Vendeta de na stria (de Rossi)
Vendeta de na stria
Paul dal Binder l'aea jà l fegn te tobià, demò valch sfrugn l'à abù da far e coscita l se à ntardivà. L volea amò dant l'Aimarìa esser a ciasa e l se à studià per vegnir n ju. L'era n bel dì fers, che se cedaa de sofoar, l'é ruà da n ruf e l'é jit a se n beiver mìngol de aga fresćia. L'era jà per se n jir, l sent chiamar. L'era na burta veia co na capa bruna, disc, che l vegne apede ela a ciacolar mìngol. Ma el ge respon, che no l'à temp e che co na sort de jent desche ela no l vel aer nia da che far. Enirada desche n poie, la sauta sù, la fasc l pugn e la disc:
"Maladet mostro, tu tu pissaras amò a mi!" e sparida la era.
No l'é passà diesc menuc, se snigola dut l ciel, da Lausa n ca vegn dut scur e n trat dò l tarluia e l tona, che l'é n spavent. E dapò l'é vegnù na gran tampesta. Seben che l monech de Mazin l'é sobit sutà a sonar la carmelitana, l'é vegnù massa temp tart. I ciampes e pré i era piegn de bòzole, ma mascimamenter chi de Paul.