Una gita sa mont de net
Una gita sa mont de net
Sa mont son jit na sera
a troèr duc chi che l'era
ma sentì po coche é fat
a jir a scur come l giat.
Dò che é beù
n litro e vèlch de più,
con te man n bachet,
son partì con n cruscet.
L'era jà bon scur
e ogne tant dajee te n mur,
e intant che badèe a mie pas
per no inciampèr te n sas,
dae te na segnora
che parea na bora,
e ge dae na mostazèda
che la volea parlèr te chela.
La me vardèa con doi eies
desche prest doi cheiles;
ge dae amò n buton
e la é sparida te n buron.
E ben, me n vaghe intant
con più paura che dant,
e canche son stat n toch in su
stencià me sentìe
e me sente jù sora n ciuchet
e magne dut l mie cruscet.
Din don dorolan ta!
Chi sarà mai che vegnarà!
Ma da la puza é jà sentù
una che la brama portèa jù.
La jìa desche na sia
la fajea n'aria n tel passèr
che cherdee la volessa besèr.
N colet da pitor,
n gramièl da murador,
n pé de stivalins
de goma e bie fins.
I pìroi scassèa,
la cedeneles sclindernèa,
la viesta fina e impiturèda,
e de bela mènies incolèdes.
Ora te vèlch pec la se impegnèa
e dapò la brama se sdravèa,
ora te vèlch sas la fajea fech.
Con doi straoutes
la é rueda jun chela outes,
e ge vaghe amò mìngol,
e eco Pecol.
Te na ciasaa son jit indèna
che piena la era de tena;
doi o trei pèstres i beea purons,
e fajea n auter i fregolons.
Nia, me n vaghe da chela
e son jit te na più bela.
Una forin barcon cighèa
e l'autra daìte se spieièa.
La vera pèstres sa mont
la sera les fesc pecont,
e no les sparagna l lat di etres
per n fèr vegnir amò de etres.
Pon pon, da n sas sun cuert,
ma l'era jà massa tèrt;
e dapò amò un più gross, pun
e se destuda la lum.
La vaces bugolèa,
la vedeles musolèa,
l giat se la filèa
te let tra l piumin
e i lenzei de lin.
A sentir chi versc l giat aur i eies
e dreza la ureies,
e con n tremendo miao,
che parea chel del babao,
l'à fat i morc sparir
e i spiric se n jir.
Les me à fat jir a dormir
per eles poder se n jir.
I saùches se la ciantèa
la sorices se rincorea,
zacan m'é ndromenzà.
Sot tel fegn, m'é descedà
che soreie l'era jà,
e in su son forenà.
Soraperra