Безбородов М. И. Сочиненият 1-це томсь (1939)/Попть оноц

From Wikisource
Jump to navigation Jump to search
Сочиненият 1-це томсь  (1939)  by Безбородов, Михаил Ильич
Попть оноц
Михаил Безбородов. Сочиненият, Васенце томсь. Мордовскяй государственнай издательствась. Саранск, 1939.

[ 47 ]

ПОПТЬ ОНОЦ


Уды...
Кургоц келептьф ортакс
Рашкокс йордафт пильгонза,
Шалхкоц бта мода ватракш.
Крнай, шудихть сельгонза.

Крёзоц нюрьги цинзер вельде,
Алу уски парь-крганц.
Пацянянза стане келемсть —
Занязь кудонц и мрганц.
* * *
Шамац сяшка —
Аф озави
Боцькя эчкса аванцты.
Сонцень сельмонза кумбряшкат;
Кенярдсь цебярь ононцты.

Вазец йофси ошкс лахання,
Шяяренза — помала,
Конань мархта вадихть шарыхть...
Уды цебярь он ала.

Онцтонза сон няи пачат,
Кандыхть цюкорхт тувонцты,
Каньзер, каньзер шра ваксса
Гривенникнень лувондсынь.

Рахси — бта срадсть колхосне,
Шнасы козя роштовать,

[ 48 ]

Бта валдомсть церькунь крёсне,
Пици шаняпт попавась.
А ульцява
Сурму орса
Тувокс шашнихть козятне...
Томба лангаст
Шудихть шовса
Козянь пуре-позатне.

Сыргозсь...
Шерьхки, трнай кудоц, —
Молихть тракторхне кига.
Ваны вальмава и няи:
Толнясь валдопни „Гигантть”.

Церькуть пряса якстерь флаг;
Ашет попонь пачанза.
Аэроплатт менельть лазыхть —
Звезда мархта пацясна.

А маластонь якстерь ошень
Фкакс завоттне морайхть...
Кяжи букась, грива мархтось
Мяштенцты прянц комафтсь.