Talk:Séng-gĭng/Cháung-sié Gé/4

创世记·第四章 该隐，亚伯。该隐其囝孙。亚当生绁，绁生以挪士。 者侬共伊老小夏娃同室。夏娃就带身，生该隐讲：「耶和华保护我，我就得喇唐晡囝。」仅生伊弟亚伯。亚伯眏羊1，该隐做塍。有蜀日，该隐掏涂产献耶和华。亚伯揢头胎其羊，连者羊油掏来献。耶和华眷顾2亚伯，连伊所献其祭。哪该隐连伊所献其祭，上帝都伓眷顾。该隐就变面，大使性3。耶和华共该隐讲：「汝怎其变面、使性呢？若使4汝行善，挪乇5卖见6受纳呗？汝哪行恶，罪孽就伏著门前。罪孽的的想慕汝，哪汝会压制伊。7」 以后该隐共伊弟落塍中其时候，该隐就起来拍伊弟亚伯，刣8伊。耶和华问该隐讲：「汝弟亚伯著底所？」该隐应讲：「我卖晓的。挪乇是我看管我弟呗？」耶和华讲：「汝有做什乇？汝弟其血，有声音由地嚟求我。地开喙由汝手嚟接汝弟其血，故此汝的的受咒，离者位处。汝耕田时候，地伓替汝出土产等候。汝的的流荡落地上。」该隐共耶和华讲：「我受罪只重，我卖当的起。汝落只蜀日逐我离者地，伓容我再见汝面。我的的流荡落地上。凡侬遇著我，的的将我刣死。」耶和华就共该隐讲：「底侬刣该隐，者侬的的受罚七倍。」耶和华就揢记号赐乞该隐，免的侬蜀遇著就刣伊。该隐就离耶和华面前，去埃田东边挪得其地方住。 该隐共伊老小同室，伊老小就带身，生以诺。该隐起蜀座城，凴伊囝其名，叫罗以诺。以诺生以拉，以拉生米户雅利，米户雅利生玛土撒利，玛土撒利生拉麦。拉麦讨两只老小，蜀只名亚大，蜀只名洗拉。亚大生雅八，就是住帐篷养头牲许侬其祖宗。伊弟名犹八，就是弹琴吹箫许侬其祖宗。洗拉生土八该隐，就是铜鉄匠其祖师。土八该隐其妹名拿玛。拉麦共伊两只老小讲： 「亚大洗拉著听我声音； 拉麦其老小听我其话。 侬伤我，我有刣伊， 后生其侬害我，我有刣伊。9 侬若使刣该隐会受罚七倍， 哪刣拉麦的的受罚七十七倍。」 亚当仅共伊老小同室。伊老小生囝名伊绁，讲：「前日该隐刣亚伯，仱上帝仅赐我只喇囝替亚伯。」绁亦生囝，名伊以挪士。遘者时候，侬乍起手祷告耶和华其名。