машты. Эста кармай Вася аф машты ялганц тонафтома и кода пяк содай и оцю ломань кармай корхтама:

— Эх, аля, аф маштат! Тон ва кода кирьдьк локшанедьть, а локшесь пряцень вельф ва кода эряви шарфтомс. — И няфцы Вася кода эряви кайгфтомс локшесь, а ялганза, кода оцю ломань лангс, кургонь келептезь ваныхть — кажнайть мялец тонадомс тя хитрай тевти. Тяда меле Вася шуфтонь вяшкоманцка няфцы ялганзонды. Озайхть шабатне куд ужеть ваксс и илядень перьф морсихть Васянь вяшкоманц мархта и сетме илядень кожфкять пачк мянь велеть омба пес маряви морсемя вайгяльсна.

Кафтошка недляда меле Васянь мольсь мялец тя постуфонь эряфть эзда. Кармась седиенц таргама тя шадама оргаву квассь, прянц сяряди саразкс кармась каннемонза и пильгонзовок пулзясть. Но Прохор атяц ужяльди эсонза и мярьги:

— Тонь, цьорай, шапам порьсы сединяцень; архт Прохоррясь бабацень кядьста алня пидефть, псиняста сивсак, мадат эше вастоняс и етай.

Ужальди Прохор-атяц Васянь эса, сон соньцкя тяшкаста ушедсь прянь тряма и мяляфць козд теензовок стакаль шаабакс пиньгста работамась. Но Васявок атянц ужальцы. Коста Прохор атя жалендай пингонзон лангс и модать лангса боком куфци, Вася аф тревожасы атянц, ськамонза командовай учатнень лангса.

Но весть Вася няезе и авардемовок Прохор-атянь и сонцьке эста пяк авардсь.

Фкя пингть учаснон ванозь вирнять ваксса. тусь вишкя пизем и учатне кяшеньцть пиземть эзда вири юрнатнень алга. Шить валгома шовор панезь стадать вели. Ула лувозень учанзон ортанява сувамстост и эстакиге пишкодсь кяжиста Прохор-атя лангс:

— Кодиить колма учатнень?

Прохор атявок кармась лувондома. правда колма учат ашельхть. Прохор-атя кармась вешеньдемост, но костонга ашесть мув. Самдонза меле Ула тага кяжиста пеишкодсь:

— Кизонь работацень колмоцекс талеканц кирьдьса!

Прохор-атя аварьгодсь и сельмеведень пачк пшкядсь валомня:

— Тоньня волясь, Парьфирий Степаныч. Тонь кяцот власть, тонь кяцот милостьсь.

Васявок аварьгодсь, — ужялькс арась атяц и эсь пачканза арсесь; „улелень тяни оцю ломань и эрьхтелиня Улонь пиля ланга клокса, мяляфтольхце оду кода Прохор-атязень обжасемс!“

Тя веня Вася первай, вень перьф изь уда!

Омбоце шиня Вася паксяса кармась кяженц пандома атянц инкса — кармась учатнень локшеса пиксемост. Прохор-атя кардазе:

— Тяйть токся, цьорай, жуватась аф виноват сон безответнай.

— Кие мля виноватсь, ведь синь инксост Ула обжанзя?

— Шкайсь няйсы кие виноватсь. — Ваймонь таргама пачк, сетьмоняста мярьгсь Прохор-атя.

Обедста учатнень панезь стойлас, озасть кшиняда сускома и Прохор-атя корхтазевсь:

— Ва тяфта, цьорай, козяалятне и козякодкшнихть.

— Кода, атяй, казна штоли мусть?
— кизефтезе Вася.

— Казнатнень синь, церай, аф вешеньцазь, а „казнась“ соньць сашенды теест и авардезь анай пря, штоба сяволезь.

— А кода, Прохор-атяй? — Вася кенярьдсь што атяц тага теенза кармай азондома басня казнатнень колга и юкстазе ризфонц.

— Хе, хе, хе! — пеедезевсь Прохор-атя — казнась теест цьорай мон и тон, да тага лама тяфтамда минь лацонк.

Вася келептезе кургонц, варжаксць эсь лангозонза, атянц лангска и мезьгя изь шарькодя. Аф ламос ащезь тага кизефць: — Атяй, а мес тон аф козякодат?

— Мон няйсак ломаненьди работан.

— А разя кие ломаненьди работай ся аф козякодкшни?

— Аф, цьорай! Коста козякодомс, кда кизонь перьф няйсак шафтама кафонек, а мольхтяма ловонь прамос ярмаконьконь инкса, сон тееньк пялеснонга аф макссыня.

— А тон урядникти жалендак! — Оцю ломаньск тонавтозь мярьгсь Вася.

— Э цьорай! Пинесь пинеда аф ярхцай.

Вася тага ашезень шарькодя атянц ня остатка валонзон и аф ламос ащезь кизефтезе тага.

— Атяй, а врьгазсь пинеда ярьхцай? — Ха ха ха! — Рахазевсь лангозонза Прохор-атя. — Ниньгя, цьорай, мезьга аф шарькодят. Ва касат оцюста и кармат содамонза мля эряфть. Эхе-хе-хе! Эряф, эряф, — пинень эряф! — Прохор-атя таргазе кувакаста ваймонц и велясь ваймама, а Вася, штоба аф шорьсемс атянцты тусь ляйти яшеляма.

Вася кафта кизот ванц Прохор-атя мархта Улонь уча стаданц. Кафта кизода меле сась аляц степьста; рамась алаша лоскоткя и сявозе Васять эсь мархтонза посабляма.

Алянц мархтовок работазь Вася изь няя цебярь. Молихть парнень сокама, шавихть кафонест, шинь-перьф пяля олговок аф сокави ащи алашаняснон и шуфтонь соканяснон мархта. Вася алашать эса вятни (алашась сонць первай кизоть ниньгя афоль моля борозда кигя — одоль ниньгя), а аляц мяньдеви сокать вельхксс и мзяра ули виец пособляй алашати, — тостяди сокать эса Коста модась калгода, — сокаськя аф пезы. Аф кржа сашендовсь беднай ломаттненьди пяярьдемс ливезь калгода модати, коста пиземсь сонь ламос афольце лопафта.

Васянь аляц ламос изь эря. Вача шись и козятнень пяльгя стака работатне таргазь седиенц, пульзяфтозь пильгонзон, кядензон, горбаськафтозь копоренц и тяфта ламос ашязь эря — кулось. Алянц куломда меле илядсь Вася кемнильце кизоса соду куд потмозост хозяинкс.

Кемнилие кизоса Вася маштоль-ни сокама и инзама, но афоль машта ниньгя видемя и лядемя, но аляфтома стака эряфсь тонафтозе Васянь сембе тефненьди.

Кемзисемге кизоса Вася, кода и оцю ломань, лядель. Эстиенза ламонь лядендемс изь сашондов, сянкса эрь кизоне, кодак кенерихть суратне, пинепне, штоба аф илядомс тялонь перяф вачада, Васяньди сашендовсь недялянь кафтонь якамс лядемя велень козяляти — Уланьди - конаньди шабакс пиньгстонза ванондсь Прохор-атянц махта учат.

Весть мольсь Вася фкя эсь велень цьора мархта Улоньди пинем лядемя — (Васяньди эста кемгафксува кизоль). Ула сиводезень синь-кеменень трешнек шити, а везьде лядемя питнесь ульсь цалковай.

— Сяда лама аф максан. — Корхтай цьоратненьди Ула. — Тинь ниньгя одтада.

Цьоратне согласиндасть.

Паксяв тумда инголе Ула пирьфсонза салаваня корхтай Васяньди:

— Тон, цера, ва мезе: лядемста арак меколи и сяда вишконяста паньтьк инголет ялгацень, штоба тяза лотксе, а тя старанияцень ингса мон теть лишнай пятак прьбаван.

Вася соглосиндась. Тя шовор Васянь ялгац кудынголе ладьсесь пеелемонц эса. Тусть паксяв Вася, кода мярьгсь теенза Ула, арась меколи, а ялгац инголи.

шинь перьф лядсть копорьснон шовиямс. Вестевок стак ашесть лоткся, аньцек пеелемснон шовамост весть-аф весть лоткайхть, да обедамста афламос ащесть. Вася эрь рядть лядемста нарнесыня ливезензон ожасонза арьси эсь пачканза: „мон тяшкава шаван лишнай пятак теень максы Ула, а сон мес тяшкава шави?“

Шить валгома шовор цьоратне тусть Улонь пяли ужанама. Улорясь каясь теест целай цяра шапама и кельмя квас, эзонза синнесь пидеф шини и салу калхт. Вася лятфтазе постуфокс эряфонц, мзярда Улорять тя квасоц сивозе сембе седиенц. Цьоратне сивозь сембе квасть, синь мялезост дажа тусь тя шапама и кельмя квассь стака работада меле Квасда меле Улорясь канць модамарьхть и похарямстонза лихць тага кельмя шапама лофца.

Ужанамада меле Ула теест мярьгсь;

— Ну, геройхть, работадя лац. Ярмаконкса сада ванды.

Куду молемста Вася мярьгсь ялганцты:

— Федот, мон шавонь тяшкава, теень Ула лишнай пятак путсь, а тон мезенькса?

Ялгац варжаксць кургонь келептезь Васять лангс и мярьгсь эстакиге.

— Да разя макссь лишнай пятак? Эрь акаяннайсь! Ну, ежу дьяволсь! Теень сон, тонь эздот салаваня, мярьгсь: „арак лядемста инголи, пяконя лядть, и сонга мельгат кармай молемс, а тянкса теть путан лишнай пятак“. Ва чертсь... Кода васькафтомазь.

— А теень, тонь эздот салаваня мярьгсь арамда меколи и корхтай: „арак меколи и паньтьк инголет ялгаценьгя, а тянькса пятак прьбаван“. Ну, брат, кафцькя тонь мархтот нолга тулотама, — мес тозк паксяса аф азондомс фкя-фкяньди. Э брат, Вася, мироедть аф васькафцак, сон аф минь лацонок ломатть васькафнесь.

Вася куду самда меле мадсь и лятфтазень Прохор-атянь валонзон, конатнень корхнезень теенза учань ваномста. Тяда меле Вася кармась содамонза, кода козякадкшнихть мироедтне.

Омбоце шиня Вася изь стяв, — пряц кевонь сталмоса марявсь, а телац, кода пси ведьса валф, — пси и якстерь путькса велхтяф. Улорять келмя и шапама квасоц Васянь машфтозе виенц и ежонзон. Васянь тидяц сюды Улорять эса:

— Эх, век парда тяза няя. Губиндазе цьоранязень! Разя можна ломансь тяфтама вишкя работада меле андомс кельме и шапама квазда!? Шкайсь сюдозя тянкса!

Но „шкайсь“ Улорять ашезе „сюда“, сон сякокс, кода боцькя, эчколь, а Вася сексень перьф маендась мяштенц и пильгонзон мархта.

Васянь сярядемста тидянцты савсь мимс алашась, штоба рамамс тунданьди кши и пандомс дацять конань инкса старастась урядникть мархта гразясть мимс куд-лоскоткаснонга. Пчкамдонза меле, — омбоце сексеть, Вася урвяясь. сявсь эсь велестост стама же беднаень стирь кодама и соньць. Урьвац ульсь сельмонь пяльдя аф шумбра, но работань кельги ломань.

Васянь тидянцты ламос изь сав кенярькшнемс и васькамс урьвянянц лангса, — керозе „потма урмась“, коськоньць-тись кизошка и кулось. Куломдонза меле Вася пяк аварьцсь. Мзярдовок тяфта ниньгя изь аварькшня Алянц куломста фкявок сельмеведь изь прафта, да и виздсь эста Вася авардеманцка. А тяни, — тидянц куломда меле, мзярда срадсь поминкась, варжаксць кудонц перьфкя Вася, — шава, аш инь кельги ломанец куд потмоса. Озась яземпряти и урокодсь вярьгак вайгялхть, кода явси ава. Аварьдема пачк сембе эряфоц Васянь етась живой картинакс ингольганза. Аварьдемда меле Вася кармась арьсекшнеме, кода ладямс ингольдень эряфонц. Лама думандась, лама арьсесь, но аш, коданга аф думандави цебярь эряф кода унжань котфса тапаряф пряц и кядензовок новольсть, — бта афи соньцень. Васянь урьвац валомне, — сетьмя сараскакс озась ваксозонза. Вася нардазень сельмеведензон, мярьгсь:

— Дай думандатама, месеньдемс тяни. Постухокс штоли сиведемс?

— Архт-лучи степи работама, шять мзяровок ярмаконя кандат; ато кудськя курок веляй лангозонк.

— А тон месеньдят ськамот? — Кизефтезе рьванц тага Вася.

— Кода, кода прязень тряса. Шять алязе эсь пялонза сявсамань и кармалень мархтост работама.

Сяка тялоть Вася тусь работама. Службав ашезь сявя браковазь. Мизя Вася калада куд лоскодонц урьвац тусь алянц пяли эряма, а соньць ялганзон мархта тусь Украинав работа вешемя

Вестеньгя ниньгя Вася изь няеньдя машина кшнинь ки и тяни эряфсонза васеньцеда варжазе машинаса ардомать.

Украинаса Вася якась шпалатнень ланга и кати-кода повсь фкя козя хохолонь пяли, конань соньфтомонзовок ульсть колма работниконза. Козя хохолсь ульсь пьяница и эсь прянь шнафты ломань. Кодак сими и кармай ломань инголе прянь шнама што сон пяк козя и лама работниконза. Хотя и ламоль работниконза Украинскай козялять, но Васяньди сякокс мувсь стака работа. Шинь перьф Васянь пильгонзонды—кядензонды покой аш, урядаль пирьфонц и жуватанзон эса, аньцек комсь кафксува букат кирдсь Куркульсь.^[1]

Весть сась козялять свадоц пялонза инжикс, Вася сувафтсь теест винограднай вина боцькяня и кармась нюрьхтямя кукшеньняс; тя шовор инжись варжаксць Васянь лангс и мярьгсь свадонцты:

— Зачем ты его взяв? Що у тэбе нема работников? 2.)^[2]

Хозяинть мяльс инжить тонафтома валонза эсть ту и макссь каршезонза тяфтама отва:

— Накий бис твий ум мини сдавсы, колы у мэне своего хвата. А не буде працюваты, я его заставлю рукамы махаты и бутэ цилый трыждень махаты, як малын 3).^[3]

Остатка валонзон азомда меле хозяинсь ярьхтезе клоконц шрать лангс.

Вася шарьхкодезень хозяинонц валонзон и думандай: „Эх прахсь сявса, лисема куроконя ингольденза, ату ниньгя кармафтанза кядень яфиемя, сон вдь кельксы фалендаманц ломань ингольдя“. Но Васяньди кядень яфиемафтомок ашель етка ваймамс.

Колма кизот работась Вася украинскяй козять пяля Ня колма кизотнень перьф кучсесь кодгеменчка цалковай ярмак куду. Колма кизодамеле хозяиноц панезе; Васяньди савсь тага вешеньдемс работа, но стама работа, коса-можналь добувамс мзяровок ярмаконя куду кучсемс, изь мушенда и тага тусь эсь шачема велезонза.

Васянь урьвац эрясь алянц пяля, кона Васяньгя кельгозе кода эсь родной цьоранц. Сонь ульсь алашаняц, но Васянь самс кулось и Васяньди тага кудсовок ашель работа.

Етафтозе тялоть Вася куд еткса работазь и тунда сиведьсь тага Улоньди, но Ула сонць шиса ашель-ни, — илядсь хозяйнкс цьорац, кона ниньгя сяда жаднаель алянц ваксстовок.

Васянь Улонь цьорац путозе варма меленьцязонза работама. Меленьцяв эряви проворнай ломань, тоса аф муят ваймонь таргама етковок, аньцек кенерькшнек шарфнемс.

Коста хозяинсь меленьцяса аф угодяви, Вася беднай ломаттненьди кевть нолдасы сяда алу, штоба почфне яжавост сяда ляпста. Но Вася содасы, што тянкса хозяинсь соци, да и пожалай меленьцястовок паньцы Хозяинсь аф весть инголькигя Васяньди корхнесь:

— Тон варжак, Вася, всякай сволочньди кевть тяк ноля алу, мон кда содате, тянкса спасиба аф мярьган. А кда цебярь ломань сай, то сяда алуня нолдак и посабляк мархтонза кяскафт каньнемс. Цебярь ломатненьди эсьтееньгя аф весть сави пшкядемс, а ня сволочне сякот пейснон врьгазкс мчкрфцазь лангозон.

Вася кулхцонды и седиец „лозк“ моли, коста хозяиноц Ула и беднайхненьди „сволочт“ мярьги, а козятне теенза: „цебярь ломатть“ Вася кяжияй и гразяй Улонь цьоранцты:

— Беднайхне, мярьгат, мчкорфцазь пейснон лангозт? Ожу верда потяй педли, ниньгя сусктядязь мзярдовок, да станя сусктядязь, мянь куломозт кармат мяляфтомост!

Вася тя пиньгть лац кармась-ни шарьхкодемя кода козякодкшнихть и мес козялятне лац эряйхть.

 

* * *

Меленцяса работазь, Вася арась-ни стама ломанькс, мзярда тя параса од ломаттне мярьгоньдихть ня алятненьди: „атяй“, Вася арась-ни Васятякс, — горбаськодсь копорец, сакалонза и шяяренза васток шаржиясть, — мярьгат почф пульняса вельхтяфт и конясонза плежецка кармась пиндолдома польцякс шить каршеса.

Васятя работась Улонь церанц меленьцяса революциять самс. Тя пингт самос Васятя аф кржа тежянь кяскав копорьсонза, каннель афкржа лов веляфтсь, аф кржа якшам няйсь. Тяфта эрясь мянь революциять самс.

 .   .   .   .   .   .   .   .   .   .   .   .   .   .   .   .   .   .   .

Октябрьскай революцияста ни Васятятне рабочайхнень мархта ердазь унду и сяпи, шапаряфксокс ащи эряфоньконь.

Сязезь пряснон сятнень, конат кирьдезь синь тя эряфса. Сявозь эсь кядезост власть и кармасть чокама эстиест од и валда эряф.

А эряфсь пяк сяпиель!.

Но и од эряфськя ашезе няфтя эстакигя эсь таньфонц Аф кржа савсь пяярьдемс вер, штоба кирьдемс и арамс тя эряфти. Аф кржа савсь срафтомс кевонь пандт, конатнень марсезь кулакне киснон лангс валда эряфонь — колхозонь строямста.

Тяни Васятя колхозник. Соньгя тиезь ломанькс. Соньгя седиец тяни радоснайста тотнай марстонь эряфонь моторса, марстонь эряфонь пяк вию работаса.

Председательсь аф весть корхнесь теенза:

— Тон, Васятяй, тят работа, кодгемень вехксыя кизоце-ни, саты, тон эсь векозт работать-ни лама, а тяни ваймак, кадк сяда одтне работайхть, а тонь минь тяфтаковок трятядязь. — Но Васятя аф кирьди апак работак, сонь седиец ризнай, коста аф сявсазь паксяв. Сальдя сявсы Васятя байдеконц и туй правленияв сюцезь...

— Мон молян „предсядательти!“ мес бригадирсь ломанькс аф лувсамань — ащемань сяв работама?..

Моли Васятя правленияв, кармай шумондама, байдеконц мархта тук, тук, тук, мастору калтыи.

— Тя мезень права? — Шумондай кяжиста Васятя.

— Мес, мес, Васятяй, шумондат? — Кизефцазь колхозникне.

— Мес? Бригадирсь ломанькс аф луви эсон — работама ашемань сявя.

— Да мезень тон работникат? калма лазкснень копорьсот каннесайть.

Васятя кяжияй тя ломанть лангс и кяжень пачк кармай фалендама:

— Варжак, цьора, мон ниньгя тонь карксяземозон яцетя.

— Ха, Ха. Ха! — Рахазевихть колхозникне Васятя лангс.

— Тинь тяда рахся атять лангс, сон ниньгя щять кемгафксува кизоса стирь лангс ерай урьвяямс.

— Сонь ваность вона: фкявок пеец ниньгя изь пра.

— Правдаця-правдаця, цьорай.

— Васятя кенярць-ни тя ломаньть лангс.

— А плежонц пионерхне спектаклень парикса кяшсазь. — Кодамовок шутник аля пшкяди тя еткть.

— Ха, Ха, Ха!.. Тага рахасазь Васятянь.

Тяниеньгя вага, кода ашезе эрся сявомс бригадирсь Каргонь ляй паксяв, но Васятя сякокс педьсь бригадать мархта. Мезьгя аф тият, савсь максомс теенза поворонь тевсь.

Тяни ва Васятя Каргонь ляй паксяса, крандаз потмоса — тишетнень лангса, лятфни етаф и тяниень эряфонц эса.

— Да цьора, кода ашемя шава, всетки тиемя эстиеньк эряф. Эх, цьора, пара эрямась марса пяк пара! Миньгя атятнень эса ужяльдихть Хе, Хе, Хе! — пеедезевсь Васятя и шарфць омба боконц лангс. Тяфтама — шабакс пееди шаманяса Васята и матодовсь пяк таньцтиста.

Времась пяляведа лама-ни.

Васятянь шонгарямонь пидемя вастсонза мадонцть-ни остатка палы седьтневок.

 

Саранск

 

---

1. 1) Куркуль украинскяй вал — кулак.
2. 2) Мезеньди ян сявить тага, штоли кржа ниньгя работниктот?
3. 3 Пяк эряви теень тонь разумця, кда моньцень ули Аф ули теенза работа, мон сонь кошарца кядензон мархта яфиемя и яфии колма шишка, к'да варма меленьця.

 

---