Безбородов М. И. Сочиненият 1-це томсь (1939)/Колма пинкт, или колма морот/Васенце пялькссь. Моданкса

From Wikisource
Jump to navigation Jump to search
Сочиненият 1-це томсь / Колма пинкт, или колма морот  (1939)  by Безбородов, Михаил Ильич
Васенце пялькссь. Моданкса
Михаил Безбородов. Сочиненият, Васенце томсь. Мордовскяй государственнай издательствась. Саранск, 1939.
[ 124 ]

ВАСЕНЦЕ ПЯЛЬКССЬ

МОДАНКСА


Эрязста ласьки
Мокшень од стирьне
Кели паксява,
Пяксянь кинява;
Сон кува ласьки,
Меки варжаксни,
Сельме ведьняти
Ожа пенц начфни.
Стирьнять лангсонза
Акша панарне,
Прязонза сотфке
Ташта руцяне;
Карьсефт пильгонза
Пона пракстаса,
Вете ленгаста
Кодаф карьняса.

[ 125 ]

Пужфке, олафке
Эвотьф шаманяц,
Лафту ланганза
Срафтфке шяярняц.
Тяфта ков ласьки?
Ков эряскады?
Мес кафта пяли
Пелезь ванонды?
Кие эвфтезе?
Кие обжазе?
Кие авардезь
Паксяв нолдазе?—
Ласьки аканцты
Пиченя вели;
Меки ванонды —
Сединяц пели.
Салаюфть цьорац
Вай, сонь обжазе,
Рахазь — пеедезь
Паксяв нолдазе.
Тяни од пингоц
Стирьнять юмась ни.
Сянкса сединяц
Тотнай, комотни.
Содасы — кулясь
Пачкодсь велети,
Аф пара славась
Келес келемкшни.
Кулянь каннида
Лама велеса,
Ламонь кулендихть
Оржа пилесна.
Фкя куля маряйхть —
Тиихть ведьгемонь,
Тиихть ведьгемонь,
Оржа кяльнясост
Рахсесазь сембонь:

[ 126 ]

„Коленди стирьда
Велеса лама”, —
Кядьнек—пильгонек
Кармайхть корхтама.
Вов мес велеста
Стирьнясь ворьгоди,
Вов мес паксяса
Келукс кольгонди.
Стакаста сюдуфсь
Касозе серенц,
Вирень нумолнякс
Ломаньда пелендсь.
Одняста стирьнясь
Кармась якама
Оцюфнень мархта
Паксяв покама.
Мяляфтсы, нуйхне
Рахайхть эсонза,
Мес аф кирдеви
Тарвазсь кядьсонза.
— Алду, сизеть ни?..
— Ха-ха, ха-ха, ха!
Архтака куду —
Росьнень тяйть тапа.
Эх, стирьня, стирьня,
Сюдуф уроске. —
И кармайхть нума
Эрязста нуйхне.
Маладсь од пингоц,
Тяни оцю ни,
Аньцек эряфкац,
Вай, аф петневи.
Сякокс козянди
Виенц макссесы,
Эрь кши сускомнять
Ливсьса рамсесы.
Сяконь лангс исяк,

[ 127 ]

Вай, сонь пеедезь:
Вай, лимокс-сюнокс
Вирьса тиендезь.
Тяряц корхнекшнесь...
Алдусь мяляфтсы,
Вай сонь корхтаманц —
Лядыкс тошкаманц:
„Шятьта, Алдуняй,
Мон курок кулан,
Равжа модати
Эряма суван,
Мяляфтк: аяш тонь
Тряйце — аляце,
Курок аф ули
Щайце-каряйце.
Сиротакс, стирьняй,
Эрямась цьолак...
Тята аварде
Ваксозон озак...”
Тяфта корхтазьне
Алдуть явсезе,
Алдуть явсезе
Кельме трваса,
Ямбарть палсезе.
Кафцькенянь шудесть
Сельме ведьнясна,
Фкя-фкас ашкодовсть
Кафцьконь кядьнясна.