Канѡ̑ны, си́рѣчь кни́га пра́вилъ/Пра̑вила пе́рвагѡ вселе́нскагѡ собо́ра
| ←Пра̑вила свѧты́хъ а҆по́стѡлъ | Пра̑вила свѧты́хъ а҆по́столѡвъ, свѧты́хъ собо́рѡвъ вселе́нскихъ и҆ помѣ́стныхъ, и҆ свѧты́хъ ѻ҆те́цъ Пра̑вила свѧта́гѡ вселе́нскагѡ пе́рвагѡ собо́ра, ніке́йскагѡ |
Пра̑вила втора́гѡ вселе́нскагѡ собо́ра→ |
| This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts. |
свѧты́хъ собо́рѡвъ
вселе́нскихъ и҆ помѣ́стныхъ,
и҆ свѧты́хъ ѻ҆те́цъ
Пра̑вила свѧта́гѡ вселе́нскагѡ пе́рвагѡ собо́ра, ніке́йскагѡ.
Пра́вило а҃.
А҆́ще ᲂу҆ когѡ̀ въ болѣ́зни врача́ми ѿѧ́ты чле́ны, и҆лѝ кто̀ ва́рварами ѡ҆скопле́нъ: таковы́й да пребыва́етъ въ кли́рѣ. А҆́ще же, бꙋ́дꙋчи здра́въ, са́мъ себѐ ѡ҆скопи́лъ: такова́го, хотѧ́ бы и҆ къ кли́рꙋ причи́сленъ бы́лъ, надлежи́тъ и҆зключи́ти, и҆ ѿны́нѣ никогѡ̀ и҆з̾ таковы́хъ не до́лжно производи́ти. Но ка́къ ꙗ҆́вно то̀, что̀ сїѐ и҆зрече́но ѡ҆ дѣ́йствꙋющихъ съ намѣ́ренїемъ, и҆ дерза́ющихъ ѡ҆скоплѧ́ти сами́хъ себѐ: та́къ напроти́въ, а҆́ще кото́рые ѡ҆скопле́ны ѿ ва́рварѡвъ, и҆лѝ ѿ госпо́дъ, впро́чемъ же ѡ҆брѧ́щꙋтсѧ досто́йны, таковы́хъ въ кли́ръ допꙋска́етъ пра́вило.
Пра́вило в҃.
Поели́кꙋ, по нꙋ́ждѣ, и҆лѝ по дрꙋги́мъ побꙋжде́нїѧмъ человѣ́кѡвъ, мно́гое произошло̀ не по пра́вилꙋ церко́вномꙋ , та́къ что̀ люде́й, ѿ ꙗ҆зы́ческагѡ житїѧ̀ неда́внѡ пристꙋпи́вшихъ къ вѣ́рѣ, и҆ кра́ткое вре́мѧ ѡ҆глаше́нными бы́вшихъ, вско́рѣ къ дꙋхо́вной кꙋпе́ли приво́дѧтъ, и҆ то́тчасъ по креще́нїи возво́дѧтъ въ є҆пі́скопство, и҆лѝ пресвѵ́терство: посемꙋ̀ за бла́го при́знано, дабы̀ впре́дь ничегѡ̀ такова́гѡ не бы́ло. Поели́кꙋ и҆ ѡ҆глаше́нномꙋ потре́бно вре́мѧ, и҆ по креще́нїи дальнѣ́йшее и҆спыта́нїе. И҆́бо ꙗ҆́сно писа́нїе а҆по́стольское глаго́лющее: не новокреще́нꙋ, да не разгордѣ́всѧ въ сꙋ́дъ впаде́тъ, и҆ въ сѣ́ть дїа́волю. А҆́ще же, въ продолже́нїи вре́мени, дꙋше́вный нѣ́который грѣ́хъ ѡ҆брѣ́тенъ бꙋ́детъ въ нѣ́коемъ лицѣ̀, и҆ бꙋ́детъ ѡ҆бличе́нъ двꙋмѧ̀, и҆лѝ тремѧ̀ свидѣ́телѧми: таковы́й да бꙋ́детъ и҆зключе́нъ и҆з̾ кли́ра. А҆ постꙋпа́ющїй вопрекѝ семꙋ̀, ꙗ҆́кѡ дерза́ющїй сопротивлѧ́тисѧ вели́комꙋ собо́рꙋ, подверга́етъ себѐ ѻ҆па́сности и҆зключе́нїѧ и҆з̾ кли́ра.
Пра́вило г҃.
Вели́кїй собо́ръ без̾ и҆з̾ѧ́тїѧ положи́лъ, что́бы ни є҆пі́скопꙋ, ни пресвѵ́терꙋ, ни дїа́конꙋ, и҆ воѻбщѐ никомꙋ̀ и҆з̾ находѧ́щихсѧ въ кли́рѣ, не бы́ло позво́лено и҆мѣ́ть сожи́тельствꙋющꙋю въ до́мѣ женꙋ̀, ра́звѣ ма́терь, и҆лѝ сестрꙋ̀, и҆лѝ те́ткꙋ, и҆лѝ тѣ̀ то́кмѡ ли́ца, котѡ́рыѧ чꙋ́жды всѧ́кагѡ подозрѣ́нїѧ.
Ка́къ цѣ́ль сегѡ̀ пра́вила є҆́сть пред̾ѡхрани́ть свѧще́нныѧ ли́ца ѿ подозрѣ́нїѧ: то положе́нное въ ѻ҆́номъ запреще́нїе ѿноси́ть до́лжно къ тѣ́мъ пресвѵ́терамъ, дїа́конамъ и҆ ѵ҆подїа́конамъ, кото́рые не и҆мѣ́ютъ же́нъ: и҆́бо присꙋ́тствїе жены̀ при мꙋ́жѣ ѿстранѧ́етъ подозрѣ́нїе ѿ живꙋ́щагѡ при женѣ̀ дрꙋга́гѡ же́нскагѡ лица̀.
Пра́вило д҃.
Е҆пі́скопа поставлѧ́ти наибо́лѣе прили́чно всѣ́мъ тоѧ̀ ѻ҆́бласти є҆пі́скопамъ. А҆́ще же сїѐ неꙋдо́бно, и҆лѝ по належа́щей нꙋ́ждѣ, и҆лѝ по да́льности пꙋтѝ: по кра́йней мѣ́рѣ трѝ во є҆ди́но мѣ́сто да соберꙋ́тсѧ, а҆ ѿсꙋ́тствꙋющїе да и҆з̾ѧвѧ́тъ согла́сїе посре́дствомъ гра́матъ: и҆ тогда̀ соверша́ти рꙋкоположе́нїе. Оу҆твержда́ти же таковы̑ѧ дѣ́йствїѧ въ ка́ждой ѻ҆́бласти подоба́етъ є҆ѧ̀ митрополі́тꙋ.
Пра́вило є҃.
Ѡ҆ тѣ́хъ, кото́рыхъ є҆пі́скопы, по ка́ждой є҆па́рхїи, ᲂу҆дали́ли ѿ ѡ҆бще́нїѧ церко́внагѡ, принадлежа́тъ ли ѻ҆нѝ къ кли́рꙋ, и҆лѝ къ разрѧ́дꙋ мїрѧ́нъ, до́лжно въ сꙋжде́нїи держа́тьсѧ пра́вила, кото́рымъ постано́влено, что́бы ѿлꙋче́нные ѻ҆дни́ми, не бы́ли прїе́млемы дрꙋги́ми. Впро́чемъ да бꙋ́детъ и҆зслѣ́дываемо, не по малодꙋ́шїю ли, и҆лѝ ра́спрѣ, и҆лѝ по како́мꙋ либо подо́бномꙋ неꙋдово́льствїю є҆пі́скопа, подпа́ли ѻ҆нѝ ѿлꙋче́нїю. И҆ та́къ, дабы̀ ѡ҆ се́мъ происходи́ти могло̀ прили́чное и҆зслѣ́дованїе, за бла́го при́знано, что́бы въ ка́ждой ѻ҆́бласти два́жды въ го́дъ бы́ли собо́ры: что́бы всѣ̀ воѻбщѐ є҆пі́скопы ѻ҆́бласти, собра́вшисѧ во є҆ди́но, и҆зслѣ́дывали таковы̑ѧ недоꙋмѣ́нїѧ: и҆ таки́мъ ѻ҆́бразомъ достовѣ́рнѡ ѡ҆каза́вшїесѧ несправедли́выми проти́въ є҆пі́скопа, ѡ҆снова́тельнѡ всѣ́ми при́знаны бы́ли недосто́йными ѡ҆бще́нїѧ, доко́лѣ не заблагоразсꙋ́дитъ собра́нїе є҆пі́скопѡвъ произнестѝ ѡ҆ ни́хъ бо́лѣе снисходи́тельное рѣше́нїе. Собо́ры же да быва́ютъ, є҆ди́нъ пред̾ четыредесѧ́тницею, да по прекраще́нїи всѧ́кагѡ неꙋдово́льствїѧ, чи́стый да́ръ прино́ситсѧ бг҃ꙋ: а҆ дрꙋгі́й ѻ҆́колѡ ѻ҆се́ннѧгѡ вре́мени.
Пра́вило ѕ҃.
Да хранѧ́тсѧ дре́внїе ѻ҆бы́чаи, принѧ́тые въ є҆гѵ́птѣ, и҆ въ лі́вѷи, и҆ въ пентапо́лѣ, дабы̀ а҆леѯандрі́йскїй є҆пі́скопъ и҆мѣ́лъ вла́сть над̾ всѣ́ми си́ми. Поне́же и҆ ри́мскомꙋ є҆пі́скопꙋ сїѐ ѻ҆бы́чно. Подо́бнѡ и҆ въ а҆нтїохі́и, и҆ въ и҆ны́хъ ѻ҆бластѧ́хъ да сохранѧ́ютсѧ преимꙋ́щєства цр҃кве́й. Воѻбще́ же да бꙋ́детъ и҆звѣ́стно сїѐ: а҆́ще кто̀, без̾ соизволе́нїѧ митрополі́та, поста́вленъ бꙋ́детъ є҆пі́скопомъ: ѡ҆ таково́мъ вели́кїй собо́ръ ѡ҆предѣли́лъ, что̀ ѻ҆́нъ не до́лженъ бы́ти є҆пі́скопомъ. А҆́ще же ѻ҆́бщее всѣ́хъ и҆збра́нїе бꙋ́детъ благосло́вно, и҆ согла́сно съ пра́виломъ церко́внымъ: но два̀ и҆лѝ трѝ, по со́бственномꙋ любопрѣ́нїю, бꙋ́дꙋтъ ѻ҆́номꙋ прекосло́вити: да превозмога́етъ мнѣ́нїе бо́льшагѡ числа̀ и҆збира́ющихъ.
Пра́вило з҃.
Поне́же ᲂу҆тверди́сѧ ѻ҆быкнове́нїе, и҆ дре́внее преда́нїе, что́бы чти́ти є҆пі́скопа, пребыва́ющаго въ є҆́лїи: то да и҆мѣ́етъ ѻ҆́нъ послѣ́дованїе че́сти, съ сохране́нїемъ досто́инства, присво́еннагѡ митропо́лїи.
Пра́вило и҃.
Ѡ҆ и҆менова́вшихъ нѣ́когда сами́хъ себѐ чи́стыми, но присоединѧ́ющихсѧ къ каѳолі́ческой и҆ а҆по́стольской цр҃кви, благоꙋго́дно ст҃о́мꙋ и҆ вели́комꙋ собо́рꙋ, да, по возложе́нїи на ни́хъ рꙋ́къ, пребыва́ютъ ѻ҆нѝ въ кли́рѣ. Пре́жде же всегѡ̀ надлежи́тъ и҆̀мъ пи́сьменнѡ и҆сповѣ́дати, ꙗ҆́кѡ прилѣпѧ́тсѧ и҆ послѣ́довати бꙋ́дꙋтъ ѡ҆предѣле́нїѧмъ каѳолі́ческїѧ и҆ а҆по́стольскїѧ цр҃кви, то́ є҆сть, бꙋ́дꙋтъ въ ѡ҆бще́нїи церко́вномъ и҆ съ двоеже́нцами, и҆ съ па́дшими во вре́мѧ гоне́нїѧ, длѧ кото́рыхъ и҆ вре́мѧ покаѧ́нїѧ ᲂу҆ста́влено, и҆ сро́къ проще́нїѧ назна́ченъ. На́добно, что́бы ѻ҆нѝ во все́мъ послѣ́довали ѡ҆предѣле́нїѧмъ каѳолі́ческїѧ цр҃кви. И҆ та́къ гдѣ̀, и҆лѝ въ се́лахъ, и҆лѝ во града́хъ, всѣ̀, ѡ҆брѣта́ющїесѧ въ кли́рѣ, ѡ҆ка́жꙋтсѧ рꙋкоположе́нными и҆з̾ ни́хъ ѻ҆дни́хъ: да бꙋ́дꙋтъ въ то́мъ же чи́нѣ. А҆́ще же та́мъ, гдѣ̀ є҆́сть є҆пі́скопъ каѳолі́ческїѧ цр҃кви, нѣ́которые и҆з̾ ни́хъ пристꙋ́пѧтъ къ цр҃кви: ꙗ҆́вно є҆́сть, ꙗ҆́кѡ є҆пі́скопъ правосла́вныѧ цр҃кви бꙋ́детъ и҆мѣ́ти є҆пі́скопское досто́инство: а҆ и҆менꙋ́ющїйсѧ є҆пі́скопомъ ᲂу҆ та́къ называ́емыхъ чи́стыхъ, пресвѵ́терскꙋю че́сть и҆мѣ́ти бꙋ́детъ: ра́звѣ заблагоразсꙋ́дитъ мѣ́стный є҆пі́скопъ, что́бы и҆ то́тъ ᲂу҆ча́ствовалъ въ че́сти и҆́мени є҆пі́скопа. А҆́ще же то̀ є҆мꙋ̀ не ᲂу҆го́дно бꙋ́детъ: то длѧ ви́димагѡ сопричисле́нїѧ такова́гѡ къ кли́рꙋ, и҆зѡбрѣте́тъ длѧ негѡ̀ мѣ́сто и҆лѝ хѡрепі́скопа, и҆лѝ пресвѵ́тера: да не бꙋ́детъ двꙋ́хъ є҆пі́скопѡвъ во гра́дѣ.
Чи́стыми называ́ли себѧ̀ є҆ретїкѝ, послѣ́дователи нова́та, ри́мской цр҃кви пресвѵ́тера, кото́рый ᲂу҆чи́лъ, па́дшихъ во вре́мѧ гоне́нїѧ не принима́ть на покаѧ́нїе, и҆ двоеже́нцєвъ никогда̀ не принима́ть въ ѡ҆бще́нїе церко́вное, и҆ въ си́хъ го́рдыхъ и҆ не человѣколюби́выхъ сꙋжде́нїѧхъ полага́лъ чистотꙋ̀ своегѡ̀ ѻ҆́бщества.
Пра́вило ѳ҃.
А҆́ще нѣ́которые без̾ и҆спыта́нїѧ произведены̀ въ пресвѵ́теры, и҆лѝ хотѧ̀ при и҆спыта́нїи и҆сповѣ́дали своѝ грѣхѝ, но, по́слѣ и҆́хъ и҆сповѣ́данїѧ, противꙋ̀ пра́вила подви́глись человѣ́ки, и҆ возложи́ли на ни́хъ рꙋ́ки: таковы́хъ пра́вило не допꙋска́етъ до свѧщеннослꙋже́нїѧ. И҆́бо каѳолі́ческаѧ це́рковь непремѣ́ннѡ тре́бꙋетъ непоро́чности.
Пра́вило і҃.
А҆́ще кото́рые и҆з̾ на́шихъ произведены̀ въ кли́ръ, по невѣ́дѣнїю, и҆лѝ со свѣ́дѣнїемъ произве́дшихъ: сїѐ не ѡ҆слаблѧ́етъ си́лы пра́вила церко́внагѡ. И҆́бо таковы́е, по дозна́нїи, и҆зверга́ютсѧ ѿ свѧще́ннагѡ чи́на.
Пра́вило а҃і.
Ѡ҆б̾ ѿстꙋпи́вшихъ ѿ вѣ́ры, не по принꙋжде́нїю, и҆лѝ не по причи́нѣ ѿѧ́тїѧ и҆мѣ́нїй, и҆лѝ ѻ҆па́сности, и҆лѝ чегѡ́ либо подо́бнагѡ, ка́къ то̀ слꙋчи́лось въ мꙋчи́тельство лїкі́нїево, собо́ръ ѡ҆предѣли́лъ ꙗ҆влѧ́ти ми́лость и҆̀мъ, а҆́ще и҆ не сꙋ́ть досто́йны человѣколю́бїѧ. Кото́рые ᲂу҆̀бо и҆́стиннѡ пока́ютсѧ: тѣ̀ трѝ лѣ́та проведꙋ́тъ междꙋ̀ слꙋ́шающими чте́нїе писа́нїй, ꙗ҆́кѡ вѣ́рные: и҆ се́дмь лѣ́тъ да припа́даютъ въ це́ркви, просѧ̀ проще́нїѧ: два́ же лѣ́та бꙋ́дꙋтъ ᲂу҆ча́ствовать съ наро́домъ въ моли́твахъ, кромѣ̀ причаще́нїѧ свѧты́хъ та̑инъ.
Пра́вило в҃і.
Благода́тїю при́званные къ и҆сповѣ́данїю вѣ́ры, и҆ пе́рвый поры́въ ре́вности ꙗ҆ви́вшїе, и҆ ѿложи́вшїе вои́нскїе по́ѧсы, но пото́мъ, а҆́ки псы̀, на свою̀ блево́тинꙋ возврати́вшїесѧ, та́къ что̀ нѣ́которые и҆ сребро̀ ᲂу҆потреблѧ́ли, и҆ посре́дствомъ дарѡ́въ дости́гли возстановле́нїѧ въ вои́нскїй чи́нъ: таковы́е де́сѧть лѣ́тъ да припа́даютъ въ цр҃кви, просѧ̀ проще́нїѧ, по трилѣ́тномъ вре́мени слꙋ́шанїѧ писа́нїй въ притво́рѣ. Во всѣ́хъ же си́хъ надлежи́тъ прїима́ти въ разсꙋжде́нїе расположе́нїе, и҆ ѻ҆́бразъ покаѧ́нїѧ. И҆́бо кото́рые, со стра́хомъ, и҆ слеза́ми, и҆ терпѣ́нїемъ, и҆ благотворе́нїѧми, ѡ҆браще́нїе ꙗ҆влѧ́ютъ дѣ́ломъ, а҆ не по нарꙋ́жности: тѣ́хъ, по и҆сполне́нїи ѡ҆предѣле́ннагѡ вре́мени слꙋ́шанїѧ, прили́чно бꙋ́детъ прїима́ти въ ѡ҆бще́нїе моли́твъ. Да́же позволи́тельно є҆пі́скопꙋ и҆ человѣколю́бнѣе нѣ́что ѡ҆ ни́хъ ᲂу҆стро́ити. А҆ кото́рые равнодꙋ́шнѡ понеслѝ своѐ грѣхопаде́нїе, и҆ ви́дъ вхожде́нїѧ въ це́рковь возмни́ли длѧ себѧ̀ дово́льнымъ ко ѡ҆браще́нїю: тѣ̀ всецѣ́лѡ да и҆сполнѧ́ютъ вре́мѧ покаѧ́нїѧ.
Пра́вило г҃і.
Ѡ҆ находѧ́щихсѧ же при и҆схо́дѣ ѿ житїѧ̀, да соблюда́етсѧ и҆ ны́нѣ дре́внїй зако́нъ и҆ пра́вило, что́бы ѿходѧ́щїй не лиша́емь бы́лъ послѣ́днѧгѡ и҆ нꙋжнѣ́йшагѡ напꙋ́тствїѧ. А҆́ще же, бы́въ ѿча́ѧнъ въ жи́зни и҆ сподо́бленъ причаще́нїѧ, па́ки къ жи́зни возврати́тсѧ: да бꙋ́детъ междꙋ̀ ᲂу҆ча́ствꙋющими въ моли́твѣ то́кмѡ. Воѻбщѐ всѧ́комꙋ ѿходѧ́щемꙋ, кто́ бы ни бы́лъ, просѧ́щемꙋ причасти́тисѧ є҆ѵхарі́стїи, со и҆спыта́нїемъ є҆пі́скопа, да преподаю́тсѧ свѧты́е да́ры.
Пра́вило д҃і.
Ѿноси́тельнѡ ѡ҆глаше́нныхъ и҆ ѿпа́дшихъ, ᲂу҆го́дно свѧто́мꙋ и҆ вели́комꙋ собо́рꙋ, что́бы ѻ҆нѝ трѝ го́да то́кмѡ бы́ли междꙋ̀ слꙋ́шающими писа́нїѧ, а҆ пото́мъ моли́лись съ ѡ҆глаше́нными.
Пра́вило є҃і.
По причи́нѣ мно́гихъ смѧте́нїй и҆ происходѧ́щихъ неꙋстро́йствъ, заблагоразсꙋждено̀ соверше́ннѡ прекрати́ти ѻ҆бы́чай, вопрекѝ а҆по́стольскомꙋ пра́вилꙋ ѡ҆брѣ́тшїйсѧ въ нѣ́которыхъ мѣста́хъ: дабы̀ и҆з̾ гра́да во гра́дъ не преходи́лъ ни є҆пі́скопъ, ни пресвѵ́теръ, ни дїа́конъ. А҆́ще же кто̀, по се́мъ ѡ҆предѣле́нїи свѧта́гѡ и҆ вели́кагѡ собо́ра, таково́е что́ либо предпрїи́метъ, и҆лѝ допꙋ́ститъ сдѣ́лать съ собо́ю таково́е дѣ́ло: распорѧже́нїе да бꙋ́детъ соверше́ннѡ недѣйстви́тельно, и҆ переше́дшїй да бꙋ́детъ возвраще́нъ въ це́рковь, къ кото́рой рꙋкоположе́нъ во є҆пі́скопа, и҆лѝ пресвѵ́тера, и҆лѝ дїа́кона.
Пра́вило ѕ҃і.
А҆́ще кото́рые пресвѵ́теры, и҆лѝ дїа́коны, и҆лѝ воѻбщѐ къ кли́рꙋ причи́сленные, ѡ҆проме́тчивѡ и҆ стра́ха бж҃їѧ пред̾ ѻ҆ча́ми не и҆мѣ́ѧ, и҆ церко́внагѡ пра́вила не зна́ѧ, ᲂу҆далѧ́тсѧ ѿ со́бственной це́ркви: таковы́е ѿню́дь не должны̀ бы́ти прїе́млемы въ дрꙋго́й це́ркви: и҆ надлежи́тъ всѧ́кое понꙋжде́нїе проти́вꙋ и҆́хъ ᲂу҆потреби́ти, да возвратѧ́тсѧ въ своѝ прихо́ды: и҆лѝ, а҆́ще ѡ҆ста́нꙋтсѧ ᲂу҆по́рными, подоба́етъ и҆̀мъ чꙋ́ждымъ бы́ти ѡ҆бще́нїѧ. Та́кожде, а҆́ще кто̀ дерзне́тъ принадлежа́щаго вѣ́домствꙋ дрꙋга́гѡ восхи́тити, и҆ въ свое́й це́ркви рꙋкоположи́ти, без̾ согла́сїѧ со́бственнагѡ є҆пі́скопа, ѿ кото́рагѡ ᲂу҆клони́лсѧ причи́сленный къ кли́рꙋ: недѣйстви́тельно да бꙋ́детъ рꙋкоположе́нїе.
Пра́вило з҃і.
Поне́же мно́гїе причи́сленные къ кли́рꙋ, любостѧжа́нїю и҆ лихои́мствꙋ послѣ́дꙋѧ, забы́ли бж҃е́ственное писа́нїе, глаго́лющее: сребра̀ своегѡ̀ не дадѐ въ ли́хвꙋ: и҆, дава́ѧ въ до́лгъ, тре́бꙋютъ со́тыхъ, сꙋди́лъ свѧты́й и҆ вели́кїй собо́ръ, что́бы, а҆́ще кто̀, по́слѣ сегѡ̀ ѡ҆предѣле́нїѧ, ѡ҆брѧ́щетсѧ взима́ющїй ро́стъ съ да́ннагѡ въ зае́мъ, и҆лѝ и҆но́й ѡ҆боро́тъ даю́щїй семꙋ̀ дѣ́лꙋ, и҆лѝ полови́ннагѡ ро́ста тре́бꙋющїй, и҆лѝ нѣ́что и҆но́е вымышлѧ́ющїй ра́ди посты́дной коры́сти, таковы́й бы́лъ и҆зверга́емъ и҆з̾ кли́ра, и҆ чꙋ́ждъ дꙋхо́внагѡ сосло́вїѧ.
Пра́вило и҃і.
Дошло̀ до свѧта́гѡ и҆ вели́кагѡ собо́ра, что̀ въ нѣ́которыхъ мѣста́хъ и҆ гра́дахъ дїа́коны преподаю́тъ пресвѵ́терамъ є҆ѵхарі́стїю, тогда̀ ка́къ ни пра́виломъ, ни ѻ҆бы́чаемъ не пре́дано, что́бы не и҆мѣ́ющїе вла́сти приноси́ти, преподава́ли приносѧ́щымъ тѣ́ло хрⷭ҇то́во. Та́кже и҆ то̀ содѣ́лалось и҆звѣ́стнымъ, что̀ да́же нѣ́которые и҆з̾ дїа́конѡвъ, и҆ пре́жде є҆пі́скопѡвъ, є҆ѵхарі́стїи прикаса́ютсѧ. Сїѐ ᲂу҆́бѡ всѐ да пресѣче́тсѧ: и҆ дїа́коны да пребыва́ютъ въ свое́й мѣ́рѣ, зна́ѧ, что̀ ѻ҆нѝ сꙋ́ть слꙋжи́тели є҆пі́скопа, и҆ ни́зшїе пресвѵ́терѡвъ. Да прїе́млютъ же є҆ѵхарі́стїю по порѧ́дкꙋ по́слѣ пресвѵ́терѡвъ, преподава́емꙋю и҆̀мъ є҆пі́скопомъ, и҆лѝ пресвѵ́теромъ. Но нижѐ сидѣ́ти посредѣ̀ пресвѵ́терѡвъ позво́лено дїа́конамъ. И҆́бо то̀ быва́етъ не по пра́вилꙋ, и҆ не въ порѧ́дкѣ. А҆́ще же кто̀, и҆ по́слѣ сегѡ̀ ѡ҆предѣле́нїѧ, не хо́щетъ послꙋ́шенъ бы́ти: да прекрати́тсѧ є҆гѡ̀ дїа́конство.
Пра́вило ѳ҃і.
Ѡ҆ бы́вшихъ паѵлїа́нами, но пото́мъ прибѣ́гнꙋвшихъ къ каѳолі́ческой цр҃кви, постановлѧ́етсѧ ѡ҆предѣле́нїе, что́бы ѻ҆нѝ всѣ̀ воѻбщѐ вно́вь крести́мы бы́ли. А҆́ще же кото́рые въ пре́жнее вре́мѧ къ кли́рꙋ принадлежа́ли: таковы́е, ꙗ҆вѧ́сь безпоро́чными и҆ неꙋкори́зненными, по перекреще́нїи, да бꙋ́дꙋтъ рꙋкоположе́ни є҆пі́скопомъ каѳолі́ческїѧ це́ркви. А҆́ще же и҆спыта́нїе ѡ҆брѧ́щетъ и҆̀хъ неспосо́бнымикъ свѧще́нствꙋ: надлежи́тъ и҆̀мъ и҆зве́ржєннымъ бы́ти и҆з̾ свѧще́ннагѡ чи́на. Подо́бнѡ и҆ въ ѿноше́нїи къ дїаконі́ссамъ, и҆ ко всѣ́мъ воѻбщѐ причи́слєннымъ къ кли́рꙋ, то́тъ же ѻ҆́бразъ дѣ́йствованїѧ да соблюда́етсѧ. Ѡ҆ дїаконі́ссахъ же мы̀ ᲂу҆помѧнꙋ́ли ѡ҆ тѣ́хъ, кото́рыѧ, по ѡ҆дѣѧ́нїю, за таковы́хъ прїе́млютсѧ. И҆́бо впро́чемъ ѻ҆нѣ̀ никако́гѡ рꙋкоположе́нїѧ не и҆мѣ́ютъ, та́къ что̀ мо́гꙋтъ соверше́ннѡ счислѧ́емы бы́ти съ мїрѧ́нами.
Пра́вило к҃.
Поне́же сꙋ́ть нѣ́которые преклонѧ́ющїе колѣ̑на въ де́нь гдⷭ҇нь, и҆ во днѝ пѧтидесѧ́тницы: то̀, дабы̀ во всѣ́хъ є҆па́рхїѧхъ всѐ ѻ҆дина́ковѡ соблюда́емо бы́ло, ᲂу҆го́дно свѧто́мꙋ собо́рꙋ, да стоѧ́ще прино́сѧтъ моли̑твы бг҃ꙋ.