Татар бармы деп сорагъанларгъа
Jump to navigation
Jump to search
| Татар бармы деп сорагъанларгъа by |
| Latin script: Tatar barmı dep sorağanlarğa |
Татар бармы деп ким сорай? Мен барман.
Атын, санын бек таныгъан джаш татарман.
Тюрктен озьге, тувгъаным ёкъ дюньяда.
Тюркнинъ ози, озь къардашы Чонъгъарман.
Миллет атым тюрк болса да, тарихте
Шанлы атым татар, шай деп язарман.
Озь терегин бегенмеген сойсузларгъа
Гурь давушман: Керекмийсиз деп айтарман.
Кельген кечкен ханлыкъларны, барлыкъларны
Ёкътыр, деген къансызларгъа джав боларман.
Сав бол, арув миллет! Бугунь юкъласанъ да,
Козь яшымман бетинъ сыйпап мен янтарман.
Талкъ болсакъ да, халкъ къатында шуретинъ бар,
Кунь корерсинъ сен де халкъдай итибарман.
Мен корьмесем савлыгъымда бундай куньлер,
Мезарымда: Татар къайдай? деп сорарман.
Татар къайдай, деп сорарман мезарымдан.
Алалмасам яхшы джевап, ах ... Джыларман.
|
This work is in the public domain in countries where the copyright term is the author's life plus 70 years or less. See Copyright.
|