Uyupacha kurakakunap Huamanga obispopaq qillqan

by Don Pedro Casina Cari, don Juan Ynga Quespi Topa

Don Pedro Casina Cari, don Juan Quespi Topa, prinçipalkuna, mandones, alcaldes y regidores.

Tukuy llaqta runa agrauiawasqankuta don Pedro de Arango y Sotomayor mana allin informeta qurqa Señoríaman, "kay Uyu Pacha estançia Cauana dotrinapmi" nispa. Kay tukuy rimasqan manam chiqachu. Liçençiado don Martín de Larteaga cura propietario karqa, Cozco Obispado kaptinraq. Paymi capillata Uyu Pacha pampapi rurachirqa, misata rurarqa chay capillapi, Cozco obispomanta liçençiata mañaspa. Chay estançiapi ancha daños kaptinmi, astakumurqa. Kay Sanoraya estançiaman abueloykuna chaymanta yawkurqa. Curay liçençiado Jerónimo Rodríguez y Jacinto Fernández Coronado y don Juan de Zespes, kay chika curap tiemponpi, manam ima pleytopas karqachu. Curay bachiller Jaçinto de Palaçios yawkusqanmanta, don Pedro de Arango y Sotomayor, curayta chiqnispa, llulla simiwan Señoríaman, "Cauana dotrinap allpanmi, chaypi yachaq runakuna Cauanaman richun" nispa, mañarqa Señoríasmanta. Guacañaman ancha karum. Manam misata chaypi kaq runa uyarinchu, karu kaptin. Cauanaman hichpam." nispa willarqa Señoríaman. Chaymi "Señoría, chiqach hichpallapi" nirqa.

Kunan rikuy, yaya, juezniymi kanki: Cauanaman kimsa topo largom y huk hatun mayu chimpana. Kay llaqtaman chay estançiamanta huk tupullam, manataq ima mayupas kayman hamuspa chimpana kanchu. Chaymi kunan llapa comunpi mañayki y rimayku: manam Cauana dotrinaman riymanchu. Kay llaqtapim curay dotrinawanqa. Señoría mandasqanmanta, ñam iskay runa wañun mana confesasqa y kunanpas huk runa wañunayachkantaqmi. Curayta Señoría mandarqa "ama chay estançiapi kaq runakunawan metekuychu" nispa. Chayraykum mana confesaq rinchu. Kay tukuy mañasqaykuna chiqanmi, manam llullamantachu rimani y jurayku kay Santa Cruzpa señalninpi, manam maliçiawanchu justiçiata alcansanayraykum.

Don Pedro Casiña Cari, don Joan Ynga Quespi Topa.