Talk:Séng-gĭng/Cháung-sié Gé/3
Add topic创世记·第三章 亚当、夏娃犯罪。 耶和华上帝所造地嚟各种其兽，惟独蛇第一狡怪。蛇共者诸娘侬讲：园嚟许侈树其果籽，上帝挪乇1共汝讲，伓通食麽？」诸娘侬应蛇讲：「园底只侈树其果籽我都会食的，惟独园中有蜀蔸，伊其果籽上帝命讲：『伓通食，亦伓通摸，惊汝会死。』」蛇共诸娘侬讲： 「汝未的的死。上帝晓的汝食者果籽许蜀日，汝目睭会明，会辨别善恶，共上帝蜀样。」诸娘侬见者树其果籽仅好食仅好看，仅会乞侬思慕，亦加伊智慧，就摘者树其果籽食。仅掏乞伊唐晡，伊唐晡亦食。两个侬目睭就明，见觉是赤身露体，就揢无花果其箬2褡蜀堆做裙。 遘日斜，凉风起，耶和华上帝落园底嚟行。亚当共诸娘侬听见伊声音，就去屈3树缝4嚟避上帝其面。耶和华上帝就叫者侬，共伊讲：「汝著底所？」伊应讲：「我著园底，听见汝声音。因我是露体，我就惊，走5去屈。」上帝讲：「底侬共汝讲，汝是露体呢？我所命汝，伓通食许树其果籽，汝有食麽？」者侬讲：「汝揢者诸娘侬赐我，配合我，伊掏者树其果籽乞我，我就食。」耶和华上帝就问诸娘侬讲：「汝怎其縂款做呢？」伊应讲：「是者蛇诱惑我，我乍食。」 耶和华上帝共蛇讲：
「汝既然做者代， 汝比许侈六畜、百兽，的的受咒故重。 汝著使腹佬6行路，蜀世食塭尘7。 我卜使汝共诸娘侬结仇， 汝其后裔共伊其后裔亦縂款。 伊后裔卜拍伤汝其头， 汝卜拍伤伊其骹后蹬8。」
仅共诸娘侬：
「我的的使汝带身9尽苦， 添养10吃亏11。 汝会想慕汝唐晡， 唐晡会管的汝。」
仅共亚当讲：
「因汝有听汝老小其话， 食我所命汝莫食其果籽， 地因汝亦受咒。 汝的的蜀世侬12劳苦，食者地嚟出产其乇。 者地卜生刺草尽侈， 汝所食其就是田嚟其菜。 的著汗流满面，乍会得者所食其乇， 等遘汝归著土嚟， 因汝是由涂嚟造出来。 汝本来是尘土，遘死的的转尘土去。」
者侬名伊老小夏娃，因伊是一切生民其娘奶13。耶和华上帝就替亚当连伊老小做喇配衣裳乞伊颂14。 耶和华上帝讲：「者侬会辨别善恶，像我侪蜀样。仱免得伊伸手，仅摘生命树其果籽掏来食，就会永生。」故此耶和华上帝使伊出埃田园，耕作伊自家所出其涂，逐者侬出去。仅落埃田园东边设基路冰，共火焰其剑，随处转动，把守生命树其路。
Start a discussion about Séng-gĭng/Cháung-sié Gé/3
Talk pages are where people discuss how to make content on Wikisource the best that it can be. You can use this page to start a discussion with others about how to improve Séng-gĭng/Cháung-sié Gé/3.
