Epistola I de Petro Capitulo 2

1  Depone vos dunque omne malitia, e omne dolo, e simulationes e invidias, 
   e omne sorta de detraction, 

2  e como infantes neonate, desira le pur lacte spiritual, pro poter crescer 
   in salute, 

3  si vos ha jam gustate quanto dulce es le Senior. 

4  Approxima vos a Ille como petras vive, reprobate per le homines mais eligite
   e preciose ante Deo, assi etiam vos,

5  como petras vive, edificate como casa spiritual, pro esser un sacerdotio
   sancte pro offerer sacrificios spiritual, acceptabile a Deo per medio de
   Jesus Christo. 

6  Pois que on lege in le Scriptura: Ecce, io pone in Sion un petra angular, 
   eligite, preciose; e quicunque crede in illo non essera confundite.

7  Pro vos dunque qui crede illo es preciose; mais pro le incredules le petra 
   que le edificatores ha reprobate es illo que deveniva le petra angular, 

8  un petra de obstaculo e un saxo de scandalo; e assi illes impinge in le
   Parola essente disobediente; e pro isto illes esseva preordinate. 

9  Mais vos es un generation electe, un real sacerdotio, un gente sancte, un 
   populo que Deo acquireva, pro proclamar le virtutes de Ille qui vos ha
   appellate ex le tenebras a su meraviliose luce;

10 vos, qui olim non esseva un populo, mais nunc vos es le populo de Deo; vos,
   qui non habeva obtenite misericordia, mais nunc vos obteneva misericordia.

11 Carissimos, io vos exhorta como extranieros e pelegrinos a abstiner vos 
   ex le concupiscentias del carne, que pugna contra le anima,

12 habente un bon conducta inter le Gentiles; a fin que in le cosas que illes
   murmura contra vos como malfactores, illes glorifica Deo in le die del 
   visitation per causa de vostre bon operas. 

13 Sia vos subjectate, per amor del Senior, a omne autoritate create per le 
   homines: al rege como superior; 

14 al governatores, como mandate ex Ille pro punir le malfactores e pro dar 
   laude a qui face le ben.

15 Pois que iste es le voluntate de Deo: que, facente le ben, vos face mutescer 
   le bucca del homines ignorante e insensate;

16 como liberes, mais non habente le libertate como velo pro coperir le malitia, 
   mais como servos de Deo.

17 Honora totos. Ama le fratres. Time Deo. Da honor al reges. 

18 Vos servos subjecta vos con timor a vostre seniores; non solmente a illes 
   qui es bon e moderate, mais anque a illes qui es difficile.

19 Pois que isto es acceptabile: si alcuno, per motivo de conscientia ante Deo,
   supporta afflictiones e pati injustemente.

20 Pois que gloria es, si vos supporta con patientia le castigation de vostre
   culpas? Mais si vos face le ben, e con patientia vos supporta le suffrentia,
   isto es grate a Deo.

21 Pois que a isto vos esseva appellate: perque anque Christo suffreva pro vos,
   e vos dava un exemplo, a fin que vos seque su passos; 

22 Ille, qui non committeva peccato, e in cuje bucca non esseva trovate alicun 
   dolo;

23 Ille, qui essente maledicite, non malediceva; ille qui quando suffreva, non 
   menaciava, mais se remitteva in le manos de Ille qui judica justemente;

24 Ille, qui ha portate super le ligno nostre peccatos in su corpore, a fin que 
   nos essente morte al peccato, poteva viver pro le justitia, e mediante su 
   vulneres vos esseva sanate.

25 Pois que vos vadeva errante como oves; mais nunc vos tornava al Pastor e  
   Episcopo de vostre animas.

---

1 2 3 4 5

---

Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud Rev