Безбородов М. И. Сочиненият 1-це томсь (1939)/Луга лангса

From Wikisource
Jump to navigation Jump to search
Сочиненият 1-це томсь  (1939)  by Безбородов, Михаил Ильич
Луга лангса
Михаил Безбородов. Сочиненият, Васенце томсь. Мордовскяй государственнай издательствась. Саранск, 1939.

[ 49 ]

ЛУГА ЛАНГСА


Зорясь олай,
Олай, олай, —
Олась и юмась,
Шинять цяткоц —
Васень цяткоц
Лаймоть ланга прась.
Сиянь росать,
Сиянь росать
(Кона тишеть штась)
Цяткоц пидезе
И Мокшети
Эшляма сувась.
Венемсь, керендсь.
Венемсь, афкстась,
Кеподезе прянц
Додунц лангста,
Палаткаста
Лиссь ушу Гурьянць.
Шамань штама
Ласьки мокшети, —
Штазе и мрдась.
Кафта кядьса
Пара мяльса
Ражокти кундась.
Эводсь лаймось,
Пандовсь ваймоц,
Ражоксь морай зоря;
Бригадати,
Ударникти
Кайги моронц йоряй.

[ 50 ]

Стяда варьхмодсь,
Стяда варьхмодсь,
Стяда, стяда, стяда!
Фкя-фкянь йотазь,
Фкя-фкянь йотазь,
Лядема кундада.
— Сембе анокт,
Сембе анокт, —
Бригадирсь ивадсь.
Фкя-фкянь йотазь
Пеелепне
Тишети сувасть.
Серьцек, мельцек,
Серьцек, мельцек
Лядихть сембе фкакс.
Лядихть, лядихть...
Мельгаст лаймоть
Тингокс шамац штадсь.
Пеелепне
Коршазь — коршайхть,
Нарайхть лаймоть прянц.
— Аф йотаван,
Кенерьхть мельган, —
Ювади Гурьянць.
— Гурьянть мельгя,
Гурьянть эзда
Тят ляда фкя вакс!
— Эряздоня,
Финишсь мала,
Няеви ни флагсь.
Серьцек, мельцек,
Серьцек, мельцек,
Тюже тишесь прафтф.
Менельть няфтьсы
Гурьянть кядьса
Вяри кепотьф флагсь.

[ 51 ]

* * *
— Хо, хо, хо, ха...
— Хо, хо, хо, ха...
— Ой, аванят, хай;
Рахазь, моразь
Авань рота
Велеть ширде сай.
Пильгсна акшет,
Прясна якстерьхть.
Молихть, кандыхть увф.
Сембонь вийсна
Тянинь тевти
Бригадава лувфт.
— Эй, од ават,
Няфтесть тячи
Кели лаймоть лангса
Эсь виентень
Стане, кода
Улхка минь сокамста.
Няфтесть, ваность,
Кода моли
Марстонь вийса тевсь.
Минь виеньке,
Минь тевоньке —
Кулаконь кургти кевсь.
— Аноктама,
Аноктама, —
Аватне ивадсть.
Серьцек, мельцек
Веляфтф тишеть
Срафнемонза срадсть.
Вишке кядьса
Грабля недьса
Срафнесазь эрь рядть.
А вирьть алда,
Гурьян ялгась
Пишкоды: „лядьть, лядьть!”