Page:Tain Bo Cuailnge.djvu/15

From Wikisource
Jump to: navigation, search
This page has been validated.


[LU. 55a.]

TÁIN BÓ CÚAILNGE INSO SĪS

Tarcomlád slóiged mór la Connachtu[1] .i. la hAilill ⁊ la Meidb ⁊ hetha húaidib cossna trī chóiced aili. Ocus fóite techta ó Ailill co .vii. maccu Mágach .i. co hAilill, co Ánlúan, co Moccorb, co Cét, co Én, ⁊ Bascall, ⁊ Dóche—trícha cét la cach næ—⁊ co Cormac Condloṅgas mac Conchobair cona t[h]ríb cétaib, bói for condmiud la[2] Connachta. Tecait uile íarum co mbātar hi Crūachnaib Ái.

Trí luírg didiu do Chormac oc tochím do C[h]rúachnaib. In cētna lorg, broitt brecca i forcipul co filliud impu. Fortíi bértha foraib. Léini fothairinniuth cota ṅglūn ⁊ fotalscéith foraib ⁊ manāis lethanglas for crúnd midṡing i lláim cech fir.

In lorg tánaisi, broit dubglasa impuside ⁊ lénti co ndercintliud co horcnib sís, ⁊ moṅga tara cenna síar, ⁊ lubne gela foraib ⁊ slega có[i]crinné inna lāmaib. “Ní hé Cormac beus,” or Médb.

Tic in tres lórc dano. Broitt chorcra ímpu ⁊ lénte culpatacha fo dérggintṡlaid co traigthe, ⁊ berthai slechtai co gūaille, ⁊ cromscéith co fǣbraib condúala ímpu ⁊ turre rígthige i llāim cach fir. “Is é Cormac inso hi fechtsa,[3]” or Médb.

Doecmalta dano iarum .iiii. c[h]ōiced hĒrend co mbātar hi Crúachnaib Áii. Ocus nīstéilcset a fáthi ⁊ a ndrúid ass sein co cénd cóicthigis oc írnaidi ṡeóin. Asbert Médb íarum fria haraid a llaa documlásat: “cach óen scaras sund tra indiu,” olsi, “fria chóem ⁊ a charait, dobērat maldachtain fórmsa, úair is mé dorinól in slúagadsa.” “Ansu didiu,” ol int ara, “co nimparrá in carpat deisel ⁊ cotí nert int ṡeūin ara tísam ar frithisi.”

Intan didiu dosói int ara forsin carpat ⁊ lotair do thecht ass, co naccatár in níngin macdacht remib. Folt buidi furri. Bratt brecc impe, delg nōir ánd. Léine c[h]ulpatach co nderggintṡlaid

  1. leg. Connachta
  2. Gl. ꝉ fo
  3. = in fechtsa

M 2