Касыця вийть/Кавонест братиники/2
II
Венельксэсь чопода. Менелесь эчке кошмасо ацавсь. Чинть срунатне а токить масторонтень. Ансяк шкань-шкань прок содов суликань пачк чись невтсы чаманзо. [ 115 ]Сон неяви вишкине, прок пижень трёшник. Вановтозо ожо.
Менельстэнть прок сееде ситань пачк пры пиземесь. Толкан леенть велькссэ кальтне ожо чамаст сюконявтызь маскадозь леентень.
Сёксь. Рудаз, течи пиземе, валске — кивекс масторсонть кельмевсы. Каурькс, прок пеель лангс чалгат.
Тюма кирекс кирьмицявсь, чие школасто кудов. Варманть каршо молемстэ сельведензэ прок кснавт кеверить. Каршозонзо Бусран кудотне ёжова сылт-сылт гурьтякадозь чие. Тюма варштась лангозонзо: буто верев аксорксо аксырязь Бусран. Сон чийсь, крышкатнестэ кольксь чудиця пиземе ведесь. Чие, сонсь а соды козонь прясь каямс, а соды козонь рунгось копачамс. Прок талакадозь киска нерькстневи кардастнэва — вешни чопода тарка.
Аламо шкань ютазь Коляша прок боцька кеверьсь ведьгирев — пандалов. Тандадсь, куязо прок студень сорны. Лавканть велькссэ вывескась уш арасель. Чеменев жестенть, косо ульнесь понгавтозь вывескась, шли пиземе ведесь.
Тюма ансяк ютызе покш сэденть, Сухой проволкасто кижнэзь лиссь Польтянь Андрей ды Дема.
— Совак шайтян левкс кудов! — Пижакадсь Андрей. Тюма арась ве бокав. Мельгаст чийсть эщо ломанть, сынст вановсо налксесь мень бути вештнема. Тюманень охота содамс — месть чийнить. Веенстнэ кекшнить, омбонстнэ прянь ванстазь мезе бути вешнить.
Аламо шкань ютазь велесь пешкедсь салдатто. [ 116 ]Чалгаевонь кавто этажсэ кудо прянтень палка вельде пезнавсть якстере флаг.
— Большевики! Сови советэнь власть, машт буржуйтнень!
Ульцясь кувсесь. Якстереармеецтнэ ветить Борцук Верань. Тюма смелчкатсь, чийсь каршост.
— Товарищи! — Пижакадсь.
Вейке якстереармеецэсь пейдезевсь.
— В чем дело?
— Дайте рас ударю.
— Она мои руки поломала, я работником был у него.
Тюма кемкавтово иесэ эщо, русскс кортамояк паро ладсо а машты. Сон кепедизе кедензэ, арьси каямо.
— Не надо... — чаравсь прясонзо красноармеецэсь. Ансяк сыргасть, дубордозь каршост чии Фролань Илькань цёрась — Ванька, сонсь вишкине — винтовкась кочкарязонзо вачкодеви.
— Товарищ якстереармеец, — пижнезь пшкадсь Ванька, — деветь человек поймали.
— Вот ведите эту. — Тулкадизе Веранть.
— Я видел Коляша отсюда спрятался.
— Где, какой Коляша? — кармась кевкстнеме якстереармеецэсь.
— Вот мерян. Айда мон покажу, — Тюма карьсэ шлёпи рудазов кияванть. Якстереармеецтнэ чиить мельганзо.
Кода совасть Коляшанень, тосо кудось ульнесь почаксазь прок левксэв туво гайнанзо сокаризе. Коляшанизэ ды кемкавксово иесэ тейтерест авардсть.
— Где сам?!
[ 117 ]— Неделя как уш нет дома...
— Маншат ватракш сельме! — Авась кирьмицявсь.
— Товарищ, ей богу правдый сегодня видал.
Листь кудостонь.
Якстереармеецтнэ панжизь лавканть, — тосо ульнесть ансяк штепкат.
«Чалгаевонь» ули паронть кандыть прок мекшт. Якстереармеецтнэ совасть нешке пирентень, кинень кода паро саить медь. Мекштнэ авардезь вайгельсэ бизакадсть якшамо вармасонть кельме пизементь ало.
Кудонтень кадовсь ансяк пожарс а палыця горобиясь.
— Часиязо кулось меля, монсь бу лазовлия верень поти сеськенть! — Моткодезь валгсь верьсе этажстонть Оляй баба, конань цёратне те революциянть кисэ путызь пряст. Тюма варштась лангозост, «кавонест братиники» пшкадсь эсь пачканзо. Сон ськамонзо тусь ало пев. Прясонзо якстереармеецэнь шлём, сельмезэнзэ новоли. Лангсонзо салдатской стариной фуфайка, боксонзо мельганзо ускови шашка — сонсь карьсэ ды навазь коцтонь понкссо.
Сон пачкодсь ташто калмазырьтне видьс, Афрычинкань икельде чии Коляша ды Каргин Митя видстэ эйзэнзэ. Тюма таймаскадсь, прок, мерят, эй поколькс кельмесь.
— Товарищ красноармеец, стреляй!
Галятянь кардайстэ лиссь кромой Кузьмань Аляксей. Тюма эзь чаркодть. Аляксей таргизе револьверэнзэ, кавксть ледсь. Коляша Митя марто каявсть вирев.
— Эх, тюря, маштовлидизь ведь. Монгак красноармеец. Мейсь слюнат нолдыть? Адя.
[ 118 ]Алексей Тюма марто тусь Борцук Верань кудос. Кудонть икеле ульнесть аравтозь ламо улавт. Вальмаванть каськасто чамдасть кекшезь сюронть.
Чизэ чопотетсь. Тунь мезеяк а неят, Тюма арась пекензэ лангс Коляшань кустема пес — лекси.
Марясы кашторды.
— Панжодо... — састо кенкш крайганть пшкадсь Коляша.
Чикорк мольсть кенкш петатне. Тюма стясь ды паметьстеме ношкстась сборняв. Вальматне ульнесть пекстнезь, лазксканть цивторды тол. Сон чийсь кустема пентень.
— Кто здесь!
— Я, Тюма.
— Что за Тюма?
— Товарищ Тюма.
Красноармеецэсь кирвайсь зепсэ кантлемка фонарь.
— А, свой. К кому ты?
— Начальнику.
— К комиссару?
— Да.
— Иди.
Тюма пелезь совась сборнянтень. Ульнесь заседания. Комиссарось кежейстэ варштась лангозонзо.
— Это кто?
— Это наш, он числится в штабе, здешний.
— Вот большевик, вот большевик, — пшкадсь Дема.
— Вот этот Коляша домой пришел, домой пришел. — Кармась кортамо Тюма.
[ 119 ]— Вот тот, коната, коната кавнест братиниктнэнь чавсь.
— А... Тот торговец, буржуй, которой убил наших коммунистов.
— Взять!!!
Макссь команда командирэсь. Аляксей таргизе наганонзо, мартонзо тусть якстереармеецт.
— Монгак молян, — мельгаст рангстась Тюма.
— Адя.
Тюма ношкстась мельгаст.
Кенкшенть ваксс мольсть салавине.
— Панжт! — рангстась Аляксей.
— Кие тосо? — пшкадсь тейтересь.
— Панжт теть мерсть!
Коляша таргизе револьверэнзэ, кекшсь кенкш удалов. Кода тейтересь панжизе кудыкилькс кенкшенть, неть колмонест совасть кудонтень.
— Х-х-лоп! Хлоп! — Ледсь Коляша. Аляксей венемсь кияксонтень, пилестэнзэ верень чудирькс тусь.
Коляша ношкстась ушов, но Тюма аштесь стройсэ. Кодак чийсь видезэнзэ, сон апак корта ледизе коняс. Коляша кунст ёртовсь кудыкелев. Тюма пезнавтызэ пекезэнзэ штыкенть ды чиезь тусь сборняв.
— Аляксеень маштызе, — ёвтнесь, кода уш пачкодсь сборнянтень.
— Коляша оргодсь? — кевкстизе Дёма.
— Арась мон... маштыя сонзэ.
— Убил!
— Да, убил он того. Но и нашего тот убил. — [ 120 ]Кармась кортамо Дёма. Андрей ды комиссарось нолдызь пряст.
— Ну ладно, ребята! Теперь село в большевистских руках. Создали волость. Председателем останется Дуняшин. Держите крепко власть. Берегитесь банды. У вас много меньшевиков. Ваш враг Чугунов Федор. Опасайтесь его. Он говорун. Он темную массу поведет туда, куда ему хочется. Итак ребята, боритесь!
Комиссарось свистизе Андреень кеденть, мейле максызе Деманень. Демань сельмсэ налксесь обида. Сон арьсесь ёвтамс горянзо, што пек жаль Аляксей.
— Но ты боец поедешь с нами бить богача! — Пшкадсь комиссарось, кода венстизе кедензэ Тюманень. Тюма кепедизе шлёмонзо ды пейдезь пшкадсь:
— Поеду!
— Едем!
Лиссть сборнястонть. Якстереармеецтнэ пурнавкшность уш куцяс.
— Вот мой будет помошник! Едем, товарищи!
Тюма вачкодизе алашанть, комиссаронть марто рядс ношкстасть икелев, мельгаст тусть остаткатне.
Мельгаст валдомсь валскень зорясь ды багровой якстересэ кирвайсь чи лисема пельксэсь.