Page:Tain Bo Cuailnge.djvu/16

From Wikisource
Jump to: navigation, search
This page has been validated.

4

TÁIN BÓ CÚAILNGE

ímpe. Dā assa co foráib óir impu. Agad ḟochōel forlethan. Dí broí duba dórchaidi. [55b] Abrait duib dáin, co mbentais foscod i medōn a dā grūaide. Indar latt ropo di partaing ímdéntai a beóil. Indar latt ba fross do nēmannaib bói inna bélaib .i. a fíaclai. Teóra trillsi fuirri .i. dí thriliss immo cénd sūas, trilis tara haiss sīar, co mbeired[1] a dā colpt[h]a inna díaid. Claideb corthaire do ḟíndruine inna láim; esnaid óir and. Trī maic imlissen cechtar a dá súla. Gaisched lasin íngin ⁊ dá ech duba foa cárput.

“Cia do chomainmsiu?” ol Médb frisin ningin. “Fedelm banfili do Chonnachtaib mo ainmsea,” or ind ingen. “Can dothéig?” or Medb. “A hAlbain iar foglaim filidechta,” or ind ingen. “In fil imbass forosna lat?” or Médb. “Fil écin,” or ind ingen. “Décai dámsa didiu cobbia mo ḟechtas.” Dosnécce ind íngen íarum. Is ánd asbert Médb: “A Feidélm banḟāit[h], co acci[2] in slúag?” Frisgart Fedelm co nepert: “Atchíu fordérg, atchíu rúad.” “Ní fír són ém,” ol Médb, “ar atá Conchobor ina chess i nEmain ⁊ hUlaid imbi co neoch a[ ][3] a nócc, ⁊ ráncatar mo thechtasa co tucsat fis scél damsa ass.” “Fedelm banḟáith, co acca ar slūag?” ol Médb. “Atchíu fórderg, atchíu rúad,” ol ind íngen. “Nī fír són,” ol Medb, “ar atá Celtchar mac Guthidir[4] co triún hUlad imbi i nDún Lethglaisse, ⁊ atá Fergus mac Roeich maic Echdach lenni sund for loṅgais co tricha[5] chēt imbi.” “Fedélm banḟāith, co acca ar slūag?” ol Médb. “Atchīu forderg, atchīu rūad,” ol ind ingen. “Nī baa anísin tra,” ol Médb, “ar bīt imferga ⁊ círgala ⁊ fuili fordérgga i cach slūag ⁊ i cach thaurchómrac dūnaid móir. Déca atheruch dūnd dano ⁊ abbair a ḟír frind.” “Feidelm banḟāith, co acca ar slūag?” “A[t]chíu forderg, atchíu rūad,” ol Fedelm.

“Atchíu fer find sirfes[6] cles co lín crēchta fora chris:
lūan láith i nairthiur a chind ōenach mbúada a thulchind.

Fail .vii. ngemma láith ṅgaile for lár a dá imlisse:
fil fúidrech fora glinni, fil leind ndeirg ndrolaig immi.

  1. leg. co mbenad?
  2. gl. .i. cinas atchí
  3. The letter after a may have been s, the following letter is illegible; then follow faint traces of what may have been ec; leg. as dech
  4. leg. Uthidir
  5. leg. trichait
  6. leg. firfes