Se disc de n berba de Fopa

From Wikisource
Jump to navigation Jump to search
Se disc de n berba de Fopa
by anonim
grafia moderna

Se disc de n berba de Fopa.

Se disc de n berba de Fopa che l volëva savei n frëgo de strionëc e che l abe liet na outa nte ceze liber da strionëc come che se dëssa fè a fè vegnì l diaol. Ence dël l eva curious de vedei sta roba e coscì l se njegna dut chël che l douráva, l và su la vara del pleván sot a La Plié, l fesc na roda con sue ierbe e con suoi ciof che l s'ava tout con dël; l speta nlo che l vegne mesanot. Cánche l'ora da La Plié bat mesanot, l sent n rumour del orco sun chël bosch sot a chël plán ulache l eva dël. L se tol debota la vëta de paternostri fora de fonda, e ite bel debota nta mesa sta roda de ciof. Chi veighelo a vegnì? L eva propio l diaol, burt come n demonio, che jiva per mez a dël e a duta maniera l lo volëva trè fora de sta roda; ma percieche la roda l'eva trop grana, no l é mei sté bon de l arjonje per l podei trè fora. L diaol s'à ben prové duta la not, ma cánche i'à dé l prum bot co la ciampana da l'Aimaria, l l à mossù delongo tò ca, l lasce nlo e se n jì co nen brao tof. A chëst auter ie degorëva ju le gote ben grosse e freide da la poura, e daspò no ie ence no plu vegnù ntel ce de fè ncora na outa na tela.