Vegne co na coura
Vegne co na coura
Vegne co na cioura,
se saveissa de chi che la fossa.
L' è giapada sun nosta siala
e l' è menada sa Liviné.
La m' é sautada sun fegolé,
la m' é juda via n tablé,
la m' à mangé l fen e dut l mescedé.
M' è pensé: voi pa la mené via Roncat
che la me dà pa n bon pazon de lat.
Via Roncat, ogni past la zapáva nte condla
e la ie stravëva l lat.
Ades la plu bela: son jù a me la tò.
Son rué sa Mulinat,
la no n' ava plu degun lat.
Son rué fora n Retic,
i dijëva che l' é n mestic.
Son rué sa la Banchëte
l' eva zenza tëte.
Son rué sun Col,
per grazia la fajëva azol.
È dit, voi pa me la tò
e jì su dal Benefiziat,
che l à n giat e mei degun lat.
L Benefiziat l no l' à voluda
che l eva tánt nterescé,
l ie mossëva dé da mangé.
Me l' è touta e me n son jù, son rué sun Plaza,
la m' à fat la baraca;
me l' è touta e l' è menada sun Ofize,
i à dit che podon jì duc 2 a mparé giudize.
L eva proprio da mesdì che passáve via Brenta,
la m' é sciampada su da chi Finazzer,
la i à stravé la polenta.
E po la m' é sciampada ndavò su da chële Brue,
a fè de le sue.
Me l' è touta e me n son jù e son rué via Livinadac
e nconte n Talián e l disc: "Ciò, ciò,
chësta l' é la cioura de San del Lò".
È dit: Voi pa jì a cherì sti Sagn,
che son pa stuf de paié dagn.
Ah! a forza de cherì v' è mpo ciapé.
L è n pez che sta cioura la va ntourn a bonderé
e a mëte jent a mormoré.
"Te la consegne chilò n presenza de duta sta jent
perché no te creie che vade ntourn con tradiment."
- No, no berba, chësta cioura no n' é pa mia,
a me n mpazé nte na cioura,
me njegne demè na straciaria -
"Si, si, la cioura l' é tua. Ciala, che t' è pa ben vedù
via dovò majon a fè l pazon".
- La cioura l' é bele melusada, ma me la tignarè
mefo; ma mossei me dé la stala -
"Per la stala chichemei te fesc na ria lada".