Канѡ̑ны, си́рѣчь кни́га пра́вилъ/Пра̑вила свѧты́хъ а҆по́стѡлъ

From Wikisource
Jump to navigation Jump to search
Пра̑вила свѧты́хъ а҆по́столѡвъ, свѧты́хъ собо́рѡвъ вселе́нскихъ и҆ помѣ́стныхъ, и҆ свѧты́хъ ѻ҆те́цъ
Пра̑вила свѧты́хъ а҆по́стѡлъ
This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.


Кни́га пра́вилъ свѧты́хъ а҆по́столѡвъ,
свѧты́хъ собо́рѡвъ
вселе́нскихъ и҆ помѣ́стныхъ,
и҆ свѧты́хъ ѻ҆те́цъ

Пра̑вила свѧты́хъ а҆по́стѡлъ
[edit]

Пра́вило а҃.
[edit]

Е҆пі́скопа да поставлѧ́ютъ два̀ и҆лѝ трѝ є҆пі́скопа.

Пра́вило в҃.
[edit]

Пресвѵ́тера и҆ дїа́кона и҆ про́чихъ приче́тникѡвъ да поставлѧ́етъ є҆ди́нъ є҆пі́скопъ.

Пра́вило г҃.
[edit]

А҆́ще кто̀, є҆пі́скопъ, и҆лѝ пресвѵ́теръ, вопрекѝ ᲂу҆чрежде́нїю гдⷭ҇ню ѡ҆ же́ртвѣ, принесе́тъ къ ѻ҆лтарю̀ и҆ны́ѧ нѣ́котѡрыѧ вє́щи, и҆лѝ ме́дъ, и҆лѝ млеко̀, и҆лѝ вмѣ́стѡ вїна̀, пригото́вленный и҆з̾ чегѡ́ либо дрꙋга́гѡ напи́токъ, и҆лѝ пти̑цы, и҆лѝ нѣ́котѡрыѧ живѡ́тныѧ, и҆лѝ ѻ҆́вощи, вопрекѝ ᲂу҆чрежде́нїю, кромѣ̀ но́выхъ кла́сѡвъ, и҆лѝ вїногра́да въ надлежа́щее вре́мѧ: да бꙋ́детъ и҆зве́рженъ ѿ сщ҃е́ннагѡ чи́на. Да не бꙋ́детъ же позво́лено приноси́ти къ ѻ҆лтарю̀ что́ либо и҆но́е, ра́звѣ є҆ле́й длѧ лампа́ды и҆ ѳѷмїа́мъ, во вре́мѧ ст҃а́гѡ приноше́нїѧ.

Пра́вило д҃.
[edit]

Всѧ́кагѡ и҆на́гѡ плода̀ нача́тки да посыла́ютсѧ въ до́мъ є҆пі́скопꙋ и҆ пресвѵ́терамъ, но не ко ѻ҆лтарю̀. Разꙋмѣ́етсѧ же, ꙗ҆́кѡ є҆пі́скопъ и҆ пресвѵ́теры раздѣ́лѧтъ съ дїа́конами и҆ про́чими приче́тниками.

Пра́вило є҃.
[edit]

Е҆пі́скопъ, и҆лѝ пресвѵ́теръ, и҆лѝ дїа́конъ, да не и҆зго́нитъ жены̀ своеѧ̀ под̾ ви́домъ благоговѣ́нїѧ. А҆́ще же и҆зго́нитъ, да бꙋ́детъ ѿлꙋче́нъ ѿ ѻ҆бще́нїѧ церко́внагѡ: а҆ ѡ҆става́ѧсь непрекло́ннымъ, да бꙋ́детъ и҆зве́рженъ ѿ сщ҃е́ннагѡ чи́на.

Толкова́нїе. И҆згна́нїе жены̀ запреща́етсѧ свѧщє́ннымъ ли́цамъ потомꙋ̀, ка́къ и҆з̾ѧснѧ́етъ зѡна́ръ, что̀ сїѐ каза́лось бы ѡ҆хꙋжде́нїемъ сꙋпрꙋ́жества. Впро́чемъ воздержа́нїе є҆пі́скопѡвъ ѿ сꙋпрꙋ́жества є҆́сть дре́внее преда́нїе, ѿ кото́рагѡ ѿстꙋпле́нїе шесты́й вселе́нскїй собо́ръ замѣ́тилъ то́лькѡ въ нѣ́которыхъ а҆фрїка́нскихъ цр҃квахъ, и҆ то́тчасъ запрети́лъ свои́мъ пра́виломъ в҃і.

Пра́вило ѕ҃.
[edit]

Е҆пі́скопъ, и҆лѝ пресвѵ́теръ, и҆лѝ дїа́конъ, да не прїе́млетъ на себѧ̀ мїрски́хъ попече́нїй. А҆ и҆на́че да бꙋ́детъ и҆зве́рженъ ѿ сщ҃е́ннагѡ чи́на.

Пра́вило з҃.
[edit]

А҆́ще кто̀, є҆пі́скопъ, и҆лѝ пресвѵ́теръ, и҆лѝ дїа́конъ ст҃ы́й де́нь па́схи пре́жде весе́ннѧгѡ равноде́нствїѧ съ і҆ꙋде́ѧми пра́здновати бꙋ́детъ: да бꙋ́детъ и҆зве́рженъ ѿ сщ҃е́ннагѡ чи́на.

Пра́вило и҃.
[edit]

А҆́ще є҆пі́скопъ, и҆лѝ пресвѵ́теръ, и҆лѝ дїа́конъ, и҆лѝ кто́ либо и҆з̾ сщ҃е́ннагѡ спи́ска, при соверше́нїи приноше́нїѧ, не причасти́тсѧ: да предста́витъ причи́нꙋ, и҆ а҆́ще є҆́сть благосло́вна, да бꙋ́детъ и҆звине́нъ. А҆́ще же не предста́витъ: да бꙋ́детъ ѿлꙋче́нъ ѿ ѻ҆бще́нїѧ церко́внагѡ, ꙗ҆́кѡ содѣ́лавшїйсѧ вино́ю вре́да наро́дꙋ, и҆ на соверша́вшаго приноше́нїе наве́дшїй подозрѣ́нїе. а҆́кибы непра́вильнѡ соверша́лъ.

Пра́вило ѳ҃.
[edit]

Всѣ́хъ вѣ́рныхъ входѧ́щихъ въ цр҃ковь, и҆ писа̑нїѧ слꙋ́шающихъ, но не пребыва́ющихъ на моли́твѣ и҆ ст҃о́мъ причаще́нїи до конца̀, ꙗ҆́кѡ безчи́нїе въ цр҃кви производѧ́щихъ, ѿлꙋча́ти подоба́етъ ѿ ѻ҆бще́нїѧ церко́внагѡ.

Пра́вило і҃.
[edit]

А҆́ще кто̀ съ ѿлꙋче́ннымъ ѿ ѻ҆бще́нїѧ церко́внагѡ помо́литсѧ, хотѧ́ бы то̀ бы́ло въ до́мѣ: таковы́й да бꙋ́детъ ѿлꙋче́нъ.

Пра́вило а҃і.
[edit]

А҆́ще кто̀, принадлежа̀ къ кли́рꙋ, съ и҆зве́рженнымъ ѿ кли́ра моли́тисѧ бꙋ́детъ: да бꙋ́детъ и҆зве́рженъ и҆ са́мъ.

Пра́вило в҃і.
[edit]

А҆́ще кто̀ и҆з̾ кли́ра, и҆лѝ мїрѧни́нъ ѿлꙋче́нный ѿ ѻ҆бще́нїѧ церко́внагѡ, и҆лѝ недосто́йный прїѧ́тїѧ въ кли́ръ, ѿше́дъ, въ и҆но́мъ гра́дѣ при́нѧтъ бꙋ́детъ без̾ представи́тельной гра́маты: да бꙋ́детъ ѿлꙋче́нъ и҆ прїѧ́вшїй и҆ прїѧ́тый.

Пра́вило г҃і.
[edit]

А҆́ще же бꙋ́детъ ѿлꙋче́нный: да продолжи́тсѧ є҆мꙋ̀ ѿлꙋче́нїе, ꙗ҆́кѡ солга́вшемꙋ и҆ ѡ҆бманꙋ́вшемꙋ цр҃ковь бж҃їю.

Пра́вило д҃і.
[edit]

Не позволи́тельно є҆пі́скопꙋ ѡ҆ставлѧ́ти свою̀ є҆па́рхїю и҆ во и҆нꙋ́ю преходи́ти, а҆́ще бы и҆ ѿ мно́гихъ ᲂу҆бѣжда́емь бы́лъ, ра́звѣ когда̀ бꙋ́детъ нѣ́котораѧ вина̀ благосло́внаѧ, сїѐ твори́ти є҆го̀ понꙋжда́ющаѧ, ꙗ҆́кѡ могꙋ́щаго бо́льшꙋю по́льзꙋ ѡ҆бита́ющымъ та́мѡ принестѝ сло́вомъ бл҃гоче́стїѧ. И҆ сїѐ не по своемꙋ̀ произво́лꙋ, но по сꙋдꙋ̀ мно́гихъ є҆пі́скопѡвъ и҆ по сильнѣ́йшемꙋ ᲂу҆бѣжде́нїю.

Пра́вило є҃і.
[edit]

А҆́ще кто̀ пресвѵ́теръ, и҆лѝ дїа́конъ, и҆лѝ воѻбщѐ находѧ́щїйсѧ въ спи́скѣ кли́ра, ѡ҆ста́вивъ сво́й предѣ́лъ, во и҆ны́й ѿи́детъ, и҆ совсѣ́мъ премѣстѧ́сѧ, въ дрꙋго́мъ жи́ти бꙋ́детъ без̾ во́ли є҆пі́скопа своегѡ̀: таково́мꙋ повелѣва́емъ не слꙋжи́ти бо́лѣе, и҆ наипа́че, а҆́ще своегѡ̀ є҆пі́скопа, призыва́ющагѡ є҆го̀ къ возвраще́нїю, не послꙋ́шалъ. А҆́ще же ѡ҆ста́нетсѧ въ се́мъ безчи́нїи: та́мѡ, ꙗ҆́кѡ мїрѧни́нъ, въ ѻ҆бще́нїи да бꙋ́детъ.

Пра́вило ѕ҃і.
[edit]

А҆́ще же є҆пі́скопъ, ᲂу҆ кото́рагѡ такѡвы́мъ бы́ти слꙋчи́тсѧ, въ ничто̀ вмѣни́въ ѡ҆предѣле́нное и҆̀мъ запреще́нїе слꙋже́нїѧ, прїи́метъ и҆̀хъ ꙗ҆́кѡ чле́нѡвъ кли́ра: да бꙋ́детъ ѿлꙋче́нъ, ꙗ҆́кѡ ᲂу҆чи́тель безчи́нїѧ.

Пра́вило з҃і.
[edit]

Кто̀ по ст҃о́мъ креще́нїи двꙋмѧ̀ бра́ками ѡ҆бѧ́занъ бы́лъ, и҆лѝ нало́жницꙋ и҆мѣ́лъ, то́тъ не мо́жетъ бы́ти є҆пі́скопъ, ни пресвѵ́теръ, ни дїа́конъ, нижѐ воѻбщѐ въ спи́скѣ сщ҃е́ннагѡ чи́на.

Пра́вило и҃і.
[edit]

Взе́мшїй въ сꙋпрꙋ́жество вдовꙋ̀, и҆лѝ ѿве́рженнꙋю ѿ сꙋпрꙋ́жества, и҆лѝ блꙋдни́цꙋ, и҆лѝ рабы́ню, и҆лѝ позо́рищнꙋю, не мо́жетъ бы́ти є҆пі́скопъ, ни пресвѵ́теръ, ни дїа́конъ, нижѐ воѻбщѐ въ спи́скѣ сщ҃е́ннагѡ чи́на.

Пра́вило ѳ҃і.
[edit]

И҆мѣ́вшїй въ сꙋпрꙋ́жествѣ двꙋ́хъ се́стръ, и҆лѝ племѧ́нницꙋ, не мо́жетъ бы́ти въ кли́рѣ.Сїѐ а҆по́стольское пра́вило постано́влено длѧ тѣ́хъ, кото́рые, въ таково́е сꙋпрꙋ́жество встꙋпи́въ є҆щѐ въ ꙗ҆зы́чествѣ, ѡ҆става́лись въ се́мъ незако́нномъ сожи́тїи нѣ́которое вре́мѧ и҆ по́слѣ креще́нїѧ. А҆ кото́рые по креще́нїи не ѡ҆става́лись бо́лѣе въ тако́мъ сꙋпрꙋ́жескомъ сожи́тїи: тѣ̀ по є҃ пра́вилꙋ св. ѳео́фїла а҆леѯандрі́йскагѡ мо́гꙋтъ бы́ть терпи́мы въ кли́рѣ: потомꙋ́ что грѣ́хъ ꙗ҆зы́ческагѡ житїѧ̀ ѡ҆чище́нъ ст҃ы́мъ креще́нїемъ.

Пра́вило к҃.
[edit]

Кто̀ и҆з̾ кли́ра да́стъ себѧ̀ порꙋ́кою за кого́ либо, да бꙋ́детъ и҆зве́рженъ.

Пра́вило к҃а.
[edit]

Скопе́цъ, а҆́ще ѿ человѣ́ческагѡ наси́лїѧ таковы́мъ содѣ́ланъ, и҆лѝ въ гоне́нїи мꙋ́жескихъ чле́нѡвъ лише́нъ, и҆лѝ та́кѡ рожде́нъ, и҆ а҆́ще досто́инъ, да бꙋ́детъ є҆пі́скопъ.

Пра́вило к҃в.
[edit]

Са́мъ себѐ скопи́вшїй, да не бꙋ́детъ при́нѧтъ въ кли́ръ. Самоꙋбі́йца бо є҆́сть, и҆ вра́гъ бж҃їѧ созда́нїѧ.

Пра́вило к҃г.
[edit]

А҆́ще кто̀ ѿ кли́ра скопи́тъ себѐ самаго̀: да бꙋ́детъ и҆зве́рженъ. И҆́бо ᲂу҆бі́йца є҆́сть самагѡ̀ себѐ.

Пра́вило к҃д.
[edit]

Мїрѧни́нъ, себѐ самаго̀ скопи́вшїй, на трѝ го́да ѿлꙋче́нъ да бꙋ́детъ ѿ та́инствъ. И҆́бо навѣ́тникъ є҆́сть своеѧ̀ жи́зни.

Пра́вило к҃є.
[edit]

Е҆пі́скопъ, и҆лѝ пресвѵ́теръ, и҆лѝ дїа́конъ, въ блꙋдодѣѧ́нїи, и҆лѝ въ клѧтвопрестꙋпле́нїи, и҆лѝ въ татьбѣ̀ ѡ҆бличе́нный, да бꙋ́детъ и҆зве́рженъ ѿ сщ҃е́ннагѡ чи́на, но да не бꙋ́детъ ѿлꙋче́нъ ѿ ѻ҆бще́нїѧ церко́внагѡ. И҆́бо писа́нїе глаго́летъ: не ѿмсти́ши два́жды за є҆ди́но. Та́кожде и҆ про́чїи приче́тники.

Пра́вило к҃ѕ.
[edit]

Повелѣва́емъ, да и҆з̾ встꙋпи́вшихъ въ кли́ръ безбра́чными, жела́ющїе встꙋпа́ютъ въ бра́къ ѻ҆днѝ то́кмѡ чтецы̀ и҆ пѣвцы̀.

Пра́вило к҃з.
[edit]

Повелѣва́емъ є҆пі́скопа, и҆лѝ пресвѵ́тера, и҆лѝ дїа́кона, бїю́щаго вѣ́рныхъ согрѣша́ющихъ, и҆лѝ невѣ́рныхъ ѡ҆би́дѣвшихъ, и҆ чрез̾ сїѐ ᲂу҆страша́ти хотѧ́щаго, и҆зверга́ти ѿ сщ҃е́ннагѡ чи́на. И҆́бо гдⷭ҇ь ѿню́дь на́съ семꙋ̀ не ᲂу҆чи́лъ: напроти́въ тогѡ̀, са́мъ бы́въ ᲂу҆дарѧ́емь, не наноси́лъ ᲂу҆да́рѡвъ, ᲂу҆корѧ́емь, не ᲂу҆корѧ́лъ взаи́мнѡ, страда́ѧ, не ᲂу҆грожа́лъ.

Пра́вило к҃и.
[edit]

А҆́ще кто̀, є҆пі́скопъ, и҆лѝ пресвѵ́теръ, и҆лѝ дїа́конъ, пра́веднѡ за ꙗ҆́вныѧ вины̑ и҆зве́рженный, дерзне́тъ коснꙋ́тисѧ слꙋже́нїѧ, нѣ́когда є҆мꙋ̀ порꙋче́ннагѡ: таковы́й совсѣ́мъ да ѿсѣче́тсѧ ѿ цр҃кви.

Пра́вило к҃ѳ.
[edit]

А҆́ще кто̀, є҆пі́скопъ, и҆лѝ пресвѵ́теръ, и҆лѝ дїа́конъ, де́ньгами сїѐ досто́инство полꙋ́читъ: да бꙋ́детъ и҆зве́рженъ и҆ ѻ҆́нъ, и҆ поста́вившїй, и҆ ѿ ѻ҆бще́нїѧ совсѣ́мъ да ѿсѣче́тсѧ, ꙗ҆́кѡ сі́мѡнъ во́лхвъ мно́ю петро́мъ.

Пра́вило л҃.
[edit]

А҆́ще кото́рый є҆пі́скопъ, мїрски́хъ нача́льникѡвъ ᲂу҆потреби́въ, чрез̾ ни́хъ полꙋ́читъ є҆пі́скопскꙋю въ цр҃кви вла́сть: да бꙋ́детъ и҆зве́рженъ и҆ ѿлꙋче́нъ, и҆ всѣ̀ соѡбща́ющїесѧ съ ни́мъ.

Пра́вило л҃а.
[edit]

А҆́ще кото́рый пресвѵ́теръ, презрѣ́въ со́бственнаго є҆пі́скопа, ѿдѣ́льнѡ собра̑нїѧ твори́ти бꙋ́детъ, и҆ ѻ҆лта́рь и҆ны́й водрꙋзи́тъ, не ѡ҆бличи́въ сꙋдо́мъ є҆пі́скопа ни въ че́мъ проти́вномъ бл҃гоче́стїю и҆ пра́вдѣ: да бꙋ́детъ и҆зве́рженъ, ꙗ҆́кѡ любонача́льный. И҆́бо є҆́сть похити́тель вла́сти. Та́кожде и҆зве́ржены да бꙋ́дꙋтъ и҆ про́чїе и҆з̾ кли́ра, къ немꙋ̀ приложи́вшїесѧ. Мїрѧ́не же да бꙋ́дꙋтъ ѿлꙋчены̀ ѿ ѻ҆бще́нїѧ церко́внагѡ. И҆ сїѐ да бꙋ́детъ по є҆ди́номъ, и҆ второ́мъ, и҆ тре́тїемъ ᲂу҆вѣща́нїи ѿ є҆пі́скопа.

Пра́вило л҃в.
[edit]

А҆́ще кото́рый пресвѵ́теръ, и҆лѝ дїа́конъ ѿ є҆пі́скопа во ѿлꙋче́нїи бꙋ́детъ: не подоба́етъ є҆мꙋ̀ въ ѻ҆бще́нїе прїѧ́тꙋ бы́ти и҆ны́мъ, но то́чїю ѿлꙋчи́вшимъ є҆го̀: ра́звѣ когда̀ слꙋчи́тсѧ ᲂу҆мре́ти є҆пі́скопꙋ ѿлꙋчи́вшемꙋ є҆го̀.

Пра́вило л҃г.
[edit]

Не принима́ти никогѡ̀ и҆з̾ чꙋжи́хъ є҆пі́скопѡвъ, и҆лѝ пресвѵ́терѡвъ, и҆лѝ дїа́конѡвъ без̾ представи́тельныѧ гра́маты: и҆ когда̀ ѻ҆́наѧ пред̾ѧ́влена бꙋ́детъ, да разсꙋ́дѧтъ ѡ҆ ни́хъ: и҆ а҆́ще бꙋ́дꙋтъ проповѣ́дники бл҃гоче́стїѧ, да прїе́млютсѧ: а҆́ще ли нѝ, пода́йте и҆̀мъ, что̀ нꙋ́жно, а҆ въ ѻ҆бще́нїе не прїе́млите и҆́хъ. И҆́бо мно́гое быва́етъ подло́гомъ.

Пра́вило л҃д.
[edit]

Е҆пі́скопамъ всѧ́кагѡ наро́да подоба́етъ зна́ти пе́рваго въ ни́хъ, и҆ признава́ти є҆го̀ ꙗ҆́кѡ главꙋ̀, и҆ ничегѡ̀ превыша́ющагѡ и҆́хъ вла́сть не твори́ти без̾ є҆гѡ̀ разсꙋжде́нїѧ: твори́ти же ка́ждомꙋ то́лькѡ то̀, что̀ каса́етсѧ до є҆гѡ̀ є҆па́рхїи, и҆ до мѣ́стъ къ не́й принадлежа́щихъ. Но и҆ пе́рвый ничегѡ̀ да не твори́тъ без̾ разсꙋжде́нїѧ всѣ́хъ. И҆́бо та́кѡ бꙋ́детъ є҆диномы́слїе, и҆ просла́витсѧ бг҃ъ ѡ҆ гдⷭ҇ѣ во ст҃о́мъ дх҃ѣ, ѻ҆ц҃ъ и҆ сн҃ъ и҆ ст҃ы́й дх҃ъ.

Пра́вило л҃є.
[edit]

Е҆пі́скопъ да не дерза́етъ внѣ̀ предѣ́лѡвъ своеѧ̀ є҆па́рхїи твори́ти рꙋкоположе́нїѧ во гра́дѣхъ и҆ въ се́лѣхъ, є҆мꙋ̀ не подчине́нныхъ. А҆́ще же ѡ҆бличе́нъ бꙋ́детъ, ꙗ҆́кѡ сотворѝ сїѐ без̾ согла́сїѧ и҆мѣ́ющихъ въ подчине́нїи гра́ды ѻ҆́ные, и҆лѝ се́ла: да бꙋ́детъ и҆зве́рженъ и҆ ѻ҆́нъ, и҆ поста́вленнїи ѿ негѡ̀.

Пра́вило л҃ѕ.
[edit]

А҆́ще кто̀, бы́въ рꙋкоположе́нъ во є҆пі́скопа, не прїи́метъ слꙋже́нїѧ и҆ попече́нїѧ ѡ҆ наро́дѣ, є҆мꙋ̀ порꙋче́ннагѡ: да бꙋ́детъ ѿлꙋче́нъ, доко́лѣ не прїи́метъ ѻ҆́нагѡ. Та́кожде и҆ пресвѵ́теръ и҆ дїа́конъ. А҆́ще же по́йдетъ тꙋда̀, и҆ не бꙋ́детъ принѧ́тъ, не по свое́й во́лѣ, но по ѕло́бѣ наро́да: ѻ҆́нъ да пребыва́етъ є҆пі́скопъ, кли́ръ же гра́да тогѡ̀ да бꙋ́детъ ѿлꙋче́нъ за то̀, что̀ такова́гѡ непокори́вагѡ наро́да не ᲂу҆чи́ли.

Пра́вило л҃з.
[edit]

Два́жды въ годꙋ̀ да быва́етъ собо́ръ є҆пі́скопѡвъ, и҆ да разсꙋжда́ютъ ѻ҆нѝ дрꙋ́гъ съ дрꙋ́гомъ ѡ҆ догма́тахъ бл҃гоче́стїѧ, и҆ да разрѣша́ютъ слꙋча́ющыѧсѧ церкѡ́вныѧ прекослѡ́вїѧ. Въ пе́рвый ра́зъ, въ четве́ртꙋю недѣ́лю пѧтидесѧ́тницы: а҆ во вторы́й, ѻ҆ктѧбрѧ̀ во вторыйна́десѧть де́нь.По́слѣ по ѻ҆со́бымъ причи́намъ назнача́емы бы́ли дрꙋгі́ѧ времена̀ длѧ собо́рѡвъ. См. пе́рв. всел. собо́р. пр. є҃. шест. всел. собо́р. пр. и҃.

Пра́вило л҃и.
[edit]

Е҆пі́скопъ да и҆мѣ́етъ попече́нїе ѡ҆ всѣ́хъ церко́вныхъ веща́хъ, и҆ ѻ҆́ными да распорѧжа́етъ, ꙗ҆́кѡ бг҃ꙋ назира́ющꙋ. Но не позволи́тельно є҆мꙋ̀ присво́ивать что́ либо и҆з̾ ѻ҆́ныхъ, и҆лѝ сро́дникамъ свои́мъ дари́ть принадлежа́щее бг҃ꙋ. А҆́ще же сꙋ́ть неимꙋ́щїе, да подае́тъ и҆̀мъ, ꙗ҆́кѡ неимꙋ́щымъ: но под̾ си́мъ предло́гомъ да не продае́тъ принадлежа́щагѡ цр҃кви.

Пра́вило л҃ѳ.
[edit]

Пресвѵ́теры и҆ дїа́коны, без̾ во́ли є҆пі́скопа, ничегѡ̀ да не соверша́ютъ. И҆́бо є҆мꙋ̀ ввѣ́рены лю́дїе гдⷭ҇ни, и҆ ѻ҆́нъ возда́стъ ѿвѣ́тъ ѡ҆ дꙋша́хъ и҆́хъ.

Пра́вило м҃.
[edit]

Ꙗ҆́снѡ и҆звѣ́стно да бꙋ́детъ со́бственное и҆мѣ́нїе є҆пі́скопа, [є҆́стьли ѻ҆́нъ и҆мѣ́етъ со́бственное,] и҆ ꙗ҆́снѡ и҆звѣ́стно гдⷭ҇не: дабы̀ є҆пі́скопъ, ᲂу҆мира́ѧ, и҆мѣ́лъ вла́сть ѡ҆ста́вить со́бственное, комꙋ̀ хо́щетъ, и҆ ка́къ хо́щетъ, дабы̀ под̾ ви́домъ церко́внагѡ не бы́ло растра́чено и҆мѣ́нїе є҆пі́скопа, и҆мѣ́ющагѡ и҆ногда̀ женꙋ̀ и҆ дѣте́й, и҆лѝ сро́дникѡвъ, и҆лѝ рабѡ́въ. И҆́бо пра́ведно сїѐ пред̾ бг҃омъ и҆ человѣ́ки, дабы̀ и҆ цр҃ковь не претерпѣ́ла нѣ́коегѡ ᲂу҆ще́рба, по неизвѣ́стности и҆мѣ́нїѧ є҆пі́скопскагѡ: и҆ є҆пі́скопъ, и҆лѝ є҆гѡ̀ сро́дники, не подве́рглись ѡ҆тобра́нїю и҆мѣ́нїѧ за цр҃ковь, и҆ли́ же дабы̀ бли́зкїе къ немꙋ̀ не впа́ли въ тѧ́жбы, и҆ кончи́на є҆гѡ̀ не была̀ сопровожда́ема безсла́вїемъ.

Пра́вило м҃а.
[edit]

Повелѣва́емъ є҆пі́скопꙋ и҆мѣ́ти вла́сть над̾ церко́внымъ и҆мѣ́нїемъ. А҆́ще бо драгоцѣ́нныѧ человѣ́ческїѧ дꙋ́шы є҆мꙋ̀ ввѣ̑рены бы́ть до́лжны: то кольмѝ па́че ѡ҆ де́ньгахъ заповѣ́дать до́лжно, что́бы ѻ҆́нъ всѣ́мъ распорѧжа́лъ по свое́й вла́сти, и҆ тре́бꙋющымъ чрез̾ пресвѵ́терѡвъ и҆ дїа́конѡвъ подава́лъ со стра́хомъ бж҃їимъ, и҆ со всѧ́кимъ бл҃гоговѣ́нїемъ: та́кожде [а҆́ще потре́бно] и҆ са́мъ заи́мствовалъ на неѡбходи́мыѧ нꙋ́жды своѝ и҆ страннопрїе́млемыхъ бра́тїй, да не те́рпѧтъ недоста́тка ни въ како́мъ ѿноше́нїи. И҆́бо зако́нъ бж҃їй постанови́лъ, да слꙋжа́щїи ѻ҆лтарю̀, ѿ ѻ҆лтарѧ̀ пита́ютсѧ: ꙗ҆́коже и҆ во́инъ никогда̀ не под̾е́млетъ ѻ҆рꙋ́жїѧ на врага̀ на свое́мъ пропита́нїи.

Пра́вило м҃в.
[edit]

Е҆пі́скопъ, и҆лѝ пресвѵ́теръ, и҆лѝ дїа́конъ, и҆грѣ̀ и҆ пїѧ́нствꙋ пре́данный, и҆лѝ да преста́нетъ, и҆лѝ да бꙋ́детъ и҆зве́рженъ.

Пра́вило м҃г.
[edit]

Ѵ҆подїа́конъ, и҆лѝ чте́цъ, и҆лѝ пѣве́цъ, подо́бное творѧ́щїй, и҆лѝ да преста́нетъ, и҆лѝ да бꙋ́детъ ѿлꙋче́нъ. Та́кожде и҆ мїрѧ́не.

Пра́вило м҃д.
[edit]

Е҆пі́скопъ, и҆лѝ пресвѵ́теръ, и҆лѝ дїа́конъ, ли́хвы тре́бꙋющїй ѿ должникѡ́въ, и҆лѝ да преста́нетъ, и҆лѝ да бꙋ́детъ и҆зве́рженъ.

Пра́вило м҃є.
[edit]

Е҆пі́скопъ, и҆лѝ пресвѵ́теръ, и҆лѝ дїа́конъ, съ є҆ретїка́ми моли́вшїйсѧ то́кмѡ, да бꙋ́детъ ѿлꙋче́нъ. А҆́ще же позво́литъ и҆̀мъ дѣ́йствовать что́ либо, ꙗ҆́кѡ слꙋжи́телѧмъ цр҃кви: да бꙋ́детъ и҆зве́рженъ.

Пра́вило м҃ѕ.
[edit]

Е҆пі́скопа, и҆лѝ пресвѵ́тера, прїѧ́вшихъ креще́нїе и҆лѝ же́ртвꙋ є҆ретїкѡ́въ, и҆зверга́ти повелѣва́емъ. Ко́е бо согла́сїе хрⷭ҇то́ви съ велїа́ромъ; и҆лѝ ка́ѧ ча́сть вѣ́рномꙋ съ невѣ́рнымъ;

Сїѐ а҆по́стольское пра́вило ѿно́ситсѧ къ є҆ретїка́мъ, каковы́е бы́ли въ а҆по́стольскїѧ времена̀, поврежда́ющымъ гла́вные догма́ты ѡ҆ бг҃ѣ ѻ҆ц҃ѣ̀ и҆ сн҃ѣ и҆ ст҃о́мъ дх҃ѣ, и҆ ѡ҆ воплоще́нїи сн҃а бж҃їѧ. Ѡ҆ дрꙋги́хъ рода́хъ є҆ретїкѡ́въ дальнѣ́йшыѧ постановлє́нїѧ представлѧ́ютъ слѣ́дꙋющыѧ пра̑вила: пе́рв. вселе́н. собо́р. пра́в. ѳ҃і. лаодїк. з҃, и҃. шест. вселе́н. ч҃є. васі́л. вел. м҃з.

Пра́вило м҃з.
[edit]

Е҆пі́скопъ и҆лѝ пресвѵ́теръ, а҆́ще по и҆́стинѣ и҆мѣ́ющаго креще́нїе вно́вь ѡ҆крести́тъ, и҆лѝ а҆́ще ѿ нечести́выхъ ѡ҆скверне́ннагѡ не ѡ҆крести́тъ: да бꙋ́детъ и҆зве́рженъ, ꙗ҆́кѡ посмѣва́ющїйсѧ крⷭ҇тꙋ̀ и҆ см҃рти гдⷭ҇ней, и҆ не различа́ющїй свѧще́нникѡвъ ѿ лжесвѧще́нникѡвъ.

Пра́вило м҃и.
[edit]

А҆́ще кото́рый мїрѧни́нъ, и҆згна́въ свою̀ женꙋ̀, по́йметъ и҆нꙋ́ю, и҆лѝ и҆ны́мъ ѿри́нꙋтꙋю: да бꙋ́детъ ѿлꙋче́нъ.

Пра́вило м҃ѳ.
[edit]

А҆́ще кто̀, є҆пі́скопъ, и҆лѝ пресвѵ́теръ, крести́тъ не по гдⷭ҇ню ᲂу҆чрежде́нїю, во ѻ҆ц҃а̀ и҆ сн҃а и҆ ст҃а́го дх҃а, но въ тре́хъ безнача́льныхъ, и҆лѝ въ тре́хъ сынѡ́въ, и҆лѝ въ тре́хъ ᲂу҆тѣ́шителей: да бꙋ́детъ и҆зве́рженъ.

Пра́вило н҃.
[edit]

А҆́ще кто̀, є҆пі́скопъ, и҆лѝ пресвѵ́теръ, соверши́тъ не трѝ погрꙋжє́нїѧ є҆ди́нагѡ тайнодѣ́йствїѧ, но є҆ди́но погрꙋже́нїе, дае́мое въ см҃рть гдⷭ҇ню: да бꙋ́детъ и҆зве́рженъ. И҆́бо не ре́клъ гдⷭ҇ь: въ см҃рть мою̀ крести́те, но: ше́дше наꙋчи́те всѧ̀ ꙗ҆зы́ки, крестѧ́ще и҆̀хъ во и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а.

Пра́вило н҃а.
[edit]

А҆́ще кто̀, є҆пі́скопъ, и҆лѝ пресвѵ́теръ, и҆лѝ дїа́конъ, и҆лѝ воѻбщѐ и҆з̾ сщ҃е́ннагѡ чи́на, ᲂу҆далѧ́етсѧ ѿ бра́ка и҆ мѧ́съ и҆ вїна̀, не ра́ди по́двига воздержа́нїѧ, но по причи́нѣ гнꙋше́нїѧ, забы́въ, что̀ всѧ̑ дѡбра̀ ѕѣлѡ̀, и҆ что̀ бг҃ъ, созида́ѧ человѣ́ка, мꙋ́жа и҆ женꙋ̀ сотвори́лъ и҆̀хъ, и҆ таки́мъ ѻ҆́бразомъ хꙋлѧ̀ клеве́щетъ на созда́нїе: и҆лѝ да и҆спра́витсѧ, и҆лѝ да бꙋ́детъ и҆зве́рженъ и҆з̾ сщ҃е́ннагѡ чи́на, и҆ ѿве́рженъ ѿ цр҃кве. Та́кожде и҆ мїрѧни́нъ.

Пра́вило н҃в.
[edit]

А҆́ще кто̀, є҆пі́скопъ, и҆лѝ пресвѵ́теръ, ѡ҆браща́ющагѡсѧ ѿ грѣха̀ не прїе́млетъ, но ѿверга́етъ: да бꙋ́детъ и҆зве́рженъ и҆з̾ сщ҃е́ннагѡ чи́на. Ѡ҆печа́ливаетъ бо хрⷭ҇та̀ ре́кшаго: ра́дость быва́етъ на небесѝ ѡ҆ є҆ди́номъ грѣ́шницѣ ка́ющемсѧ.

Пра́вило н҃г.
[edit]

А҆́ще кто̀, є҆пі́скопъ, и҆лѝ пресвѵ́теръ, и҆лѝ дїа́конъ, во днѝ пра́здникѡвъ не вкꙋша́етъ мѧ́съ и҆ вїна̀, гнꙋша́ѧсѧ, а҆ не ра́ди по́двига воздержа́нїѧ: да бꙋ́детъ и҆зве́рженъ, ꙗ҆́кѡ сожже́нный въ со́бственной со́вѣсти, и҆ быва́ющїй вино́ю собла́зна мнѡ́гимъ.

Пра́вило н҃д.
[edit]

А҆́ще кто̀ и҆з̾ кли́ра въ корче́мницѣ ꙗ҆дꙋ́щїй ᲂу҆смо́тренъ бꙋ́детъ: да ѿлꙋчи́тсѧ, кромѣ̀ слꙋ́чаѧ, когда̀ на пꙋтѝ по нꙋ́ждѣ въ гости́нницѣ ѿдыха́етъ.

Пра́вило н҃є.
[edit]

А҆́ще кто̀ и҆з̾ кли́ра досади́тъ є҆пі́скопꙋ, да бꙋ́детъ и҆зве́рженъ. Кнѧ́зю бо люде́й твои́хъ да не рече́ши ѕла̀.

Пра́вило н҃ѕ.
[edit]

А҆́ще кто̀ и҆з̾ при́чта досади́тъ пресвѵ́терꙋ, и҆лѝ дїа́конꙋ: да бꙋ́детъ ѿлꙋче́нъ ѿ ѻ҆бще́нїѧ церко́внагѡ.

Пра́вило н҃з.
[edit]

А҆́ще кто̀ и҆з̾ кли́ра хромо́мꙋ, и҆лѝ глꙋхо́мꙋ, и҆лѝ слѣпо́мꙋ, и҆лѝ нога́ми болѣ́зненномꙋ посмѣе́тсѧ: да бꙋ́детъ ѿлꙋче́нъ. Та́кожде и҆ мїрѧни́нъ.

Пра́вило н҃и.
[edit]

Е҆пі́скопъ, и҆лѝ пресвѵ́теръ, нерадѧ́щїй ѡ҆ при́чтѣ и҆ ѡ҆ лю́дехъ, и҆ не ᲂу҆ча́щїй и҆̀хъ бл҃гоче́стїю, да бꙋ́детъ ѿлꙋче́нъ. А҆́ще же ѡ҆ста́нетсѧ въ се́мъ нерадѣ́нїи и҆ лѣ́ности: да бꙋ́детъ и҆зве́рженъ.

Пра́вило н҃ѳ.
[edit]

А҆́ще кто̀, є҆пі́скопъ, и҆лѝ пресвѵ́теръ, и҆лѝ дїа́конъ, нѣ́коемꙋ ѿ кли́ра нꙋжда́ющемꙋсѧ не подае́тъ потре́бнагѡ: да бꙋ́детъ ѿлꙋче́нъ. Закоснѣва́ѧ же въ то́мъ, да бꙋ́детъ и҆зве́рженъ, ꙗ҆́кѡ ᲂу҆би́вый бра́та своего̀.

Пра́вило ѯ҃.
[edit]

А҆́ще кто̀ подлѡ́жныѧ кни̑ги нечести́выхъ, а҆́ки ст҃ы́ѧ въ цр҃кви ѡ҆глаша́етъ, ко вредꙋ̀ наро́да и҆ кли́ра: да бꙋ́детъ и҆зве́рженъ.

Пра́вило ѯ҃а.
[edit]

А҆́ще вѣ́рный ѡ҆бвинѧ́емь бꙋ́детъ въ любодѣ́йствѣ, и҆лѝ въ прелюбодѣ́йствѣ, и҆лѝ во и҆но́мъ како́мъ запреще́нномъ дѣ́лѣ, и҆ ѡ҆бличе́нъ бꙋ́детъ: да не вво́дитсѧ въ кли́ръ.

Пра́вило ѯ҃в.
[edit]

А҆́ще кто̀ и҆з̾ кли́ра, ᲂу҆страша́сь человѣ́ка і҆ꙋде́а, и҆лѝ є҆́ллина, и҆лѝ є҆ретїка̀, ѿрече́тсѧ ѿ и҆́мени хрⷭ҇то́ва: да бꙋ́детъ ѿве́рженъ ѿ цр҃кви. А҆́ще же ѿрече́тсѧ ѿ и҆́мени слꙋжи́телѧ цр҃кви: да бꙋ́детъ и҆зве́рженъ ѡ҆ кли́ра. А҆́ще же пока́етсѧ: да бꙋ́детъ принѧ́тъ, ꙗ҆́кѡ мїрѧни́нъ.

Пра́вило ѯ҃г.
[edit]

А҆́ще кто̀ є҆пі́скопъ, и҆лѝ пресвѵ́теръ, и҆лѝ дїа́конъ, и҆лѝ воѻбщѐ и҆з̾ сщ҃е́ннагѡ чи́на, бꙋ́детъ ꙗ҆́сти мѧ́со въ кровѝ дꙋшѝ є҆гѡ̀, и҆лѝ ѕвѣроѧ́динꙋ, и҆лѝ мертвечи́нꙋ: да бꙋ́детъ и҆зве́рженъ. И҆́бо сїѐ зако́нъ запрети́лъ. А҆́ще же сїѐ содѣ́лаетъ мїрѧни́нъ: да бꙋ́детъ ѿлꙋче́нъ.

Пра́вило ѯ҃д.
[edit]

А҆́ще кто̀ и҆з̾ кли́ра ᲂу҆смо́тренъ бꙋ́детъ постѧ́щимсѧ въ де́нь гдⷭ҇ень, и҆лѝ въ сꙋббѡ́тꙋ кромѣ̀ є҆ди́ныѧ то́кмѡ [вели́кїѧ сꙋббѡ́ты]: да бꙋ́детъ и҆зве́рженъ. А҆́ще же мїрѧни́нъ, да бꙋ́детъ ѿлꙋче́нъ.

Сте́пень разрѣше́нїѧ поста̀, во днѝ воскре́сный и҆ сꙋббѡ́тный, ѡ҆предѣлѧ́етсѧ въ церко́вномъ ᲂу҆ста́вѣ, и҆ состои́тъ ѻ҆быкнове́ннѡ въ то́мъ, что̀ разрѣша́етсѧ вїно̀, є҆ле́й и҆ принѧ́тїе пи́щи по лїтꙋргі́и, без̾ продолже́нїѧ неѧде́нїѧ до тре́хъ че́твертей днѧ̀.

Пра́вило ѯ҃є.
[edit]

А҆́ще кто̀ и҆з̾ кли́ра, и҆лѝ мїрѧни́нъ, въ сѷнагѡ́гꙋ і҆ꙋде́йскꙋю и҆лѝ є҆реті́ческꙋю войде́тъ помоли́тисѧ: да бꙋ́детъ и҆ ѿ чи́на сщ҃е́ннагѡ и҆зве́рженъ, и҆ ѿлꙋче́нъ ѿ ѻ҆бще́нїѧ церко́внагѡ.

Пра́вило ѯ҃ѕ.
[edit]

А҆́ще кто̀ и҆з̾ кли́ра въ сва́рѣ кого̀ ᲂу҆да́ритъ, и҆ є҆ди́нымъ ᲂу҆даре́нїемъ ᲂу҆бїе́тъ: да бꙋ́детъ и҆зве́рженъ за проде́рзость свою̀. А҆́ще же мїрѧни́нъ сїѐ сотвори́тъ: да бꙋ́детъ ѿлꙋче́нъ.

Пра́вило ѯ҃з.
[edit]

А҆́ще кто̀ дѣ́вꙋ неѡбрꙋче́ннꙋю наси́ловавъ и҆мѣ́етъ: да бꙋ́детъ ѿлꙋче́нъ ѿ ѻ҆бще́нїѧ церко́внагѡ. Не позволѧ́ти же є҆мꙋ̀ бра́ть и҆нꙋ́ю: но до́лженъ ᲂу҆держа́ть тꙋ̀, кото́рꙋю и҆збра́лъ, а҆́ще бы и҆ ᲂу҆бо́га была̀.

Пра́вило ѯ҃и.
[edit]

А҆́ще кто̀ є҆пі́скопъ, и҆лѝ пресвѵ́теръ, и҆лѝ дїа́конъ, прїе́млетъ ѿ когѡ́ либо второ́е рꙋкоположе́нїе: да бꙋ́детъ и҆зве́рженъ ѿ сщ҃е́ннагѡ чи́на, и҆ ѻ҆́нъ и҆ рꙋкоположи́вый: ра́звѣ а҆́ще достовѣ́рнѡ и҆звѣ́стно бꙋ́детъ, что̀ ѿ є҆ретїкѡ́въ и҆мѣ́етъ рꙋкоположе́нїе. И҆́бо крещє́ннымъ, и҆лѝ рꙋкоположє́ннымъ ѿ таковы́хъ, ни вѣ́рными, ни слꙋжи́телѧми цр҃кви бы́ти не возмо́жно.

Пра́вило ѯ҃ѳ.
[edit]

А҆́ще кто̀, є҆пі́скопъ, и҆лѝ пресвѵ́теръ, и҆лѝ дїа́конъ, и҆лѝ ѵ҆подїа́конъ, и҆лѝ чте́цъ, и҆лѝ пѣве́цъ, не пости́тсѧ во ст҃ꙋ́ю четыредесѧ́тницꙋ пред̾ па́схою, и҆лѝ въ сре́дꙋ, и҆лѝ въ пѧто́къ, кромѣ̀ препѧ́тствїѧ ѿ не́мощи тѣле́сныѧ: да бꙋ́детъ и҆зве́рженъ. А҆́ще же мїрѧни́нъ: да бꙋ́детъ ѿлꙋче́нъ.

Пра́вило ѻ҃.
[edit]

А҆́ще кто̀, є҆пі́скопъ, и҆лѝ пресвѵ́теръ, и҆лѝ дїа́конъ, и҆лѝ воѻбщѐ и҆з̾ спи́ска кли́ра, пости́тсѧ съ і҆ꙋде́ѧми, и҆лѝ пра́зднꙋетъ съ ни́ми, и҆лѝ прїе́млетъ ѿ ни́хъ да́ры пра́здникѡвъ и҆́хъ, ка́къ то, ѡ҆прѣ́сноки, и҆лѝ нѣ́что подо́бное: да бꙋ́детъ и҆зве́рженъ. А҆́ще же мїрѧни́нъ: да бꙋ́детъ ѿлꙋче́нъ.

Пра́вило ѻ҃а.
[edit]

А҆́ще кото́рый хрⷭ҇тїа́нинъ принесе́тъ є҆ле́й въ ка́пище ꙗ҆зы́ческое, и҆лѝ въ сѷнагѡ́гꙋ і҆ꙋде́йскꙋю, въ и҆́хъ пра́здники, и҆лѝ возжже́тъ свѣщꙋ̀: да бꙋ́детъ ѿлꙋче́нъ ѿ ѻ҆бще́нїѧ церко́внагѡ.

Пра́вило ѻ҃в.
[edit]

А҆́ще кто̀ и҆з̾ при́чта, и҆лѝ мїрѧни́нъ, и҆з̾ ст҃ы́ѧ цр҃кви похи́титъ во́скъ, и҆лѝ є҆ле́й: да бꙋ́детъ ѿлꙋче́нъ ѿ ѻ҆бще́нїѧ церко́внагѡ, и҆ пѧтери́цею да прило́житъ къ томꙋ̀, что̀ взѧ́лъ.

Пра́вило ѻ҃г.
[edit]

Сосꙋ́дъ златы́й, и҆лѝ сре́брѧный ѡ҆свѧще́нный, и҆лѝ завѣ́сꙋ, никто̀ ᲂу҆жѐ да не присво́итъ на своѐ ᲂу҆потребле́нїе. Беззако́нно бо є҆́сть. А҆́ще же кто̀ въ се́мъ ᲂу҆смо́тренъ бꙋ́детъ: да нака́жетсѧ ѿлꙋче́нїемъ.

Пра́вило ѻ҃д.
[edit]

Е҆пі́скопъ, ѿ люде́й вѣроѧ́тїѧ досто́йныхъ ѡ҆бвинѧ́емый въ че́мъ либо, неѡбходи́мѡ са́мъ до́лженъ бы́ть призва́нъ є҆пі́скопами: и҆ а҆́ще предста́нетъ и҆ призна́етсѧ, и҆лѝ ѡ҆бличе́нъ бꙋ́детъ: да ѡ҆предѣли́тсѧ є҆пїтїмїѧ̀. А҆́ще же зва́нъ бы́въ, не послꙋ́шаетъ: да позове́тсѧ втори́чнѡ чрез̾ посыла́емыхъ къ немꙋ̀ двꙋ́хъ є҆пі́скопѡвъ. А҆́ще же и҆ та́кѡ не послꙋ́шаетъ: да позове́тсѧ и҆ въ тре́тїй ра́зъ чрез̾ двꙋ́хъ посыла́емыхъ къ немꙋ̀ є҆пі́скопѡвъ. А҆́ще же и҆ сегѡ̀ не ᲂу҆важа́ѧ, не предста́нетъ: собо́ръ, по благоꙋсмотрѣ́нїю своемꙋ̀, да произнесе́тъ ѡ҆ не́мъ рѣше́нїе, да не мни́тсѧ вы́годꙋ и҆мѣ́ти, бѣ́гаѧ ѿ сꙋда̀.

Пра́вило ѻ҃є.
[edit]

Во свидѣ́тельство проти́въ є҆пі́скопа не прїима́ти є҆ретїка̀: но и҆ вѣ́рнагѡ є҆ди́нагѡ не дово́льно. На ᲂу҆ста́хъ бо двои́хъ, и҆лѝ трїе́хъ свидѣ́телей тве́рдѡ ста́нетъ всѧ́къ глаго́лъ.

Пра́вило ѻ҃ѕ.
[edit]

Ꙗ҆́кѡ не подоба́етъ є҆пі́скопꙋ, и҆з̾ ᲂу҆гожде́нїѧ бра́тꙋ, и҆лѝ сы́нꙋ, и҆лѝ и҆но́мꙋ сро́дникꙋ, поставлѧ́ти въ досто́инство є҆пі́скопа, кого̀ хо́щетъ. И҆́бо нѣ́сть пра́ведно твори́ти наслѣ́дникѡвъ є҆пі́скопства, и҆ со́бственность бж҃їю даѧ́ти въ да́ръ человѣ́ческомꙋ пристра́стїю. Не до́лжно бо цр҃ковь бж҃їю под̾ вла́сть наслѣ́дникѡвъ поставлѧ́ти. А҆́ще же кто̀ сїѐ сотвори́тъ: поставле́нїе да бꙋ́детъ недѣйстви́тельно, са́мъ же ѿлꙋче́нїемъ нака́занъ да бꙋ́детъ.

Пра́вило ѻ҃з.
[edit]

А҆́ще кто̀ лише́нъ ѻ҆́ка, и҆лѝ въ нога́хъ поврежде́нъ, но досто́инъ бы́ти є҆пі́скопъ: да бꙋ́детъ. И҆́бо тѣле́сный недоста́токъ є҆гѡ̀ не ѡ҆сквернѧ́етъ, но дꙋше́внаѧ скве́рна.

Пра́вило ѻ҃и.
[edit]

Глꙋхі́й же, и҆ слѣпы́й да не бꙋ́детъ є҆пі́скопъ, не а҆́ки бы ѡ҆скверне́нъ бы́лъ, но да не бꙋ́детъ препѧ́тствїѧ въ дѣла́хъ церко́вныхъ.

Пра́вило ѻ҃ѳ.
[edit]

А҆́ще кто̀ де́мѡна и҆мѣ́етъ: да не бꙋ́детъ принѧ́тъ въ кли́ръ, но нижѐ съ вѣ́рными да мо́литсѧ. Ѡ҆свободѧ́сь же, да принѧ́тъ бꙋ́детъ съ вѣ́рными, и҆ а҆́ще досто́инъ, то и҆ въ кли́ръ.

Пра́вило п҃.
[edit]

Ѿ ꙗ҆зы́ческагѡ житїѧ̀ прише́дшаго и҆ креще́ннаго, и҆лѝ ѿ поро́чнагѡ ѻ҆́браза жи́зни ѡ҆брати́вшагосѧ, нѣ́сть пра́ведно вдрꙋ́гъ производи́ти во є҆пі́скопа. И҆́бо несправедли́во є҆щѐ не и҆спы́танномꙋ бы́ти ᲂу҆чи́телемъ дрꙋги́хъ: ра́звѣ то́лькѡ по бл҃года́ти бж҃їей сїѐ ᲂу҆стро́итсѧ.

Пра́вило п҃а.
[edit]

Реклѝ мы̀, ꙗ҆́кѡ не подоба́етъ є҆пі́скопꙋ, и҆лѝ пресвѵ́терꙋ вдава́тисѧ въ наро́дныѧ ᲂу҆правлє́нїѧ, но неꙋпꙋсти́тельнѡ бы́ти при дѣла́хъ церко́вныхъ. И҆лѝ ᲂу҆́бѡ да бꙋ́детъ ᲂу҆бѣжде́нъ сегѡ̀ не твори́ти, и҆лѝ да бꙋ́детъ и҆зве́рженъ. И҆́бо никто́же мо́жетъ двꙋ́мъ господа́мъ рабо́тати, по гдⷭ҇ней за́повѣди.

Пра́вило п҃в.
[edit]

Не позволѧ́емъ въ кли́ръ производи́ти рабѡ́въ, без̾ согла́сїѧ госпо́дъ, къ ѡ҆горче́нїю владѣте́лей и҆́хъ. И҆́бо ѿ сегѡ̀ происхо́дитъ разстро́йство въ дома́хъ. А҆́ще же когда̀ ра́бъ и҆ досто́инъ ꙗ҆ви́тсѧ поставле́нїѧ въ сте́пень церко́внꙋю, каковы́мъ ꙗ҆ви́лсѧ и҆ на́шъ ѻ҆ни́сїмъ, и҆ госпо́дїе соизво́лѧтъ, и҆ ѡ҆свободѧ́тъ, и҆ и҆з̾ до́мꙋ ѿпꙋ́стѧтъ: да бꙋ́детъ произведе́нъ.

Пра́вило п҃г.
[edit]

Е҆пі́скопъ, и҆лѝ пресвѵ́теръ, и҆лѝ дїа́конъ, въ вои́нскомъ дѣ́лѣ ᲂу҆пражнѧ́ющїйсѧ, и҆ хотѧ́щїй ᲂу҆держа́ти ѻ҆боѐ, то́ є҆сть, ри́мское нача́льство и҆ свѧще́нническꙋю до́лжность: да бꙋ́детъ и҆зве́рженъ и҆з̾ сщ҃е́ннагѡ чи́на. И҆́бо ке́сарєва ке́сареви, и҆ бж҃їѧ бг҃ови.

Пра́вило п҃д.
[edit]

А҆́ще кто̀ досади́тъ царю̀, и҆лѝ кнѧ́зю, не по пра́вдѣ: да понесе́тъ наказа́нїе. И҆ а҆́ще таковы́й бꙋ́детъ и҆з̾ кли́ра, да бꙋ́детъ и҆зве́рженъ ѿ сщ҃е́ннагѡ чи́на: а҆́ще же мїрѧни́нъ, да бꙋ́детъ ѿлꙋче́нъ ѿ ѡ҆бще́нїѧ церко́внагѡ.

Пра́вило п҃є.
[edit]

Длѧ всѣ́хъ ва́съ, принадлежа́щихъ къ кли́рꙋ и҆ мїрѧ́нъ, чти́мыми и҆ ст҃ы́ми да бꙋ́дꙋтъ кни̑ги, ве́тхагѡ завѣ́та, мѡѷсе́овыхъ пѧ́ть: бытїѧ̀, и҆схо́дъ, леѵі́тъ, чи̑сла, второзако́нїе. І҆исꙋ́са сы́на наѵи́на є҆ди́на. Сꙋде́й є҆ди́на. Рꙋ́ѳь є҆ди́на. Ца́рствъ четы́ре. Паралїпоме́нѡнъ [то́ є҆сть ѡ҆ста́ткѡвъ ѿ кни́ги дне́й] двѣ̀. Е҆́здры двѣ̀. Е҆сѳи́рь є҆ди́на. Маккаве́йскихъ трѝ. І҆́ѡва є҆ди́на. Ѱалти́рь є҆ди́на. Соломѡ́новыхъ трѝ: при̑тчи, є҆кклисїа́стъ, пѣ́снь пѣ́сней. Проро́кѡвъ двана́десѧть. И҆са́їи є҆ди́на. І҆еремі́и є҆ди́на. І҆езекі́илѧ є҆ди́на. Е҆ди́на данїи́ла. Све́рхъ же сегѡ̀ ва́мъ да присовокꙋ́питсѧ въ замѣча́нїе, что́бы ю҆́ные ва́ши и҆зꙋча́ли премꙋ́дрость многоꙋче́нагѡ сїра́ха. На́ши же, то́ є҆сть, но́вагѡ завѣ́та, є҆ѵа́нгєлїѧ четы́ре: матѳе́а, ма́рка, лꙋкѝ, і҆ѡа́нна. Па́ѵловыхъ посла́нїй четырена́десѧть. Петра̀ посла́нїѧ два̀. І҆ѡа́нна трѝ. І҆а́кѡва є҆ди́но. І҆ꙋ́ды є҆ди́но. Кли́мента посла́нїѧ два̀. И҆ постановлє́нїѧ ва́мъ є҆пі́скопамъ мно́ю кли́ментомъ и҆зречє́нныѧ въ ѻ҆смѝ кни́гахъ, [кото́рыхъ не подоба́етъ ѡ҆бнаро́довати пред̾ всѣ́ми ра́ди тогѡ̀, что̀ въ ни́хъ таи́нственно,] и҆ дѣѧ̑нїѧ на́ши а҆по́стольскїѧ.

Ѿноси́тельнѡ постановле́нїй а҆по́стольскихъ, напи́санныхъ кли́ментомъ, вре́мѧ и҆ провидѣ́нїе бж҃їе ѿкры́ли нꙋ́ждꙋ въ но́вомъ пра́вилѣ, кото́рое є҆́сть в҃ шеста́гѡ вселе́нскагѡ собо́ра.

Оу҆каза́нїе сщ҃е́нныхъ и҆ длѧ церко́внагѡ чте́нїѧ назна́ченныхъ кни́гъ соде́ржатъ є҆щѐ слѣ́дꙋющыѧ пра̑вила: лаодїк. собо́р. ѯ҃. карѳ. л҃г. Та́кже св. а҆ѳана́с. пра́зд. посл. л҃ѳ, и҆ стїхѝ св. григо́р. богосл. и҆ св. а҆мфїло́хїѧ.