Tatar barmı dep sorağanlarğa
Tatar barmı dep kim soray? Men barman.
Atın, sanın bek tanığan caş tatarman.
Türkten özge, tuvğanım yoq dünyada.
Türkniñ özi, öz qardaşı Çoñğarman.
Millet atım türk bolsa da, tarihte
Şanlı atım tatar, şay dep yazarman.
Öz teregin begenmegen soysuzlarğa
Gür davuşman: Kerekmiysiz dep aytarman.
Kelgen keçken hanlıqlarnı, barlıqlarnı
Yoqtır, degen qansızlarğa cav bolarman.
Sav bol, aruv millet! Bugün yuqlasañ da,
Köz yaşımman betiñ sıypap men yantarman.
Talq bolsaq da, halq qatında şüretiñ bar,
Kün körersiñ sen de halqday itibarman.
Men körmesem savlığımda bunday künler,
Mezarımda: Tatar qayday? dep sorarman.
Tatar qayday, dep sorarman mezarımdan.
Alalmasam yahşı cevap, ah ... Cılarman.
|
This work is in the public domain in countries where the copyright term is the author's life plus 70 years or less. See Copyright.
|