Касыця вийть/Кавонест братиники/1
| ←Кавонест братиники | Кавонест братиники (1934) by , edited by Потешкин Ф. I-це пелькс |
II-це пелькс→ |
| Касыця вийть. Сёрмадомо ушодыця сборник. Пурнызе А. Лукьянов. — Молодая гвардия, Москва, 1934. — с. 108—114 |
Кавонест братиники
Евтнема
I
Кальтне ало леесь такода сэтьместэ ды прок сленикань полотна сравтовсь келеде келес.
Тошна, авардемат сы. Рунгот мик карми чулксетеме, седееськак скирязь скири. Прят бу петляс килькштявлик истямо апародонть. Преветькак маштыть.
Ало пе ёндо мельник Мишкань ведьгевенть ланга раужо пелькс появась ломань стена. Виде-паронь стена. Келес а келеми, проулкась свистизе.
— Уряж, — рангстась Тюма, — ванта, ванта, те мезе? Уряж, поп пазава марто юты.
Тюма налксесь кинть лангсо пуль потсо. Сон пурнасы пуленть куцяс, кенере-пакарьсэнзэ теи яма ды венельди тозонь. Кода начки пулесь, тееви вакашке.
Чинь-чоп, чинь-чоп Тюма налксекшнесь кинть лангсо [ 109 ]пуленть потсо. А чама содави, а сельть содавить, прок гайнасо туво левкс. Ков больчи моли? Ков иля моле, — яла пуль потс. «Теяк паро, сельме икеле коть ай ашти» — кортнесь уряжось. Тюмань авась умок уш кулось. Уряждонть башка ки карми мельганзо якамо. Кинень пек эряви те нолго туло эйкакшось. Тетясь коть ули, лезэ эйстэнзэ а покш. Сон тунь сокор. Цёранзо чаманть а содасы.
Тюма скирнавсь пуленть потсто, вакашканзо вачкинзе элезэнзэ, рудазов кеденть кепедизе конязонзо ды кеденть алга ваны раужо пеленть лангс.
Раужо пелесь, лиясто сырги икелев, лиясто лотки ве таркас, се шканть стакасто лекси венельксэсь — прок кувси. Тюмань рунгова лиясто кельме ведь валови, лиясто жарс каяты, такода радови — учи поп пазава марто.
Уряжось ёртызе руця панксонть, конань эйстэ арсесь стамо эстензэ панар ды тандадозь эли радувазь ладсо ношкстась кудов.
Сон ёвардызе столенть, бабань парьстэнть таргизе столь ланга коцтонь каямканть, путсь кши, каймака ды салдоркс.
— Совак, стака мор саензат! Совак, коть ёвардык чама киськенть. — Уряжось хлопадизе нулков вишкине вальманть, сонсь кармась кияксонть тенсеме. Аляка атя каштом чиресэ нурсесь рунгонзо ды месть бути мурнось курго потсо. — «Чи валдо бу». Ух, Аляк-атя ломанесь... стяко сэвизе пиже чекерь атянть. Тумо ульнесь атясь. Ней, — ней прок чев коськсь. Те весе сокор чись костизе.
[ 110 ]— «Мезе истя?» — Аляка прок ответэнь апак учо пшкадсь.
— А содан мень народ юты.
— Нама. Престольной празник.
Аляк-атя прок ливчакадсь. Сакалонзо пондакшкавтынзе, но сынь яла теке сэмекс казямот.
— Совак пайстомо чи!
— Ужо.
— Ды кие карми учомат дрянь эдакой!
Тюма тень каршо мезеяк эзь пшкадть. Сон стамбарнэ нолдызе элензэ, элестэнть вакашкатне новольсть ды порксавсть пильгалонзо. Прок эсь фатяяк, яла ваны. Раужо пелесь занизе покш ульцянть, морясо сэрей волнакс нежеди икелев. Сулейсэнзэ эль-эль копачасы Тюмань. Тюма а поты, кедензэ алга яла ваны сыця народонть лангс.
Кармасть пачкодеме малав. Кодак лоткить — Тюмань седейстэ прок мезеяк сезеви: поцк, поцк мольсь седеезэ.
Лоткить, таго сыргить. Таго прок раужо пель нежеди икелев. Истя уш теснасто молить, секень вант ульцянть кавтов келемтсызь.
— Машт антихристнэнь!!!
Каятотсь апаро вайгель. Тюмань мик соракадсь сывелезэ, пелезь шашсь кудо бокас, илязо понг пильгалов.
Икеле мольсть кавто салдат. Лангсост серой шинельть, конясост какардат, чапкаст серойть нолтневиця круг мартот. Сабляст вандолсть чинть каршо. Саблястонть чи валдось кивтёлк каявсь Тюмань чамас. Тюма [ 111 ]потазевсь. Се шканть Бусран лоштизе верьнешке потсо ломаненть, коната мольсь ютксост. Верев ломанесь прась кинть лангс, пулесь пештизе кирга парензэ. Мейле цётмарсо вачкодизь омбоценть. Омбоцесь сэредезь сельме вановсо варштась удалов, се шканть сонзэ вачкодизь кирпець песэ — прась сонгак.
Празьтнень чавсть кинень кода паро, кие мейсэ понгсь, машсть не кавто ломантнень. Сынь прок кевень пандт валяясть пуленть потсо, — эсть макст пря каладомс не мокшнатнень вачкодематне ало.
— Встать!!!
Вейке салдатось кучкордызе празенть. Празесь сельгизе кургстонзо верь пенксенть ды нардевтеме стясь пильге лангс. Омбоцесь чирькась прок меньгак жив поколь.
— Лепштямс прок кендялт! — Афрыч Костя лиссь юткстост. Сонзэ прязо ульнесь судрязь, касмозо прок виде ки, ансяк ней котлявсть черензэ. Чамазо якстере, сакалонзо келейстэ сравтовсть мештеванзо, мештсэнзэ крёст. Кедензэ кенере-пакарс илештязь, сынсь верьсэ пурксевсть. Бусран нулав пинжаксо, коцтонь сэньс нававт понкссо, сизезь аксори вакссонзо.
Истя мольсть велеванть. Истя ульцянть кувалт молемстэ кольгевсть верест не кавто братиники ломантне. Вейкесь седе алкине, кудряв, эчке, ламоксть снартнесь панжомс кургонзо. Эсть макст шка. Кода сон ушодыль вал, сестэ вачкодилизь курго ланга, туильть кургстонзо верьть, потомиль кирга парезэ. Те ульнесь Филя. Омбоцесь седе сэрей, истямо жо куратной, эчке, лавтовонзо келейть. Сон марясы, што моцезэ кармась маштомо, [ 112 ]сон марясы, што эрямозо эрявсь. Понгсь верев сельме вановтонтень, ведь чиресэ вишка кудынест. Кардайсэст касыця маршось буто юхаи те кельме варма коштонть, коната токась ней.
Сон таргизе оймензэ, кургстонзо истяжо ёртызе верев сельгенть ды кенярдозь кармась кортамо:
— Ялгат! Товарищи!.. Минь кавонек братиники кулотано. Минек эйсэ маштыть эсинек ялгат, бедняк-середнякт. Маштовтыть эйсэнек вана паразиттнэ! Вана! Тынь тынсь содасынк кие Афрыч Костя. Тынсь содасынк, кие Егор Иванычесь! Сон свал ульнесь старшинакс! Тынь ломантне чоподатадо. Неть салдатнэ лездыть буржуень властентень, неть меньшевикт. Минь кулотано, но не ломантне шлявить минек верьсэнть — шлявить мастор лангстонть допрок. Инязорось сяворсь престолстонзо, сяворить нетькак. Тынь думинк, ялгат, минь виенек тынк марто путынек кинень? Не паразиттнэнень. Минек маштыть секс, што минь ливтяно сынст кедь алдо беднотанть!..
— Молчать!!!
Хлоп котмерьс зэрькадизь сердешниксэ. Митя прок керязь чувто сяворсь. Бусран сайсь каштом подонь чавома молотка, озась ласте Митя лангс ды кармась тапамо прянть.
Егор Иваныч кепедсь покш кев ды нолдызе Филянь каряз лангс.
— Тынь лепеятадо минек верьс...
Теке марто Филя нилизе валонзо. Венемсь алянть рунгонзо.
— Кие а содасынзе Оляинь цёратнень? Весе [ 113 ]содасынек! Розбойникть! салыцят! Вана мезень кис маштано эйсэст.
Татар Яков венельдясь кулы ломаненть куркс.
Народось яла промсь. Ульцясь стакасто лексесь. Чись авардевть вановтсонзо валнось моданть.
— Оргодть! Сторонись!
Миша паметьстеме ардсь алашасонть. Каламышкасонть пельс кулозь велявтнесь Песэ Кандрань вишка цёрась.
— А, матьта! Эзить пачкодть ялго! Кольневтят эсь прят — больчевик...
Фрола Миша марто таргизь крандайстэнть, вейке пильгте омбоце прядо ды арьсить нучк каямонзо пшти узерь лангс.
— Ох-х-х!!!
Стакасто таргизе цёрась ды новольсь кедьстэст.
— Товарищи!
Валгак больше эзь кенерть пшкадеме, салдатось саблянть нерькстызе кургозонзо.
— Товарищи! Нука мезе вандадо! Истя весе маштнесамизь. Ванат минек кисэ?! Самай сень кис, што минь мольдяно буржуйтне каршо, тейдяно ровноправия. Минь не хотим воювамо. Минь нельгсынек бояртнэнь кедьстэ моданть, макссынек крестьянтнэнень?
Капшазь кортась Игнатиень Дёма. Сон прядызе валонзо ды чопавсь народонть юткс.
Алякань Иван, кода кирдсь серьдешникенть Филянь пря велькссэ, истяк кадовсь кепедезь.
Пси верезэ кармась кельмеме, кармась само тензэ паметь. Сон стамбарнэ нолдызе серьдешникенть, седеень [ 114 ]сэредезь варштась верь покольтне лангс ды тусь кулозьтне ваксто.
Тюма, кода арась кудо бокантень, истяк чувтомсь. Кодаяк таркастонзо а сырьгавтови рунгозо, прок мерят педясь.
Сонзэ икеле, кинть лангсо, пуленть потсо, косо сон ансяк тейнесь вакашкат, сестэ неявить тензэ прок велявтнить жив ломанть. Прок пулесь вельтинзе сынст. Но ломантне сокорить пуленть, кучкорить не кавто жив покольтнень.
Тюма укстась, кувакасто таргизе оймензэ. Ансяк сыргиксэль, мольсь Иван лелязо.
— Кулость кавонест братиники...
— Мейсь чавинк?!
— А содан... ломанть кармавтымизь... буто сынь большевикть, антихристт, орт, розбойникт. Митясь месть мерсь... буто «кулотан, мери, тынк кисэ».
— Минек кис?
— Да, келя, тынк кисэ, од эрямонть кисэ. Инязоронтькак, келя, сынь ёртызь. Дёма кадовсь. Пек вешнесть эйсэнзэ. Монь вакска ютась, мон эзия ёвта. Ну, здоровт, нейгак никак эсть куло.
— Калмизь?
— Д-а. Ды яла теке живть. Иван ёвардынзе кедензэ.